“Ia Dou Lomani Ira Sara Eso Ni Ra Sa Lomalomarua”
Barbara Thompson
Second Counselor in the Relief Society General Presidency
Na totoka ni veisiko sa ikoya na laurai ni veisau ni bula, tavoya na wainimata, tubu ni ivakadinadina, veilomani ni tamata, vaqaqacotaki ni matavuvale.
Kemuni na taciqu lomani, sa dua na ka kalougata meu mai tiko vata kei kemuni ka vakila na nomuni yalodina kei na nomuni dau lomana na Turaga. Vinaka vakalevu na nomuni sa veilomani tiko ka vakaraitaka na loloma cecere vei ira na tani ena veisiga.
Ena gauna e liu ni iSoqosoqo ni Veivukei e Nauvoo, eda kila ni o ira na marama era lako ki na veivale yadua, veiqaravi kivei ira eso tale, vakadeitaki ni gagadre, kau mai ni kakana, qaravi ira na tauvimate, kei na ivakaraitaki ni yalololoma me baleti ira yadua na marama kei na nodra matavuvale.1 E kauta mai oqo ki na vakasama na ivolanikalou ena Juta: “Ia dou sa lomani ira sara eso, ni ra sa lomalomarua.”2 Ena noqu vakananuma na ivolanikalou oqo kei na kena ibalebale, e vukica noqu vakasama kivua na i Vakabula kei na vakavuqa ni kena tukuna na ivolanikalou na loloma kei na yalololoma e tu vua na Karisito me baleti keda yadua.
Eda vakawilika ena Veiyalayalati Vou ni o Karisito e “lomani ira kece”3 na tamata ena Nona dau vukei ira. E dau lomani ira o Koya ni raica ni ra viakana ka dau vakani ira, se ni ra dau tauvimate e dau vakabulai ira o Koya, se ni ra dau gadreva na veivakani vakayalo e dau vakavulici ira o Koya.
Na loloma cecere sa ikoya na lomana ka solia wale na ka vua e dua tani tale. Kena ibalebale mo lomana ka gadreva mo vakamamadataka na nona rarawa e dua tani tale. Kena ibalebale mo vakaraitaka na yalololoma kei na yalovinaka vua e dua tani tale.
E kerei keda na i Vakabula me da cakava na veika sa cakava o Koya,4 noda colata nona icolacola e dua tani tale, noda vakacegui ira era gadreva na vakacegu, noda tagi vata kei ira era sa tagi,5 noda vakani ira era viakana, sikovi ira na tauvitamate,6 noda vukei ira na malumalumu, laveta cake na liga era sa lutu sobu,7 ka “veivakatavulici vakai ira ena vunau ni matanitu.”8 Kivei au na veivosa oqo kei na cakacaka e vakamacalataka na dauveisiko—o ira era veiqaravi kivei ira eso tani tale.
Na veisiko e solia vei ira na marama e dua na gauna me ra na dau raici ira, veivakaukauwataki, ka veivakavulici vakai ira. Me vakataka e dua na ivakavuvuli ena Matabete i Eroni era sa vakacolati me ra “dau vakaraici ira na lewenilotu” ka “dau sikovi ira ka vakauqeti ira tikoga,”9 ena dau vakaraitaka na loloma e dua na dauveisiko ena nona dau masulaki ira na marama e dau sikovi ira.
E vakananuma vakaoqo vei keda o Sisita Beck, “Me baleta ga ni da muria tiko na ivakaraitaki kei na ivakavuvuli i Jisu Karisito, eda rokova na veikacivi tabu oqo me da loloma, kila, veiqaravi, kila vakavinaka, veivakatavulici, ka cakacaka ena Vukuna.”10
Nikua, au vinakata meu vosa ena rua na ulutaga:
-
Na veivakalougatataki ko kauta vei ira eso tani tale ena nomu veiqaravi vakadauveisiko.
-
Na veivakalougatataki o ciqoma ena nomu qaravi ira eso tani tale.
Na Veivakalougatataki Ko Kauta Vei Ira Eso Tani Tale Ena Nomu Veiqaravi Vaka-Dauveisiko
Dua na gauna lekaleka sa oti au a sikovi ira kina e dua na ilawalawa marama e Anchorage, Alaska. Rauta ni tinikarua na marama eratou tiko ena rumu ka kuria tale mai ena talevoni e ono mai na so na koro lelevu e Alaska. Lewe levu vei ira na marama oqo era vakaitikotiko ni rauta na drau na maile mai vale ni Lotu. Era vakatavulica vei au na marama oqo na veisiko.
Me ra na sikovi kece na marama ena gadrevi kina na vodo waqavuka, vodo waqa, se vodo motoka balavu sara. Na gauna kei na ilavo me na vakayagataki sa na vakadredretaka sara ga. Ia, o ira na marama oqo era vakila ni ra veivolekati tiko ena nodra qaqa ni masu ka ra sa dau kerea ga na veitokoni ni Yalo Tabu me ra kila se cava era na vinakata, dina ga ni ra na sega ni dau veisotari vakawasoma ena matanavotu. Era sa na veitaratara ga ena talevoni, ena initaneti, kei na ivola. Era veiqaravi ena yalololoma baleta ni ra sa ia oti na veiyalayalati kei na Turaga ka ra sa gadreva me ra na vakalougatataka ka vaqaqacotaka na nodra bula na marama tacidra.
Dua tale na dauveisiko gugumatua ena Democratic Republic e Congo e rau taubaletaka e dua na gaunisala balavu me rau laki sikova e dua na marama kei na luvena lailai. O rau na marama oqo e rau masulaka na itukutuku e rau na kauta ka rau vinakata me rau kila se cava e rawa ni rau cakava me vakavu veisau ena nona bula na marama ka rau laki sikova. Dua na ka na nona marau na marama e rau a sikova. Vei koya, na nodrau mai veisiko sa vaka e dua na itukutuku mai lomalagi me baleti koya sara ga. Ni rau sikovi koya tiko na dauveisiko ena nona loma ni vale, eratou vakalougataki na dauveisiko, o koya na marama e rau sikova tiko, kei ira na nona matavuvale. Sega sara ga ni bau dua na ka na taubale balavu e rau a cakava mai. Tiko vei rau na dauveisiko oqo na loloma cecere, ka rau sa vakavuna sara ga na veisau levu. Ka rau sa vakalougatataka sara ga na nona bula na marama erau sikova.
Na veiyawaki ni vanua, na veika me dausaumi vakailavo, kei na taqomaki ni bula ni tamata, e dau vakadredretaka sara na veitaratara ena veivula ena so na vanua ena Lotu, ia na kaukauwa ga ni ivakatakila yadua, era sa raica rawa kina na marama era sasagataka me ra veilomani ka veivakaukauwataki, na sala me ra vakayacora kina na veikacivi oqo sa mai vua na Turaga.
O ira na peresitedi ni iSoqosoqo ni Veivukei ka ra sa vakauqeti era sa veivosaki vata kei ira na nodra bisopi ka masulaka na veilesi ni dauveisiko me ra na vukei koya kina ena nodra vakaraici ka vukei tiko na marama ena tabanalevu. Ni da sa kila vinaka na ilakolako ni veivosaki kei na ivakatakila, eda sa na kila vinaka cake na bibi ni noda itavi ni veiqaravi ka na vakadeitaka na vakararavi ki na Yalotabu me veituberi ki na noda sasaga.
Oi au e dua na dau sikova e levu sara na marama ena veivula ka qai laki tukuna ena yalovakacegu, “Niu sa qarava oti na noqu veisiko!” Dina niu sa na laki ripotetaka na ka au sa cakava, ia kevaka me o koya walega o ya na vuna au cakava kina, sa dua dina na ka vakamadua.
Na totoka ni veisiko e sega ni kena rawati na 100% ena ripote ni veivula; na totoka ni veisiko ena kena raici ni sa veisau na bula, sa tavoya laivi na wainimata, sa kadre cake na ivakadinadina, era sa lomani na tamata, vaqaqacotaki na matavuvale, ra vakalomavinakataki na tamata, ra vakani na viakana, ra sikovi na tauvimate, ka ra vakacegui o ra era rarawa voli. Na kena dina, sa ikoya ni veisiko ena sega ni cava baleta ni da na dau vakaraici ira ka veivakaukauwataki tu ga ena veigauna.
Dua tale na veivakalougatataki ni veisiko sa ikoya na vaqaqacotaki ni duavata kei na veilomani. E vakasalataki keda na ivolanikalou ena icakacaka ni kena rawati: “A sa vakaroti ira me ra yalovata ka me … duabau ga na vakabauta ka duabau ga na papitaiso, io, me ra duavata sara ka veilomani.”11
E levu sara na marama era sa dau talanoataka ni vu ni nodra lesu tale mai ki na itaviqaravi ni Lotu baleta e dua na marama dauveisiko yalodina, ka dau lako yani ena veivula ka laki vakavulici ira, vakabulai ira, lomani ira, ka vakalougataki ira.
Ena so na gauna na ka bibi duadua ena nomu veisiko sa ikoya na itukutuku o na laki wasea. Eso na marama e lailai sara na nodra dau veivaqaqacotaki vakayalo, vakavo ga me baleta na itukutuku o na kauta yani. Na iVaqa Ni Veisiko ena Liaona era itukutuku vakosipeli ka vukei ira yadua na marama me vakalevutaka nodra yalodina, vakaukauwataka nodra matavuvale, ka vakabibitaka na veivukei ena daulomasoli.
Ena so na gauna na ka bibi duadua ena nomu veisiko sa ikoya na nomu mai dabe ga ka vakarorogo. Na vakarorogo e dau veivakacegui, veikauwaitaki, ka dau veivakabulai. Ena so tale na gauna o na vakadre vakavinaka ka vakarau mo veiqaravi ena vuvale se veivuke ka vakaceguya e dua na gone ni tagi tiko.
Na Veivakalougatataki o Ciqoma ena Nomu Qaravi Ira Eso Tani Tale
E levu sara na veivakalougatataki o rawa ni ciqoma ena nomu qaravi ira eso tani tale. Ena so na gauna au dau kaya, “Oilei, Sa dodonu meu na cakava na noqu veisiko!” (O ya na gauna au guilecava kina niu sikovi ira ka vakavulici ira tiko na marama. O ya na gauna au raica tiko kina me vaka ni icolacola bibi ka sega me ka ni veikalougatataki) Au rawa ni kaya sara ga kina vakadodonu niu dau vakila na vinaka ni noqu bula niu laki veisiko. Au dau laveti cake, lomani ka vakalougatataki, vakalevu cake mai vei ira au dau sikova. E levu kina na noqu loloma. Na noqu gagadre meu veiqaravi e vakalevutaki. Au sa raica rawa talega na totoka ni nona ituvatuva na Tamada Vakalomalagi me da dau veirairaici ka dau veivukei vakaikeda.
Eso tale na veivakalougatataki ni dauveisiko sa ikoya ni da na kilai ira kina eso ka ra na noda itokani ka na sega ni vakakina kevaka me sega na veisiko. Ena so na gauna o keda sara ga eda sa isau tiko ni nodra masu eso na marama. E dau kauta voleka sara talega mai, na ivakatakila yadua kei na sotavi ni veika vakayalo na veisiko.
Au sa sotava oti eso na veika vakayalo totoka sara ka marautaki ena noqu bula, niu dau laki dabe ena nodra vale na marama ena noqu tabanalevu, kei na veiyasai vuravura. Keimami sa veivakatavulici ena kosipeli. Keimami sa tagi vata, veidredrevaki vata, ka walia vata na leqa, kau sa laveti cake ka vakalougatataki.
Dua na yakavi, ni sa voleka ni cava na vula, au sa vakarau tiko meu biuta na neitou tauni kau se bera tiko ni sikova e dua na noqu itokani marama. Sa laki bogi mai na vanua. Sega ni dua na ka meu cakava. Au a sega ni qiri. Ka sega na kequ ikarua. Ia, au sa vakadeitaka meu sa lako mada ga ka laki sikovi Julie, na noqu itokani. O Ashley na luvei Julie a sucu vata kei na dua na mate ni sui. Dina ni sa voleka sara ni yabaki ono o Ashley, ia, e se lailai sara ka sega ni rawa me cakava e levu na ka vakavo ga na nona rawa ni yavalata na ligana ka vosa. Dau davo tu ga ena dua na ibe vutika ni sipi ena veisiga. A gone mamarau ka dau matadredredre tu ga o Ashley kau dau taleitaka na tiko vata kei koya.
Niu yaco yani ki vale ena bogi o ya, e a sureti au o Julie meu curu yani ka sa kaci sara mai o Ashley ni via vakaraitaka vei au e dua na ka. Au curu yani ka laki dabe sara ena fuloa e yasai Ashley ka dabe mai yasana ka dua o tinana. Tukuna o Ashley, “Raica na ka au sa rawa ni cakava!” sa qai sasaga o koya me vuki yani ka vuki lesu tale mai ka vakalailai sara na nona vukei koya o tinana. E taura ni voleka me ono na yabaki sa qai rawata na ka oqo. Ni keitou vakasausau, marautaka, ka mosita vata na ka sa rawa oqo, au vakavinavinaka vua na Tamada Vakalomalagi niu a laki veisiko rawa ka sega ni calata na ka sa yaco o ya. Dina ga ni a yaco na ka oqo ena vica vata na yabaki sa oti, ka sa mai yali talega na bula nei Ashley, au na dau vakavinavinaka tu ga niu a sotava vata kei koya na veika o ya.
E dua na dauveisiko totoka ka yalodina ena vica vata na yabaki o tinaqu. E dau vakasamataka tu ga na sala me vakalougataka kina na vuvale ena sikova. E dau vakaliuca o koya na ka me baleti ira na luvena na marama e dau sikova ka nuitaka tu me vaqaqacotaka na nodra matavuvale. Au nanuma tiko e dua na gone yabaki lima e a cici cake mai vei tinaqu e vale ni Lotu ka kaya, “O iko na noqu dauveisiko. Au lomani iko!” E dua na ka totoka ka veivakalougataki vei tinaqu na nona dau tiki tu ni nodra bula na marama vakasakiti kei na nodra matavuvale.
Ena sega ni vinaka taucoko na veika e sotavi ena gauna ni veisiko. Ena dredre ena so na gauna, me vaka na vuvale o na sega ni taleitaki mai kina, se dua na marama o sikova sa dredre sara ga baleta ni rui osooso o koya. Ena via taura toka e dua na gauna balavu mo drau veikilai kei na so na marama mo na sikova. Ia ni da gadreva me da lomani ira, vukei ira, ka masulaki ira na marama oqori, ena vukei keda na Yalo Tabu me da na kunea na sala me da dau raici ira ka vaqaqacotaki ira.
E dau matai sara o Peresitedi Thomas S. Monson me veiqaravi me vaka e dau cakava na iVakabula. E dau laurai o koya ni dau veisiko voli ga ka vukei ira eso tani tale. Tukuna o koya: “Eda sa vakavolivoliti tu oqo mai vei ira era gadreva na noda veikauwataki, na veivakayaloqaqataki, noda veitokoni, veikaroni kei na noda dauveinanumi. … Eda sa liga ni Turaga e vuravura edaidai, kei na itavi ni veiqaravi ka vueti ira cake na luvena. O Koya e sa vakarararavi tu mai vei keda.”12
“Ia sa rawa walega me ra vakaitavi kina ko ira era sa yalomalumalumu ka dauloloma; ko ira sa tu vei ira na vakabauta, na inuinui, kei na loloma, io ko ira sa yalomatua ena [nona] ka kecega era sa vakaitavi kina.”13
O ira na marama eda sikovi ira tiko era sa soli mai vei keda me da qaravi ira. Me sa tiko vei keda na loloma kei na yalololoma me da na veisautaka kina na nodra bula o ira era sa vakacolati mai vei keda.
Kemuni na taciqu, au lomani kemuni. Au sa na masulaka mo ni na vakila na loloma ni Tamada Vakalomalagi kei na noda iVakabula o Jisu Karisito. Au vakadinadinataka kivei kemuni ni bula tiko na i Vakabula, ena yaca i Jisu Karisito, emeni.