9 ni Me

E Rawa Vakacava ki na Yalo Tabu me Vakalougatataki Au ena Veisiga?

Vunau kei na Veiyalayalati 46–48

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e gadreva na noda veivuke kei na masu? Na cava eda rawa ni cakava meda vukei ira kina? O cei e dodonu me da sureta ki na itaviqaravi mai oqo?

• Noda itavi se icolacola. Na ilesilesi cava soti eda sa vakayacora rawa? Na ilesilesi cava so e gadrevi meda cakava? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

• Noda bula. Na cava so e sotavi wale tikoga oqo e sa vaqaqacotaka na noda ivakadinadina? Na cava e sa yaco tiko ki na noda bula, ka rawa vakacava ni da veitokoni vakai keda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

E vuqa na lewe ni Lotu vakalesui mai e liu a wilika na veivakatakilai vakayalo ni Yalo Tabu ena ivolanikalou (raica na Cakacaka 2:1–4; 13:52; 1 Korinica 12:4–11; 3 Nifai 19). Ni ra vulica tu na lewe ni kuoramu se kalasi na Vunau kei na Veiyalayalati 46–48 ena macawa oqo, era sa na rairai vulica ni sa makutu na Turaga me vakavulici ira na Yalododonu oqo ena veivakalougatataki e rawa ni kauta mai na Yalo Tabu ki na nodra bula. Na cava so e sotavi esa vakavulici iko ena sala e dau vakalougatataki iko kina na Yalo Tabu? E rawa vakacava ni vukei ira o vakavulica na Yalo Tabu ena ituvaki kece ni nodra bula?

Me vukea na nomu vakavakarau ni vakauqeta na nomu kuoramu se kalasi me ra vakasaqara na veivakayarayarataki ni Yalo Tabu, o na via railesuva na “iTavi ni Yalo Tabu” ena Tudei ena Vakabauta ([2004], 82) kei na itukutuku i Elder Gary E. Stevenson “E Dau Vukei Iko Vakacava na Yalo Tabu?” (Liaona, Me 2017, 117–20).

Sa rawa ni vukei keda na Yalo Tabu ni kila deivaki ka vakatavulica na dina ni kosipeli.

Vulica Vata

Sa dolea na ivolanikalou e vuqa na ivakaraitaki ni isolisoli vakayalo. O rawa ni vukea vakacava ni taracake na nodra vakabauta na lewe ni nomu kuoramu se kalasi ni veisolisoli oqo e rawa ni vakatakilai ena noda bula nikua? O rawa ni tekivu ena nodra sureti ni vola ena papa e dua na isolisoli vakayalo e vakamacalataki ena Vunau kei na Veiyalayalati 46:7–33 ka me veivosakitaki na sala era sa raica kina ni vakatakilai ena nodra bula se na bula ni dua era kila.

Me ikuri ni isolisoli eso ni Yalotabu, sa dau vakalougatataki keda na Yalo Tabu ena vuqa sara na sala. O rawa ni vakayagataka e dua se sivia na itaviqaravi e ra me vukei ira na lewe ni kuoramu se kalasi ni kila vakamatata cake na ka oqo.

• So na gauna eda nanuma ni da gadreva ga na Yalo Tabu ena vakatulewa bibi eso se na veika e yaco ki na noda bula. E rawa vakacava ni o vukei ira o vakavulica ni vakila na levu tale ni ka e rawa ni vakayacora vei ira na Yalo Tabu? O rawa ni wasea vakailawalawa lalai na kuoramu se kalasi ka kerea na ilawalawa yadua me wilika e dua se sivia na ivolanikalou mai na “iVurevure Veitokoni Eso.” Me qai wasea e dua na tamata mai na ilawalawa yadua na ka era sa vulica. Qai sureta na lewe ni kuoramu se kalasi yadua me cakava e dua na lisi ni sala eso e rawa ni vakalougatataka kina na nodra bula na Yalo Tabu. Ni ra wasea tu na nodra lisi, sa rawa ni ra tukuna na ka era rawa ni cakava me tiko vata kei ira na Yalo Tabu ena veisiga yadua.

• Dua tale na sala me vukei ira o vakavulica ni kila vakamatata na sala e rawa ni vukei ira kina na Yalo Tabu oya mera vola na taro eso oqo ena papa: Na cava eda kila tu me baleta na Yalo Tabu? E rawa vakacava ni vukei keda na Yalo Tabu? Sa rawa ni qai vakaraica na lewe ni kuoramu se kalasi na isaunitaro ena itukutuku i Elder Gary E. Stevenson “E Dau Vukei Iko Vakacava na Yalo Tabu?” (Liaona, Nove. 2017, 117–20). Sa rawa talega ni ra raica na isaunitaro ena railesuvi ni “iTavi ni Yalo Tabu” ena Tudei ena Vakabauta (tabana e 82). Ke veiganiti, wasea na veika o sa sotava kei na Yalo Tabu, ka sureti ira na itabagone me ra wasea na veika era sa sotava.

• Sa rawa ni ra wilika na lewe ni kuoramu se kalasi na “Noda iVakatakila” se “Vulica mo Vakila na Veivakauqeti ni Yalotabu” ena wase 4 ni Vunautaka na Noqu Kosipeli ([2019], 95–96, 102–3). Sa rawa ni ra qai vakalecalecava ni ra kaulotu ka vakavulica tiko e dua ka se sega ni rogoca na sala e rawa ni vakalougatataka kina na noda bula na Yalo Tabu. Na cava era na kaya vei ira?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Joni 14:16–27 (Na Dauveivakacegui sa rawa ni vakavulici keda ka kauta mai na ka kece ki na noda vakanananu)

• Joni 15:26; Vunau kei na Veiyalayalati 42:17; Mosese 1:24 (Sa tiko ki na Yalo Tabu na itukutuku ni Tamada kei na Luvena)

• Roma 8:16 (Sa vakadinadinataka na Yalotabu ni da sa luve ni Kalou)

• 2 Nifai 32:5; Vunau kei na Veiyalayalati 18:18 (Ena vakaraitaka vei keda na Yalo Tabu na ka meda cakava)

• 3 Nifai 27:20 (Na Yalo Tabu sa vakatabui keda)

• Moronai 8:26 (Na Yalo Tabu e vakasinaiti keda ena inuinui kei na loloma)

• Moronai 10:5 (Na Yalo Tabu e vakavulica vei keda na dina)

Veivakavulici ena iVakarau ni iVakabula

A wasea na iVakabula na italanoa, vosa vakatautauvata, kei na ivakarataki dina ni bula rawarawa eso me veivakavulici ena dua na sala e vakaibalebale kina vei ira na Nona tisaipeli. Na rawaka cava so sa sotavi o rawa ni wasea vata kei ira na itabagone me vukei ira ni kila deivaki na itavi eso ni Yalo Tabu ka vakila e dua na gagadre mera qara na rawaka vakaoya? (Raica na Veivakavulici ena iVakarau ni iVakabula [2016], 22.)