23 ni Me

Au Dau Ciqoma Vakacava na iSolisoli ni Yalo Tabu?

Vunau kei na Veiyalayalati 51–57

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. Na cava eda rawa ni cakava me taraicake kina na duavata vei ira na lewe ni kuoramu se kalasi? Na lalawa cava so eda na via cakava vata?

• Noda itavi se icolacola. Na cava eda sa cakava tiko me wasei kina na kosipeli? Na cava so eda sa sotakaya ena vakayacori ni cakacaka ni valetabu kei na tuva kawa?

• Noda bula. Eda sa raica vakacava na liga ni Turaga ena noda bula? Na cava e sa vakauqeti keda ena vuli ivolanikalou ena macawa oqo?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ni oti na noda papitaiso, sa vakataqara na ligadra e uluda na tauri matabete me vakatikori na isolisoli ni Yalo Tabu. Era sa na rairai vakananumi ena ka oqo na lewe ni kuoramu se kalasi ni ra vulica na Vunau kei na Veiyalayalati,51–57 ena macawa oqo. Ia, na ciqomi ni Yalo Tabu sa gadreva e levu mai na kena oya. Me ciqomi na Yalo Tabu me noda itokani tudei, sa dodonu meda gadreva na Nona tiko rawa, sureti Koya ki na noda bula, ka muria na ivakaro ena yalodina. Na veivakalougatataki cava so ena basika mai ki na nodra bula o vakavulica ni ra qara na Nona veivakayarayarataki?

Me vukea nomu vakavakarau ni veivakavulici, sa rawa ni o railesuva na “Na iSolisoli ni Yalo Tabu” ena Tudei ena Vakabauta ([2004], 83–84) se na itukutuku i Peresitedi Henry B. Eyring “Me Tiko kei Kemuni na Nona Yalotabu” (Liaona, Me 2018, 86–89).

Me ciqomi na veituberi ni Yalo Tabu, sa dodonu meda qara ena veisiga na Nona veivakayarayarataki.

Vulica Vata

Me vukea nodra kila vakamatata cake na lewe ni kuoramu se kalasi na isolisoli ni Yalo Tabu, o na via tekivu veivosakitaka na sala e vakatikori kina na isolisoli ni Yalo Tabu. Sa rawa ni ra wilika na Vunau kei na Veiyalayalati 52:10; 53: 3; 55:1–3 ka veivosakitaka na ka era vulica. Vakadreta ni o koya na tauri matabete e sega ni solia na Yalo Tabu ia sa sureta na lewenilotu me ciqoma na Yalo Tabu. Na cava na kena duidui? Na veitaviqaravi e ra sa rawa ni vukei ira o vakavulica ni kila vakamatata cake na sala me ciqomi kina na isolisoli vakamareqeti oqo.

• Na ka e cakava o Liai kei na nona matavuvale mera tuberi tu ena Liaona esa tautauvata ki na ka sa dodonu meda cakava me ciqomi kina na veituberi veivakayarayarataki ni Yalo Tabu. O na via vakaraitaka e dua na yaloyalo i Liai kei na Liaona (raica na Gospel Art Book, [2009], naba 68) ka kerea na lewe ni kuoramu se kalasi mera wasea na ka era kila tu me baleta na Liaona. Sa rawa ni o qai sureta e veimama vei ira me wilika na 1 Nifai 16:14–29 kei na veimama kadua me wilika na 1 Nifai 18:8–22, ni raici na sala eso e vakataka kina na Yalo Tabu na Liaona. Na cava eda vulica mai na ivakaraitaki ni matavuvale i Liai e rawa ni vukei keda ni ciqoma vakataucoko sara na Yalo Tabu?

• Na wase yadua ena Me iSakisaki ni iTabagone sa umani tu kina na ivakasala ni kena bulataki na ivakatagedegede kei na ivakaro ni Turaga. Na bulataki ni veivakaro oqo sa sureta na kaukauwa ni Yalo Tabu ki na noda bula. Navuca mo sureta na lewe ni kuoramu se kalasi mera digitaka yadua e dua na wase ena Me iSakisaki ni iTabagone, ka wilika, ka makataka na veika esa dodonu mera cakava se kua ni cakava me vukei ira ni ciqoma na Yalo Tabu. Me ra qai wasea vei ira na vo ni kuoramu se kalasi na ka era sa vulica. Sureti ira me ra tuva e dua na takete ena vukei ira me ciqomi vakataucoko sara na Yalo Tabu. Cava na vuna eda vinakata kina me tiko vata kei keda na Yalo Tabu? (raica na Joni 14:26–27; 15:26; 16:13; 2 Nifai 32:3).

• Ena nona itukutuku “Me Tiko kei Kemuni na Nona Yalotabu” (Liaona, Me 2018, 86–89), a kaya o Peresitedi Henry B. Eyring, “Sa noqu vakanuinui nikua me vakalevutaki na nomuni gagadre kei na sasaga ni ciqoma na Yalo Tabu” (tabana e 86). Kerea na lewe ni kuoramu se kalasi mera wilika na ciwa na parakaravu ena nona itukutuku vakatekivu e “Na veika a sotava na Parofita o Josefa Simici” (tabana e 88). Sureti ira me ra vakaraica na ka a cakava o Josefa Simici me ciqoma kina na veivakayarayarataki ni Yalo Tabu. Sa rawa ni ra vola ena papa na ka era raica. Ke veiganiti, sa rawa ni o sureti ira ni wasea na veika era sotava vata na kena ciqomi ni veituberi mai vua na Yalo Tabu. Na cava era a cakava tiko ena gauna ni veika a sotavi oqo e muataki ki na ciqomi ni veituberi mai vua na Yalo Tabu? O sa rawa ni wasea talega na ka o sotava.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Moronai 8:25–26; Vunau kei na Veiyalayalati 20:77, 79; 121:45–46 (Na sala me ciqomi kina na Yalo Tabu)

• David A. Bednar, “Ciqoma na Yalo Tabu,,” Liaona, Nove. 2010, 94–97

• Douglas D. Holmes, “The Gift of the Holy Ghost” (First Presidency Christmas Devotional, Dec. 4, 2016), broadcasts.ChurchofJesusChrist.org

Veivakavulici ena iVakarau ni iVakabula

Ena vakavakarau ni Nona ilesilesi e vuravura, na iVakabula a “kauta cake na Yalo Tabu ki na veikau” me lolo, me masumasu, ka “me tiko vata kei na Kalou” (Vakadewa i Josefa Simici, Maciu 4:1 [ena Maciu 4:1, ivakamacala e ra b]). Na vakatavulici qaqa ni kosipeli e sega ni kena ibalebale na vakarautaki walega ni lesoni ia na noda vakarautaki keda. (Raica na Veivakavulici ena iVakarau ni iVakabula [2016], 12.)