Fakataukei Fakatokāteliné: Molonai 7:45–48

“Ko e Manavaʻofá ʻa e ʻOfa Haohaoa ʻa Kalaisí”

ʻI hoʻo ako ʻa e Molonai 7:44–48, naʻá ke ako ai ʻa e founga ke feinga ke fakatupulaki ʻa e manavaʻofá, ʻa e ʻofa haohaoa ʻa Sīsū Kalaisí. ʻE lava ke tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ki he Molonai 7:45–48, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

Poupouʻi hono toutou ako ʻo e fakataukei fakatokāteliné. Poupouʻi ʻa e kau akó ke hokohoko atu hono ako maʻuloto mo fakaʻaongaʻi ʻo e ngaahi potufolofola fakataukei fakatokāteliné. Fakamanatu ange ʻe ʻomi ʻe hono fakaʻaongaʻi ʻo e tokāteline taʻengata ʻoku nau ako mei he ngaahi potufolofola ko ʻení ha fakahinohino mo ha tataki fakalaumālie ʻi he kotoa ʻo ʻenau moʻuí.

Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi tūkunga kuo nau aʻusia pe mamata tonu ai te nau lava ai ʻo ako ke manavaʻofa.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni potufolofola fakataukei fakatokāteline ko ʻení ke akoʻi ʻi he hili ʻa e lēsoni “Molonai 7:44–48,” ʻa ia ko e lēsoni puipuituʻa ki he potufolofola fakataukei fakatokāteline Molonai 7:45–48. Kapau ʻoku fiemaʻu ke ʻunuakiʻi ʻa e lēsoni ʻo e potufolofola fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻaki mo iá ʻi he lolotonga ʻo e uike ko iá.

Fakamatalaʻí mo e ako maʻulotó

Fakakaukau ke fakaafeʻi ʻa e kau akó ke ngāue mo ha hoa ke fakakakato ʻa e ʻekitivitī ko ʻení. Fakaafeʻi ha ngaahi hoa ʻo e kau akó ke vahevahe ʻenau ngaahi talí mo e kalasí.

Fakakaukauloto lolotonga ha fealeaʻaki Haʻu, ʻo Muimui ʻIate Au mo ho fāmilí, lolotonga hoʻomou talanoa ki he ʻuhinga ʻo e manavaʻofá, ʻoku pehē ʻe hoʻo tehiná, “ʻIkai ʻoku ʻuhinga ʻa e manavaʻofá ki hono fakahoko pē ha ngaahi meʻa lelei maʻá e kakaí?” ʻOkú ke talaange ki ho tokouá ko e angaleleí ko ha konga ia ʻo e manavaʻofá ka naʻá ke ako lahi ange ki ai ʻi he seminelí.

• Ko e hā mo ha toe fakaikiiki kehe fekauʻaki mo e manavaʻofá te ke talaange ki ho tokouá?

Tokoni ki he kau akó ke ako maʻuloto ʻa e potufolofola mo e kupuʻi lea folofola mahuʻinga ki he Molonai 7:45–48. Fakakaukau ke tā ʻa e fakatātā ko ʻení ki he palakipoé pea fakaafeʻi ha tokotaha ako ke ne fokotuʻutuʻu ʻa e fakamoʻoni fakafolofolá mo e kupuʻi lea mahuʻinga ʻo e folofolá ke tonu ʻaki hono tohi totonu kinautolu ʻi loto ʻi he foʻi hātí. Tamateʻi ʻa e meʻa ʻi he loto hātí, pea fakaafeʻi ha tokotaha ako ʻe taha ke ne fakakakato ʻa e ʻekitivitií. Poupouʻi ʻa e tokotaha ako takitaha ke tā ha foʻi haati ʻi heʻenau tohinoa akó pea hiki ke tonu ʻa e fakamoʻoni fakafolofolá mo e kupuʻi lea mahuʻinga ʻo e folofolá ʻi loto. Fakaafeʻi ʻa e kalasí kotoa ke lau maʻuloto leʻolahi fakataha kinautolu.

Akoako hono fakaʻaongaʻí

Ke tokoni ke toe vakaiʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié, fakakaukau ke tuifio ʻa e ngaahi lea ʻo e tefitoʻi moʻoni ʻe tolu ki hono maʻu ʻo e ʻilo fakalaumālié, ʻo hangē ko ʻene hā atu ʻi laló. Hiki ʻa e tatau kuo tuifió ʻi he palakipoé pea fakaafeʻi ʻa e kau akó ke fakatonutonu ʻa e tefitoʻi moʻoni takitaha ʻiate kinautolu pē mei heʻenau manatú. ʻO ka fiemaʻu, ʻe lava ke toe vakaiʻi ʻe he kau akó ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2023). Hili ha taimi feʻunga, fakaafeʻi ha kau ako ʻe toko tolu ke omi ki he palakipoé ʻo takitaha tohi totonu ha taha ʻo e ngaahi tefitoʻi moʻoní.

1. Vakavakaiʻi ʻi he tui.

2. Fekumi ki ha mahino lahi ange ʻo fakafou ʻi ha fakakaukau kuo fokotuʻu fakalangi.

3. Ngāueʻi ʻa e ngaahi fakakaukaú mo e ngaahi fehuʻí ʻaki ha ngaahi maʻuʻanga tokoni ʻoku taʻengata.

Fakaafeʻi ʻa e kau akó ke nau fakakaukau ki ha ngaahi tūkunga kuo nau fakamoʻoniʻi pe aʻusia ʻa ia ʻe lava ke akoako ai ʻe he toʻu tupú ʻa e manavaʻofá, pe fakaʻaongaʻi ha niʻihi ʻo e ngaahi tūkunga ko ʻení.

• ʻOku fakaʻitaʻi ngofua ʻa ʻOsikā ʻe hono ngaahi tokoua mo e tuofāfine īkí. ʻOku nau faʻa kole kia ʻOsikā ke vaʻinga mo kinautolu pe tokoniʻi kinautolu ʻi heʻenau ngāue fakaako mei ʻapí. ʻOku loto ʻa ʻOsikā ke nau tukunoaʻi ia kae lava ke ne fai ʻene meʻa pē ʻaʻana.

• Naʻe ʻilo ʻe Hei-Uani naʻe fakamafola ʻe ha kiʻi taʻahine ʻe taha ʻi heʻene kalasi Finemuí ha ngaahi talanoa fekauʻaki mo ia. ʻOku ongoʻi puputuʻu mo loto-mamahi ʻa Hei-Uani ʻi he meʻá ni pea ʻoku ʻikai ke ne fakapapauʻi ʻa e meʻa ke ne faí.

• ʻOku loto ʻa Kapo ke manakoa ʻi he akó pea mo hā ngali taʻemanavahē ʻi he sio ʻa hono ngaahi kaungāmeʻá. ʻOkú ne faʻa tukuhifoʻi ʻa e toenga ʻo e kalasí pea toʻo taʻepoaki ʻenau ʻū meʻá.

ʻE lava ke aleaʻi fakakalasi ha taha ʻo e ngaahi tūkunga ko ʻení, pe ko hono vahevahe ʻa e kau akó ki ha fanga kiʻi kulupu tokosiʻi pea vahe ange ha tūkunga ke nau aleaʻi. Poupouʻi kinautolu ke fili pe ko e fē ʻi he ngaahi tefitoʻi moʻoni ki hono maʻu ʻo e ʻilo fakalaumālié ʻe ʻaonga taha ʻi honau tūkungá pea mo hono ʻuhingá. Fakaafeʻi ʻa e kulupu takitaha ke vahevahe mo e toenga ʻo e kalasí ʻa e meʻa naʻa nau aleaʻí. ʻE lava ke tataki ʻe ha niʻihi ʻo e ngaahi fehuʻi ko ʻení ʻa e kau akó ʻi he fealēleaʻaki ko ʻení.

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• Ko e hā te ke vahevahe mei he Molonai 7:45–48 te ne lava ʻo fakaʻaiʻai ʻa e tokotaha ko ʻení ke ne tali ʻi ha founga manavaʻofa lahi ange hono tūkungá?

• Ko e hā ha ngaahi potufolofola pe ngaahi fakamatala kehe mei he kau taki ʻo e Siasí ʻe ala tokoni?

Ngāue ʻi he tuí

• Ko e hā ha ngaahi faingataʻa ʻe ala fehangahangai mo e tokotahá ni ʻi heʻene feinga ke fakaʻaongaʻi ʻa e meʻa ʻokú ke vahevahe mo iá?

• Te ne ngāue fēfē ʻi he tuí neongo e ngaahi faingataʻa ko ʻení?

Vakavakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

• ʻE tokoniʻi fēfē ia ʻe heʻene vakai ki he tūkungá ʻaki ha fakakaukau ʻoku taʻengatá ke ne ongoʻi manavaʻofa ange ki he niʻihi kehé?

• ʻE tokoni fēfē ʻa hono vakaiʻi ʻa e founga naʻe fakafeangai ai ʻa Sīsū Kalaisi ki he niʻihi kehé ke angaʻofa ange ai ʻa e tokotaha ko ʻení?

Hili ʻa e fealēleaʻaki ʻa e kalasí pe kulupú, fakakaukau ke fehuʻi ki he kau akó pe ʻoku ʻi ai ha ngaahi tafaʻaki kehe ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻe ala tokoni ʻi he ngaahi tūkungá.

Toe vakaiʻi ʻo e fakataukei fakatokāteliné

Lolotonga ha lēsoni ʻi he kahaʻú, tā ha foʻi haati fōlahi ʻi he palakipoé pea fakaafeʻi e kau akó ke nau fakamanatuʻi pe ko e potufolofola fakataukei fakatokāteline mo e kupuʻi lea fakafolofola mahuʻinga fē ʻoku fekauʻaki mo e fakatātaá. Poupouʻi ʻa e tokotaha ako takitaha ke ne toutou hiki maʻuloto ʻa e fakamoʻoni fakafolofolá (Molonai 7:45–48) mo e kupuʻi lea folofola mahuʻinga (“Ko e manavaʻofá ʻa e ʻofa haohaoa ʻa Kalaisí”) ʻi heʻenau tohinoa akó.