Ciqoma na Yalo Tabu

Elder David A. Bednar

Of the Quorum of the Twelve Apostles

Na vosa e va oqo — “Ciqoma na Yalo Tabu”—e sega ni malanivosa cavuti wale tu ga; ia, e dua na ivakaro vakamatabete—na nona veivakauqeti e dua e tu vua na kena dodonu, me cakacakataki ka sega ni vakasaurarataki vei ira.

Na noqu itukutuku e vakanamata ena bibi ni noda dau segata ena noda bula e veisiga me da ciqoma vakaidina sara na Yalo Tabu. Au masuta ka sureta na Yalo ni Turaga me dusimaki keda ka vakauqeti keda yadua.

Na iSolisoli ni Yalo Tabu

Ena Tiseba ni 1839, ni rau tiko voli mai Washington D.C. me rau kerea na kena saumi lesu vakailavo na veika cala a vakayacori vei ira na Yalododonu mai Missouri, e rau a vola kina e dua na ivola vei Hyrum Smith o Josefa Simici kei Elias Higbee: “Ena neirau veitalanoa kei na Peresitedi [kei Amerika], a vakatarogi keirau kina se duatani vakacava na neirau lotu mai vei ira na veimatalotu tale era tu ena gauna oqo. A kaya kina o Baraca Josefa eda duidui ena ivakarau ni papitaiso, kei na isolisoli ni Yalo Tabu ena veitabaki ni liga. Keitou nanuma kina ni veivakasama kece tale eso era rawati mai na isolisoli ni Yalo Tabu” (Nodra iVakavuvuli na Peresitedi ni Lotu: Josefa Simici [2007], 108).

Na Yalo Tabu e ikatolu ni Le Tolu Vakalou; o Koya e tamata vakayalo ka dau vakadinadinataka na veika dina kecega. Ena ivolanikalou e dau vakatokai na Yalo Tabu me Dauveivakacegui (raica na Joni 14:16–27; Moronai 8:26), e Qasenivuli (raica na Joni 14:26; V&V 50:14), ka Dauvakatakila (raica na 2 Nifai 32:5). Na ivakatakila mai vei rau na Tamana kei na Luvena e dau vakadewataki mai vua na Yalo Tabu. O Koya na nodrau dautukutuku ka nodrau ivakadinadina bula na Tamada kei na Luvena.

Na Yalo Tabu e dau vakatakilai vei ira na tagane kei na yalewa e vuravura me kaukauwa ka isolisoli talega ni Yalo Tabu. Na kaukauwa e rawa ni yaco mai vua e dua na tamata ni se bera na papitaiso; sai koya na ivakadinadina bula ni o Jisu Karisito na noda iVakabula ka Dauveivueti. Mai na kaukauwa ni Yalo Tabu era na rawata kina na dauvakadidike yalodina ena Lotu na veivakadeitaki me baleta na dina ni Nona kosipeli na iVakabula, na iVola i Momani, na dina ni Veivakalesui mai, kei na nona ilesilesi vakaparofita o Josefa Simici.

Ena qai soli walega na isolisoli ni Yalo Tabu ni sa oti na papitaiso ka vakayacori ena kena ivakarau dodonu mai na kaukauwa dodonu kei na veitabaki ni ligadra o ira e tu vei ira na Matabete i Melikiseteki. Sa kaya na Turaga:

“Mo dou veivutuni ka papitaiso koi kemudou vakaadua ga, me bokoci kina nomudou ivalavala ca; ia mo dou papitaiso ena wai ka papitaiso talega ena bukawaqa kei na Yalo Tabu. …

“Ia ko ira kecega sa vakabauta mo drau vakadeitaka sara me lewe ni noqu lotu, io mo drau tabaka na uludra, kau na solia vei ira na isolisoli ni Yalo Tabu” (V&V 33:11, 15).

A vakamatatataka na kena icakacaka oqo vei ira mai Efeso ko Paula na iApositolo ena nona taroga:

“Sa yaco vei kemudou na Yalo Tabu ni dou sa qai vakabauta, se segai? A ra sa kaya vua, Keitou sa sega mada ni rogoca se sa soli na Yalo Tabu, se segai.

“A sa kaya vei ira ko koya, Dou sa papitaisotaki beka ena cava? A ra sa kaya, ena papitaiso i Joni.

“Sa qai kaya ko Paula, E dina ga sa dau veipapitaisotaki ko Joni ena papitaiso ni veivutuni, ka kaya vei ira na tamata, me ra vakabauti koya ena muri koya mai, ko koya oqo ko Jisu.

“Ia ni ra sa rogoca era sa papitaisotaki ena yaca ni Turaga ko Jisu.

“Ia ni sa tabaki ira ko Paula ena ligana, sa yaco ki vei ira na Yalo Tabu” (Cakacaka 19:2–6).

Na papitaiso ena tabadromuci sai koya na “ikau ni cakacaka vakalotu ni kosipeli, sa dodonu me na tarava mai na papitaiso ni Yalotabu me na taucoko kina” (iVolavosa ni iVolatabu, “Baptism”). A vakamacalataka na Parofita o Josefa Simici ni “papitaiso e dua na cakacaka vakalotu tabu ni vakavakarau ena kena ciqomi na Yalo Tabu; sai koya na sala ka idola me na soli kina na Yalo Tabu. Na iSolisoli ni Yalo Tabu ena veitabaki ni liga, ena sega ni rawa ni ciqomi ena vakayagataki ni dua tale na ivakavuvuli ia na ivakavuvuli ga ni buladodonu” (Teachings: Joseph Smith, 95–96).

Na cakacaka vakalotu ni nona vakadeitaki e dua na lewenilotu vou kei na kena soli na isolisoli ni Yalo Tabu e rawarawa ka bibi. Era na vakotora na ligadra ena uluna e dua o ira na Matabete i Melikiseteki bula kilikili ka cavuta na yacana. Oti o ya, ena dodonu ni matabete tabu kei na yaca ni iVakabula, sa na vakadeitaki kina me lewena Na Lotu i Jisu Karisito ni Yalododonu Edaidai, ka na cavuti na malanivosa bibi oqo: “Ciqoma na Yalo Tabu.”

Na rawarawa ni cakacaka vakalotu oqo e rawa ni vakavuna me da raibaleta kina na kena bibi. Na vosa e va oqo—“Ciqoma na Yalo Tabu”—e sega ni malanivosa cavuti wale tu ga; ia, e dua na ivakaro vakamatabete —na nona veivakauqeti e dua e tu vua na kena dodonu, me cakacakataki ka sega ni vakasaurarataki vei ira (raica na 2 Nifai 2:26). Ena sega ni sa tekivu cakacaka sara ena noda bula na Yalo Tabu ena kena sa tabaki na uluda mai na liga ka cavuti na va na malanivosa bibi oqori. Ni da ciqoma na cakacaka vakalotu oqo, eda sa ciqoma kina e dua na itavi tabu ka na tomani tikoga me da gadreva, me da segata, me da cakacakataka, ka bula me vakadina kina ni da sa “ciqoma na Yalo Tabu” kei na kena isolisoli vakayalo e sala vata kaya.“A cava na kena yaga vua na tamata kevaka sa vakarautaki tu na isolisoli me nona, ka qai sega ni taura? Raica sa sega ni vinakata na isolisoli sa soli vua, io sa sega talega ni vinakati koya sa solia” (V&V 88:33).

Na cava me da cakava me na dau dina tikoga kina na veivakauqeti vakadonui oqo me da segata na veitokani ni ikatolu ni Lewetolu Vakalou? Meu na vakatura mada ni da na gadreva me da (1) gadreva ena yalodina me da ciqoma na Yalo Tabu, (2) sureta ena kena ivakarau dodonu ki na noda bula na Yalo Tabu; ka (3) talairawarawa ena yalodina ki na ivakaro ni Kalou.

Gadreva ena Yalodina

Taumada sa dodonu me da gadreva, gaganotaka, ka segata na veitokani ni Yalo Tabu. E rawa ni daru vulica e dua na lesoni cecere me baleta na gagadre dodonu mai vua na Nona tisaipeli yalodina na iVakavuvuli ka vakamacalataki ena iVola i Momani:

“Eratou sa qai vakavulici ira na lewevuqa ko iratou na lewe tinikarua; eratou sa kaya vei ira na lewevuqa me ra tekiduru ka masu vua na Tamada ena yaca i Jisu. …

“Eratou sa kerea na veika eratou sa rui gadreva sara me soli vei iratou na Yalo Tabu” (3 Nifai 19:6, 9).

Sa dau vaka beka kina vei keda ena noda dau nanuma me da dau masuta vagumatua ena veigauna na veika eda sa rui gadreva, io na Yalo Tabu? Se eda sa dau vagolei tani ena veika ni vuravura kei na ogaoga ni bula e veisiga ka da dau taura tu ga kina vakamamada se vakawalena sara na isolisoli vakamareqeti duadua oqo mai vei ira kecega na isolisoli? Na ciqomi ni Yalo Tabu e tekivu mai na noda gadreva ena yalodina e veigauna na Nona veitokani ena noda bula.

Veisureti ena Kena iVakarau Dodonu

Ena rawarawa cake na noda ciqoma ka vakila na Yalo ni Turaga ni da sureti Koya ena kena ivakarau dodonu ki na noda bula.E sega ni rawa ni dau vakasaurarataka, vakatotogana, se vakarota na Yalo Tabu. Ia, e dodonu me da sureti Koya ki na noda bula ena ivalavala malua ka veivakauqeti vata ga e dau vakayacora vei keda ko Koya (raica na V&V 42:14).

Na noda sureta na veitokani ni Yalo Tabu e dau vakayacori ena vuqa na sala: ena kena caka ka maroroi na veiyalayalati; ena noda dau masu ena yalodina vakatamata yadua kei na matavuvale; ena noda vakasaqaqara vagumatua ena ivolanikalou; ena noda vaqaqacotaka na isema eso vei ira na lewe ni matavuvale kei ira na itokani; ena noda segata me tu vei keda na vakasama, na ivalavala, kei na ivosavosa dodonu; kei na noda dau sokalou ena noda veivale, ena veivaletabu vakalou, kei na lotu. Ena yasana kadua, na noda vakamamadataka, se na noda voroka na veiyalayalati kei na noda yalayala, noda sega ni dau masu ka vulica na ivolanikalou, kei na vakasama, ivalavala kei na vosa tawakilikili ena vakavuna na nona lako tani se levei keda sara ga na Yalotabu.

Me vaka e vakavuvulitaka vei ira na nona tamata ko Penijamini na Tui: “Raica au sa kaya vei kemuni na wekaqu, ko ni sa vakavulici oti ka kila tu na veika oqo; ia kevaka ko ni qai talaidredre ka ivalavala vakatani tikoga, ko ni sa yawa tani sara mai na Yalo ni Turaga, ka sa sega ni tiko vata kei kemuni ko Koya me tuberi kemuni ena sala dodonu, mo ni kalougata kina ka sautu ka taqomaki vinaka” (Mosaia 2:36).

Talairawarawa ena Yalodina

Na noda talairawarawa ena yalodina ki na ivakaro ni Kalou sa yaga sara ki na noda ciqoma na Yalo Tabu. Sa dau talevi tiko vei keda ena veimacawa na dina oqo ena noda vakarogoca na masu ni sakaramede ka vakaivotavota ena bula kilikili ena madrai kei na wai. Ena noda yalataka ni sa lomada me da taura na yaca i Jisu Karisito, me da dau nanumi Koya tikoga, ka da muria na Nona ivakaro, sa yalataki vei keda me na dau tiko ga vata kei keda na Nona Yalotabu (raica na V&V 20:77). Sai koya oqo, ni veika kecega e vakavulica vei keda na nona kosipeli na iVakabula me da vakayacora ka yaco me da vakakina sa kena inaki me vakalougatataki keda ena veitokani ni Yalo Tabu.

Vakasamataka na vuna eda masu ka vulica kina na ivolanikalou. Io, eda gadreva me da veitaratara ena masu vei Tamada Vakalomalagi ena yaca ni Luvena. Ka io, eda gadreva me da rawata na rarama kei na kila ka era tu ena ivolayavu. Ia yalovinaka ka nanuma ni ivakarau tabu eso oqo era sa ivakarau taumada me da dau nanuma kina na Tamada Vakalomalagi kei na Luvena Lomani ka ra sa gadrevi me baleta na veitokani tikoga ni Yalo Tabu.

Vakananuma lesu na vuna eda sokalou kina ena vale ni Turaga kei na noda veisoqoni ena Siga ni Vakacecegu. Io, eda dau veiqaravi ena vukudra na noda era sa mate yani ena valetabu—kei ira na noda matavuvale kei na noda itokani ena tabanalevu kei na tabana eda vakaitikotiko kina. Ka, io, eda marautaka na veimaliwai ni buladodonu ka da kunea ena kedra maliwa na tacida kei na ganeda. Ia taumada eda sa dau soqoni vata ena duavata me da vakasaqara na veivakalougatataki ni Yalo Tabu kei na kena veidusimaki.

Na masu, na vuli, na soqoni vata, na sokalou, na veiqaravi, kei na talairawarawa era sega ni tu duadua voli se tu vakataki ira ena ituvatuva balavu ni veika me caka ena kosipeli. Ia, na ivalavala dodonu yadua oqo era sa tiki bibi sara ni sasaga cecere vakayalo me rawati kina na ivakaro me ciqomi na Yalo Tabu. Na ivakaro mai vua na Kalou eda talairawarawa kina kei na ivakasala vakauqeti mai vei ira na iliuliu ni Lotu eda muria era sa vakanamata vakadua ena kena rawati na veitokani ni Yalotabu. Na kena vakasama, ni ivakavuvuli kece sara ni kosipeli kei na kena itaviqaravi sa kedra itakele na lako yani vei Karisito ena kena ciqomi na Yalo Tabu ena noda bula.

O iko kei au e dodonu me daru segata me daru vakataki ira na cauravou yaloqaqa ka ra vakamacalataki ena iVola i Momani, ka ra a “muria vakavinaka sara na ivakaro kecega; io, sa yaco vei ira me vaka na nodra vakabauta. …

“… Era sa dau qarava na Turaga na nodra Kalou ena veisiga; io, era sa muria na nona ilesilesi, na nona lewa kei na nona vunau” (Alama 57:21; 58:40).

iVakadinadina

Sa kaya na Turaga ni Lotu i Jisu Karisito ni Yalododonu Edaidai sai koya “na lotu dina duadua ga e vuravura” (V&V 1:30). E dina na Lotu vakalesui mai oqo baleta ni oqo na nona Lotu na iVakabula; Sai Koya “na sala, na vu ni dina, kei na vu ni bula” (Joni 14:6). Ka sa lotu bula baleta na cakacaka kei na isolisoli ni Yalo Tabu. Sa dua na kalougata levu e noda ni da mai bula ena dua na gauna sa tu kina e vuravura na matabete, ka rawa ni da ciqoma na Yalo Tabu.

Ni oti e vica na yabaki mai na gauna a vakamatei kina ena vuku ni nona vakabauta na Parofita o Josefa Simici, a rairai vei Peresitedi Brigham Young ka wasea vua na ivakasala ni veigauna kecega oqo: “Tukuna vei ira na tamata me ra yalomalumalumu ka yalodina ka raica me ra maroroya na Yalo ni Turaga ia ena tuberi ira vakadodonu. Qarauna ka kakua ni vagolea tani na domo malua; ena vakavulici [ira] ena veika me ra cakava kei na vanua me ra lako kina; ena vuataka mai na vuanikau ni matanitu.Tukuna vei ira na turaga me ra dolava tu na yalodra ki na dina ni vakabauta, baleta ena gauna e yaco mai kina vei ira na Yalo Tabu, sa na vakarau tu na yalodra me ciqoma. Ena rawa me ra tukuna na Yalo ni Turaga mai na veiyalo kece tale. Ena tukuna vei ira na vakacegu kei na marau kei na reki ki yalodra, ka na kauta tani na veicudruvi, na veicati, na dauvuvu, veiqati, kei na ca mai yalodra; ia na nodra gagadre taucoko ga me ra caka vinaka, kauta mai na buladodonu, ka tara cake na matanitu ni Kalou. Tukuna vei ira na veitacini kevaka era na muria na Yalo ni Turaga era na donu” (Teachings: Joseph Smith, 98).

Sa noqu masu me da na gadreva sara ena yalodina ka sureta ena kena ivakarau dodonu na Yalo Tabu ki na noda bula e veisiga. Au masuta talega me da na talairawarawa ena yalodina ki na ivakaro ni Kalou o keda yadua, ka da ciqoma vakaidina sara na Yalo Tabu. Au yalataka ni veivakalougatataki a vakamacalataka na Parofita o Josefa Simici vei Brigham Young sa baleti keda ka rawa talega ni da rawata o keda kece sara eda na rogoca ka wilika na itukutuku oqo.

Au vakadinadinataka na kedrau dina ka rau tiko dina na Tamada kei na Luvena. Au vakadinadinataka ni sa dauvakatakila na Yalo Tabu, e dauveivakacegui, ka ivakavuvuli cecere duadua ka sa dodonu me da vuli mai Vua. Kau vakadinadinataka ni veivakalougatataki kei na isolisoli ni Yalotabu e cakacaka tiko ena loma ni Lotu vakalesui mai, Lotu dina ka Lotu bula i Jisu Karisito ena gauna edaidai. Au vakadinadinataka ena yaca tabu i Jisu Karisito, emeni.