« ថ្ងៃទី ១០ ខែ មករា ។ ហេតុអ្វីការនិមិត្តដំបូងសំខាន់ ? សេចក្ដីផ្ដើមនៃ គោលលទ្ធិ និង សេចក្ដីសញ្ញា; យ៉ូសែប ស្ម៊ីធ—ប្រវត្តិ ១:១–២៦ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១ ( ឆ្នាំ ២០២០ )
« ថ្ងៃទី ១០ ខែ មករា ។ ហេតុអ្វីការនិមិត្តដំបូងសំខាន់ ? »ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១
ខ្ញុំបានឃើញពន្លឺ ដោយ ចន ម៉ាក់នូតុន
ថ្ងៃទី ១០ ខែ មករា
ហេតុអ្វីការនិមិត្តដំបូងសំខាន់ ?
សេចក្ដីផ្ដើមនៃ គោលលទ្ធិ និង សេចក្ដីសញ្ញា; យ៉ូសែប ស្ម៊ីធ—ប្រវត្តិ ១:១–២៦
ប្រឹក្សាជាមួយគ្នា
ដឹកនាំដោយសមាជិកម្នាក់នៅក្នុងកូរ៉ុម ឬគណៈប្រធានថ្នាក់ រយៈពេលប្រហែល ១០–២០ នាទី
នៅដើមការប្រជុំ សូមសូត្ររួមគ្នានូវបាវចនាកូរ៉ុមបព្វជិតភាពអើរ៉ុន ឬ បាវចនាក្រុមយុវនារី ។ រួចហើយ សូមដឹកនាំការពិភាក្សាអំពីចំណុចដូចខាងក្រោមនេះ ហើយដាក់ផែនការពីរបៀបដើម្បីអនុវត្តតាមអ្វីដែលបងប្អូនពិភាក្សា ( បងប្អូនអាចសម្រេចចិត្តនៅក្នុងការប្រជុំគណៈប្រធានថា តើ ចំណុចមួយណាដែលត្រូវពិភាក្សា ) ៖
-
កូរ៉ុម ឬថ្នាក់របស់យើង ។ តើមាន នរណាម្នាក់ ត្រូវការជំនួយ និងការអធិស្ឋានរបស់យើង ដែរឬ ទេ ? តើយើងអាចធ្វើអ្វីខ្លះដើម្បីជួយដល់ពួកគេ ? តើយើងគួរអញ្ជើញនរណាឲ្យមកចូលរួមសកម្មភាពនាពេលខាងមុខនេះ ?
-
កាតព្វកិច្ច ឬទំនួលខុសត្រូវរបស់យើង ។ តើយើងបានបំពេញកិច្ចការអ្វីខ្លះ ? តើយើងត្រូវធ្វើកិច្ចការអ្វីខ្លះ ? តើយើងបានអញ្ជើញមនុស្សដទៃឲ្យមករកព្រះគ្រីស្ទដោយរបៀបណា ហើយតើយើងអាចអញ្ជើញមនុស្សដទៃនាពេលនេះដោយរបៀបណា ?
-
ជីវិតរបស់យើង ។ តើបទពិសោធន៍ថ្មីៗអ្វីខ្លះដែលបានពង្រឹងទីបន្ទាល់របស់យើង ? តើមានអ្វីកំពុងកើតឡើងនៅក្នុងជីវិតរបស់យើង ហើយតើយើងអាចគាំទ្រគ្នាទៅវិញទៅមកតាមរបៀបណា ?
នៅចុងបញ្ចប់នៃមេរៀននេះ សូមធ្វើនូវអ្វីខាងក្រោមនេះទៅតាមការគួរ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកកូរ៉ុម ឬថ្នាក់អំពីផែនការ និងការអញ្ជើញទាំងឡាយដែលបានដាក់នៅក្នុងអំឡុងពេលនៃការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬយុវវ័យម្នាក់ រយៈពេលប្រហែល ២៥–៣៥ នាទី
រៀបចំខ្លួនខាងវិញ្ញាណ
ទោះជាវាបានកន្លងទៅជាង ២០០ ឆ្នាំហើយក្ដី តាំងពីយ៉ូសែប ស្ម៊ីធ បានលុតជង្គង់ចុះអធិស្ឋានជាលើកដំបូងនៅក្នុងព្រៃពិសិដ្ឋ ចម្លើយដែលលោកបានទទួលនោះក៏មានឥទ្ធិពលលើជីវិតរបស់យើងនាសព្វថ្ងៃនេះយ៉ាងខ្លាំងដែរ ។ សូមសញ្ជឹងគិតពីពរជ័យនានា ដែលបានកើតមានក្នុងជីវិតរបស់បងប្អូន ដោយសារព្រះវរបិតា និងព្រះរាជបុត្រាបានបង្ហាញព្រះកាយដល់យ៉ូសែប ។ ហេតុអ្វីវាសំខាន់ដល់អ្នកដែលបងប្អូនបង្រៀន ឲ្យទទួលបានសាក្សីផ្ទាល់ខ្លួនរបស់គេអំពីការនិមិត្តដំបូងមកពីព្រះវិញ្ញាណបរិសុទ្ធ ? តើបងប្អូននឹងជួយពួកគេឲ្យធ្វើការណ៍នេះដោយរបៀបណា ? វាអាចផ្តល់ជាអត្ថប្រយោជន៍ដល់បងប្អូន ដើម្បីរំឭកសារលិខិតមកពីសន្និសីទទូទៅ ខែ មេសា ឆ្នាំ ២០២០ ដែលបានប្រារព្ធរំឭកខួបលើកទី ២០០ នៃការនិមិត្តដ៏រុងរឿងនេះ ។
យុវវ័យម្នាក់ៗអាចទទួលបាននូវទីបន្ទាល់ផ្ទាល់ខ្លួនមួយអំពីការនិមិត្តដំបូង ។
រៀនជាមួយគ្នា
ដោយសារ យ៉ូសែប ស៊្មីធនៅជាយុវវ័យនៅឡើយពេលទទួលបានការនិមិត្តដំបូង នោះអស់អ្នកទាំងឡាយដែលបងប្អូនបង្រៀនអាចយល់ពីការស្វែងរកសេចក្ដីពិតរបស់លោក ។ សូមផ្ដល់ពេលឲ្យសមាជិកក្នុងកូរ៉ុម និងថ្នាក់ចែកចាយគំនិត និងចំណាប់អារម្មណ៍របស់ពួកគេអំពីយ៉ូសែប ស៊្មីធ—ប្រវត្តិ ១:១–២៦ ។ សកម្មភាពខាងក្រោមនេះអាចជួយពួកគេឲ្យពង្រឹងទីបន្ទាល់របស់ពួកគេថា ព្រះជាព្រះវរបិតា និងព្រះយេស៊ូវ គ្រីស្ទបានបង្ហាញព្រះកាយដល់យ៉ូសែប ស្ម៊ីធ ។
-
តើយើងរៀនសេចក្ដីពិតនៃដំណឹងល្អអ្វីខ្លះ មកពីបទពិសោធន៍របស់យ៉ូសែប ស៊្មីធនៅក្នុងព្រៃពិសិដ្ឋ ? សមាជិកកូរ៉ុម ឬថ្នាក់អាចអានដំណើររឿងរបស់យ៉ូសែបនៅក្នុង យ៉ូសែប ស៊្មីធ—ប្រវត្តិ ១:៧–២០ ហើយចែកចាយសេចក្ដីពិតនានា ដែលពួកគេរកឃើញ ។ ( ឧទាហរណ៍ ព្រះទ្រង់ព្រះសណ្ដាប់ និងឆ្លើយតបនឹងការអធិស្ឋាន; សាតាំង និងអំណាចរបស់វាមានពិត ប៉ុន្ដែព្រះចេស្ដារបស់ព្រះគឺអស្ចារ្យជាង; វិវរណៈមិនបញ្ចប់ឡើយ ) ។ តើសេចក្ដីពិតទាំងនេះផ្តល់ពរជ័យដល់ជីវិតរបស់យើងដូចម្តេចខ្លះ ?
-
បងប្អូនក៏អាចសូមឲ្យសមាជិកកូរ៉ុម ឬថ្នាក់រំឭកសារលិខិតអំពីការនិមិត្តដំបូងផងដែរមកពី សន្និសីទទូទៅ ខែ មេសា ឆ្នាំ ២០២០ ( សូមមើល Liahona ខែ ឧសភា ឆ្នាំ ២០២០ ) ។ ឧទារហណ៍ ពួកគេអាចរំឭកឡើងវិញពីសារលិខិតរបស់ប្រធាន រ័សុល អិម ណិលសុន « ស្តាប់ទ្រង់ » ( Liahona ខែ ឧសភា ឆ្នាំ ២០២០ ទំព័រ ៨៨-៩២ ) ។ សូមឲ្យពួកគេចែកចាយនូវអ្វីដែលពួកគេរកឃើញ និងអារម្មណ៍របស់ពួកគេអំពីការនិមិត្តដំបូង ។
-
ប្រធានសាសនាចក្រមួយរូបៗបានថ្លែងទីបន្ទាល់អំពីបេសសកម្មដ៏ទេវភាពរបស់ព្យាការី យ៉ូសែប ស្ម៊ីធ ។ សមាជិកកូរ៉ុម ឬថ្នាក់អាចទទួលបានប្រយោជន៍ពីការអានទីបន្ទាល់របស់ពួកលោកនៅក្នុងសៀវភៅសិក្សាមួយមកពីការបង្រៀនរបស់ប្រធានសាសនាចក្រ ។ ( សៀវភៅសិក្សាទាំងនេះភាគច្រើនមានមួយជំពូកនិយាយអំពីព្យាការី យ៉ូសែប ស្ម៊ីធ ។ សម្រាប់បញ្ជីស្ដីពីជំពូកទាំងនេះ សូមមើល សេចក្ដីណែនាំដល់បទគម្ពីរទាំងឡាយ « ការនិមិត្ត » នៅលើគេហទំព័រ topics.ChurchofJesusChrist.org ) ។ បងប្អូនអាចអញ្ជើញសមាជិកក្នុងកូរ៉ុម ឬថ្នាក់របស់បងប្អូនពីរបីថ្ងៃមុន ឲ្យជ្រើសរើសយកប្រធានណាម្នាក់ ហើយចែកចាយសេចក្ដីថ្លែងការណ៍មួយដែលលោកបានថ្លែង ដែលពួកគេអាចយកមកប្រើដើម្បីបង្រៀននរណាម្នាក់អំពីការនិមិត្តដំបូង ។
-
សូមពិចារណាអញ្ជើញសមាជិកក្នុងកូរ៉ុម ឬថ្នាក់ឲ្យសិក្សា « ការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទតាមរយៈយ៉ូសែប ស្ម៊ីធ » នៅក្នុងជំពូកទី ៣ នៃសៀវភៅ ប្រកាសដំណឹងល្អរបស់យើង ( [ ឆ្នាំ ២០១៩ ] ទំព័រ ៣៦–៣៨ ) ហើយអនុវត្តបង្រៀនគ្នាទៅវិញទៅមកអំពីការនិមិត្តដំបូង ។ បងប្អូនអាចឲ្យពួកគេចែកចាយបទពិសោធន៍របស់ យ៉ូសែប ស៊្មីធ ដោយប្រើសម្ដីរបស់លោកផ្ទាល់ខ្លះដែលមាននៅក្នុង យ៉ូសែប ស៊្មីធ—ប្រវត្តិ ១:១៦–១៧ ។
-
តើអស់អ្នកទាំងឡាយ ដែលបងប្អូនបង្រៀនដឹងថា មានដំណើររឿងជាច្រើនអំពីការនិមិត្តដំបូងដែរឬទេ ? ដំណើររឿងនីមួយៗផ្ដល់នូវសេចក្ដីលម្អិតពិសេសៗ ដែលនាំឲ្យយើងយល់ដឹងកាន់តែច្បាស់ជាងមុនអំពីអ្វីដែលបានកើតឡើងនៅក្នុងព្រៃពិសិដ្ឋ ។ បងប្អូនអាចសង្ខេបវគ្គ « Overview » នៃ Gospel Topics essay « First Vision Accounts » ( នៅលើគេហទំព័រ topics.ChurchofJesusChrist.org ) ។ រួចហើយ បងប្អូនអាចសូមឲ្យអស់អ្នកទាំងឡាយ ដែលបងប្អូនបង្រៀន រំឭកសេចក្ដីសង្ខេបនៃដំណើររឿងទាំងបួននៅក្រោមចំណងជើង « Accounts of the First Vision » ។ ពួកគេក៏អាចអានដំណើររឿងពិតខ្លះដោយប្រើតំណភ្ជាប់ដែលផ្ដល់មកនេះផងដែរ ។ តើពួកគេបានរកឃើញអ្វីខ្លះ ដែលពង្រឹងដល់ទីបន្ទាល់របស់ពួកគេអំពីការនិមិត្តដំបូង ? បងប្អូនអាចមើលវីដេអូ « Ask of God: Joseph Smith’s First Vision » ( នៅលើគេហទំព័រ ChurchofJesusChrist.org ) ដែលបង្ហាញអំពីការនិមិត្តដំបូង ដោយប្រើសេចក្ដីលម្អិតមកពីដំណើររឿងទាំងនេះ ។ ហេតុអ្វីវាល្អដែលមានដំណើររឿងជាច្រើនអំពីការនិមិត្តដំបូង ? តើដំណើររឿងទាំងនេះជួយយើងឲ្យយល់កាន់តែច្បាស់អំពីព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកកូរ៉ុម ឬថ្នាក់ឲ្យសញ្ជឹងគិត ហើយកត់ត្រានូវអ្វីដែលពួកគេនឹងត្រូវ ធ្វើដើម្បីប្រព្រឹត្តតាមការបំផុសគំនិត ដែលពួកគេបានទទួលនៅថ្ងៃនេះ ។ តើមេរៀនថ្ងៃនេះទាក់ទងទៅ នឹងគោលដៅផ្ទាល់ខ្លួន ដែលពួកគេបានដាក់យ៉ាងដូចម្ដេច ? ប្រសិនបើពួកគេចង់ សមាជិកកូរ៉ុម ឬថ្នាក់អាចចែកចាយគំនិតរបស់ពួកគេបាន ។
ធនធានគាំទ្រ
-
ម៉ាថាយ ៣:១៣–១៧; កិច្ចការ ៧:៥៤–៦០; នីហ្វៃទី៣ ១១:៣–១០ ( ព្រះ ជាព្រះវរបិតា និងព្រះយេស៊ូវគ្រីស្ទបើកសម្ដែងព្រះអង្គទ្រង់ដល់មនុស្សនៅលើផែនដី )
-
« What do we learn about the nature of God from the First Vision? » មកពីកម្មវិធី « Face to Face ជាមួយប្រធាន អាវរិង និងអែលឌើរ ហូឡិន »( ការចាក់ផ្សាយយុវវ័យទូទាំងពិភពលោក ថ្ងៃទី ៤ ខែ មីនា ឆ្នាំ ២០១៧ ) នៅលើគេហទំព័រ FacetoFace.ChurchofJesusChrist.org
ការបង្រៀនតាមរបៀបរបស់ព្រះអង្គសង្គ្រោះ
ព្រះអង្គសង្គ្រោះបានអញ្ជើញអ្នកដើរតាមទ្រង់ទាំងអស់ ឲ្យថ្លែងទីបន្ទាល់អំពីសេចក្ដីពិតដ៏ពេញលេញនៃការបង្រៀនរបស់ទ្រង់ ។ កាលពួកគេបានធ្វើដូច្នោះ នោះព្រះវិញ្ញាណបានប៉ះពាល់ដួងចិត្តរបស់ពួកគេ ។ តើបងប្អូនអាចលើកទឹកចិត្តអស់អ្នកទាំងឡាយដែលបងប្អូនបង្រៀនឲ្យថ្លែងទីបន្ទាល់របស់ពួកគេដោយរបៀបណា ? ( សូមមើល ការបង្រៀនតាមរបៀបរបស់ព្រះអង្គសង្គ្រោះ [ ឆ្នាំ ២០១៦ ] ទំព័រ ១១ ) ។
សូមមើលផងដែរ « Prepare to Teach » ( វីដេអូ នៅលើគេហទំព័រ ChurchofJesusChrist.org ) ៕