Molonai 7–9

Vakai Fakalūkufuá

Naʻe lekooti ʻe Molonai, ʻa ia naʻe hē toko taha holo ʻi ha ngaahi taʻu lahi hili hono fakaʻauha hono kakaí, ʻa e ngaahi lea ʻa ʻene tamaí fekauʻaki mo e ʻamanaki lelei te tau lava ʻo maʻu ʻia Kalaisi ki ha ngaahi meʻa maʻongoʻonga ange ʻe hoko mai. Naʻá ne poupouʻi kitautolu ke tau fakaʻaongaʻi ʻa e Maama ʻa Kalaisí ke ʻiloʻi ʻa e totonú mei he halá. Naʻá ne akoʻi ʻa e founga ke “puke maʻu ʻa e meʻa kotoa pē ʻoku leleí” (Molonai 7:20, 25), tautautefito ki he manavaʻofá, “ʻa e ʻofa haohaoa ʻa Kalaisí” (Molonai 7:47). Naʻá ne vahevahe foki ha tohi mei heʻene tamaí ʻokú ne akoʻi ʻoku fakahaofi ʻa e fānau īkí ʻo fakafou ʻi he Fakalelei ʻa Kalaisí pea ʻoku ʻikai fiemaʻu ke papitaiso kinautolu.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Molonai 7:1–19

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau falala kia Sīsū Kalaisi ke fakamāuʻi ʻa e leleí mei he koví.

• Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ʻa e founga ʻoku tākiekina ai ʻa e ngaahi fili ʻoku nau fakahokó ʻe heʻenau tui kia Sīsū Kalaisí.

• Laʻiʻata ke fakaʻaliʻalí: Ko e laʻiʻata ʻoku foʻi tapafā ʻe ua ʻoku hangē ʻoku lanu kulei kehekehé

• Naunaú: Ko ha kasa ki he lēsoni fakataumuʻa ʻoku fokotuʻu atú

• Fokotuʻu ki hono akoʻi ʻi he konifelenisi vitioó: Ke fakahoko ʻa e lēsoni fakataumuʻá ʻaki ʻa e kasá, fakapapauʻi ʻoku fakapoʻuli ʻa e feituʻu ʻokú ke ʻi aí. Fakakaukau ke tāpuni ʻa e puipuí, ʻunu ki ha loki ʻoku ʻikai lahi ai ha ngaahi matapā sioʻata, pe pūlou ʻi ha kafu fakataha mo hoʻo komipiutá. (Mahalo te ke fie akoako fakahoko ʻeni ʻo fakaʻaongaʻi hoʻo meʻafaitā fakakomipiutá kimuʻa pea kamata ʻa e kalasí ke fakapapauʻi ʻoku fakapoʻuli ʻa e feituʻú.) Fakaafeʻi ʻa e kau akó ke lau ha potufolofola pe kaati ʻokú ke puke hake ki he meʻafaitaá lolotonga ʻene kei fakapoʻulí. Hili iá pea huluʻi ha kasa ki he laʻikātí pe potufolofolá pea kole ki he kau akó ke nau toe feinga pē. ʻE lelei foki ke tomuʻa fakaafeʻi ha tokotaha ako ke ne fakahoko ʻa e lēsoni fakataumuʻa ko ʻení ki he kalasí.

Molonai 7:20–43

Taumuʻa ʻo e lēsoní: ʻE lava ke tokoni ʻa e lēsoni ko ʻení ke maʻu ʻe he kau akó ha ʻamanaki lelei ʻoku lahi angé ʻo fakafou ʻia Sīsū Kalaisi.

• Teuteu ʻa e tokotaha akó: Fakakaukau ke fakaafeʻi ʻa e kau akó ke lau ʻa e 1 Pita 3:15 pea fakalaulauloto ki he founga ʻoku ʻoange ai ʻe Sīsū Kalaisi ha ʻamanaki lelei kiate kinautolú.

• Naunaú: Ko ha tēpile ʻoku ʻi ai ha ngaahi meʻa kehekehe, kau ai ha fanga kiʻi meʻakai maʻamaʻa ʻe lava ke tala ʻe he kau akó pe ʻoku fakatupu moʻui lelei pe ʻikai

• Ngaahi Vitioó: “ʻOku Fakamoʻoni ʻa ʻAlamā ki Hono Foha ko Hilamaní” (7:09; mamata mei he taimi 1:30 ki he 2:32); “Finding Hope through the Resurrection of Christ (Ko Hono Maʻu ʻo e ʻAmanaki Leleí ʻi he Toetuʻu ʻa Kalaisí)” (4:41); “Ko e ʻEiki Faifakamoʻuí” (13:00; mamata mei he taimi 8:49 ki he 11:53)

• Laʻipepa Tufá: “Ko Hono Maʻu ʻo e ʻAmanaki Leleí ʻia Sīsū Kalaisi”

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi hoʻo meʻafaitaá ke fakaʻaliʻali ʻa e tēpile kuo teuteu ki he lēsoni fakataumuʻá pea fehuʻi ki he kau akó pe ko e hā ha ngaahi meʻa te nau pehē ʻoku lelei pea mo ia ʻoku ʻikai leleí.

Molonai 7:44–48

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó mo nau fekumi ki he manavaʻofá ʻi heʻenau moʻuí.

• Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi sīpinga naʻe fakahaaʻi ai ʻe he Fakamoʻuí ʻa e ʻofá, pea pehē ki ha ngaahi sīpinga ʻo e ʻofa faka-Kalaisí ʻi he ʻahó ni.

• Ngaahi Vitioó: “The Coat (Ko e Koté)” (2:07); “Gordon Hinckley: Lessons I Learned as a Boy (Kōtoni Hingikelī: Ngaahi Lēsoni Naʻá Ku Ako Ko ha Tamasiʻí)” (4:04); “ʻOfa Faka-Kalaisí: Ko ha Faʻifaʻitakiʻanga ʻo e Kakai Tuí” (4:50); “ʻOku ʻIkai Fakaʻau ʻo Ngata ʻa e ʻOfá” (19:48; mamata mei he taimi 15:05 ki he 17:22)

• Laʻiʻata ke fakaʻaliʻalí: Ko ha fakatātā ʻo e Fakamoʻuí

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻe he kau akó ʻa e polokalama fetalanoaʻakí ke vahevahe ha ngaahi fehuʻi ʻoku nau maʻu fekauʻaki mo e manavaʻofá. ʻE lava heni ke maʻu ai ʻenau ngaahi fehuʻí ke lau ʻe honau kaungā-akó lolotonga ʻa e konga hoko ʻo e lēsoní. Fakaʻaliʻali leva ʻa e ngaahi ʻekitivitī ʻe lava ke fai ʻe he kau akó ke feinga ke maʻu ha tali ki heʻenau ngaahi fehuʻí.

Fakataukei Fakatokāteliné: Molonai 7:45–48

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteline mo e kupuʻi lea folofola mahuʻinga ki he Molonai 7:45–48, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi tūkunga kuo nau aʻusia pe mātā ʻa ia te nau lava ai ʻo ako ke manavaʻofá

• Meʻa ke fakaʻaliʻalí: Ko ha tā fakatātā ʻo ha foʻi haati ʻi he palakipoé ʻoku tohi takai ai ʻa e fakamoʻoni fakafolofolá mo e ngaahi kupuʻi lea mahuʻingá ʻi ha hokohoko kehekehe

• Fokotuʻu ki hono akoʻi ʻi he konifelenisi vitioó: Ke tokoni ke toe vakaiʻi ʻe hoʻo kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié, fakakaukau ke tuifio ʻa e ngaahi lea ʻi he ngaahi tefitoʻi moʻoni takitaha ʻe tolú. Taipeʻi tahataha ʻa e ngaahi tefitoʻi moʻoni kuo fakahokohoko kehekehé ʻi he polokalama fetalanoaʻakí pea fakaafeʻi ʻa e kau akó ke nau tali ʻaki ʻa e fakalea hokohoko totonú ʻi he vave taha te nau lavá.

Molonai 8

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino lelei ange ki he kau akó ʻa e ʻuhinga ʻoku ʻikai fiemaʻu ai ke papitaiso ʻa e fānau īkí pea mo e meʻa ʻokú ne akoʻi mai kiate kitautolu fekauʻaki mo e Tamai Hēvaní mo Sīsū Kalaisí.

• Teuteu ʻa e tokotaha akó: Te ke lava ʻo vahevahe ʻa e talanoa mei he kamataʻanga ʻo e lēsoní pe ko ha talanoa faitatau mo ia pea kole ki he kau akó ke fakakaukau ki he founga ʻe lava ke nau tali ai ki he tūkungá.

• Vitiō: “Pea ʻe Tataki ʻa Kinautolu ʻe ha Tamasiʻi Siʻi” (16:55; mamata mei he taimi 4:40 ki he 5:59)

• Fokotuʻu ki hono akoʻi ʻi he konifelenisi vitioó: Te ke lava ʻo toe faʻu fakaʻilekitulōnika ʻa e sātí pea vahevahe hoʻo screen mo e kau akó. ʻI heʻenau lipooti ʻa e meʻa ne nau maʻu ʻi heʻenau akó, te ke lava ʻo taipeʻi ʻa e meʻa ne nau maʻú ʻi he kōlomu totonú.