Faaopoopoga: “Ia Liua Oe e ala i le Faafouina o Lou Mafaufau”

Faigalotu Iunivesite Polika Iaga–Idaho

Elder Robert S. Wood

13 Me, 2003

Ina ua sefuluono o’u tausaga, ou te manatua lo’u toe foi vave i le fale i se tasi afiafi mai se gaoioiga faaagafesootai, sa matuai ala lava ma e le’i saunia e alu e moe. Sa ou mafaufau ou te alu i fafo e popō le polo pasiketipolo ae sa ou iloa o le a le talisapaia e tuaoi lenei gaoioiga, aua atonu ua momoe. Sa ou manatu foi e mafai ona ou taina ni musika i la’u laaupese ae sa ou iloa o le a tetee o’u matua i lenei mea aua e i lalo ifo o lo’u potumoe lo la potumoe!

I luga o le fata o lo’u moega sa taatia ai se kopi o le Tusi a Mamona lea e masani ona tuu ai e lo’u tina iina ma le faamoemoe o le a ou faitauina. I lena taimi, sa ou faitauina totonu o le Tusi a Mamona ae ou te lei faitauina moni lava le Tusi a Mamona. O le mea moni, na pau lava le fasifuaitau na ou manatuaina moni mai le tusi o le, “O a’u, o Nifae, na fanaua e ni matua lelei.” I lena afiafi, i le leai o se faamoemoega sili atu nai lo le leai o se mea e sili atu ona lelei e fai, sa amata ai ona ou faitauina le Tusi a Mamona.

O le taeao na sosoo ai i le 11:00 i le taeao; o le Aso Toonai lea, sa manatu ou matua sa ou moe umi aua sa ou le faigaluega seia oo i lena aoauli. Peitai, sa ou matuai ala lava. Sa ou faitauina upu faaiu a Moronae, “Ioe, o mai ia Keriso, ma faaatoatoaina ia te ia, ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou” (Moronae 10:32). Ina ua mae’a ona faitauina le valaaulia ma le faatofa mai ia Moronae, sa ou tootuli i autafa o lo’u moega ma tofotofo i le folafolaga na ia faia muamua: “Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia” (Moronae 10:4).

O lena taeao o le Aso Toonai, sa ou ole atu ai mo le molimau a le Agaga Paia, ma sa ou mauaina ma le matua’i manino ma le mamana nai lo soo se faaiuga faata’ita’i po o se taunuuga faigofie ua ou faia. Na avea ma faavae lea na alia’e mai ai ni talitonuga maumaututu sili ona taua.

O le taeao o le Aso Gafua na sosoo ai i le aoga, sa ou feiloai ai i se uo lelei, e le o se tagata o le Ekalesia, lea sa tele i ai ni a’u talanoaga e uiga i le talalelei. Sa ia fai mai ia te au e i ai sana lisi o talafaatusa e 50 i le Tusi a Mamona lea na faaalia ai o le Tusi a Mamona e lē o faavaea i luga o [se] tusiga anamua ae o se mea na tupu i le seneturi lona sefuluiva. (O se talafaatusa e faasino i se tagata po o se mea e tupu po o se mea e le o agatonu le faasologa, e pei o le fai atu na aveina e Julius Caesar lana taavale SUV i Roma.)

Ia, sa ou fai atu i la’u uo ua tuai tele o ia, aua sa i ai sa’u molimau patino i le Tusi a Mamona! Ae, sa ou fai atu ia te ia, “Aumai lau lisi ia te a’u, ma o le a ou teuina.” Sa ou teuina lena lisi ma i le aluga o tausaga, ma a o faia nisi sailiiliga ma suesuega e tagata iloilo eseese ma aoaoga faaakatemia, sa ta’itasitasi ma to’ese mai aitema mai le lisi. Mulimuli ane, i ni nai tausaga ua mavae, sa ou lauga atu ai i se vaega i le Iunivesite o Cornell ma ta’ua ai la’u lisi, ma iloa ai faapea ina ua mavae le tele o nei tausaga sa na o le tasi lava le aitema na totoe—ae e mafai ona ou faatali. Ina ua uma la’u tolaulauga, sa sau se polofesa iloga ia te a’u ma fai mai, “Ia, e mafai ona e aveesea lau aitema mulimuli, aua ua ta’u mai i a matou suesuega e le o se mea faafaatusa.”

Mafaufau mo se minute pe semanu e faape’i lo’u olaga pe ana ou taofiofi lo’u talitonuga maumaututu i le Tusi a Mamona seia oo ina ou taliina fesili uma na tuuina mai e la’u uo ia te a’u. E masani ona ou fai atu faapea, pe a oo mai i upumoni sili ona taua, e leai ni o’u masalosaloga, e ui atonu e i ai ni a’u fesili! E i ai nisi o mea e tatau ona tatou maua ai se talitonuga maumaututu e sili atu i lo o tatou malamalamaaga lē atoatoa ma fesili vave. Na faasino mai e Moronae le ala e maua ai le malamalama moni o fesili aupito sili ona taua ma upumoni sili ona musuia.

I le aso 11 Ianuari, 2003, i le Uluai Fonotaga Faaleaoaoga a Taitai i le Lalolagi Atoa, na valaau mai ai Peresitene Boyd K. Packer o le Korama a Aposetolo e Toasefululua i o tatou taitai e “fua mea uma ua e aoaoina e uiga i lou faauuga ma le valaauina agai i upumoni faavae” ma faataoto mai na upumoni. O loo i ai i totonu o i latou le misiona paia a Iesu Keriso ma le Ekalesia sa Ia faatuina; o le aveesea o upumoni taua o le talalelei, o le suia o sauniga, ma le aveesea o ki faaaposetolo i le Liliuese; o le Toefuataiga i lalo o le taitaiga a le Tamā ma le Alo ma e ala mai i le Perofeta o Iosefa Samita o mea na leiloloa; ma le i ai pea o ki faaaposetolo ma faaleperisitua i le Ekalesia i aso nei.

Sa faasino atu Peresitene Packer i le Agaga Paia o se taiala faaleagaga e maua e tagata taitoatasi i le papatisoga ina ia mafai ai ona iloatino ma faamautu i o tatou olaga nei upumoni. Sa faapena foi ona talanoaina e Elder Neal A. Maxwell, o le Korama a Aposetolo e Toasefululua lo tatou tiutetauave e maua faaaliga faaletagata lava ia ina ia mafai e i tatou taitoatasi ona maua se molimau mautinoa o na upumoni e sili ona taua.

O le a tonu lava le natura o le moni o faaaliga ma le molimau a le Agaga?

Mai Faamatalaga i le Malamalama

Ua faapea mai ua tatou i ai i le lotolotoi o se fetauaiga o faamatalaga—komepiuta; polokalama o le teuina o faamatalaga, suesuega, ma le aumaia o faamatalaga; upega fesootai; atamai faafoliga; satelite o fesootaiga; televise ma telefoni. E ui ua lofituina i tatou i faamatalaga, ae e toatele o loo malelemo i le lē malamalama. O le mea moni, e oo lava i totonu o le matalalaga o lenei taua tele faalelalolagi, o se mataupu autu o le auala tatou te faaliliuina ai faamatalaga e avea ma malamalama---le auala tatou te faafetaui ai fasi mea, o faamatalaga, i mamanu faapena e mafai ona tatou faapea atu ai ua tatou iloa se mea. O le taimi lava e tuufaatasia ai faamatalaga e avea ma malamalama, e faapefea ona tatou iloa o le mea ua tatou iloa e sa’o pe atoatoa? E ioeina foi e saienitisi ma le au faifilosofia e faapea, i se tulaga taua, tatou te le ioeina. O mea uma tatou te iloa, e na ona moni lava e tusa ma le mamao o lo tatou iloa, e faalagolago i nisi faamatalaga ma ni faata’ita’iga ese e faaalia.

Peitai, o nisi taimi, tatou te fenumia’ia ai lo tatou iloa ma mea ua iloa. I se talatomua i le New York Times, e faitauina o le “Mass Found in Elusive Particle; Universe May Never Be the Same” (June 5, 1998). Na fautuaina mai e le tusiga e faapea, o le taimi nei ua iloa e saienitisi e i ai tino o le niuterino, o le a telegese ai le faalauteleina o le atulaulau. I se isi itu ou te manatu e tutusa lava le atulaulau i le asō e pei o le aso a o lei toe iloiloina e le vaega faasaienitisi ona manatu!

O le mea lea, e mafai ai, ona iloa e aunoa ma le iloaina. O le mea moni, ua tusia e faapea i le Fono i le Lagi, o Satani, o le sa i ai moni lava le tele o faamatalaga, “sa le iloa e ia le mafaufau o le Atua … o le mea lea na saili ai o ia e faaumatia le lalolagi” (Mose 4:6). Sa talanoa Paulo e uiga ia i latou o e “aoao pea, ma e le mafai lava ona oo ina malamalama i le upumoni” (2 Timoteo 3:7). Na valoia e Amosa e faapea, i o tatou aso o le a i ai se oge o le malamalama ma sa talanoa Moronae e uiga i se veli o le le talitonu lea e mafua ai ona tumau pea tagata i le tauaso o o latou mafaufau (Eteru 4:15).

I le isi itu, ua poloai mai le Alii ia tatou auauna atu ia te ia ma o tatou mafaufau atoa (Mataupu Faavae ma Feagaiga 4:2) ma ia tatou saili e aoao e ala i le suesue ma le faatuatua (Mataupu Faavae ma Feagaiga 88:118). Ua Ia fautuaina i tatou e saili i le malamalama o atunuu ma malo, o le talafaasolopito ma le natura, o mea ua tuanai, o mea o loo i ai, ma mea o le a oo mai (Mataupu Faavae ma Feagaiga 88:79; 93:24, 53). Ua Ia folafola mai o le a aveesea le veli mai o tatou mafaufau (Mataupu Faavae ma Feagaiga 10:1) ma o le a faamalamalamaina e le Agaga (Mataupu Faavae ma Feagaiga 11:13). O se taunuuga, o le a tatou saoloto ma paia (Helamana 14:30; Mataupu Faavae ma Feagaiga 20:31). E iloa foi e outou le mea moni, e tuu saoloto foi tatou e le upu moni (loane 8:32).

Saoloto mai le a? Mai le lē malamalama, agasala, ma tiga o le oti. “Afai e te ole mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau” (Mataupu Faavae ma Feagaiga 42:61).

O Le Uiga o le Malamalama Faaleagaga—O Le Mamanu Faalelagi

I vaega uma o le atamai faaletagata, e toetoe lava o fautuaga uma e mafai ona lolo atu i le fesili “aisea?” E malamalama matua uma i lenei mea. Ae, i le mavae ai o se fefulisa’iga umi o le “aisea” e te oo ai i se tulaga e na o le pau le tali o le, “Ia, ona ua pau lava!” O le mea moni, ua tatou fai atu ona ua pau lava o le ala ua tuufaatasia ai le lalolagi. Ua tatou iloa foi e i ai taimi e faatoilaloina ai nei “upumoni faavae” e ala i faamaoniga faaopoopo. O fetaua’iga lava na i le talafaasolopito o saienisi. Pe leai ea se mea e le mafai ona faavaeina mulimuli e aunoa ma le faatalitali mo se isi aafiaga? Ioe.

O loo i ai i lenei olaga ni upumoni patino e matua taua tele ma e tatau ona faamautuina ma le mausali i o tatou mafaufau ma loto lea e le manaomia ai se isi faamaoniga o lo latou moni. Ina ia faafetaia’ia tofotofoga o le olaga faaletino, ua saunia ai e lo tatou Tama Faalelagi se molimau mautinoa o na malamalamaaga taua lea e mafai ona tatou faafetauia le malamalama faaopoopo ma le poto tatou te ono maua mulimuli ane. Atonu tatou te le iloa tali uma; o le mea moni, atonu tatou te le malamalama i fesili uma—ae o le a tatou faavaeina i o tatou olaga se auivi faapitoa o le malamalama lea o le a tuuina mai ai e le gata o se faavae faaleatamai ma faaleagaga e le maluelue, ae [o le a suia ai foi] o tatou lava olaga.

O le a le molimau lea e tuuina mai ia i tatou le malamalama e sili atu nai lo le malamalama i sane? O Le Molimau a le Agaga Paia. O le malamalama e maua mai le Agaga Paia e tolu ona vaega [autu]: muamua, e faatatau i upumoni aupito sili ona taua ma maoae; lona lua, e maioio i lona mautinoa; ma le lona tolu, e suia ai le amio.

O le malamalamaaga e tuuina mai i le molimau a le Agaga Paia e maua mai ai, i le taimi muamua, se atatosi o le malamalama—avanoa e mafai ona ofi ai le malamalama faaopoopo. O le isi auala e faaupu ai e faapea, e tuuina mai e le Agaga Paia ia i tatou se malamalamaaga o uluai mataupu faavae o le poto. Tou te manatua na tautino mai e le Faifaataoto o le amataga o le poto o le mata’u lea i le Alii.

Na saunoa le Perofeta o Iosefa Samita e faapea, e tolu lava mea mautinoa e tatau ai mo se alii po o se tamaitai e onosaia ai tofotofoga o le olaga: O se malamalama o loo soifua le Atua; o se malamalamaaga i Lona natura, uiga faaleatua, ma atoatoaga; ma o se talitonuga maumaututu o le ala o le olaga o loo tatou tulitulimatagauina e ogatusa ma Lona finagalo.

I le avea ai ma se tagata aoga i le kolisi, sa ou aoaoina ai o le uluai mataupu po o le fautuaga o se soloaiga o manatu e taua tele. E mafai e se tasi ona galue e ala i ni laina atamai ma lavelave o mafaufauga, ia e foliga mai e lava le faatauanau i laasaga taitasi i manatu, ae, afai e sese pe le atoatoa ia mataupu, o le a sese foi le faasologa atoa o mafaufauga, e tusa lava po o le a le atamai o faaiuga.

Mo se faataitaiga, afai tatou te amata i le manatu faapea na tulai faafuasei mai le olaga ma o lona atinaega e tele lava ina le fuafuaina, o le a tatou faaliliuina faamatalaga faaletino, faapaiolosi, ma faaagafesootai po o faamatalaga i se auala faapitoa, o se auala o le a faauiga sese ma nutililii ai lo tatou malamalama. O na mafaufauga o le a i ai taunuuga i le auala e faagaoioia ai lo tatou sosaiete ma le ala tatou te faatino ai. Afai, i se isi itu, tatou te amata i le manatu faapea o le olaga faitino e tupu mai i le mamanuina ma o le a atiina ae e tusa ai ma le tulafono e faavavau, o le a tatou malamalama i vae ma fasi vaega o a tatou faamatalaga i se auala e ese mai, o le a tatou vaaia le fesootaiga ma le atoatoa o le olaga. O le a tatou malamalama i le faatulagaga o le upumoni, o le a tatou vaaia mamanu ma faamoemoega ia e vaai ai isi i faaletonu ma avanoa. Sa malamalama Iopu i le taua tele o le uluai mataupu faavae ina ua ia tautino mai, e oo lava i le loloto o lona pagatia:

“Ae o le poto e maua lea i fea? po o ifea foi le mea o i ai le mafaufau? … Na fetalai mai foi o ia i le tagata, Faauta, o le mata’u i le Alii, o le poto lava lea; o le alo ese i le amio leaga o le mafaufau lea” (Iopu 28:12, 28).

O le tele o mafuaaga faaletagata e faagaeetia—o ia lava mai le faapogai e faavavau ma le paia ma faamalamalamaina i le fanau mai e ala i le malamalama o Keriso—ae aua nei o tatou manatu faatauvaa i le vaapiapi o le vaaiga e tulai mai i le tulitulimatagauina o le upumoni e ese mai le Atua. Ua faateleina lo’u taia i tapulaa ma le matautia o le mea o le a ta’ua e Paulo o le mataupu faalemafaufau o le “faaletino” faalelalolagi, sosaiete o tagata, filosofia, saienisi faaupufai, tusitusiga, tala faatino, musika, fisiki, kemisi, ma le paiolo.

E le tatau ona saisaitia i tatou i fauga faafaatusa po o faamatalaga e taofia ai i tatou mai le “sopo tuaoi i tapulaa o taimi.” E tatau ona tatou teenaina le manatu o le soona faia o soo se mea ma le leai o se faamoemoe lea e fautuaina ai i tatou e fai atu ni fesili sese, taulai atu i mea e na o sina taimi ae maumau ai mea e tumau, faia o ni mea e le fetaui, ma fautua atu ni fautuaga e le atoatoa pe le talafeagai. I se aotelega, e lamatia lo tatou talai atu e avea ma upumoni e faatuina le mataupu mo na o sina taimi a tagata, i le vaai atu i ai, e pei ona ta’ua e Paulo, “ua vaavaai ai faanenefu i le faaata,” ae ua aumaia i tatou e lo tatou Tama Faalelagi e vaai ia te Ia “fesagai.” E pei ona tusia e Paulo, “o nei onapo ou te iloa ai faaleatoa [ina ua faapupulaina e le faaaliga a le Agaga Paia], ou te iloatino ai, pei ona iloatinoina o au” (1 Korinito 13:12).

O nei mea uma o le mafuaaga lea ua fautuaina ai i tatou e perofeta e suesue mae’ae’a le loloto o tusitusiga paia ma upu a perofeta soifua i le faatuatua ma le tatalo. I lena lava galuega, o tusitusiga paia, i lalo o le taitaiga a le Agaga Paia, o loo aofia ai le “taiala moni i e ua fememeai.”

Lua, e pei ona fautuaina mai, o lenei malamalama e maioio. E ui o o tatou aafiaga, matauga, ma mafaufauga lelei e ono taitai atu ai i tatou i ni faaiuga patino, ae e le mafai lava ona latou faamalosia le talitonuga maumaututu lea e aveesea ai le masalosalo ma faaosofia ai le tumau. Na fetalai atu Iesu ia Peteru e lei ta’ita’i atu o ia e “se tagata” ia malamalama o Iesu o le Keriso ae o lona “Tama o i le lagi” (Mataio 16:17). E pei ona tusia e Paulo, “E leai lava se tagata e tautala i le Agaga o le Atua na te tauanatemaina o Iesu” (1 Korinito 12:3). O mafai ona e vaai pe aisea ua avea ai o se mea taufaafefe le faafitia o le molimau a le Agaga Paia? E le pei o isi faamaoniga, e faamuta ai le finauga. O lena faamaoniga e ala i le Agaga e tauaveina se talitonuga maumaututu e le mailoa i soo se isi lava vaega o mafaufauga. Atonu e tele ni faataitaiga faafilosofia e faatatau i le i ai o le Atua po o le paia o le tulaga faale-alo o Iesu, po o le moni o le Toefuataiga, ae o loo tumau pea i le tulaga o le taumatemate, e tusa lava po o le a le talitonuina.

O le taimi lava e saili ma maua ai e se tasi le molimau a le Agaga Paia, e amata ai loa e se tasi le matafaioi e suia ai le olaga. Ua fautua mai i lenei mea le uiga lona tolu o lenei malamalamaaga e uiga i le Agaga. E suia ai. Na tusia e Paulo e faapea sa ia te ia le “mafaufau o Keriso” (2 Korinito 2:16), ma sa tautino mai e le nuu o le Tupu o Peniamina ua “le toe i ai so latou manao e fai mea leaga, ae ia faia mea lelei e le aunoa” (Mosaea 5:2). O le mauaina o le molimau a le Agaga, sa valaauina ai i latou ma tali atu i le Agaga. O le iloaina o Keriso e ala i le Agaga, tatou te alolofa ai ia te Ia ma tausi Ana poloaiga—ma ua atili faamafanafanaina ai i tatou ma aoaoina e le Agaga, seia oo ina pei ona tautino mai Mamona, “pe a afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; ina ia mafai ona faamamaina i tatou e pei lava ona mama o ia” (Mamona i le Moronae 7:48; tagai foi 1 Ioane 3:1–3).

I lana tusi i le au Roma, na tusia ai e le Aposetolo o Paulo:

“Aua foi atu tou te amio faatasi ma [le] lalolagi: ae peitai ia liliuina i le toefuatai[ina] o outou loto, ina ia [e] suesue pe se a le finagalo o le Atua, i mea ua lelei, ma le malie, ma le atoatoa” (Roma 12:2).

Ua faailoa e Paulo le eseesega i le va o se natura faaletagata e taitai sese e le le usiusitai ma talitonuga sese, ma le tagata e faalagolago i le Atua ma faafouina e le Agaga Paia. Sei iloga lava e amata ona tupu lenei faafouga tatou te iloa ai po o a fesili sa’o ma iloa po o a mea e tatau ona tatou tatalo atu ai. (Tagai Roma 8:6–8, 26–27) A o galue le Agaga i totonu o i tatou, ua tatou maua se “saunia o le mafaufau” e iloatino ai le upumoni ma mafai ai ona maua “le mafaufau o Keriso” (Galuega 17:11; 1 Korinito 2:14, 16).

Ua finau Alema a o tatou gauai atu o tatou loto i le Tama e ala i le faatuatua ia Keriso, o lo tatou malamalama “ua amata ona faamalamalamaina o [tatou] malamalamaaga ma ua amata ona faalauteleina o [tatou] mafaufau” (Alema 32:34). I aso e gata ai na fetalai mai ai le Alii e faapea na te “manaomia le loto ma le mafaufau malie” (Mataupu Faavae ma Feagaiga 64:34) ma fautuaina i tatou e “teu i o tatou mafaufau e le aunoa afioga o le ola” (Mataupu Faavae ma Feagaiga 84:85), faapaiaina i tatou lava ina ia “tau-tasi o tatou mafaufau i le Atua, ma o le a oo mai aso o le a tatou vaai ai ia te Ia; ona o le a afe ese e Ia le veli mai Ona fofoga ia te i [tatou]” (Mataupu Faavae ma Feagaiga 88:68).

O le mana liua o le malamalama faaleagaga e le faatapulaaina i le tagata. E pei ona matauina e Paulo, a o gauai atu e i tatou o se nuu o tatou loto i le Atua ma faia o tatou mafaufau ia tau-tasi ia te Ia, o le a faaatoatoaina le nuu o le au paia, ina ia leai se fevaevaeaiga ia i tatou ma o le a “a ia maopoopo lava i le loto e tasi ma le manatu e tasi” (1 Korinito 1:10, tagai foi Roma 14:1, 5, 19).

O Mea e Moomia mo le Mauaina o le Malamalama Faaleagaga

E faapefea ona tatou mauaina lena malamalama atoatoa, maioio ma liua ai? Sei o tatou mafaufau i itu e fa o mea e manaomia mo le mauaina o le malamalama faaleagaga: muamua, o se sailiga faanatinati mo le upumoni; lona lua, o se naunautaiga e usiusitai i le upumoni ua faapea ona iloa; tolu, o se manao e molimau atu i le upumoni i nofoaga uma ma i taimi uma; ma le, lona fa, o se uunaiga e auauna atu i isi i le upumoni.

Mauaina Gofie ma le Aoaoina Ma le Filiga: O Se Ituaiga o Lotomaualalo

Muamua, ona tatau lea ona tatou tatala atu i le aoao atu ma le filiga i la tatou sailiga o le aoaoina o le Agaga. O sea sailiga e manaomia ai se lagona o o tatou lava manaoga ma e sili atu nai lo se naunau faasamasamanoa i tali tatou te sailia. Ua tautino mai e le Alii e faapea, o i latou o e fia aai ma fia feinu i le amiotonu o le a faatumuina i le Agaga Paia (Mataio 5:6; 3 Nifae 12:6), ae na Ia fetalai foi, “Oi talofa ia te outou o e ua maoona! Aua e fia aai outou” (Luka 6:25). Sa tautino atu e le Alii ia Ioane le Talifaaaliga o le a Ia teena i latou o e e faaleogalua, e le malulu pe vevela, i le mauaina o le lagona ua lava lo latou ola tutoatasi ma ua leai se mea e manaomia (Faaaliga 3:16–17).

O loo i ai se tala faapea na sau se alii talavou ia Sokarate, le faifilosofia Eleni anamua, ma talosaga ina ia aoaoina i le poto. Ua lipotia mai faapea, na vave lava ona u’u mai e Sokarate le taulealea ma lolomi i totonu ma taofi lona ulu i lalo o le vai o se tama’i alia e lata ane seia iu ina ia tuu o ia e ea i luga, ua tau manava. Ona fai atu lea o Sokarate, “Pe a e manao i le poto e faapei ona e manao tele i le ea, ona mafai lea ona ou aoao oe.”

I upu a Robert Frost, e tatau ona tatou o tele i tai i le loloto o le vai o a tatou tautinoga pe afai e mananao ia ausia se mea e tumau. Sa faapipii e le Perofeta o Iosefa Samita le sailiga mo le malamalama moni i le ositaulaga ma fautuaina e mafai e se tasi ona iloa le upumoni pe afai lea ua saunia se tasi e ositaulagaina mea uma (Sixth Lecture on Faith).

E ese mai i lena fiaaai ma le fia inu o le mea lea e ta’ua e perofeta o le “maaa o le loto”, o se le mafai ona vaai po o le a moni lava, ia faalogo i le mea moni o loo tautalagia, ma ia lagonaina ma se loto faamaoni. O C. S. Lewis i lana voluma faaiu o tala o le Narnia The Last Battle (“How the Dwarfs Refused to Be Taken In,” 143–48), o loo tusia ai le auala, ina ua uma ona faatoilaloina ’au a le White Witch e Asla le Leona (ma o le faatusa o Keriso) ma ona soo, o falepuipui ma filifili ia na saisaitia ai o ia, na tele naua na mou ese. I totonu o se pa o le falepuipui, sa saisaia ai i se li’o se vaega o tagata pupuu. Na faafuasei lava, ona mou ese atu le pa ma a latou filifili, ma sa latou saoloto. Ae sa latou mumusu e talitonu i lo latou lava faasaolotoga ma nonofo ai i totonu o la latou lio putuputu, e le lagonaina le ea fou, pe vaaia le la, pe sosogiina foi fugalaau. E oo lava i le tagi leotele o Aslan i o latou taliga e faaosofia i latou, ae sa latou aveseseina le tagi e faapea o se faititili po o se togafiti. E pei ona matauina e Aslan, sa oo ina latou fefefe i le aveesea o i latou mai le falepuipui lea ua avea nei ma o latou lava mafaufau. Sa matauina e Aslan i se tasi taimi, “Oi, atalii e o Atamu, e maeu lou atamai e puipuia oe lava mai mea uma atonu e te manuia ai” (C. S. Lewis, The Magician’s Nephew). E pei ona tusia manino e Nifae:

“Ma o lenei, o aʼu o Nifae, … ma tuua aʼu ou te faanoanoa ona o le lē talitonu, ma le amioleaga, ma le valelea, ma le ua maaa o tagata; ona latou te lē fia saili le poto, pe fia malamalama i le poto silisili, e ui ina tuu mai ia te i latou i le manino, e tusa ma le manino e mafai ona oo i ai se upu” (2 Nifae 32:7).

E toatele e le mafai ona lagona musumusuga a le Agaga pe maua le upumoni ona o lo latou faamalamalamaina o mea ofoofogia manino na tutupu o le a avea ma ‘alofaga. E tele suesuega e uiga ia Keriso e saili e faamalamalama ai Lana misiona ma faatosinaga e ala i le faamalamalamaina o Lona tulaga paia o le alo, ma o isi e saili e faamalamalama le Perofeta o Iosefa Samita e ala i le faamalamalamaina o lona valaauga faaperofeta. E pei ona matauina ma le poto e Iakopo, o se mea valea le tuuina atu o le talitonuga tele i a tatou matauga ma le malamalama faatapulaaina ma teena le poto lea e sau mai le Agaga Paia. Ae, na ia faaiu, “e lelei le aoaoina pe afai [tatou] te faalogologo i fautuaga a le Atua” (2 Nifae 9:28–29).

Ina ia aoaoina i le poto e ala i le Agaga, e tatau ona tatou saunia e faaalu mea uma ua tatou i ai i lona tulitulimatagauina, o se suesuega e faatelevaveina e le tele o tatalo ma le anapogi. O loo faapea mai na “anapogi ma tatalo Alema i aso e tele” ina ia iloa (Alema 5:46). E manaomia ai la, e le gata i le maelega ma le suesue ma le agaga tatalo ae o le ositaulagaina o mea atonu e taua ia i tatou, e oo lava i a tatou lava agasala, o na elemene o “o tatou ituaiga olaga” lea e faalavelave i le aoaoina. E tatau ona tatou faia e pei ona tautino mai e le tamā o Lamonae lona manao ia iloa le Atua: “O le a ou lafoai ese a’u agasala uma ina ia ou iloa oe” (Alema 22:18). O upu mulimuli a Iakopo o loo aumaia ai le aotelega atoa o le mataupu: “E, ia outou atamamai! O le a se isi mea e mafai ona ou fai atu?” [Iakopo 6:12].

Usiusitai

O le tulitulimatagauina ma le filiga o le upumoni, o lea e tatau ai ona tatou saunia e usitai i le upumoni. Ua tautala Alema e uiga i le fagua ma le faaosofia o o tatou mafaufau (o lona uiga, o o tatou loto ma mafaufau) ina ia tofotofo ai i le afioga (Alema 32:27). E mautinoa lava o lenei mea e le o faasinoa i le aoaoina lē tinoa, ae o le faatino moni. Sa faatonuina e le Aposetolo o Ioane i latou o e fai mai ua latou iloa Keriso ae ua le mulimuli i Lana fautuaga: “O se faapea ua ou iloa o ia, ae le tausi e ia i ana poloaiga, o le pepelo lava lea, e le o i totonu ia te ia le upumoni” (1 Ioane 2:4). E pei ona tautino mai e le Alii i le Mataupu Faavae ma Feagaiga, “Ma e leai se tagata na te mauaina se atoatoaga [o le upumoni] vagana ai ua tausi e ia ana poloaiga. O ia o le e tausia Ana poloaiga, e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma” (Mataupu Faavae ma Feagaiga 93:27–28).

O lea saili ma mulimuli ai e ono manaomia ai foi le onosai, ma faatalitali i le Alii, o lē na fetalai mai, “Faauta, o outou o ni fanau laiti ma e le mafai ona outou gafatia mea uma i le taimi nei; e ao ina outou tutupu a’e i le malosi faaleagaga ma i le malamalama o le upumoni” (Mataupu Faavae ma Feagaiga 50:40). Ma e pei ona matauina e Elder Neal A. Maxwell, “O le maoae o le paleni i le va o le sailia ma le lotomalie e faatalitali ai mo se poto ma se malamalama atili o le a foliga mai e le o se galuega laitiiti!” (We Talk of Christ, We Rejoice in Christ, Salt Lake City: Deseret Book, Co., 1984], 93).

O le saili ma le filiga, aoaoina, ma le mulimuli ai, faatasi ai ma le faatalitali ma le onosai sa lauiloa i upu a John Henry Newman: “Ou te le o ole atu e vaai i se vaaiga mamao—ua lava le laa e tasi mo au” [Hymns, no. 97]. A o tatou mulimuli i le upumoni i le usiusitai, e matala lautele atu ai ala o le upumoni i la tatou vaai, ma tatou tuputupu ae i o tatou foliga i le upumoni. O loo i ai se uiga loloto i le fetalaiga a Keriso “O A’u o le upumoni” e o faatasi ma Lana valaau ia avea e pei lava o Ia.

Molimauina ma le Auaunaga

O le mea mulimuli, afai tatou te mananao ia maua le malamalama faaleagaga, e tatau ona tatou saunia e molimau atu i le upumoni lea ua tatou maua ma naunau e auauna atu ma faagaeetia isi i le upumoni, ua i ai, e pei o Enosa, “se naunauga mo le manuia o [tatou] uso” (Enosa 1:9).

I lana valaaulia i le nuu o le Tupu o Noa e ulu ifo i le vai o le papatisoga i le feagaiga ma le Alii, sa faaalia ai ma le ofoofogia e Alema le Matua le sootaga o le molimauina ma le auauna atu i le upumoni na maua ia Keriso ma e ala mai i le Agaga Paia. O fua o le upumoni ua maua o se naunautaiga e faamafanafana ma tauave avega a le tasi ma le isi ma ia “tutu o ni molimau a le Atua i taimi uma ma i mea uma” (Mosaea18:8–9). E le gata i lea, o le amiosa’o e faaalia i se olaga o le tautala-i mea moni ma le faia o mea lelei e matala lautele ai lava ia tafa’ilagi o le upumoni. Ona faataunuuina ai lea o le folafolaga a le Alii i o tatou olaga: “Ona solo malosi ai lea o lou lototele i luma o le Atua; ma to ifo i luga o lou agaga le mataupu faavae o le perisitua e pei o le sau mai le lagi. O le a avea le Agaga Paia ma au soa e le aunoa” (Mataupu Faavae ma Feagaiga 121: 45–46).

O le faapaiaina i mea ua tatou iloa, tatou te maua ai le talitonuga maumaututu lea e aveesea ai le masalosalo ma le fefe ma, faatasi ai ma le Aposetolo o Paulo, e mafai ona faafetaiaia luitau o le olaga ma le “susulu atoatoa o le faamoemoe” lea e leai se mea “e le mafai e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii” (2 Nifae 31:20; Roma 8:39).