Na Veisau e Vu Mai na Kaukauwa ni Vakabauta kei na iTovo ni Bula

Elder Richard G. Scott

Of the Quorum of the Twelve Apostles

Na bula e dodonu tikoga e veigauna, ena vakavurea e dua na kaukauwa e loma kei na igu ka na tudei na nona dau veivorati kei na veivakayarayarataki ka veivakacacani ni ivalavala ca kei na talaidredre.

Ni kilai ka vakayagataki vakadodonu na vakabauta ena qaqa ka bibi na kena revurevu. Na vakabauta vaka o ya e rawa ni veisautaka na nona bula e dua mai na bula gogo, ni veisiga ki na dua na mataivakatagi ni reki kei na marau. Sa ka bibi sara ena nona ituvatuva ni marau na Tamada mai Lomalagi na bulataki ni noda vakabauta. Ia na vakabauta dina, vakabauta ni vakabulai, e vakanamata vua na Turaga o Jisu Karisito, vakabauta na Nona ivunau kei na ivakavuvuli, vakabauta na nona veidusimaki vakaparofita na nona ilumuti na Turaga, vakabauta na kena rawa ni kunei na ivakarau ni bula kei na itovo sega ni laurai ka dau rawa ni veisautaka na bula. Sa dina sara, na vakabauta na iVakabula sa ivakavuvuli ni cakacaka kei na kaukauwa.

Na vakabauta e dua na yavu buloko ni bulibuli. Au kila deivaki ni a vakayagataka na iVakabula ko Jisu Karisito na vakabauta ena Nona itavi ena ruku ni nona veidusimaki na Tamada mai Lomalagi. A vakayagataka na iVakavuvuli me bulia kina na veivuravura vakayawa ka vakakina me bulia kina na veika lalai vakalivaliva, na tiki ni iyaya lailai duadua eda kila tu nikua. Ia, au vakabauta ni tu tale eso na buloko somidi ni tara ka ena veivakurabuitaki ni veibuli.

Na vakabauta ki na gauna sa bera mai e vakaraitaki mai vei rau na veiwatini erau vauci vata ena valetabu. Erau kila ni nodrau talairawarawa ki na ivakavuvuli i Jisu Karisito kei na yavu ni veivakabulai ni Tamada mai Lomalagi, erau na bula vata kina ena marau. Erau kila ni gauna ena yaco mai kina na dredre ka kena inaki me gauna ni tubu cake, erau na kunea na sala, me vaka e veivakauqeti kina na Yalo Tabu, me rau rawata kina ena veisala vuavuai vinaka ka tarai cake kina na itovo ni bula.

Na vakabauta kei na itovo ni bula erau veiwekani vinaka sara. Na vakabauti ni kaukauwa ni talairawarawa ki na ivunau ni Kalou ena rawati kina na igu ena ivakarau ni bula e tu me baleti iko ena gauna ni gagadre bibi. Na itovo ni bula vakaoqori e sega ni dau tarai cake ena gauna ni bolebole lelevu se veitemaki. Oqori na gauna e nakiti me qai vakayagataki kina. Na nomu dau vakabauta na ivakavuvuli dina ena tara cake na itovo ni bula; na itovo ni bula e vaqaqacotaki ena vakalevutaka na nomu rawa ni vakayagataka eso tale na vakabauta. Na vuana, ena vakavinakataka cake na nomu rawata kei na nomu yalodei mo vakamalumalumutaka na veivakatovolei ni bula. Na levu ga ni kena vaqaqacotaki na nomu itovo, na kena rawa ni yaga vakalevu vei iko na cakacakataki ni vakabauta. O na kila na nodrau veiwaki na vakabauta kei na itovo ni bula me rau veivaqaqacotaki vakataki rau. Na itovo ni bula e dau tali vakamalua mai na wa ni culacula ni ivakavuvuli, ivunau kei na talairawarawa e bulataki.

E kaya o Peresitedi Hugh B. Brown: “Ena yasa ni bula cava ga e wawa tu kina na veika vakayalo cecere me rawata na tamata, ena vakabauta ga ena rawa kina. E sega ni rawa ni bula na tamata kevaka e sega na vakabauta, baleta ena ilakolako ni bula na kena leqa levu duadua sai koya na tarai cake ni itovo ni bula—e sega ni cakacaka ni vakasama, ia ena noda vakabauta na ivakavuvuli kei na noda solibula ka yalodina kina.” (ena Conference Report, Oct. 1969, 105. Eda cakacakataka na vakabauta ena noda cakava. E kaya o Josefa Simici ni “vakabauta [sai koya] na ivakavuvuli ni cakacaka kei na kaukauwa.” (Lectures on Faith [1985], 72).

Eda na yaco me vaka na ka eda vinakata mai na noda dau vaka tikoga kina ena veisiga yadua. Na itovo ni bula dodonu sa ivakatakilakila talei ni ituvaki o sa yacova tiko. Na itovo ni bula dodonu e yaga vakalevu cake sara mai na veiyaya kece o taukena, na kila ka kece o sa rawata mai na vuli, se na takete kece sara o sa rawata veitalia na levu ni kena qoroi mai vei ira na tamata. Ena bula ka tarava ena dikevi na nomu itovo ni bula dodonu me kilai na ivakarau o vakayagataka kina na nomu galala ena bula oqo.

E sega ni rawa ni vakarusa se vakamalumalumutaka na nomu itovo ni bula sa tubu cake tiko mai o Setani se dua tale na kaukauwa. O iko ga o na vakayacora ena nomu talaidredre. Na itovo ni bula totoka ka vakasakiti sa veisau me sega ni vakaibalebale ka vakawaleni ni sa vakamaumautaki ena ilawaki se talaidredre.

Sa dau basika na itovo ni bula savasava kaukauwa mai na digidigi dodonu e veigauna ena veivakatovolei kei na vakatovolei ni bula. Na digidigi oqori e dau vakayacori vata kei na noda vakanuinui ki na veika eda vakabauta, ia ni sa bulataki, sa na tudei.

Na cava beka eso na ivakavuvuli veivakaukauwataki ka dau yavutaki kina na vakabauta?

• Vakabauta na Kalou kei na Nona lomasoli me veivuke ena gauna e gadrevi kina, veitalia na bolebole ni veika eda sotava voli.

• Talairawarawa ki na Nona ivakaro kei na bula ka vakaraitaka ni rawa ni vakabauti iko ko Koya.

• Dau kidava na veivakauqeti vuni ni Yalo Tabu.

• Na kena bulataki ena yaloqaqa na veivakauqeti ko ya.

• Na yalovosota kei na veiciqomi ni laiva na Kalou mo sotava na dredre ka tubu kei na gauna e dau yaco malua tiko mai kina na isau ni kerekere ena dua na gauna balavu toka.

“Na vakabauta sai koya na vakanuinuitaki ni veika sa sega ni rairai; ia mo dou kakua ni vakatitiqataka ni dou sa sega ni raica, ka ni na vakatovolei taumada na nomudou vakabauta, dou na qai raica e muri na kena ivakadinadina” (Ica 12:6). O koya oqo, ena veigauna kece e “vakakatovolei kina na nomu vakabauta”—o ya, mo cakacakataka ena bula kilikili na veivakauqeti—o na rawata na ivakadinadina veivakadeitaki ni Yalotabu. Ni o sa cakacakataka na veika o kila me baleta e dua na ka, ia o se veilecayaki tikoga ena veika mo cakava, toso tikoga ena vakabauta, o na tuberi mo raica na kena iwali, o na sega ni kunea ena dua tale na sala. Ena gauna sara mada ga e kaukauwa duadua tu kina na nomu vakabauta, ena sega ni sauma mai vakatotolo na Kalou me vaka na nomu gagadre. Na Kalou ena sauma mai me vaka na Nona ituvatuva tawamudu ena veika e vinaka vei iko, ena gauna duadua e vinaka kina. Mo vakavinavinaka ni dau vakatara na Kalou ena so na gauna mo dau sotava tiko ena dua na gauna balavu na dredre ni bera ni qai yaco mai na kena isau. Oqori ena vakavuna me levu cake na nomu vakabauta ka tubu cake na nomu itovo ni bula.

Na uluvatu e davo no kina na itovo ni bula sai koya na yalodina. Na itovo ni bula kilikili ena vaqaqacotaka na nomu rawa ni kila na veidusimaki ni Yalotabu ka talairawarawa kina. Na nomu dau cakacakataka tikoga na vakabauta ena tara cake na itovo ni bula tudei. Na yavu tudei ni nomu itovo ni bula e tubu cake tiko ena vakadavori ni sa itakele ni noda bula o Jisu Karisito kei na Nona ivakavuvuli.

Na nomu bula marau e vuravura, ka vakakina na nomu vakabulai tawamudu, ena gadrevi kina e vuqa sara na veidigidigi dodonu, e sega ni dua vei ira e dredre. Era na cakacaka vata na veidigidigi oqori me tarai cake kina e dua na itovo ni bula ka na vorata na veivakayarayarataki veivakacacani ni ivalavala ca kei na talaidredre. Na itovo ni bula vakaturaga sa vaka na lase vakamareqeti ka caka mai na kena iyaya digitaki, ka tarai cake ena vakabauta, qai ukutaki vakamatau ena ivalavala dodonu e veigauna kece, qai vakamai ena lovo ni kila ka dau veilaveti. Oqori e dua na iyaya totoka sara ka sega ni rawa ni voli ena ilavo. Ia e rawa ni vakacacani ena dua na gauna lekaleka ena ivalavala ca, ka na gadrevi na sasaga mosimosi, ka babalavu me tarai cake tale kina. Ni taqomaki tu ena lewa matau, ena tu me tawamudu na itovo ni bula dodonu.

Na veika vakavuravura era na sega ni rawata vakataki ira me ra vakavurea na marau kei na yalovakacegu kei na marau ni rawa ka e vuravura. Era sega talega ni kauti keda ki na bula vakacerecerei. Na vakaturaga ni itovo ni bula, na isulu ni qaqaco vinaka e loma kei na yalodina ka tali mai na lewa dodonu e sega ni wili rawa, ena vagolea vakadodonu na bula. Na bula e dodonu tikoga e veigauna, ena vakavurea e dua na kaukauwa e loma kei na igu ka na tudei na nona dau veivorati kei na veivakayarayarataki ka veivakacacani ni ivalavala ca kei na talaidredre. Na nomu vakabauti Jisu Karisito kei na talairawarawa ki na Nona ivakaro ena vaqaqacotaka na nomu itovo ni bula. Na nomu itovo ni bula e ivakarau ni ituvaki o sa yaco tiko mo vakakina. Sa ivakadinadina ni nomu sa vakayagataka tiko vakavinaka na nomu gauna e vuravura ena gauna ni bula vakatovolei oqo.

Na ivakavuvuli e solia vei iko na ka ko a sauma. E ka dina talega ki na isau vakayalo. Ko na rawata ga na isau ni talairawarawa, ena vakabauti Jisu Karisito, kei na nomu bulataka na veika dina o sa vulica. Sai koya na tuliraki ni nomu itovo, kei na tubu ni kena qaravi, kei na vakacavari rawa ni nomu inaki e vuravura mo tubu mai na veivakadinati ka mo marau.

E sega ni rawa ni o wele voli ga ena bula, se ena gauna na tamata vakayago me qai vukea na nomu sasaga mo bula kilikili. O na yaco o iko me vaka na ka o cakava kei na veika o dau vakasamataka. Na malumalumu ni itovo ni bula ena vakavuna vua e dua me dau via vakamamautaki koya ga se nanumi koya ga. Ena sega ni rawa mo ubia na itovo ni bula malumalumu ena kote ni vakalecaleca.

Ena yaco na gauna o koya e dau yavutaka na nona vakatulewa ena veika e yaco tiko ena vakadeitaka ni na cakava na ivalavala ca bibi. E sega na itautauri kaukamea ni dina me vakadodonutaka tiko na nona ilakolako na tamata o ya. Ena dau sotava tikoga e veigauna na veitemaki qaseqase me vagolei tani kina mai na ivakaro. Na veidigidigi oqori era dau vakadonui ena kena tukuni ni ra sega soti ni ca sara, ni ra dau ciqomi vakalevu ena loma ni bula veimaliwai ka dau levu kina na noda itokani. Na tamata vuku ka sega na nona yavu vakaivakavuvuli ena dau rawata ena so na gauna na veika talei, sega ni tudei. Ia na rawa ka oqori ena vaka na valevakatui tara ena nuku. Ni yaco mai na vakatovolei ni itovo ni bula, ena kasauru, e vakavuqa ni na kauti ira sobu tale ga eso. Ke vakacava na nona segata e dua e voroka na ivakaro me vunitaka, ni toso na gauna e voleka ni ra dau vakavotui kece ga mai e matanalevu. O Setani sara ga vakataki koya e dau raica me vakakina. Ena dau segata sara o koya kei ira na nona imuri me ra vakavuna na kena levu ga ni rarawa era rawata vei ira yadua na luvena na Tamada mai Lomalagi. Na ivalavala bibi yadua ni talaidredre se na kena voroki na veivakabauti ena vakavurea e veigauna na taro se ra tiko talega kina eso se sega. Sa na vakamalumalumutaka na nodra vakabauta kei na nodra vakanuinui na tani me baleti koya oqori.

Na bula oqo e gauna ni vakatovolei. Na vinaka ni nomu sotava na kena bolebole ena kilai kina na tudei ni noda itovo ni bula. Na nomu vakabauuti Jisu Karisito kei na Nona ivakavuvuli ena vaqaqacotaka na nomu itovo ni bula.

Au sa dikeva rawa vakataki au ni ulutaga eso me vaka na vakabauta, masu, loloma, kei na yalomalua ena sega na kedra bibi ka sega na kedra cakamana me yacova ni ra sa yaco me ra tikida bula ena vuku ni veika eda sa vakila vakataki keda, ka vukei mai na veivakauqeti kamica ni Yalo Tabu. Ena gauna taumada ni noqu bula au raica ni rawa niu vulica na ivakavuvuli vakosipeli ena noqu vakasama ka vakakina, ena kaukauwa ni soli vakasama kei na vakadidike, au kila kina ni ra sa ka bibi sara. Ia na kedra kaukauwa vakaitamera kei na nodra rawa ni rawata me ra vakarabailevutaka na noqu kila ka a sega ni rawa me yacova niu sa vakatara na Yalo Tabu me tauvulona ka vakalevutaka na kedra ibalebale e yaloqu ena noqu dau vakatovotovotaka tikoga e veigauna na vosota. Au raica ena noqu dau veiqaravi tikoga ena yalodina ena vukudra na tani, a qai bulia na Kalou na noqu itovo ni bula. E vakarautaka e dua na ivakarau ni bula e tubu cake tikoga me dau vakilai na veidusimaki ni Yalotabu. Na kena totoka na ituvatuva ni kosipeli ena noda cakava na veika e vakasalataki keda kina na Turaga, sa soli vei keda na kila ka kece kei na rawa ka e gadrevi me rawa kina na vakacegu kei na veivakataucokotaki ena bula oqo. Sa vakakina na noda rawata na vakavakarau e yaga me baleta na bula marau tawamudu ena nona iserau na Turaga.

Ena vaqaqacotaki e dua na ivakadinadina mai na veivakauqeti vakayalo ka vakadeitaka na dina ni dua na ivakavuvuli, ni dua na cakacaka dodonu. E vakavuqa ni veituberi vakaoqori e dau sala vata mai kei na lomabibi ka dau vakaturuya na wainimata ka dredre kina na vosa. Ia na ivakadinadina e sega ni lomabibi. Sai koya sara ga na itovo ni bula ka tali vata mai na wa ni culacula e rawa mai na vakatulewa dodonu e sega ni wiliki rawa. Na veidigidigi oqo era vakayacori vata kei na vakabauta ni vakararavi ki na veika era vakabauti ka, ena so na gauna e sega ni rairai taumada. Na ivakadinadina qaqa e kauta mai na sautu, na vakacegu, kei na veivakadeitaki. E vakavuna na yalodei ena gauna eda sa talairawarawa kina ena veigauna kece ki na nona ivakavuvuli na iVakabula, ena totoka na bula, ena vakadeitaki na veigauna sa bera mai, ka na tu vei keda na kaukauwa me da vakamalumalumutaka na bolebole ena vakalatilati ena noda sala. Ena tubu na ivakadinadina ena kena kilai na dina, ka yaco mai ena masu kei na kena vakasamataki vakatitobu na ivunau vakaivolanikalou. Ena susugi cake ena kena bulataki na dina oqori ena vakabauta e kelei tu ena yalodei ni na rawati na vuana sa yalataki tu.

Ena vaqaqacotaki na nomu ivakadinadina ena nomu talairawarawa ena lomasoli ki na lawa ni ikatini kei na soli ni isolisoli ni lolo, ka na vakalougatataki iko kina vakalevu na Turaga. Ni sa vaqaqacotaki na nomu ivakadinadina, ena kaukauwa cake na sasaga nei Setani me temaki iko.Vorata na nona sasaga. O na qaqa cake kina ka malumalumu sobu na nona veivakayarayataki vei iko.

E vakatarai na toso cake tikoga ni nona veivakayarayarataki o Setani e vuravura me vakarautaki kina e dua na draki ni bula me da vakadinadinataki keda kina. E dina ni vakacaca vakalevu sara tu ena gauna oqo, sa vakarautaka tu na icavacava nei Setani o Jisu Karisito ena Nona Veisorovaki kei na Tucaketale. Ena sega ni qaqa na tevoro. Ena gauna sara mada ga oqo ena cakacaka tikoga ena iyalayala sa biuta tu na Turaga. E na sega ni rawa vua me kauta tani e dua na veivakalougatataki sa rawati. E sega ni rawa ni veisautaka na itovo ni bula ka sa tali tu ena vakatauci ni lewa dodonu. E sega vua na kaukauwa me vakarusa na ivau sa vesuki oti ena loma ni dua na valetabu vakalou vei rau e dua na veiwatini kei ira na gone. E sega ni rawa ni vakamalumalumutaka na vakabauta dina. E sega ni rawa ni kauta tani na nomu ivakadinadina. Io, na veika oqori e rawa ni yali mai na noda soli keda ki na nona veitemaki. E sega ni tu vua se mai vua na kaukauwa me vakarusai ira.

Me vakalekalekataki:

• E vakayagataka na Kalou na nomu vakabauta me bulia kina na nomu itovo ni bula.

• Na itovo ni bula e ivakatakilakila ni ituvaki sa yaco tiko mo vakakina.

• Na itovo ni bula tudei e vua ni digidigi dodonu e veigauna.

• Na uluvatu e davo no kina na itovo ni bula sai koya na yalodina.

• Na levu ga ni kena vaqaqacotaki cake na nomu itovo ni bula, na kena levu ni nomu rawa ni vakayagataka na kaukauwa ni vakabauta.

Na yalomalua sai koya na itovo ni bula vinaka ena rawa kina ni da vakavulici mai lagi ena Yalotabu se me da vakavulici mai na ivurevure eso ka ra tekivutaki ena veivakauqeti mai vua na Turaga, me vaka na ivolanikalou kei na nodra vosa na parofita. Na yalomalua sai koya na qele bulabula ka talei ni itovo ni bula dodonu. E kadre mai kina na itei ni tubucake yadudua. Ni vakabulabulataki ena kena vakayagataki na vakabauta, vakasavasavataki ena veivutuni, ka vaqaqacotaki ena talairawarawa kei na cakacaka vinaka, na itei vakaoqori ena vuataka na vuanikau vakamareqeti ni veidusimaki vakayalo. Ena qai basika kina na veivakauqeti vakalou—na veivakauqeti me da kila na loma ni Turaga, na kaukauwa me rawati kina na veivakauqeti oqori.

Meu wasea mada e va na ivakavuvuli kau sa vakila kina ena noqu bula na sautu kei na marau e titobu duadua? Sa tauyavutaka tu na Turaga na vatunitutu oqo ena Nona ituvatuva tawamudu, ka ra sa yaga kece sara. Era cakacaka vata ka veivaqaqacotaki vakataki ira. Ni ra bulataki vagumatua ena veigauna kece, era na vakavuna na tudei ni itovo ni bula, ka vakalevutaki kina na noda rawata me da vukica na dredre ni bula me idewadewa ni bula marau ena gauna oqo ka tawamudu. Sai koya na:

• Vakabauta na Turaga o Jisu Karisito kei na Nona parokaramu me rawati kina na kaukauwa me da rawa ka.

• Veivutuni me vakadodonutaki kina na isau ni cala ni sega ni cakava kei na cala ni cakava.

• Talairawarawa ki na ivakaro ni Turaga me rawa kina na igu kei na veidusimaki ena noda bula.

• Veiqaravi ka guilecavi iko mo vakavutuniyautaka kina na nodra bula tale eso.

Kevaka o sa vakatulewataka mo bula dodonu, kakua ni yalolailai kina. Ena dredre beka ena gauna oqo na bula, ia tautauri matua toka ena ititoko kaukamea oqori ni dina. Sa vinaka tiko na nomu toso mai na veika o nanuma. Na nomu dredre sa ivakatakilakila ni nomu itovo ni bula, nomu bula vakaivakarau, kei na yalodei ena nona yalayala na Tamamu mai Lomalagi kei na iVakabula ni o sa talairawarawa tikoga ki na Nodrau ivakaro. Me vakauqeti kemuni na Yalo Tabu mo ni vakatauca tikoga na lewa ka na vaqaqacotaka na nomu itovo ni bula ka me kauta mai na marau levu kei na reki. Ena yaca i Jisu Karisito, emeni.