Vasega 2

Taunuuga o le Aoaoina: E mafai ona fesoasoani lenei vasega i tamaiti aoga e faateleina ai lo latou manao ma le gafatia e taulima a latou molimau ma le liua.

Gaoioiga E Ono Mafai Ona Aoao Ai

Toe faamanatu o le vasega 1

E mafai ona e faaali atu ata e pei o nei ma valaaulia tamaiti aoga e liliu atu i se paga ma faasoa mai mea latou te manatua mai le vasega na muamua atu. A uma se taimi talafeagai, valaaulia nisi o tagata aoga e faasoa mai i le vasega. Fai atu ni fesili tulitatao ina ia mautinoa ai ua malamalama tamaiti aoga i le taua o lenei faasalalauga i le lalolagi atoa.

Toatele o talavou matutua ua faatumulia ai le Maota Autu mo Konafesi a o lei amataina le faigalotu i le lalolagi atoa i le aso 15 o Me, 2022.

O loo saunoa Peresitene Russell M. Nelson i le taimi o se faigalotu i le lalolagi atoa mo talavou matutua i le aso 15 o Me, 2022.

Afai e le o ta’ua e tamaiti aoga, ia mautinoa ua latou malamalama o lenei lauga ua na o le pau lea o le taimi na saunoa ai Peresitene Russell M. Nelson i talavou matutua uma i le Ekalesia i le taimi lava e tasi e aoao i latou i mea e finagalo le Tama Faalelagi ia latou iloa.

Toe faaali atu upumoni nei e tolu na faalauiloa mai i le vasega na muamua atu:

1. Ia iloa le upumoni po o ai oe.

2. Ia iloa le upumoni e uiga i mea ua ofoina atu e le Tama Faalelagi ma Lona Alo ia te oe.

3. Ia iloa le upumoni e fesootai ma lou liua.

Faamanatu i tamaiti aoga le taimi mulimuli na latou aoao ai e uiga i nei upumoni muamua e lua.

• O a nisi o filosofia leaga e mafai e upumoni muamua e lua ona puipuia mai ai i tatou?

• E mafai faapefea e le iloaina o upumoni muamua e lua ona aafia ai lou lumanai lata mai ma lou faavavau?

Faamalamalama atu o le vasega o le asō o le a tatou aoao atili ai e uiga i le upumoni e faatatau i lo tatou liua.

Ia iloa le upumoni e fesootai ma lou liua.

Faamalamalama atu a lagona e perofeta o upu latou te tautatala ai e faapitoa lava le taua mo i tatou e manatua ma malamalama i ai, o nisi taimi o le a latou toe faia ai a latou savali i le tele o nofoaga. E mafai foi ona latou faaaogaina upu po o fasifuaitau e faamamafa ai le taua o a latou savali.

Faaali atu pe tuu atu i tamaiti aoga se ata e tuufaatasi o fuaitau nei mai le “Filifiliga mo le Faavavau,” na tuuina mai ia Me 2022, ma le saunoaga a Peresitene Nelson i le konafesi aoao ia Oketopa 2022 ua faaulutalaina “Faatoilalo le Lalolagi ma Maua le Malologa.” O le isi filifiliga o le matamata faatasi lea i le “Filifiliga mo le Faavavau” mai le taimi faailo 25:57 i le 27:01, sosoo ai ma le “Faatoilalo le Lalolagi ma Maua le Malologa” mai le taimi faailo 14:46 i le 15:33. Valaaulia tagata aoga e faatusatusa faamatalaga e lua:

“Filifiliga mo le Faavavau” (12 Me, 2022)

“Manumalo i le Lalolagi ma Maua le Malologa” (Oke. 2022)

O le saili e tali nei fesili o le a manaomia ai se taumafaiga—se taumafaiga tele. Ou te augani atu ia te oe ia tausia lau molimau. Galue i ai. Pulea. Tausi i ai. Faafailele ina ia tuputupu ae. Fafaga i upumoni. Aua ne’i faaleagaina i filosofia sesē o alii ma tamaitai lē talitonu ona e tuufesili lea pe aisea ua vaivai ai lau molimau. Punouai i tatalo faatauanau ma lotomaualalo i aso taitasi. Tausia lelei oe lava ia i afioga a perofeta anamua ma aso nei. Ole atu i le Alii e aoao oe i le auala e faalogo lelei ai ia te Ia. Faaalu atili se taimi i totonu o le malumalu ma i galuega o talafaasolopito o aiga. A o e faia lau molimau ma au faamuamua sili ona maualuga, vaavaai mo ni vavega e tutupu i lou olaga.

Ou te faalautele atu ai i tagata o le Ekalesia atoa le poloaiga lava e tasi na ou tuu atu i o tatou talavou matutua ia Me talu ai. Sa ou augani atu ia i latou i lena taimi—ma aioi atu ia te outou i le taimi nei—ia tausia e oe lava ia lau lava molimau ia Iesu Keriso ma Lana talalelei. Galue i ai. Faafailele ina ia tuputupu ae. Fafaga i upumoni. Aua ne’i faaleagaina i filosofia sese a alii ma tamaitai lē talitonu. A o e faia le faamalosiga faifai pea o lau molimau ia Iesu Keriso ma au faamuamua e sili ona maualuga, vaavaai mo ni vavega e tutupu i lou olaga.

• O a upu patino po o fasifuaitau na ia ta’u soo e tulaga ese ia te oe.

• O a ni mafaufauga po o ni lagona sa ia te oe a o e faatusatusa nei faamatalaga e lua?

E mafai ona valaaulia tamaiti aoga e faafesootai nei faamatalaga e lua i a latou masini feaveai pe a latou mananao ai. E mafai foi ona valaaulia i latou e faailoga le fuaitau “Ou te aioi atu ia te outou” i faamatalaga uma e lua.

• O a ni faatinoga ua fautuaina mai e Peresitene Nelson e “taulima ai lau molimau”? (Mafaufau e tusi tali a tagata aoga i luga o le laupapa.)

• Aisea e te manatu ai o le a “aioi” mai le perofeta ia i tatou ina ia taulima a tatou molimau?

• O le a le mea ua folafola mai e le perofeta ia i tatou pe afai tatou te faia a tatou molimau o la tatou faamuamua aupito maualuga?

Mafaufau e tusi le “Taulima Lau Molimau” i luga o le laupapa ma valaaulia tamaiti aoga e mafaufau loloto pe faapefea ona latou taulima a latou molimau.

E mafai ona avea lenei mea ma se taimi lelei e valaaulia ai tamaiti aoga e iloilo e i latou lava pe o faapefea ona latou faia. E mafai ona latou faaaogaina le upusii a Peresitene Nelson e fai ma taiala i le iloiloina o i latou lava. E mafai ona latou toe faitauina ma le filemu, ma taofi pe a uma fuaiupu taitasi e mafaufau i mea o loo latou faia lelei ma mea latou te ono fetuunai i o latou olaga.

Afai e talafeagai, e mafai ona e taitaia se talanoaga ma valaaulia tamaiti aoga e faasoa mai mea na fesoasoani ia i latou e taulima ai a latou molimau.

Valaaulia tamaiti aoga e mafaufau e filifili se manatu se tasi pe lua i le saunoaga a Peresitene Nelson latou te lagona o le a fesoasoani ia i latou e taulima lelei ai a latou molimau, ma uunaia i latou e fuafua pe faapefea ona latou faaaogaina na manatu i o latou olaga.

Fafaga lau molimau i le upumoni

O le vaega lenei o le vasega ua faamoemoe e fesoasoani ai i tamaiti aoga e taulai atu i le suesueina o le Tusi a Mamona o se vaega taua o le fafagaina ma le faafaileleina o a latou molimau.

Mafaufau e faaali atu ata nei ma fai atu i tamaiti aoga le fesili o i lalo:

fugalaau e i ai petala ua magumagu

fugalaau e i ai petala maloloina ma matala atoatoa

• Mai lou aafiaga, e mafai faapefea ona e iloa le taimi atonu e le o toe fafagaina ai lau molimau?

Tuu tamaiti aoga i ni vaega toalaiti, ma tuu atu i vaega taitasi se mea e tusi ai (se pepa lautele o i ai se savali, laupapa paepae, po o se mea faapena). Faasino atu le fuaitau a Peresitene Nelson “fafaga i upumoni,” ma valaaulia vaega taitasi e tusi i lalo le tele o auala e mafai ona latou mafaufau ai e mafai e se tagata ona tausia ma fafagaina a latou molimau i upumoni .

A lava se taimi, e mafai ona e fai atu i tamaiti aoga e faasoa mai pe na faapefea e mea na latou tusia ona fafagaina ma faafaileleina a latou molimau ma le liua.

Na faamamafa mai e Peresitene Nelson faamanuiaga e oo mai pe a tatou fafagaina a tatou molimau i upumoni mai le Tusi a Mamona. Faaali atu le fuaitau lenei, ma valaaulia tagata aoga e vaavaai mo faamanuiaga na latou mauaina:

Pe a ou mafaufau i le Tusi a Mamona, ou te mafaufau i le upu mana. O upumoni o le Tusi a Mamona ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.

O’u uso e ma tuafafine pele, ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—iaso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu faagase-mafaufau. (“O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 61)

• O le a se taimi na e mauaina ai nisi o nei faamanuiaga?

• Pe o i ai ni fuaiupu po o ni vaega o le Tusi a Mamona na fesoasoani e faamalosia ai lau molimau? (Tuu atu i tamaiti aoga se taimi e mafaufau loloto ai ma faasoa mai pe a latou mananao ai.)

E taua mo tamaiti aoga le iloaina o le mafuaaga autu lava e fafagaina ai ma faafaileleina ai e le Tusi a Mamona lo latou faatuatua ma molimau, ona o loo molimau mai ai ia Iesu Keriso. Faaali atu le faamatalaga lenei mai ia Peresitene Nelson:

O le Tusi a Mamona e faatotonugalemu ia Iesu Keriso. O loo i ai le fatu tonu o Lana savali. Sa tusia mo i tatou, i o tatou aso, mo o tatou olaga. A o tatou suesue, mafaufau loloto, ma faaaoga mataupu faavae ua aoaoina i totonu o ona itulau, o le a tatou maua le malosi e faatotonugalemu ai o tatou olaga ia Iesu Keriso ma olioli i faamanuiaga fiafia ua Ia folafola mai ia i tatou, i le taimi nei ma le faavavau.

(Russell M. Nelson, Facebook, 17 Oke., 2021, facebook.com/russell.m.nelson)

Tuu atu i tamaiti aoga se taimi e sue ai fuaitau mai le Tusi a Mamona e fesoasoani ia i latou e faatotonugalemu ai o latou olaga ia Iesu Keriso. Uunaia i latou e faasoa atu nei mea i le tagata o loo nofo i o latou autafa pe latalata i ai. E mafai ona maua ai se avanoa mo tamaiti aoga e faagaeetia ai i mea latou te faasoa ai ma a latou uo. Atonu foi e te saunia e faasoa atu pe na faapefea ona fafagaina e le Tusi a Mamona lau molimau.

Valaaulia tamaiti aoga e mafaufau pe faapefea ona latou fafagaina a latou molimau i upumoni mai le Tusi a Mamona ma mea atonu latou te lagonaina ua musuia e faia i se isi auala pe sili atu foi.

Fesili

Na faailoa mai e Peresitene Nelson nisi o luitau tatou te ono feagai a o tatou taumafai e fafaga a tatou molimau i upumoni ma fafagaina i tatou lava. O se tasi o luitau e mafai ona avea ma fesili tatou te le iloa tali i ai. Vaevae tamaiti aoga i ni paga, ma tuu atu i tamaiti aoga taitasi se tasi o faamatalaga nei e suesue ai. Valaaulia i latou e faitau ma faailoga ni mea e tulagaese ia i latou.

Na faamalamalama mai e Peresitene Russell M. Nelson:

Afai e i ai ni au fesili—ma ou te faamoemoe e i ai—saili ni tali faatasi ma manaoga faatauanau ia talitonu. Aoao mea uma e te mafaia e uiga i le talalelei ma ia mautinoa e te liliu atu i punaoa e faatumulia i upumoni mo le taitaiga. Ua tatou ola i le tisipenisione ua “leai se mea e taofia” [Mataupu Faavae ma Feagaiga 121:28]. O lea, o le a i ai le taimi o le a tali mai ai e le Alii a tatou fesili uma.

I le taimi nei, faatofu oe lava ia i le faatanoavai faamanuiaina o faaaliga ua tatou maua i o tatou tamatamailima. Ou te folafola atu o le faia o lena mea o le a faamalosia ai lau molimau, e tusa lava pe lei taliina nisi o au fesili. O au fesili faamaoni, e fesiligia i le faatuatua, o le a taitai atu ai e le aunoa i le faatuatua sili atu ma le iloa sili atu. (“Filifiliga mo le Faavavau” [faigalotu i le lalolagi atoa mo le Autalavou Matutua, 12 Me, 2022], Potutusi o le Talalelei)

Sa faamatala mai e Elder Lawrence E Corbridge, a o avea ma se tasi o Fitugafulu:

Amata i le taliina o fesili autu. E i ai fesili autu ae e i ai foi fesili faaleogolua. Tali muamua fesili autu. E le tutusa uma fesili ma e le tutusa uma upumoni. O fesili autu e aupito sili ona taua. O isi mea uma o loo i lalo ifo. E itiiti lava ni nai fesili autu. O le a ou ta‘ua le fa o na fesili.

1. O i ai ea se Atua o lo tatou Tama?

2. O Iesu Keriso ea o le Alo o le Atua, le Faaola o le lalolagi?

3. O Iosefa Samita ea o se perofeta?

4. Pe O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi?

O le eseesega, o fesili faaleogolua e le muta. E aofia ai fesili e uiga i le talafaasolopito o le Ekalesia, autaunonofo, o le tupuaga mai o tagata Aferika ma le perisitua, o tamaitai ma le perisitua, o le ala na faaliliu ai le Tusi a Mamona, o le Penina Tau Tele, DNA ma le Tusi a Mamona, faaipoipoga i itupa tutusa, o tala eseese o le Uluai Faaaliga, ma isi ma isi.

Afai e te taliina fesili autu, ona maua foi lea o tali o fesili faaleogolua, pe itiiti lona taua, ma mafai ona e taulimaina mea e te malamalama ai ma mea e te le malamalama ai, faapea ma mea e te ioeina ma mea e te le ioeina e aunoa ma le oso atoa ese mai le va’a. (Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu)

Tuu atu i tamaiti aoga se taimi e faasoa atu ai i a latou paga mea na latou aoaoina mai le faamatalaga sa latou suesueina. E mafai foi ona outou talanoaina faatasi o se vasega ia malamalamaaga o tamaiti aoga.

Ina ia fesoasoani i tamaiti aoga e toe faagaoioia mea na aoao mai e Peresitene Nelson ma Elder Corbridge, e mafai ona e faaaogaina le suesuega lenei. Faaali atu le vaaiga lenei, pe tuu atu se kopi i paga taitasi. Valaaulia i latou e vaai pe mafai ona latou faaaogaina aoaoga a Peresitene Nelson ma Elder Corbridge e fesoasoani ai i le talavou matua o loo i le tulaga faataitai.

A o galulue tamaiti aoga i tulaga e suesue ai, faalogologo ma ia avanoa e fesoasoani i tamaiti aoga a o latou talanoaina auala e mafai ona latou fesoasoani ai ia Sandra.

O Sandra o se tamaitiiti aoga talavou i le kolisi. Sa auai o ia i le Ekalesia i le aoga maualuga ma sa fiafia i le lagona o le auai i se nuu vavalalata ma agaalofa o usoga o soo o Iesu Keriso. Sa fiafia o ia e aoao e uiga i le talalelei toefuataiina a Iesu Keriso ma sa fiafia i le Tusi a Mamona. Sa faateia o ia i le lagona toafilemu sa ia maua a o ia faitauina lena tusi mo le uluai taimi. Ae ina ua iloa e le polofesa o se tasi o ana vasega i le kolisi o Sandra o se tagata o le Ekalesia, sa amata ona ia fesiligia o ia e uiga i ona talitonuga. Ina ua taumafai o ia e tali atu, sa tulitatao mai e ia fesili sa le iloa e ia tali. I se taumafaiga e saili tali, sa saili ai e Sandra le initoneti ma sau ai ma nisi fesili. Afai o oe o se uo a Sandra, e faapefea ona e taumafai e fesoasoani ia te ia e faafoeina lenei tulaga?

Mo se faataitaiga faaopoopo o se tasi na faafoeina le tele o fesili latou te le iloa taliina, e mafai ona uunaia tamaiti aoga e faitau le lauga a Elder Robert S. Wood o loo i le faaopoopoga, pe mafai foi ona e aoteleina lona aafiaga mo au tamaiti aoga. Ia mautinoa e te matauina le matafaioi a le Tusi a Mamona i le faatonutonuina e Elder Wood o fesili na fesiligia ai o ia.

Pe a laa ese uo ma aiga

O le vaega lenei o loo aofia ai se talanoaga faalevaega toalaiti e mafai ona fesoasoani i tamaiti aoga pe afai e tuua e a latou uo po o tagata o le aiga le Ekalesia.

Vaevae tamaiti aoga i ni vaega toalaiti ma tuu atu ia i latou le faamatalaga lenei, pe tuu atu i tamaiti aoga e sue i le “Filifiliga mo le Faavavau” i le Potutusi o le Talalelei. E mafai foi ona e matamata i lenei kilipi mai le taimi faailo 28:00 i le 29:10. A uma ona faitau pe matamata i lenei kilipi, valaaulia tamaiti aoga e talanoaina fesili e sosoo ai ma a latou vaega.

Afai e oo ina o ese ni uo ma aiga mai le Ekalesia, faaauau pea ona alolofa ia i latou. E le mo oe le faamasino atu i filifiliga a se isi e pei lava foi ona le tatau ai ona faitioina oe mo le tumau ai faamaoni.

Ia, faamolemole faafofoga mai pe a ou fai atu: Aua nei taitaieseina outou e i latou e i ai ni masalosaloga ua faateteleina e ni mea e le o mafai ona e vaaia i o latou olaga. O le mea sili o mea uma, tuu atu i au uo masalosalo ia vaaia le tele o lou alofa i le Alii ma Lana talalelei. Ia faaofo o latou loto masalosalo i lou loto talitonu!

A o e taulimaina lau molimau ma faatupulaia, o le a avea oe ma se meafaigaluega sili ona malosi i aao o le Alii. O le a “musuia oe e se galuega sili atu” [Alema 43:45]---o le galuega a Iesu Keriso!

• O a nisi o taunuuga le lelei e oo mai i le faamasinoina o filifiliga a se isi?

• Aisea e aoga ai le nofouta faapea o i latou o e saili e taitaiseseina oe atonu e “faaosofia e mea e le mafai ona e vaai i ai i o latou olaga”?

• Faamata e faape’i mo oe pe a e faate’ia se loto masalosalo i lou loto talitonu?

A maea a latou talanoaga faalevaega toalaiti, valaaulia tamaiti aoga e faasoa mai se mea na tulaga ese ia i latou mai la latou talanoaga. Valaaulia isi tamaiti aoga e fai ni manatu faaalia pe fai atu ni fesili e uiga i mea o loo faasoa mai e a latou uo.

Folafolaga Faaperofeta

Valaaulia tamaiti aoga e faitau parakalafa mulimuli e tolu o le “Filifiliga mo le Faavavau,” ma vaavaai mo faamanuiaga ma folafolaga a le Alii ia i latou. E mafai ona valaaulia tamaiti aoga e faasoa atu i se tuaoi se faamanuiaga ma se folafolaga sa sili ona fiafia i ai i latou ma pe aisea.

E mafai foi ona e valaaulia ni nai tamaiti aoga e faasoa mai pe faapefea ona latou aoteleina mea o loo latou aveesea mai lenei aafiaga.

Ina ia faaiuina lenei aafiaga o le aoaoga, e mafai ona e valaaulia tamaiti aoga e faamaumau soo se mea latou te mananao e taofi, faaauau pea ona fai, pe amata ona faia ona o mea ua latou aoaoina ma lagonaina i lenei aoaoga.

E mafai ona e faaiuina i lau molimau faapea o folafolaga a le Alii “o le a faataunuuina uma” e pei ona saunoa mai ai Lana auauna o Peresitene Russell M. Nelson (tagai Mataupu Faavae ma Feagaiga 1:38).