Oqo Ga Eda na Vakabulai Kina
Elder Kevin R. Duncan
Of the First Quorum of the Seventy
Meda sa vakavukui meda nuitaka ka vakamuria na nodra ivakasala na parofita kei na iapositolo bula.
Na draki batabata ni 1848 a dredre ka veibolei vei ira na painia taukei ena Bucabuca na Salt Lake. Ena draki katakata ni 1847 a vakaraitaka kina o Brigham Young ni ra tadu bula yani na Yalododonu ki na vanua yalataki. “Oqo sara ga na vanua dodonu,”1 a kaya o Brigham Young, ni a vakatakilai mai vua ena raivotu na vanua me ra laki tauyavu kina na Yalododonu. Era a vorata na isevu ni lewe ni Lotu na veika dredre lelevu ena kena sa vakatakilai na Vakalesui mai ni kosipeli. Era a cemuri laivi mai na nodra veivale, vakacacani, ka vakasasataki. Era sotava na veika rarawa vakaitamera ni ra kosova na veibuca. Ia oqo era sa mai tiko ena “vanua sa donu.”
Ia, na draki batabata ni 1848 e a tara bi sara ga. A batabata sara na draki oqo ka sa wadakau sara na yavadra o ira eso. Sa tekivu me ra veilecayaki na Yalododonu. Eso na lewe ni Lotu era kaya me ra sa kakua ni tara na nodra vale ena buca o ya. Era sa vinakata ga me ra tiko ga ena nodra qiqi, ni ra vakabauta ni ra na kauti ira ki na dua tale na vanua e vinaka cake o ira na iliuliu ni Lotu. Era a kauta tu mai na itei kei na kau vuata eso, ia era sega ni vinakata me ra vakamaumautaki ena dua na vanua qelemate, dravuisiga, ka vanua lala. A kaya o Jim Bridger, e dua na daubutu vanua kilai levu, vei Brigham Young ni na solia e dua na udolu na dola ki na imatai ni taga sila ena bula mai na Bucabuca na Salt Lake, baleta ni na sega ni yaco rawa.2
Me ikuri ni dredre oqo, sa laurai e California na koula. Era sa raica kina eso na lewe ni Lotu ni na rawarawa cake na bula ka vinaka cake sara kevaka me ra na gole ki California me ra laki vakaiyau kina ka totoka kina na draki.
Ena loma ni lomaocaoca vakaoqo, a vosa kina o Brigham Young vei ira na lewe ni Lotu. E kaya kina:
“[Oqo na buca ] sa dusimaka na Kalou me nodra na nona tamata.
Eda cemuri mai na itavuteke ki na bukawaqa, mai na bukawaqa ki na loma donu ni buturara ni vale, eda sa mai tiko eke eda na tiko kina vakadua. Sa vakatakila vei au na Kalou ni oqo na vanua ena vakadeitaki ira kina na Nona tamata, oqo na vanua era na kune vinaka kina; ena vakavinakataka na veika kece me ra vinaka kina na Nona Yalododonu; ena cudruva na uca cevata kei na tawayaga ni qele, ka na yaco me vuavuai vinaka na qele. Kemuni na taciqu, ni gole sara oqo, ka teivaka … na nomuni … sorenikau.”
Me ikuri ni nona yalataka na veivakalougatataki oqori, e kaya o Peresitedi Young ni na yaco na Bucabuca na Salt Lake me nodra sala totolo ni veilakoyaki na veimatanitu. Era na mai sikova na tui kei na iliuliu lelevu na vanua oqo. Ka kena e uasivi duadua, ni na tara kina e dua na valetabu ni Turaga.3
Oqori na yalayala veivakurabuitaki. E vuqa vei ira na lewe ni Lotu era a vakabauta na parofisai nei Brigham Young, ka so vei ira era vakatitiqataka ka ra biubiu me ra gole ki na vanua era nanuma me ra bula vinaka cake kina. Ia na itukutuku ni veigauna sa vakaraitaka tu ni parofisai yadudua a tukuna o Brigham Young sa mai yaco dina. A mai kadre ka vuavuai vinaka na buca oqo. Era sa vakalougatataki na Yalododonu. Na draki batabata ni 1848 a yaco me dua na ivakavuvuli ni Turaga me vakavulica vei ira na Nona tamata e dua na lesoni bibi. Era a vuli mai kina—ka meda sa vulica taucoko—ni sala duadua ga e dina ka taqomaki ena bula oqo e yaco mai ena vakamuri ni nodra ivakasala na parofita ni Kalou.
Sa dina sara, e dua vei ira na veivakalougatataki levu ni noda lewena tiko na Lotu oqo sai koya na veivakalougatataki ni noda liutaki tiko mai vei ira na parofita ni Kalou. Sa kaya na Turaga, “Raica au sa lesi Josefa na noqu tamata ka solia vua na kaukauwa oqo e vuravura ena dua na gauna; io sa soli vua na kaukauwa oqo kei na lewa ni cakacaka vakabete.”4 A ciqoma na vosa ni Kalou me baleti keda taucoko na lewe ni Lotu, ka vakakina me baleta na vuravura na parofita ka Peresitedi ni Lotu nikua, o Thomas S. Monson. Me kena ikuri, eda tokoni ira me ra parofita, daurairai, ka dauvakatakila, o irau na daunivakasala ena Mataveiliutaki Taumada kei ira na lewe ni Kuoramu ni iApositolo Le Tinikarua.
Ni sa wadakau tu na yava kei na vanua lala, era gadreva vakaidina na Yalododonu taumada o ya na vakabauta kei na vakanuinui vua na nodra parofita. Na nodra vakabulai kei na nodra bula sara ga me sa na kau tani. Ia na Turaga a sauma na nodra talairawarawa ka vakalougatataka ka vakasaututaki ira era vakamuria na Nona italai.
Nikua sa vakayacora tiko vakakina na Turaga vei iko kei au. Na vuravura oqo sa sinai tu ena ivola meda vukei keda vakaikeda, e vuqa sara na kenadau vakataki ira ga, vuqa na daunivakamacala, dauveituberi, kei na daunivuku sa tu vei ira na ivakasala kei na kila ni veiulutaga kecega. Ena tekinolaji nikua, na itukutuku me baleta na veiulutaga kecega sa rawa ga ni tauri mai na nomu tabaka ga e dua na ibulukau. Sa rawarawa sara na nomu coriti ena dai ni ko vakararavi tiko yani ki na “liga ni tamata”5 me vakasalataki iko ena veika kecega vakatekivu mai na nodra susugi na gone ki na sala mo kune marau kina. E dina ni so na itukutuku e dodonu, ia oi keda na lewe ni Lotu sa tu vei keda na ivurevure ni dina savasava, o ya na Kalou vakataki Koya. Eda na kune vinaka ga kevaka meda vakasaqara na iwali ni noda leqa kei na taro ena noda vakadikeva yani na veika sa vakatakila mai na Turaga vei ira na Nona parofita. Mai na tekinolaji vata oqori nikua, sa tu ga ena qeteqete ni ligada na nodra vosa na parofita ena ulutaga cava ga. Na cava beka sa vakavulica vei keda na Kalou mai vei ira na Nona parofita me baleta na vakamau kei na matavuvale? Na cava beka sa vakavulica vei keda mai vei ira na Nona parofita me baleta na vuli kei na bula mamaroroi? Na cava beka sa vakavulica vei keda o Koya mai vei ira na Nona parofita me baleta na bula marau kei na tiko vakacegu?
Na veika era vakavulica na parofita ena rairai ka makawa, sega ni kilai, se sega beka ni rawa me yaco. Ia na Kalou sa Kalou tikoga ni dodonu ka sa tauyavutaka e dua na ivakarau meda kila kina na Nona lewa. “E dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita”6 Ena kena dolavi na itabagauna oqo, na itabagauna ni iotioti ni gauna, a vakadeitaka kina na Turaga ni na veitaratara tiko vata kei keda mai vua na Nona parofita. A kaya kina: “Ena vakayacori vakaidina na vosa kau sa tukuna, se ra tukuna na noqu tamata.”7
Na noda nuitaka ka vakamuri ira na parofita sa sega walega ni dua na veivakalougatataki se madigi. E kaya o Peresitedi Ezra Taft Benson ni “noda vakabulai e vakatau toka ga ena” noda muria na parofita. E vakamacalataka o koya na ka e vakatoka na “Tinikava na Veika Bibi ena Noda Muria na Parofita.” Ena soqoni ena mataka nikua, sa dusimaki keda sara kina vakavinaka ena 14 na veika bibi oqo o Elder Claudio Costa ena Mataveiliutaki ni Vitusagavulu. Baleta ni ra sa rui ka bibi sara ena noda vakabulai, au na tokaruataki ira tale.
“iMatai: Na parofita duadua ga ena vosa tiko ena vukuna na Turaga me baleta na veika kecega.
iKarua: “Sa ka bibi cake vei keda na parofita bula mai na ivolayavu ni cakacaka.”
iKatolu: “E bibi cake vei keda na parofita bula mai vua na parofita sa mate.”
iKava: “Ena sega ni rawa vua na parofita me liutaka vakatani na Lotu.”
iKalima: “E sega ni gadrevi vua e dua na parofita me laki vuli se vakoroi me vosa kina ena dua na iulutaga cava ga se cakava e dua na ka ena dua ga na gauna.”
“iKaono. E sega ni gadrevi vua na parofita me kaya, ‘Sa kaya na Turaga’ me solia mai na ivolanikalou.
“iKavitu: E kaya vei keda na parofita na veika e dodonu me da kila, e sega ni veika eda vinakata me da kila.”
“iKawalu: “Na sega ni yalani na parofita mai na noda vakaiulubale na tamata.
“iKaciwa. Sa rawa vua na parofita me ciqoma na ivakatakila me baleta na veika cava ga, vakayago se vakayalo.
“iKatini: E rawa me vakaitavi na parofita ena veika vakamatanitu.
“iKatinikadua: Na ilawalawa e rua ni tamata e ra dau dredre duadua me ra muria na parofita sai ira era dokadoka kei ira tamata vuli kei ira na dokadoka era vutuniyau.
“iKatinikarua: Ena sega ni gadrevi me kilai raraba na parofita e vuravura.
“iKatinikatolu: E ratou lewena na parofita kei rau na nona daunivakasala na Mataveiliutaki Taumada—na kuoramu cecere duadua ena Lotu.
“iKatinikava: [Vakamuri]…ira na parofita kei iratou na Mataveiliutaki Taumada ka mo vakalougatataki; cakitaki iratou ko na kune rarawa.”8
Kemuni na taciqu kei na ganequ, me vakataki ira ga na Yalododonu ni 1848, sa rawa meda digitaka meda vakamuria na parofita, se sa rawa meda vakararavi ki na liga ni tamata. Meda sa vakavukui meda nuitaka ka vakamuria na nodra ivakasala na parofita kei na iapositolo bula. Au sa ivakadinadina ni nodra vinaka kau vakadinadinataka ni sa kacivi ira na Kalou. Au sa vakadinadinataka talega ni sa sega tale ni dua na sala e veitaqomaki cake ena bula oqo, na iwali ni noda leqa, kunei ni vakacegu kei na marau ena vuravura oqo, ka taqomaka na noda vakabulai me vakataka na noda talairawarawa ki na nodra vosa. Au sa vakadinadinataka na veika oqo ena yaca tabu ni Turaga, o Jisu Karisito, emeni.