Faatomuaga

Faiaoga pele o le inisitituti,

I lenei faasalalauga o aoaoga faaletausaga ia Ianuari 2024 S&I, na taua ai e Elder Clark G. Gilbert, “Ao tatou faaauau ona faaaogaina nei aoaoga e faateleina ai le taua ma le faigofie ona maua le inisitituti, ou te fia tuuina atu se valaaulia i faiaoga taitasi o a tatou inisitituti e sue ni avanoa e atia’e ai mafutaga faaleaoaoga tulimata’i, e taulai i faamamafa faaperofeta ua matou otooto atu. Ou te uunaia outou ina ia tuuina atu se gauai faapitoa i aoaoga a Peresitene Nelson, faatasi ai ma se faamamafa i lana savali taula, “Filifiliga mo le Faavavau” (Clark G. Gilbert, “Fetalai Mai, le Alii e; mo Lau Auauna” [faasalalauga faaletausaga a le S&I, 26 Ian., 2024], Potutusi o le Talalelei).

E pei ona outou iloa, o le lauga a Peresitene Russell M. Nelson i le faasalalauga i le lalolagi atoa ia Me 2022 mo talavou matutua ua faaulutalaina “Filifiliga mo le Faavavau” ua faasino patino atu i talavou matutua ma e faatusa moni lava i le siufofoga o le Alii ia i latou i o tatou aso (tagai Mataupu Faavae ma Feagaiga 68:4). I le avea ai ma faiaoga o le inisitituti, ua ia te outou le avanoa faapitoa ma le avanoa e fesoasoani ai e faalautele le siufofoga o le perofeta a le Alii. Faamolemole tuu se manatu faapitoa ma se taumafaiga e tuuina atu ai se aafiaga e aoao ai lea e mafai ai e talavou matutua ona malamalama, lagona, ma faaaoga aoaoga o le lauga a Peresitene Nelson “Filifiliga mo le Faavavau.” O anomea o loo i ai faatasi e mafai ona fesoasoani ia te oe i au taumafaiga.

O loo aofia ai i nei anomea se seti o lesona e lua e mafai ona faaaoga e tuuina atu ai se aafiaga e aoao ai e pei o se aoaoga e faavae i le lauga a Peresitene Nelson. E le o faamoemoe e te aoaoina atu nei lesona i le faaupuga. Ae, o nei lesona o se punaoa a o e saunia se aafiaga o le aoaoina i le aoaoga mo au tamaiti aoga. Ia e lagona le saoloto e fetuunai e pei ona musuia ai oe. I le amataga o fuafuaga o lesona, o le a e matauina ai nisi o taunuuga o le aoaoina ua ta’ua. A o e fuafuaina au gaoioiga e aoao ai mo le aoaoga, ia manatua nei taunuuga ma saili e fuafua ni gaoioiga e aoao ai o le a fesoasoani i tamaiti aoga e ausia ai nei taunuuga. Ua faamoemoe e mafai ona faia lenei aoaoga i ni vasega se lua pe tolu, e faalagolago lea i le umi o vasega taitasi.

A o e saunia lau aoaoga, ia manatua la tatou tiute e tuuina atu ni aafiaga e totonugalemu ia Keriso, e faavae i tusitusiga paia, ma taulai atu i tagata aoao ma faatumulia o tatou aafiaga faaleaoaoga ma le aoaoina i musumusuga ma molimau a le Agaga Paia (tagai Chad H Webb, “Messengers of the Good News” [faasalalauga faaletausaga a le S&I, 27 Ian., 2023], Gospel Library). Ia saili foi e faatino mataupu faavae o aoaoga faaKeriso o loo maua i le Aoao Atu i le Ala a le Faaola.

Matou te tulimatai atu i aafiaga matagofie o le a maua e a outou tamaiti aoga i le taumamafa i afioga a Keriso e pei ona aoao mai e Peresitene Nelson i lenei lauga iloga. Faafetai mo lo outou faatuatua ma molimau ma a outou taumafaiga uma e faamanuia le autalavou matutua o loo outou auauna atu i ai.