“Molonai 8: ‘ʻOku Moʻui ʻa e Fānau Īkí ʻia Kalaisi,’” Tohi ʻa Molomoná – Tohi Lēsoni ʻa e Faiakó (2024)
“Molonai 8,” Tohi ʻa Molomoná – Tohi Lēsoni ʻa e Faiakó
Molonai 8
“ʻOku Moʻui ʻa e Fānau Īkí ʻia Kalaisi”
ʻI he ngaahi tohi ʻa e palōfita ko Molonaí, naʻá ne vahevahe ha tohi naʻe fai kiate ia ʻe heʻene tamai ko Molomoná, fekauʻaki mo e papitaiso ʻo e fānau īkí. Naʻe tupu e ngaahi tohi ʻa Molomona fekauʻaki mo e kaveingá mei ha fakahā naʻá ne maʻu meia Sīsū Kalaisi. ʻOku fakahaaʻi ʻe he fakahaá ʻa e mālohi ʻo e Fakalelei ʻa e Fakamoʻuí pea mo ʻene tokoni ki he fānau īkí. ʻOku fakataumuʻa ʻa e lēsoni ko ʻení ke tokoni ke mahino lelei ange kiate koe ʻa e ʻuhinga ʻoku ʻikai fiemaʻu ai ke papitaiso ʻa e fānau īkí pea mo e meʻa ʻokú ne akoʻi mai kiate kitautolu fekauʻaki mo e Tamai Hēvaní mo Sīsū Kalaisí.
ʻOange ki he kau akó ha ngaahi faingamālie ke aleaʻi ʻa e ngaahi moʻoni ʻo e ongoongoleleí. Tuku ha taimi ki he kau akó ke nau akoako talanoa fekauʻaki mo e meʻa ʻoku nau ako fekauʻaki mo e Fakamoʻuí mo ʻEne ongoongoleleí. ʻE lava ke tokoni ʻeni ki he kau akó ke nau fakakaukauloto mo manatuʻi ʻa e ngaahi moʻoni ko ʻení pea fakamatalaʻi mahino kinautolu. ʻE lava foki ke fakatupulaki ʻe he founga ko ʻení ʻa e loto-falala ʻa e kau akó te nau lava ʻo vahevahe ʻa e ngaahi moʻoní ʻi ha ngaahi tūkunga kehe.
Teuteu ʻa e tokotaha akó: Te ke lava ʻo vahevahe ʻa e talanoa mei he kamataʻanga ʻo e lēsoní pe ko ha talanoa faitatau mo ia pea kole ki he kau akó ke fakakaukau ki he founga ʻe lava ke nau tali ai ki he tūkungá.
Ngaahi ʻEkitivitī Ako ʻOku Ala Fakahokó
Ko e hā haʻo tali?
Fakakaukau ke huluʻi ʻa e foʻi vitiō ko ʻení pe vahevahe ʻa e talanoá ʻi he lea pē ʻaʻau.
Lau ʻa e talanoa ko ʻeni naʻe vahevahe ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, pe mamata ʻi he “Pea ʻe Tataki ʻa Kinautolu ʻe ha Tamasiʻi Siʻi” mei he taimi 4:42 ki he 5:59, ʻoku maʻu ʻi he ChurchofJesusChrist.org. Fakakaukauloto ko e taha koe ʻo e ongo faifekau naʻe ʻi he tūkunga ko ʻení.
Ne ngāue ha ongo faifekau … ʻi he ʻotu moʻunga ʻi he fakatonga ʻo e ʻIunaiteti Siteití. Naʻá na sio hifo ʻi ha ʻaho ʻe taha mei he moʻungá ki ha kakai ʻoku fakatahataha hake ki ha loto ʻataʻatā. Naʻe ʻikai ke faʻa ʻi ai ha kakai ke na malanga ki ai, ko ia naʻá na hifo leva ki he loto ʻataʻataá.
Ne teu ke fai e meʻafakaʻeiki ʻo ha kiʻi tamasiʻi ne melemo. Ne ʻosi kole ʻe he ongomātuʻá e faifekaú ke “malangaʻi” e meʻafakaʻeiki hona fohá. Ne tuʻu pē e ongo faifekaú mei mui kae hanga atu ʻa e faifekaú ki he tamaí mo e faʻeé ʻo kamata ʻene malangá. Kapau ne ʻamanaki e ongomātuʻá ke maʻu ha fakafiemālie mei he faifekaú, ne hala ʻena maʻú.
Naʻá ne tafuluʻi kakaha kinaua ko e ʻikai ke papitaiso ʻa e kiʻi tamasiʻí. Ne lahi ʻena femoʻuekiná ʻo fakatoloi ai e papí, ka kuo fuʻu tōmui. Naʻá ne tala hangatonu ange kuo ʻi heli ʻena kiʻi tamasiʻí. Ko hona foʻui pē. ʻE tukuakiʻi kinaua ʻi he mamahi taʻe ngata [ʻena kiʻi tamasiʻí].
Hili ʻa e malangá pea tāpuni e faʻitoká, ne aʻu atu e ongo ʻeletaá ki he ongomātuʻa loto-mamahí. Naʻá na talaange ki he faʻeé, “Ko ha ongo tamaioʻeiki kimaua ʻa e ʻEikí, pea ʻokú ma omi mo ha pōpoaki maʻamoua.” (Boyd K. Packer, “Pea ʻe Tataki ʻA Kinautolu ʻe he Tamasiʻi Siʻi,” Liahona, Mē 2012, 7)
Fakafuofuaʻi hoʻo tali ki he fehuʻi ko ʻení ʻi ha meʻafua 1 ki he 4, ko e (1) ʻikai maʻu ha loto-falala, (2) kiʻi loto-falala, (3) loto-falala, mo e (4) loto-falala ʻaupito.
-
Te ke ongoʻi loto-falala fēfē nai ʻi hono akoʻi mo fakafiemālieʻi ʻa e ongomātuʻa loto-mamahi ko ʻení mo tokoniʻi kinaua ke na ongoʻi ʻa e ʻofa ʻa e ʻEikí?
ʻE maʻu ʻe he kau akó ha faingamālie ʻamui ange ʻi he lēsoní ke vahevahe ʻenau meʻa ʻe lava ke fai ʻi he tūkungá.
ʻI hoʻo ako ʻa e Molonai 8, fakakaukau ki he founga te ke lava ai ʻo tokoni ke mahino lelei ange ki he mātuʻa ko ʻení ʻa e Fakalelei ʻa Sīsū Kalaisí ʻi heʻene fekauʻaki mo e fānau īkí. Fakakaukau foki ki he founga ʻe ala tokoniʻi ai koe ʻe he ngaahi moʻoni mei he Molonai 8 ke mahino lelei ange ʻa e lelei mo e ʻaloʻofa ʻa e Tamai Hēvaní mo Sīsū Kalaisí.
ʻOku fakamoʻui ʻa e fānau īkí
ʻI hono toki ui ʻo Molonai ki he ngāue ʻa Sīsū Kalaisí, naʻá ne maʻu ha tohi mei heʻene tamai ko Molomoná. Naʻe tohi ʻa Molomona ki hono “foha ʻofeiná” (Molonai 8:2) naʻá ne “manatuʻi maʻu ai pē [ia] ʻi [heʻene] ngaahi lotú” (Molonai 8:3). Naʻá ne faleʻi ʻa Molonai fekauʻaki mo e ngaahi fakakikihi naʻe hoko ʻi he lotolotonga ʻo e kau Nīfaí ʻo kau ki hono papitaiso ʻo e fānau īkí. Kimui ange ʻi he moʻui ʻa Molonaí, naʻá ne tānaki ʻa e tohi ko ʻení ki heʻene lekooti ʻi he ʻū lauʻi peleti koulá.
Lau ʻa e Molonai 8:4–8, ʻo kumi e tali ʻa Molomona ʻi heʻene fanongo ki he fakafekikí.
Fakaafeʻi ʻa e kau akó ke vahevahe ha ngaahi fakakaukau pē naʻa nau maʻu mei he ngaahi veesi ko ʻení.
Fakakaukau ke tā ʻa e saati ko ʻení ʻi he palakipoé pea fokotuʻutuʻu e tali ʻa e kau akó ʻi he kōlomu totonú. Kole ki he kau akó ke vahevahe ʻa e ʻuhinga ʻe lava ke mahuʻinga pe mahuʻingamālie ai ʻenau ngaahi fakakaukaú.
Hiki ha tatau ʻo e saati ko ʻení ki hoʻo tohinoa akó, pea lekooti ʻa e meʻa ʻokú ke ako mei he ngaahi veesi ko ʻení. Te ke tānaki ki he saati ko ʻení ʻamui ange ʻi he lēsoní.
|
ʻUhinga ʻoku ʻikai fiemaʻu ai ke papitaiso ʻa e fānau īkí |
Ko e meʻa ʻoku tau ako fekauʻaki mo e Tamai Hēvaní mo Sīsū Kalaisí |
|---|---|
Ko e moʻoni ʻe taha te tau lava ʻo ako mei he ngaahi veesi ko ʻení ʻoku fakamoʻui ʻa e fānau īkí ʻo fakafou ʻi he Fakalelei ʻa Sīsū Kalaisí.
Ko ha meʻangāue ʻaonga ʻa e futinoutí ki hono ako ʻo e folofolá. Fakatokangaʻi ʻa e futinouti b ʻi he tafaʻaki ʻo e foʻi lea “angahala” ʻi he veesi 8.
Lau ha taha ʻo e ngaahi veesi ko ʻení mei he futinoutí, ʻo kumi ʻa e ʻuhinga ʻoku ʻikai ai ha angahala ʻa e fānau īkí:
-
Tokāteline mo e Ngaahi Fuakava 29:46
Mahalo te ke fiemaʻu ke lau foki ʻe he kau akó ʻa e veesi 47, ʻa ia ʻoku folofola ai ʻa e ʻEikí he ʻikai lava ke faiangahala ʻa e fānaú kae ʻoua kuo lava ke ʻekea meiate kinautolu ʻenau ngaahi ngāué. Kuo folofola ʻa e ʻEikí ʻoku toki kamata ke ʻekea mei he fānaú ʻa ʻenau ngaahi ngāué ʻi Hono ʻaó ʻi honau taʻu valú. ʻOku maʻu ʻa e ngaahi fakahā ki he foʻi moʻoni ko ʻení ʻi he Liliu ʻe Siosefa Sāmita ʻo e Sēnesi 17:11 pea ʻi he Tokāteline mo e Ngaahi Fuakava 68:25–27. Fakakaukau ke vahevahe ha niʻihi pe kotoa ʻo e meʻá ni mo e kau akó kapau ʻoku ʻi ai haʻanau ngaahi fehuʻi.
-
Ko e ʻuhinga ki he hā ʻa e Molonai 8:8 ʻi heʻene pehē “ʻoku ʻikai ha angahala ʻa e fānau īkí”?
ʻOku ʻikai fiemaʻu ke papitaiso ʻa e fānau īkí
Fakakaukau ke vahevahe ʻa e kau akó ki ha ngaahi hoa pea fakaafeʻi ʻa e hoa takitaha ke lau ha taha ʻo e ngaahi veesi ko ʻení.
Naʻe ʻomi ʻe Molomona ha toe ngaahi fakakaukau ʻe tokoni ke tau ako lahi ange ai ki he Tamai Hēvaní mo Sīsū Kalaisi mei he tokāteline ko ʻeni fekauʻaki mo e fānaú. Lau ʻa e ngaahi veesi ko ʻení, ʻo kumi ha ngaahi poini te ke lava ʻo tānaki ki he ongo tafaʻaki fakatouʻosi ʻo hoʻo sātí.
Fakaafeʻi ʻa e kau akó ke tānaki atu ki he sātí. Kapau ʻe ʻaonga, fakakaukau ke fehuʻi ange pe ko e hā ha ngaahi fakakaukau hala ʻoku maʻu ʻe he kakaí ʻoku tonu ʻe he ngaahi veesi ko ʻení.
Fakaʻaongaʻi ha kiʻi taimi ke ke vakaiʻi ai ʻa e ngaahi moʻoni kuó ke hiki ʻi he ʻotu hono ua ʻo e sātí. Fakalaulauloto ki he fehuʻi ko ʻení:
-
ʻE tokoniʻi fēfē kitautolu ʻi heʻetau moʻuí ʻi he ʻahó ni ʻe he mahino ki he ngaahi moʻoni ko ʻeni fekauʻaki mo e Tamai Hēvaní mo Sīsū Kalaisí?
Fakaafeʻi ha kau ako ke tali ʻa e fehuʻi ʻi ʻolungá. Kapau ʻe ʻaonga, fakakaukau ke kole ki he kau akó ke vahevahe ha ngaahi tūkunga te nau ala fehangahangai mo ia ʻa ia ʻe ala tokoni ai hono ʻiloʻi ʻo e ngaahi moʻoni ko ʻení. ʻE ala kau heni ʻa e taimi ʻoku ʻahiʻahiʻi ai kinautolu pe ko ha niʻihi kehe ke nau tui ʻoku fakaʻatā ʻe he ʻOtuá ha kakai pē ʻe niʻihi ke fakamoʻuí. Muimui ki he ngaahi ueʻi ʻa e Laumālié, pea kumi ha ngaahi faingamālie ke tokoni ki he kau akó ke nau ongoʻi e ʻofa ʻa e ʻEikí.
Fakakaukau ki he talanoa ʻo e ongo faifekau mei he kamataʻanga ʻo e lēsoní.
-
Makatuʻunga ʻi he meʻa kuó ke ako ʻi he ʻaho ní, ko e hā te ke talaange ki he ongomātuʻa ʻa e kiʻi leka ko ʻení ke tokoniʻi kinaua ke na maʻu ʻa e melinó ʻia Sīsū Kalaisi?
Fakaafeʻi ʻa e kau akó ke nau hiki ha tali ki he fehuʻi ko ʻení ʻo fakaʻaongaʻi ha veesi ʻe ua pe lahi ange ne nau ako ʻi he lēsoni ko ʻení. Ko ha fili ʻe taha ke akoako fakahaaʻi ai ʻe he kau akó ʻenau talí ko hano fakafaivaʻi kae ʻikai ko hano hiki hifo pē. Fakapapauʻi ʻoku mahino ki he kau akó ko e taumuʻa ʻo e founga ko ʻení ke tokoni ki he kakaí ke nau ongoʻi ʻa e ʻamanaki leleí mo e melinó ʻo fakafou ʻi he Fakalelei ʻa Sīsū Kalaisí; kae ʻikai ko hono fakaangaʻi ʻa e ngaahi tui fakalotu ʻa e niʻihi kehé.