Moroni 10:1–7

Pagdawat sa Imong Kaugalingon nga Pagsaksi kababin sa Basahon ni Mormon

Nakabati ka ba og mga impresyon o mga pagbati gikan sa Espiritu nga ang Basahon ni Mormon tinuod? Kon mao, unsa nga mga kasinatian ug mga lihok ang nakatabang kanimo sa pagbaton niini? Sa pipila sa iyang kataposang mga sinulat, si Moroni mihatag og gibug-aton nga ang Dios mao ang tinubdan sa tanang kamatuoran. Pinaagi sa Dios, makadawat kita og personal nga saksi sa katinuod sa Basahon ni Mormon, sa katinuod ni Jesukristo, ug “sa kamatuoran sa tanan nga mga butang” “pinaagi sa gahom sa Espiritu Santo” (Moroni 10:5). Kini nga leksiyon makatabang kanimo nga mahibalo sa imong kaugalingon nga ang Basahon ni Mormon tinuod.

Pagatutoki ang mga baroganan sa pagkakabig. Tabangi ang mga estudyante nga makadiskobre sa doktrina ug mga baroganan nga makapalig-on sa ilang mga relasyon ngadto sa Langitnong Amahan ug ni Jesukristo. Dasiga ang mga estudyante sa pag-analisar kon sa unsang paagi kini nga mga kamatuoran makapalawom sa ilang pagkakabig ug makatabang kanila nga molihok inubanan sa hugot nga pagtuo.

Pagpangandam sa estudyante: Dapita ang mga estudyante sa pagbasa sa Moroni 10:1–7, mangita og bisan unsang mga pulong o mga hugpong sa mga pulong nga makatabang kanila nga makasabot unsay gikinahanglan aron makahibalo sa kamatuoran mahitungod sa Basahon ni Mormon.

Mga Posibleng Kalihokan sa Pagkat-on

Usa ka pagpamatuod sa Basahon ni Mormon

Hunahunaa kon hain sa mosunod nga mga pamahayag ang labing makakonektar ka sa dihang nagsugod ka sa pagtuon sa Basahon ni Mormon:

• Dili ko segurado kon nasayod ba ako nga ang Basahon sa Mormon tinuod.

• Misalig ako sa uban nga misulti kanako nga ang Basahon ni Mormon tinuod.

• Mibati ko og mga impresyon gikan sa Espiritu Santo nga ang Basahon ni Mormon tinuod.

Pamalandongi ang imong pagpamatuod sa Basahon ni Mormon karon. Samtang magtuon ka, hunahunaa ang sunod nga mga lakang nga gusto sa Ginoo nga imong buhaton aron makaangkon, molawom, o magpabiling lig-on sa imong pagsaksi.

Ang pag-awhag ni Moroni

Human sa pagrekord sa pipila ka mga pagtulun-an sa iyang amahan, si Moroni mitudlo kon sa unsang paagi si bisan kinsa makahibalo sa ilang kaugalingon nga ang Basahon ni Mormon tinuod.

Basaha ang Moroni 10:3–5 ug ikonsiderar ang pagmarka sa unsay gisulti ni Moroni kon unsaon nato sa pagkahibalo sa katinuod sa Basahon ni Mormon. Mahimo usab nimong ikonsiderar ang pagtan-aw sa bidyo nga “Si Moroni Nagdapit sa Tanan sa Pagduol ngadto kang Kristo” gikan sa time code 4:39 hangtod sa 5:32, anaa sa ChurchofJesusChrist.org.

Ang Moroni 10:4–5 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Ikonsiderar ang pagsulat sa mosunod nga dili kompleto nga pamahayag diha sa pisara ug dapita ang mga estudyante sa pagkompleto niini diha sa ilang mga journal sa pagtuon. Dayon dapita sila sa pagkompleto niini isip usa ka klase diha sa pisara.

• Mahimo nakong masayran nga ang Basahon ni Mormon tinuod pinaagi sa gahom sa Espiritu Santo samtang ako …

Ang sunod nga kalihokan giorganisar pinaagi sa tulo ka mga hugpong sa mga pulong sa tambag ni Moroni. Ikonsiderar kon unsaon nimo sa pagtabang ang mga estudyante nga mas molawom ang ilang pagsabot niining tulo ka mga hugpong sa mga pulong. Mahimo nimong bahinon ang mga estudyante ngadto sa gagmay nga mga grupo ug i-assign ang matag grupo sa usa sa mosunod nga mga kalihokan sa pagtuon. Tinoa kon mas maayo ba nga ipakita ang mga instruksiyon alang niini nga mga kalihokan o maghatag sa matag grupo og ilang kaugalingong kopya. Human mahisgotan sa mga grupo ang ilang mga tubag, mahimo silang mopakigbahin sa klase. Mahimo usab nga ipamubo sa mga estudyante ang ilang mga ideya tapad sa pamahayag diha sa pisara.

Mobasa sa Basahon ni Mormon

Si Presidente Russell M. Nelson mihulagway sa pipila ka mga panalangin nga atong madawat pinaagi sa pagtuon sa Basahon ni Mormon. Hunahunaa kon sa unsang paagi nimo nasinati kini nga mga panalangin samtang imo kining gitun-an.

Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 62–63)

• Nakasinati na ba ka sa bisan hain sa mga panalangin nga gisaad ni Presidente Nelson niadtong kinsa nagtuon sa Basahon ni Mormon?

Dapita ang andam nga mga estudyante sa pagpakigbahin sa pipila ka mga paagi nga ilang nasinati kini nga mga panalangin. Seguroha nga dili makapabati sa bisan kinsang estudyante nga maulawan kon dili sila makahunahuna og bisan unsang mga kasinatian. Ipaniguro kanila nga makasinati gihapon sila niini nga mga panalangin samtang sila magpadayon sa pagtuon sa Basahon ni Mormon.

Ang pag-ila sa mga panalangin nga moabot gikan sa pagbasa sa Basahon ni Mormon makapamatuod nga kini tinuod ug nga kini gikan sa Dios.

Pamalandongi ang kaluoy sa Ginoo

• Unsa ang pipila ka mga ehemplo sa mga tawo diha sa kasulatan nga nakadawat sa kaluoy sa Ginoo? Mahimo nimong pangitaon ang pipila, sama ni Nephi (2 Nephi 4:20–25), Alma nga Batan-on (Alma 36:17–21), o ang mga Nephite nga naayo sa Manluluwas atol sa Iyahang pagbisita (3 Nephi 17:6–9).

• Unsa ang pipila ka mga ehemplo sa kaluoy sa Ginoo diha sa imong kinabuhi o sa kinabuhi sa usa ka tawo nga imong nailhan?

• Ngano sa imong hunahuna nga ang pagpamalandong sa kaluoy sa Ginoo makatabang kanimo nga makadawat og pagpamatuod sa Basahon ni Mormon pinaagi sa Espiritu Santo?

Pangutan-a ang Dios sa kinasingkasing, tinuod nga katuyoan, ug hugot nga pagtuo kang Kristo

• Unsa sa imong hunahuna ang gipasabot sa pagpangutana sa Dios sa kinasingkasing? Uban sa tinuod nga katuyoan? Uban sa hugot nga pagtuo kang Jesukristo (Moroni 10:4)? Kon nagkinahanglan ka og tabang sa pagtubag niini, basaha ang Joseph Smith—Kasaysayan 1:10–17, mangita kon sa unsang paagi ang batan-ong Joseph Smith mihimo sa iyang pag-ampo sa kinasingkasing, tinuod nga katuyoan, ug hugot nga pagtuo kang Kristo. (Timan-i: Ang hugpong sa mga pulong nga tinuod nga katuyoan nagpasabot nga sa higayon nga makadawat ka og tubag sa imong mga pag-ampo, kinasingkasing ka nga molihok sa pagpadayag nga imong nadawat.)

• Sa unsang paagi nga ang pagbuhat niini makatabang kanato nga makadawat og pagpamatuod sa Basahon ni Mormon pinaagi sa Espiritu Santo?

Ang akong personal nga pagpamatuod sa Basahon ni Mormon

Si Presidente Henry B. Eyring sa Unang Kapangulohan mipakigbahin sa iyang kasinatian sa paggamit sa saad ni Moroni. Basaha ang mosunod nga pamahayag o tan-awa ang bidyo nga “Usa ka Buhing Pagpamatuod” gikan sa time code 13:51 hangtod sa 14:31, anaa sa ChurchofJesusChrist.org.

Ako nanghinaot nga kamong tanan nakatino na niana nga saad diha kaninyo o nga inyo kining buhaton sa daling panahon. Ang tubag tingali dili moabot sa usa ug gamhanan nga espirituhanong kasinatian. Alang kanako kini hilom nga miabot sa sinugdanan. Apan kini moabot nga mas nagkakusog matag panahon nga ako mobasa ug mag-ampo kabahin sa Basahon ni Mormon.

Ako wala magsalig kon unsa ang nahitabo sa milabay nga panahon. Aron ang akong buhi nga pagpamatuod sa Basahon ni Mormon malig-on, akong gidawat ang saad ni Moroni sa kanunay. Wala ko gipakaingon nga ang panalangin sa pagpamatuod usa ka walay puas nga katungod. (Henry B. Eyring, “Usa ka Buhing Pagpamatuod,” Liahona, Mayo 2011, 127)

• Sa unsang paagi nga ang mga pulong ni Presidente Eyring magamit kanato bisan kon kapila pa nato basahon ang Basahon ni Mormon?

• Sa unsang paagi nga ang Espiritu Santo makapamatuod kanato sa katinuod sa Basahon ni Mormon?

• Sa unsang paagi nga ang pagpamatuod sa Basahon ni Mormon makapalig-on sa imong relasyon ug pagpamatuod sa Langitnong Amahan ug sa Iyang Anak, si Jesukristo?

Dapita ang mga estudyante sa pagpakigbahin sa ilang mga saksi sa Basahon ni Mormon ug giunsa nila pagkahibalo nga kini tinuod. Mahimo usab nimong ipakigbahin ang imong kaugalingon nga pagsaksi.

Ang mosunod makatabang sa mga estudyante sa paggamit sa Moroni 10:3–5.

Isulat diha sa imong journal sa pagtuon kon unsay imong mahimo aron sa paggamit sa mga baroganan nga gitudlo sa Moroni 10:3–5. Hunahunaa kon sa unsang paagi ka makapadayon sa pagtuon sa Basahon ni Mormon, makapamalandong sa kaluoy sa Ginoo, ug makapangayo sa Dios og saksi pinaagi sa Espiritu Santo. Asa ug kanus-a nimo buhaton kining mga butanga? Unsaon kaha pagtubag sa Ginoo ang imong mga pag-ampo?

Komentaryo ug Background nga Impormasyon

Giunsa pagkahibalo sa uban nga ang Basahon ni Mormon tinuod?

Ang mosunod nga mga kapanguhaan makatabang kanimo sa pagsabot ug sa pagkat-on gikan sa mga kasinatian sa uban. Ang tanan anaa sa ChurchofJesusChrist.org.

• “Receiving a Testimony of the Book of Mormon, Part 1” (1:30), ni Presidente Boyd K. Packer

• “How I Know the Book of Mormon is True” (1:11)

• “Nakaplagan pinaagi sa Gahom sa Basahon ni Mormon,” ni Elder Rubén V. Alliaud, gikan sa time code 1:21 hangtod sa 4:39

• “Dangop ngadto Kaniya ug ang mga Tubag Moabot” gikan sa time code 0:00 hangtod sa 1:06, ni Elder James B. Martino

• “If You Really Want to Know, You Will Know,” ni Elder Walter F. González

Si Sister Zina Young ug si Sister Eliza R. Snow, unang mga kinabig ug mga lider sa gipahiuli nga Simbahan, nakadawat og pagpamatuod sa nagkalainlaing mga paagi.

Si Zina miingon nga una niyang “nakita ang Basahon ni Mormon, kanang katingalahan, bag-ong basahon, nga nahimutang sa bintana sa among lawak lingkoranan” sa dihang 14-anyos pa siya. Samtang iyang gipunit ang basahon, usa ka “matam-is nga impluwensiya sa Balaang Espiritu ang miuban niini sa ingon nga ako kining gigakos sa akong dughan sa tumang kalipay, samtang ako misaysay sa ingon, ‘Kini ang kamatuoran, kamatuoran, kamatuoran!’”

Ang pagtuo dili ingon nga daling naabot alang kang Eliza. Ang iyang inahan ug igsoong babaye unang mipasakop sa Simbahan. Nahimamat ni Eliza si Joseph Smith ug naghunahuna nga siya adunay “matinuoron nga nawong.” Nadungog niya ang duha sa Tulo ka mga Saksi—mga lalaki nga nakakita ug nakakupot sa bulawan nga mga palid—naghisgot bahin sa basahon, ug “ingon ka talagsaon nga mga pagpamatuod” nga wala pa niya madungog sukad. Bisan pa niana, dili siya gusto nga dali ra kaayo mobalhin ug malingla. Naghunahuna nga tingale kining tanan mahimo nga usa lamang ka “pagkidlap sa kalaha,” milungtad og upat ka tuig ang iyang pagtuon sa kasulatan sa wala pa ang iyang “kasingkasing … nakaseguro” ug siya nakahukom nga magpabunyag. (Janiece Johnson, “A Witness of One’s Own,” Ensign, Dis. 2020, 37)

Sa unsang paagi nga ang pagbaton sa akong kaugalingong pagpamatuod makapanalangin kanako?

Si Presidente Dieter F. Uchtdorf, kanhi Ikaduhang Magtatambag sa Unang Kapangulohan, mitudlo:

Ang uban moingon nga lisod ra kaayo ang mga lakang o dili kini motugbang sa paningkamot. Apan moingon ko nga kining personal nga pagpamatuod sa ebanghelyo ug sa Simbahan maoy pinakaimportante nga inyong maangkon niini nga kinabuhi. Dili lamang kini mopanalangin ug mogiya ninyo niining kinabuhia, apan may direkta kining epekto sa inyong kinabuhi hangtod sa kahangtoran. (Dieter F. Uchtdorf, “Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 22)

Si Presidente Russell M. Nelson mipakigbahin:

Dili na kamo kinahanglan maghunahuna kon unsa ang kamatuoran (Moroni 10:5). Dili na kamo maghunahuna kinsa ang inyong luwas nga masaligan. Pinaagi sa personal nga pagpadayag, makadawat kamo sa inyong kaugalingon nga pagsaksi nga ang Basahon ni Mormon mao ang pulong sa Dios, nga si Propeta Joseph Smith usa ka propeta, ug nga kini ang Simbahan sa Ginoo. Bisan kon unsa man ang isulti o buhaton sa uban, walay bisan kinsa ang makapawala sa pagsaksi nga midala ngadto sa inyong kasingkasing ug hunahuna kon unsa ang kamatuoran. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95-96)

Dugang nga mga Kalihokan sa Pagkat-on

Pagpakigbahin sa ilang mga saksi sa Basahon ni Mormon

Aron sa pagtapos sa leksiyon, ikonsiderar ang paghatag sa matag estudyante og kopya sa Basahon ni Mormon diin isulat ang ilang mga pagpamatuod. Mahimong ihatag sa mga estudyante kining mga kopya sa Basahon ni Mormon ngadto sa usa ka tawo nga ilang nailhan nga gibati nila nga andam sa pagdawat niini. Sa laing paagi, mahimong mohatag ang mga estudyante niini nga mga kopya sa Basahon ni Mormon ngadto sa lokal nga mga misyonaryo aron ipakigbahin diha sa ilang mga paningkamot sa pagsangyaw.

Paghimo og biswal aron masabtan ang Moroni 10:3–5

Aron matabangan sila nga makasabot sa mga pulong diha sa Moroni 10:3–5, mahimong mogama ang mga estudyante og biswal nga susama niadtong makita diha sa seksiyon sa “Pagtulun-an human sa usa ka Pagtulun-an” sa Alang sa Kalig-on sa mga Kabatan-onan nga magasin. Tan-awa ang Pebrero 2021, Pebrero 2022, o mas bag-o nga edisyon alang sa mga pananglitan.

Moroni 10. “Moawhag”

Pahinumdomi ang mga estudyante nga ang pulong nga moawhag nagpasabot nga hugot nga pagdasig o pagdani. Ikonsiderar ang pagdapit sa mga estudyante sa pagpangita diha sa Moroni 10 sa makadaghan nga higayon nga gigamit ni Moroni kini nga pulong. Unsa ang gidapit ni Moroni nga atong buhaton? Unsa ang pipila ka piho nga mga paagi nga kita makasunod niini nga mga pagdapit?

Ang Espiritu Santo makatabang kanato nga mahibalo sa kamatuoran sa tanang mga butang

Mahimong basahon sa mga estudyante ang Moroni 10:5–7 nga mangita kon sa unsang paagi ang Espiritu Santo makatabang kanila sa tanan nilang pagkat-on. Hisgoti kon sa unsang paagi nga ang pagkahibalo niini makaimpluwensiya sa ebanghelyo ug sekular nga pagkat-on sa mga estudyante. Mahimo usab nimong hisgotan kon sa unsang paagi ang Espiritu Santo makatabang kanato sa pag-ila sa kamatuoran gikan sa sayop.