Na Cava o Sa Bau Cakava me Baleta na Yacaqu?
Elder Mervyn B. Arnold
Of the First Quorum of the Seventy
Ena dua na siga eda na soli itukutuku taucoko sara vua na noda iVakabula, o Jisu Karisito, me baleta na veika eda sa cakava ena vuku ni Yacana.
Ni se cauravou lailai o Peresitedi George Albert Smith, a rairai vua ena tadra na tukana sa mate o George A. Smith, ka taroga, “Au via kila se cava o sa bau cakava me baleta na yacaqu.” A sauma vakaoqo o Peresitedi Smith, “Au sega ni cakava me baleta na yacamu e dua na ka mo madua kina.”1
Ena veimacawa ni da vakaivotavota ena sakaramede, eda veiyalayalati ka yalataka ni sa lomada me da taura vei keda na yaca i Karisito, ka dau nanumi Koya tikoga, ka muria na Nona ivakaro. Ia kevaka e sa yaloda me da cakava, sa yalataki vei keda na veivakalougatataki vakasakiti o ya—ni na tikoga vata kei keda na Nona Yalotabu.2
Me vaka na nona tukunikataka vei tukana o Peresitedi George Albert Smith na veika sa vakayacora ena vuku ni yacana, ena dua na siga eda na soli itukutuku taucoko sara vua na noda iVakabula, o Jisu Karisito, me baleta na veika eda sa cakava ena vuku ni Yacana.
Na bibi ni rogo vinaka ni yaca e tiko ena Vosa Vakaibalebale, ka da wilika kina, “A ka me digitaki na rogo vinaka, ia na iyau levu e segai, a ka me digitaki na loloma, na siliva kei na koula e segai”3 ia “A kedra inanumi na yalododonu sa ka ni veivakalougatataki.”4
Niu vakananuma na ivolanikalou eso oqo kei na kena bibi na irogorogo vinaka, e drodro vakayauyau mai na noqu vakanananu na yaca rogo vinaka kei na isolisoli vakawa ka rau a biuta tu mai na noqu itubutubu vei iratou na taciqu e va, oi rau na ganequ, kei au. E sega vei rau na noqu itubutubu na iyau ni vuravura oqo, e sega talega vei rau na siliva se na koula. Keitou a tubu cake na lewe ciwa ena neitou vale ni rua na rumu ni moce ka dua na valenisili ka qai sogolati na varada e muri me rau dau moce kina na ganequ. Ni rau sa takali yani na noqu itubutubu, keitou sa soqoni vata mai vakaveitacini me keitou wasea na nodrau iyau vakavuravura, ka lailai walega. E biuta tu mai o tinaqu e vica na ivinivo, eso na iyaya ni lomanivale sa vakayagataki tu, kei na vica tale na nona iyaya ga o koya. E biuta tu mai o tamaqu eso na iyaya ni cakacaka vakamatai, eso na dakai balavu ni vakasasa, kei na vica wale tale na ka. Na veika walega ena rawa kina na ilavo sai koya e dua na vale kei na dua na umailavo lailai e maroroi tu.
Keitou a veitagicaki, ka vakavinavinaka, ni keitou kila ni rau sa biuta tu mai vei keitou e dua na ka e uasivi cake mai na siliva se na koula. Erau a solia vei keitou na nodrau gauna kei na nodrau loloma. Erau dau wasea vakavuqa na nodrau ivakadinadina me baleta na dina ni kosipeli, ka rawa ni keitou sa wilika ena gauna oqo ena nodrau ivolaniveisiga vakamareqeti. E sega soti ena vosa, ia e vakalevu cake ena ivakaraitaki, erau a vakavuvulitaka vei keitou na cakacaka vakaukauwa, ka dau dina. Erau sa tugana talega na gagadre me keitou tomana na neitou vuli, kaulotu, ka bibi duadua me laurai e dua na itokani tawamudu, ka vakamautaki ena valetabu, ka vosota me yacova na ivakataotioti. Sa dina sara erau a biuta tu mai vei keitou e dua na isolisoli vakawa ni yaca rogorogo vinaka.
Ni rau vakalougatataki na parofita lomani ko Ilamani kei na watina ena rua na luvedrau tagane, erau a vakayacani rau ko Liai kei Nifai. E tukuna ko Ilamani vei rau na luvena tagane na vuna erau vakayaca kina vei rau e rua na tubudrau, ka rau bula voli e vuravura rauta ni vo e 600 na yabaki me rau qai sucu. A kaya:
“Drau raica na luvequ, … au sa solia oqo vei kemudrau na yacadrau na nodatou itubutubu taumada [o Liai kei Nifai] … ; ia au sa vakayacora oqo ni gauna drau dau nanuma kina na yacamudrau … mo drau dau nanuma na nodrau cakacaka; ia ni drau sa nanuma na nodrau cakacaka, drau na nanuma na kena dau tukuni, ka volai talega, ni rau sa tamata vinaka.
“O koya gona kemudrau na luvequ, au vinakata mo drau dau cakava na veika vinaka, me rawa kina ni dau tukuni baleti kemudrau, ka dau volai talega, me vaka ga na kena dau tukuni ka volai baleti rau.
“… Me nomudrau kina na isolisoli vakamareqeti ni bula tawamudu.”5
Kemuni na wekaqu, ena 600 na yabaki mai oqo, ena dau nanumi tiko beka vakacava na yacada?
Ni da tukuna tiko na ivakarau e rawa ni da taura kina na yaca i Karisito, ka da taqomaka na yacada vinaka, e vakavuvulitaka kina vakaoqo o Moronai:
“Ia au sa kaya tale vei kemudou, dou lako vei Karisito, ka taura matua na isolisoli vinaka kecega, ia dou kakua ni taura na isolisoli ca, se na ka sa tawasavasava. …
“Ia, dou lako vei Karisito, ka biuta laivi na ivalavala sa sega ni vakalotu, mo dou vinaka kina.”6
Ena ivolalailai veivakauqeti, Me iSakisaki ni iTabagone, eda wilika kina, na galala ni digidigi e dua na ivakavuvuli tawamudu ka solia mai na Kalou ka tiko kina na itavi savasava me baleta na digidigi eda vakayacora. [Eda] galala me da digidigi vakataki [keda], [eda] sega ni galala me da digia na isau ni [noda] ivalavala. Ni [da] sa digidigi, [eda], na ciqoma na isau ni digidigi o ya.”7
Ni oti ga vakalailai neirau vakawati kei Devonna na noqu daulomani, a wasea vei au o koya e dua na italanoa me baleta na nona a vulica ena nona gauna ni itabagone na ivunau bibi oqo ni da galala tu me da digidigi, ia eda sega ni galala me da digia na isau ni noda ivalavala. Mai na nona veivuke o Shelly na luvequ yalewa, au na vinakata meu tukuna na veika a sotava o Sisita Arnold:
“Niu se yabaki 15, au dau nanuma ena vuqa na gauna ni sa rui levu na lawa kei na ivakaro. Au sega ni vakabauta ni dua na gone yabaki tinivakacaca dau vinakata me lasa ka marautaka na bula me qai levu tu na ka e vakatabui kina. Me kena ikuri, na vuqa na auwa au dau cakacaka voli kina ena lomanibai ni manumanu nei tamaqu sa taura sara ga vakalevu na noqu gauna vata kei ira na noqu itokani.
“Ena vulaikatakata oqo, e dua na noqu cakacaka meu raica me ra kakua ni basubai ka lako yani ki na loga ni witi na bulumakau era kana voli ena veico mai ulunivanua. E rawa ni mauvu na bulumakau e dau kania na witi era se qai tubu mai, ka na vakavuna na tasogo ni icegu kei na mate. E dua na bulumakau e dau saga tiko e veigauna me curumaka ki tautuba ni bai na uluna. Ena dua na mataka niu vodo ose tiko yani ka vakamuria na bai meu vakaraici ira na bulumakau, au qai raica ni sa basubai na bulumakau oqo ka lako yani ki na loga ni witi. Ena noqu kurabui, au qai kila ni sa oti toka e dua na gauna na nona kana witi toka ka sa mauvu sara tu vakalevu ka vaka tu e dua na baluni na kena irairai. Au vakasamataka, ‘Bulumakau lialia! A tu na bai oqori mo taqomaki kina, ia o qai basuka ka o sa kania vakalevu na witi sa tu kina oqo ena dua na vanua ca na nomu bula.’’
“Au a cici yani vakatotolo ki vale meu kauti tamaqu mai. Ia ni keirau sa lako yani, au raica ni sa davo matemate no na bulumakau. Au a rarawataka na mate ni bulumakau ko ya. Keitou sa vakarautaka tu vua e dua na veico totoka ena ulunivanua me kana kina ka dua na bai me kakua kina ni yacova yani na witi rerevaki, ia a basuka na bai ena nona yalowai ka vakavuna ga vakataki koya na nona mate.
“Niu vakasamataka na itavi ni bai, au qai kila ni o ya na veitaqomaki, me vaka na veitaqomaki ni ivakaro kei na nodrau lawa na noqu itubutubu. Na ivakaro kei na lawa meu vinaka kina. Au qai vakila ni talairawarawa ki na ivakaro e rawa ni vakabulai au mai na mate vakayago kei na mate vakayalo. Na veivakararamataki oqori sa dua na gauna bibi ena noqu bula.”
A vulica o Sisita Arnold ni sa solia tu vei keda na Tamada Vakalomalagi dauloloma, vuku, ka dauloloma na ivakaro—e sega ni baleta me vakatabui keda, me vaka e vinakata na meca me da vakabauta—ia me vakalougatataka na noda bula ka taqomaka na keda irogorogo vinaka kei na noda ivotavota vakawa me baleta na noda veitabatamata ni mataka, me vakataki rau ko Liai kei Nifai. Me vaka ga na bulumakau ka a sotava na isau ni nona digidigi, sa dodonu vei keda yadua meda vulica ni sega ni drokadroka cake ena yasa kadua ni bai na co—ena sega vakadua, ni “sega ni kune na marau ena ivalavala ca.”8 Eda na dui sotava yadua na isau ni noda digidigi ni sa oti na bula oqo. E matata na ivakaro, era veitaqomaki—sega ni vakatabui—ka sega ni wili rawa na veivakalougatataki ni talairawarawa!
Sa kila tu na Tamada Vakalomalagi ni da na vakayacora kece na ka cala. Au sa vakavinavinaka vakalevu ena vuku ni Veisorovaki, ka rawa kina vei keda yadua me da veivutuni, cakava na veisau e dodonu me caka me rawa kina ni da duavata tale kei na noda iVakabula, ka vakila na vakacegu kamica ni veivosoti.
Sa sureti keda tu na noda iVakabula e veisiga yadua me da vakasavasavataka na yacada ka lesu tale yani ki na Nona iserau. Na nona veivakayaloqaqataki e sinai ena loloma kei na veikauwaitaki. Raitayaloyalotaka vata kei au na nona imoko na iVakabula niu wilika na Nona vosa, “Dou na sega li ni veivutunitaka na nomudou ivalavala ca ka saumaki ka lesu mai vei au meu vakabulai kemudou?”9
Nikua au na cavuta kina vei keda yadua na bolebole vata erau a cavuta vei au na noqu itubutubu, ka rau na dau nanumi tu me baleta na irogorogo vinaka ni yacadrau. Ni se bera ni o cakava e dua na ka, raitayaloyalotaka na iVakabula ni tu e yasamu ka tarogi iko, “Meu na vakasamataka beka, meu na cavuta beka, se meu cakava niu kila ni tu e kea o Koya?” Ni tu dina ekeri o Koya. O Peresitedi Monson, na noda daulomani, au vakadinadinataka ni parofita, e dau cavuta vakawasoma na tiki ni ivolanikalou oqo ni vosa tiko me baleta na noda Turaga na iVakabula: “Niu sa lako vata tiko kei kemudou, au na tiko e yasamudou imatau ka tiko talega ena yasamudou imawi, ia na noqu Yalo Tabu ena tiko e yalomudou.”10
Ena siga vakasakiti ko ya ni da sa tu e matana na noda iVakabula lomani me tukunikataka na veika eda sa cakava ena vuku ni Yacana, me rawa ni da tukuna, “Au sa vala oti ena ivalu vinaka, au sa ciciva oti na cere, au sa taura matua na vakabauta,”11 “Au doka na Yacamuni.” Au vakadinadinataka ni o Jisu na Karisito. A mate ko Koya me rawa vei keda na bula. Ena yaca i Jisu Karisito, emeni.