“Molonai 7:44–48: ‘[Ko e] ʻOfa Haohaoa ʻa Kalaisí,’” Tohi ʻa Molomoná – Tohi Lēsoni ʻa e Faiakó (2024)
“Molonai 7:44–48,” Tohi ʻa Molomoná – Tohi Lēsoni ʻa e Faiakó
Molonai 7:44–48
“[Ko e] ʻOfa Haohaoa ʻa Kalaisí”
Fakakaukau ki ha ngaahi taimi naʻá ke ongoʻi ai ʻa e ʻofa faka-Kalaisí. Ko e hā ha liliu kuo hoko ʻi hoʻo moʻuí koeʻuhí ko e ʻofa faka-Kalaisí? Naʻe lekooti ʻe Molonai ʻa e fakaʻosinga ʻo e malanga naʻe fai ʻe heʻene tamai ko Molomoná, ʻi ha falelotu ʻi he ngaahi taʻu kimuʻá. Naʻe akoʻi ʻe Molomona ʻa e founga ke “puke maʻu ʻa e meʻa kotoa pē ʻoku leleí” (Molonai 7:20, 25), tautautefito ki he manavaʻofá, “ʻa e ʻofa haohaoa ʻa Kalaisí” (Molonai 7:47). ʻOku fakataumuʻa ʻa e lēsoni ko ʻení ke tokoniʻi koe ke mahino mo ke fekumi ki he manavaʻofá ʻi hoʻo moʻuí.
Fekumi ki he meʻafoaki ʻo e manavaʻofá. Naʻe akoʻi ʻe Molomona te tau lava ʻo fakaafeʻi kakato ange ʻa e meʻafoaki ʻo e manavaʻofá ʻaki haʻatau lotua fakamātoato ia (vakai, Molonai 7:48). Kole ki he Tamai Hēvaní ke fakafonu ho lotó ʻaki ʻa e manavaʻofa maʻa hoʻo kau akó. ʻE lava ke tokoni hoʻo ngaahi feinga faivelenga ke fakahaaʻi ʻa e manavaʻofá mo e mahinó ke ongoʻi ʻe hoʻo kau akó ʻa e ʻofa haohaoa ʻa e Fakamoʻuí.
Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi sīpinga naʻe fakahaaʻi ai ʻe he Fakamoʻuí ʻa e ʻofá, pea pehē ki ha ngaahi sīpinga ʻo e ʻofa faka-Kalaisí ʻi he ʻahó ni.
Ngaahi ʻEkitivitī Ako ʻOku Ala Fakahokó
ʻOfa faka-Kalaisí
Kapau ʻe lava, fakakaukau ke kamata ʻa e kalasí ʻaki hano fakaʻaliʻali pe lau ha taha ʻo e ngaahi talanoa ko ʻeni ʻo ha taha ʻoku alanima atu ʻi he ʻofa. Fakaafeʻi ʻa e kau akó ke fakalaulauloto ki he liliu ʻe lava ke fai ʻe he ʻofa faka-Kalaisí.
-
Ko e foaki taʻesiokita ʻa ha kiʻi tamasiʻi ki ha kiʻi tamasiʻi ʻe taha ʻoku faingataʻaʻia. Mamataʻi ʻa e “The Coat (Ko e Koté)” (2:07), ʻoku maʻu ʻi he ChurchofJesusChrist.org, pe lau ʻa e talanoá, ʻa ia ko ha talanoa moʻoni mei he kei siʻi ʻa Palesiteni Hiipa J. Kalānité (“The Coat,” Friend, Māʻasi 2012, 16–17).
2:7 -
Naʻe fili ha ongo tamaiki tangata ke na tokoniʻi ha sola, kae ʻikai ke na fakakata ʻaki ia. Mamata ʻi he “Gordon Hinckley: Lessons I Learned as a Boy (Kōtoni Hingikelī: Ngaahi Lēsoni Naʻá Ku Ako ʻi he Kei Siʻí)” (4:04), ʻoku maʻu ʻi he ChurchofJesusChrist.org.
2:3 -
Ko e tokoniʻi ʻe ha kau finemui ʻi he angaʻofa mo e manavaʻofa ha tokotaha ako ʻoku faingataʻaʻia fakaesino. Mamata ʻi he “Charity: An Example of the Believers (ʻOfa Faka-Kalaisí: Ko ha Faʻifaʻitakiʻanga ʻo e Kakai Tuí)” (4:50), ʻoku maʻu ʻi he ChurchofJesusChrist.org.
2:3 -
ʻOkú ke pehē ko e hā ʻe lava ke hoko ai ʻa e ʻofa faka-Kalaisí ko ha ivi tākiekina mālohi ʻi heʻetau moʻuí?
-
Ko hai kuo hoko ko ha sīpinga ʻo e ʻofa faka-Kalaisí ʻi hoʻo moʻuí?
Fakakaukau ke fakaafeʻi ʻa e kau akó ke vakaiʻi fakataautaha kinautolu ʻi he founga ʻoku nau fakatupulaki ai ʻa e manavaʻofá. Ko ha founga ʻeni ʻe taha ʻe lava ke nau fakahoko ai ʻení.
Naʻe akoʻi fakatouʻosi ʻe Molomona mo e ʻAposetolo ko Paulá ʻoku mahuʻinga ki heʻetau fakalakalaká ʻa hono fakatupulaki ʻo e ʻofa faka-Kalaisí (vakai, Molonai 7:44; 1 Kolinitō 13:2). Ke tokoni ke vakaiʻi ʻa e tuʻunga lelei hoʻo fakatupulaki ʻa e ʻofa faka-Kalaisí, fakalaulauloto ki he moʻoni ʻo e ngaahi fakamatala ko ʻení ʻi ha meʻafua 1 ki he 5 (1 = ʻikai ʻaupito ke moʻoni; 5 = moʻoni maʻu pē):
-
ʻOku ou feinga ke tokoni ki he niʻihi kehé, tautautefito ki he taimi ʻoku nau faingataʻaʻia pe loto-foʻi aí.
-
ʻOku ou feinga ke angaʻofa, faʻa kātaki, mo fakamolemoleʻi ʻa e niʻihi kehé, ʻo aʻu ki he taimi ʻoku faingataʻa ai ke feohi lelei mo kinautolú.
-
ʻOku ou tala ki he niʻihi kehé ʻoku ou ʻofa mo tokanga kiate kinautolu ʻi he taimi ʻoku feʻunga ke u fai ai iá.
ʻI hoʻo ako ʻa e Molonai 7, kole ki he ʻEikí ke tokoni atu ke mahino kiate koe mo ke fekumi ki he manavaʻofá.
Malanga ʻa Molomona kau ki he ʻofa faka-Kalaisí
ʻI he ofi ki he fakaʻosinga ʻo e lekooti ʻa Molonaí, naʻá ne fakakau ai ha malanga naʻe fakahoko ʻe heʻene tamai ko Molomoná ki he “kau muimui anga-fakamelino ʻo Kalaisí” (Molonai 7:3). Naʻe akoʻi ʻe Molomona ha ngaahi tefitoʻi moʻoni ʻo e ʻofá, kapau te nau tokanga ki ai, naʻá ne mei lava ke taʻofi hono fakaʻauha ʻo e kau Nīfaí. Naʻe mahuʻinga foki ʻa e ngaahi akonaki ko ʻení kia Molonai, ʻa ia naʻá ne mamata tonu ki hono fakaʻauha fakamamahi ʻo e kau Nīfaí ʻe he kau Leimaná peá ne fononga toko taha holo ai ʻi ha ngaahi taʻu lahi.
Lau ʻa e Molonai 7:47 pea fakaʻilongaʻi ʻa e kupuʻi lea ʻokú ne fakamatalaʻi ʻa e ʻofa naʻe akoʻi ʻe Molomoná.
Fakakaukau ke hiki ʻa e moʻoni ko ʻení ʻi he palakipoé: Ko e manavaʻofá ʻa e ʻofa haohaoa ʻa Kalaisí.
Naʻe fokotuʻu ʻe Sīsū Kalaisi ʻa e sīpinga haohaoa kiate kitautolu ʻo e founga ke ʻofa ai ki he niʻihi kehé. Lau ʻa e Molonai 7:45–48, ʻo kumi ʻa e ngaahi kupuʻi lea ʻokú ne (1) fakamatalaʻi lahi ange ʻa e manavaʻofá, pe founga ke ʻofa ʻo hangē ko e Fakamoʻuí, pea mo (2) fakatupulaki hoʻo loto-holi ke fakatupulaki ʻa e manavaʻofá ʻi hoʻo moʻuí.
Ko e Molonai 7:45–48 ko ha potufolofola fakataukei fakatokāteline ia. Fakakaukau ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
Ke tānaki atu ha ngaahi meʻa kehekehe mo ha ʻuhinga ki he ʻekitivitī ko ʻení, te ke lava ʻo fokotuʻu ha fakatātā ʻo e Fakamoʻuí ʻi he palakipoé. Hiki takatakai ʻi he fakatātaá ʻa e ngaahi kupuʻi lea ʻoku maʻu ʻe he kau akó. Kapau ʻe ʻaonga, tokoni ke mahino ki he kau akó ʻa e fakamatala ko ʻení.
ʻE lava ke tokoni ʻa e ngaahi fakaʻuhinga ko ʻení:
-
“kātaki fuoloa” = kātekina ʻa e ngaahi faingataʻá ʻi he faʻa kātaki
-
“ʻikai meheka” = ʻoku ʻikai loto-kovi ia ki he niʻihi kehé
-
“ʻikai fakafuofuolahi” = loto-fakatōkilalo
-
“ʻoku ʻikai kumi ʻene meʻa ʻaʻaná” = ʻokú ne fakamuʻomuʻa ʻa e ʻOtuá mo e ngaahi fiemaʻu ʻa e niʻihi kehé
-
“ʻikai ʻitangofua” = ʻikai fakaʻitaʻi ngofua
-
“tui ki he meʻa kotoa pē” = tali ʻa e moʻoni kotoa pē
Fakakaukau ke fakaʻilongaʻi mei he kupuʻi lea “ʻoku ʻikai fakaʻau ʻo ngata ʻa e manavaʻofá” ʻi he veesi 46 ki he kupuʻi lea “ʻoku tolonga ia ʻo taʻengata” ʻi he veesi 47. Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku ʻi he moʻuí ʻa e manavasiʻí mo e taʻe-lavameʻá. Taimi ʻe niʻihi ʻoku tōnounou ha ngaahi meʻa. Taimi ʻe niʻihi ʻoku ʻi ai e tōnounou ʻa e kakaí kiate kitautolu, pe ko e tōnounou fakaʻekonōmika, fakapisinisi pe fakapuleʻanga. Ka ʻoku ʻi ai e meʻa ʻe taha ʻi taimi pe ʻitāniti kuo teʻeki te ne ʻai ke siva ʻetau ʻamanakí—ko e ʻofa haohaoa ʻa Kalaisí. (Jeffrey R. Holland, Christ and the New Covenant: The Messianic Message of the Book of Mormon [1997], 337)
-
ʻOkú ke pehē ko e hā he ʻikai teitei ngata ai ʻa e ʻofa haohaoa ʻa Kalaisí ʻiate kitautolú?
-
ʻE tokoniʻi fēfē kitautolu ʻe he ʻofa ʻa e Fakamoʻuí ʻi ha ngaahi founga he ʻikai mo ha toe meʻa te ne lava?
Naʻe akonaki fakaikiiki ʻa Palesiteni Tōmasi S. Monisoni (1927–2018) fekauʻaki mo e manavaʻofá. Kapau ʻe lava, mamata ʻi he “Charity Never Faileth (ʻOku ʻIkai Fakaʻaʻau ʻo Ngata ʻa e ʻOfá),” ʻoku maʻu ʻi he ChurchofJesusChrist.org, mei he taimi 15:05 ki he 17:22. Pe lau ʻa e leá, ʻo kamata mei he “ʻOku ou lau e manavaʻofá” pea fakaʻosi ʻaki ʻa e “ko hono fakafepakiʻi ia ʻo e ongoʻi ke fakakalakalasi e niʻihi kehé” (“ʻOku ʻIkai Fakaʻau ʻo Ngata ʻa e ʻOfá,” Liahona, Nōvema 2010, 124). Kumi ha ngaahi kupuʻi lea kehe naʻe fakaʻaongaʻi ʻe Palesiteni Monisoni ke fakamatalaʻi ʻaki ʻa e ʻofa haohaoa ʻa Kalaisí.
Fakaafeʻi ʻa e kau akó ke vahevahe ʻa e meʻa ne nau fanongo ki ai pe laú pea hiki takai ʻi he fakatātā ʻo e Fakamoʻuí ha toe ngaahi kupuʻi lea pe ngaahi foʻi lea mahuʻinga.
Ko hoʻo ngaahi fehuʻi fekauʻaki mo e manavaʻofá
Ko e hā ha ngaahi fehuʻi ʻokú ke maʻu fekauʻaki mo e manavaʻofá pe founga ke ke maʻu ai ʻa e ʻofa ko ʻení?
Fakakaukau ke hiki e tali ʻa e kau akó ʻi he palakipoé.
Fekumi ki he fakahinohino ʻa e Laumālie Māʻoniʻoní ke ʻilo pe ʻoku totonu ke fakahoko fakafoʻituitui ʻe he kau akó ʻa e ʻekitivitī ko ʻení pe ʻi ha fanga kiʻi kulupu iiki.
Ke tokoni ki hono tali hoʻo ngaahi fehuʻí, fai ʻa e ngaahi meʻá ni:
-
Ako ʻa e ngaahi akonaki ko ʻeni ʻa e Fakamoʻuí fekauʻaki mo e ʻofá pe manavaʻofá: Mātiu 5:43–44; Mātiu 22:37–40; Sione 15:12.
-
Fakakaukau ki ha talanoa ʻi he folofolá ʻo ha taimi naʻe fakatātaaʻi ai ʻe he Fakamoʻuí ʻa e manavaʻofá. Kumi pea lau ʻa e sīpinga naʻá ke fakakaukau ki aí, pe fakaʻaongaʻi ha taha ʻo e ngaahi meʻá ni:
-
Naʻe taumafa fakataha ʻa e Fakamoʻuí mo e kau tānaki tukuhaú mo e kau faiangahalá (vakai, Mātiu 9:10–13). (Ko e tangata tānaki tukuhaú ko ha taha tānaki tukuhau ia maʻá e kakai Lomá, ʻa ia naʻa nau ikunaʻi ʻa ʻIsileli ʻi he taimi ko iá.)
-
Naʻe fakahaofi pea akoʻi ʻe he Fakamoʻuí ʻa e fefine naʻe moʻua ʻi he tonó (vakai, Sione 8:1–11).
-
Naʻe mamahi, fakalelei, pea pekia ʻa e Fakamoʻuí maʻá e faʻahinga kotoa ʻo e tangatá (vakai, Luke 22:41–44; 23:33–34; 1 Nīfai 19:9; Tokāteline mo e Ngaahi Fuakava 19:16–19).
-
Naʻe fakamoʻui mo tāpuakiʻi ʻe he Fakamoʻuí ʻa e kakai ʻo e Ongo ʻAmeliká (vakai, 3 Nīfai 17:5–12, 21–24).
-
-
Fakakaukau ki ha ngaahi aʻusia naʻá ke ongoʻi ai ʻa e ʻofa haohaoa ʻa e Tamai Hēvaní mo Sīsū Kalaisi kiate koe pe ko ha taimi naʻá ke ongoʻi ai ʻa e ʻofa faka-Kalaisí ki ha taha kehe.
Fakaafeʻi ʻa e kau akó ke vahevahe ʻa e meʻa ne nau ako pe manatuʻí pea mo e founga ʻe ala tokoni ai ke tali ʻenau ngaahi fehuʻí.
Founga ke maʻu mo fakahaaʻi ai ʻa e ʻofa faka-Kalaisí
Fakakaukau ke fakaʻilongaʻi ʻa e naʻinaʻi ʻa Molomona ke “lotu ki he Tamaí ʻaki ʻa e ivi kotoa ʻo e lotó, koeʻuhi ke fakafonu ʻa kimoutolu ʻaki ʻa e ʻofá ni” (Molonai 7:48).
-
ʻOkú ke pehē ʻe tokoni fēfē ʻa e lotu ki he Tamai Hēvaní ke fakafonu kitautolu ʻaki ʻa e manavaʻofá?
Mahalo ʻe tokoni ke fakamahino ki he kau akó ko e manavaʻofá ko ha meʻafoaki fakalangi ia ʻoku maʻu mei he Tamai Hēvaní ke tokoniʻi kitautolu ke tau hoko ʻo hangē ange ko Sīsū Kalaisí. Te tau lava ʻo fai hotau lelei tahá ke muimui ʻi he sīpinga ʻa Sīsū Kalaisí, ka ko hono aofangatukú, ʻoku maʻu ʻa e meʻaʻofa ʻo e manavaʻofá mei he Tamai Hēvaní ʻo fakafou ʻi he Fakalelei ʻa Hono ʻAló.
Tokoniʻi ke faʻu ʻe he kau akó ha tūkunga moʻoni ʻe lava ke fakahaaʻi ai ʻe he tali ʻa ha toʻu tupu pe ʻoku nau fonu ʻi he manavaʻofá pe ʻikai. Hili iá pea tuku ke aleaʻi ʻe he kau akó ʻa e ngaahi fehuʻi ko ʻení.
-
Fakatatau ki he meʻa kuó ke ako mei he Molonai 7:45, 47–48 pea mo e sīpinga ʻa e Fakamoʻuí, te ke fakahaaʻi fēfē ʻa e ʻofa faka-Kalaisí ʻi he tūkunga ko ʻení?
-
ʻE tokoniʻi fēfē koe ʻe he lotu fakamātoató ke ke tali ki he tūkunga ko ʻení ʻi he ʻofa?
-
Ko e hā ha ngaahi faingataʻa te ke ala fehangahangai mo ia ʻi hoʻo feinga ke fakaʻaongaʻi ʻa e meʻa kuó ke akó? Te ke lava fēfē ʻo ngāue ʻi he tuí naʻa mo hoʻo feʻao mo e ngaahi faingataʻa ko ʻení?
Toʻo ha kiʻi taimi ke hiki hifo ai ʻa e meʻa ʻokú ke fie fai ke mahino lelei ange ai kiate koe mo fakatupulaki ʻa e ʻulungaanga ʻo e manavaʻofá.