“E Vakatavulici Keda o Koya me da Biuta Tani na iTovo Vakayago”
Elder Juan A. Uceda
Of the First Quorum of the Seventy
Au vakadinadinataka na dina kei na kaukauwa ni Veisorovaki ni i Vakabula e veisavai ka veivakasavasavataki, ka vakatabui keda kei na noda veivuvale.
Ena dua na mataka, a soqoni vata e dua na matavuvale me ratou vulica na ivolanikalou me vaka ga na kena ivakarau. Ena nodratou sa soqoni vata, a vakila o tama e dua na yalo e veisaqasaqa: na kedra irairai eso na lewe ni matavuvale era sega ni marautaka me ra vakaitavi. Eratou a masu vakamatavuvale, ka ratou sa tekivu wilika sara na ivolanikalou, e raica rawa o tama ni dua vei iratou na luvena e sega ni tiko vua na nona ivolanikalou. A sureti koya me lako ki na nona rumu me lai kauta mai na nona ivolanikalou. A lako ena vuturi, ka sa vaka me tawamudu na nona taura e dua na gauna balavu, nona sa qai lesu mai, dabe sobu, ka kaya, “E dodonu li me datou sa cakava sara ga qo na ka oqo?”
A vakasamataka vakaikoya o tama ni meca ni bula savasava taucoko e vinakata me vakavuna na leqa me rawa kina me ratou kakua ni vulica na ivolanikalou. A tovolea tiko o tama, me vakamalumalumutaka na yalona, ka kaya, “Io, e dodonu me datou cakava na ka oqo ena gauna oqo baleta ni sa ikoya sara ga oqo na ka e vinakata na Turaga me datou cakava.”
A sauma lesu mai, “Au sega sara ga ni via cakava na ka qo ena gauna oqo!”
A rarawa o tama, qai kaya ena domo levu “Oqo na noqu vale, ka datou na wilika tiko ga e veigauna na ivolanikalou ena noqu vale!”
Na domona kei na levu ni nona vosa e vakararawataka na luvena yalewa, nona roqota tu na nona ivolanikalou, a biuta na soqoni ni matavuvale, cici ki na nona rumu ni moce, qai sogota vakaukauwa mai na katuba. Sa cava e kea na vulici ni ivolanikalou vakamatavuvale—sega na duavata ka lailai na loloma e vakilai e vale.
Sa kila o tama ni a caka cala, ka sa mani gole ki nona rumu ni moce ka tekiduru me masu. A vakamamasu vua na Turaga ena nona kere veivuke, ena nona kila ni a vakacudruya e dua vei ira na Luvena, e dua na luvena yalewa ka lomana vakaidina. A kerea vua na Turaga me vakalesuya mai na yalo ni loloma kei na duavata ena loma ni vale me rawa kina vei iratou me ratou tomana na nodratou vulica na ivolanikalou me vaka e dua na matavuvale. Ena nona masumasu tiko, a basika mai ena nona vakasama e dua na vakanananu: “Lako ka kaya ‘Vosoti au’.” A tomana tale nona masu vagumatua, kerea na yalo ni Turaga me lesu tale mai ki na nona loma ni vale. Vakadua tale na lako mai ni vakanananu, “Lako ka kaya ‘Vosoti au.’ ”
A vinakata dina o koya me dua na vinaka ka me cakava na ka e dodonu, sa qai tucake ka lako ki nona rumu ni moce na luvena yalewa. A tukituki vakavica ka vakamalua ena nona katuba ka sega ni dua na kena isau. Oti, sa qai dolava vakamalua na katuba ka raica na nona gone yalewa ni mamakeukeu ka tagi tiko ena nona idavodavo. A tekiduru vakavoleka yani vua ka kaya ena domo malumu ka mamada, “Vosoti au. Au kerea mo vosota na ka au a cakava.”A tokaruataka tale, “Vosoti au, au lomani iko, kau sega ni via vakararawataki iko.” Oti, sa qai lako mai ena gusu ni dua na gone na lesoni ni vinakata na Turaga me vakatavulici koya kina.
Sa mudu na nona tagi, ka oti ga e dua na vakadirorogo lekaleka, a taura cake sara nona ivolanikalou ka sa tekivu me vakasaqara eso na tikina. A vakadikeva toka o tama na liga savasava ka vakamareqeti ena nona vakacega tiko na ivolanikalou. A kunea eso na tikina a vakasaqara tiko ka sa tekivu wilika sara mai vakamalua ena domo malumu: “A sa veimecaki na i tovo vakayago kei na Kalou me tekivu sara mai na lutu i Atama, ka na vaka tu kina me tawamudu kevaka eda sa sega ni vakarorogo ki na domo ni Yalo Tabu, me da biuta tani na itovo vakayago ka yaco me tamata yalosavasava ena vuku ni i soro i Karisito na Turaga; ia me da vaka na gone lailai, me da talairawarawa, yalomalua, yalomalumalumu, dauvosota, dauloloma ka talairawarawa ki na veika kece sa lewa vua na Turaga, me vaka na gone sa talairawarawa vua na tamana.”1
Ena nona se tekiduru tikoga volekata yani na nona idavodavo, a tarai koya mai na yalomalumalumu ena nona vakasamataka vakai koya, “A volai na ivolanikalou o ya me baleti au. Sa vakatavulica vei au e dua na lesoni cecere.”
Oti sa qai vukica na matana me raici koya ka kaya, “Vosoti au. Vosoti au, Tata.”
Ena gauna vata sara ga o ya a qai kidava kina o tama ni sega ni kena inaki na wiliki ni tiki ni ivolanikalou o ya me baleti koya, ia a wilika ga me baleti koya vakaikoya. A dodoka na ligana ka mokoti koya. Sa vakalesuitale mai na loloma kei na duavata ena gauna kamikamica oqo ni duavata ka lako mai na vosa ni Kalou kei na Yalo Tabu. Na tiki ni ivolanikalou o ya, a nanuma na luvena yalewa mai na nona vulica vakaikoya na ivolanikalou, a tara na lomai tamana vata kei na bukawaqa ni Yalo Tabu.
Kemuni na taciqu lomani, na noda veivale e dodonu me veivanua ka me vakaitikotiko kina na Yalo Tabu. “E rawa wale ga me vakatautauvatataki na vale vata kei na valetabu ena kena vakamareqeti.”2 E sega na nona vanua na itovo vakayago ena noda veivale. Na itovo vakayago sa gole tani me “ubia na [nona] ivalavala ca, se [nona] qaciqacia, [nona] dokadoka se viavia lewai ira na tani, se [nona cakava] taurivaka na ivalavala e sega ni dodonu, sa na tasogo ko lomalagi; a sa rarawa na Yalo ni Turaga; ia ni sa lako tani, sa oti e kea na kaukauwa vakabete se na i lesilesi ni tamata ko ya.”3
O keda eda taura na itutu ni Matabete i Eroni se na Melikiseteki me da dau nanuma e veigauna ni “raica sa sega sara ni kilikili me vakayacori na cakacaka vakabete ena i vakarau kaukauwa se vakasaurara, ia me vakayacori ga ena veivakauqeti, na vosota vakadede, na yalomalua; na yalomalumalumu, kei na loloma e sega ni veivakaisini; io na yalo e veidokai, kei na yalomatua; raica ena rarama sara kina na yalona, ka sega vua na veivakaisini kei na lawaki.”4
Na veileti ena lako tani mai na noda vale kei na noda bula ena noda sasaga me da bulataka na ituvaki Vakarisito.“Ia dou kakua ni cudruvi ira sa ivalavala ca vei kemudou, au sa kaya vakaidina vei kemudou, o koya sa kaya sa veivutuni ka sega ni vosota na ivalavala ca ni wekana, ena cudruvi kina.”5 “Vosoti au. Vosoti au, Tata.”
Na Turaga o Jisu Karisito, sa ikoya na Tui ni Sautu, e vakatavulici keda me da tauyavutaka vakacava na sautu ena noda loma ni vale.
E vakatavulici keda me da dau vakarorogo, se dua tale na kena vosa, me da soro ki na lewa se kaukauwa ni Turaga.“Lako ka kaya, ‘Vosoti au.’”
E vakatavulici keda me da yalomalumalumu, se ena dua tale na vosa, me da “kakua ni cudru; vakamalumalumu; yalo malua; sega ni vakacudrui vakarawarawa se yalokatakata; dau soro; dau vosota na veivakacacani.”6
E vakatavulici keda me da yalomalua, se ena dua tale na vosa “biuti keda sobu, vakarauta; yalomalumalumu; dau vakarorogo; veibasai ni dokadoka, qaciqacia, viavialevu, se vakilakila.”7
“Vosoti au. Au kerea mo vosota na ka au a cakava.”
E vakatavulici keda me da dau vosota, se ena dua tale na vosa, “ni tu vei keda na itovo ni vosota na ivalavala ca ka sega na vosa kudrukudru se yalokatakata” se “yalomalua ena gauna ni vosota ena mavoa se veivakacacani.”8
E vakatavulici keda me da vakasinaiti ena loloma.“Au lomani iko, kau sega ni vinakata meu vakararawataki iko.”
Io, e vakatavulici keda o Koya me da biuta tani na itovo vakayago, me vaka na tama ena italanoa oqo, ena nona a vakamamasu kivua na Turaga ena nona kere veivuke. Io, me vaka ga nona a mokoti luvena yalewa o tama ena liga ni loloma, e vaka talega kina na i Vakabula ena nona dodoka mai na Ligana me mokoti keda ena gauna ni noda sa veivutuni vakaidina.
E vakatavulici keda me da yaco “me dua na yalododonu ena vuku ni isoro i Karisito na Turaga. Oti me da na qai muria na lewa ni Kalou, ka na yaco me da veitokani vata kei na Kalou. Au vakadinadinataka na dina kei na kaukauwa ni Veisorovaki ni iVakabula e veivakararamataki, veivakasavasavataki, ka vakatabui keda kei na noda veivuvale ena noda sasaga me da biuta tani na itovo vakayago ka muri Koya.
Sa iKoya, “na lami ni Kalou,”9 Sa iKoya “na Yalosavasava ka Dodonu,”10 “ena vakatokai na yacana ko Veivakurabuitaki, na i Vakavuvuli, na Kalou kaukauwa, na Tama ni gauna tawamudu, na Tui ni Sautu.”11 Ena yaca ni Turaga o Jisu Karisito, emeni.