tamaitai talavou o loo uuina se telefoni

13 Iuni

E Mafai Faapefea ona Ou Tetee Atu i Ponokalafi?

Mataupu Faavae ma Feagaiga 63

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea e te talanoaina (e mafai ona e filifili i se fonotaga a le au peresitene o mea e talanoaina):

• O la tatou korama po o le vasega. O a ni gaoioiga na tatou faia talu ai nei? Pe na faamanuiaina? O a gaoioiga na lelei, ma e faapefea ona tatou faaleleia atili?

• O o tatou tiute po o matafaioi. O ai e manaomia la tatou auaunaga? E faapefea ona tatou fesoasoani ia i latou?

• O ō tatou olaga. O a sini o loo tatou galulue i ai faaletagata lava ia? O a aafiaga e mafai ona tatou faasoaina atu? O a ni faamanuiaga ua tatou mauaina?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Atonu na suesue e tagata o le korama po o le vasega le Mataupu Faavae ma Feagaiga 63 i lenei vaiaso ma faitau e uiga i le lapataiga a le Alii i uluai Au Paia e uiga i le matautia o tuinanau—o se lapataiga ua Ia tuuina mai soo (tagai Mataupu Faavae ma Feagaiga 63:13–16; Mataio 5:27–28; 3 Nifae 12:27–30). E ui o nei lapataiga e faaaogaina i tagata o vaitausaga uma o taimi, e faataalise ona faaaogaina i o tatou aso, lea o loo sosolo ai le ponokalafi o se mala. O a lamatiaga ma aafiaga mamafa e fesootaʻi ma ponokalafi atonu e ono feagai ma sui o lau korama poʻo le vasega? O a mataupu faavae o le talalelei ma tulaga puipuia e mafai ona fesoasoani ia latou tausia ai o latou manatu ma amioga ia mama?

Ao e sauni e aoao atu, mafaufau e iloilo “Faafiafiaga ma Ala o Faasalalauga” ma le “Mama Atoatoa i Tulaga Feusua’i” i le Mo le Malosi o le Autalavou ([2011], 11–13, 35–37) ma le Let Virtue Garnish Thy Thoughts (tamai tusi, 2006).

alii talavou i totonu o le vasega

E mafai e sui o le korama ma tagata o le vasega ona faamalosia e le tasi le isi i le tetee atu i ponokalafi.

Aoao Faatasi

Ina ia amataina se talanoaga e uiga i ponokalafi, e mafai ona e valaaulia ia tagata o le korama po o le vasega e faitau le Mataupu Faavae ma Feagaiga 63:13–16 ma talanoaina malamalamaaga mai nei fuaiupu e fesoasoani latou te malamalama ai pe aisea e matua leaga ai ponokalafi. Ina ia fesoasoani i lau korama po o tagata o le vasega ia malamalama pe faapefea ona tetee i ponokalafi, ia faaaoga se gaoioiga se tasi pe sili atu foi o gaoioiga nei. I le faaiuga o lau talanoaga, atonu e te lagona le musuia e talanoa pe mafai faapefea e le epikopo ona fesoasoani ia i latou o loo aafia i ponokalafi (tagai Mo le Malosi o le Autalavou, 12, 37).

• O tagata o lau korama po o le vasega atonu e i ai ni fesili e uiga i le teenaina o ponokalafi. Ina ia fesoasoani latou te sailia tali, e mafai ona e tusia fesili nei i luga o le laupapa: O le a le ponokalafi? Aisea e leaga ai? E faʻapefea ona tatou liliuese mai le faaosoosoga o ponokalafi? Ina ia fesoasoani i tagata o le korama po o le vasega ia maua tali i fesili muamua e lua, ia fai atu ia i latou e iloilo le “Ponokalafi” i le Faamaoni i le Faatuatua (itulau117–18) ma le “Faafiafiaga ma Ala o Faasalalauga” ma le “Mama Atoatoa i Tulaga Feusua’i” i le Mo le Malosi o le Autalavou (itulau 11–13, 35–37). Ina ia fesoasoani latou te sailia tali i le fesili lona tolu, ia fai atu ia i latou e toe iloilo le Kenese 39:1–12; Roma 12:21; 2 Timoteo 2:22; Alema 39:3–9; Moronae 10:30; Mataupu Faavae ma Feagaiga 27:15–18; 121:45–46. Valaaulia i latou e faasoa mai tali na latou maua.

• Ina ia fesoasoani i lau korama po o lau vasega ia iloa ni auala e tetee atu ai i ponokalafi, atonu e te toe iloiloina le savali a Elder Jeffrey R. Holland “Ia Lē Toe Ulu Mai i Lo’u Agaga Lē Ita Mai ia te Au” (Liahona, Me 2010, 44–46) ma le savali a Sister Linda S. Reeves “Puipuiga mai Ponokalafi—o se Aiga e Taulai atu ia Keriso” (Liahona, Me 2014, 15–17). E mafai ona latou vaai faalemafaufau e faapea, o loo latou faia se talanoaga ma lo latou atalii po’o le afafine e uiga i le mafuaaga e matuai faataumaoia ai ponokalafi ma auala e tatau ona aloese ai. O a faamatalaga e mafai ona latou faasoa mai le savali o le konofesi na latou iloiloina? Valaaulia i latou e fai ni paga ma faasoa atu tali na latou maua. Fai atu foi ia i latou e tusi i lalo mea o le a latou faia e aloese ai mai i ponokalafi.

• Valaaulia i latou o e aoaoina e faitau le 1 Korinito 10:13 ma le Alema 13:28. Fesili atu mo ni o latou manatu e uiga i le fesootaiga o mau nei i o tatou lu’itau o le tetee atu i ponokalafi i aso nei. E mafai foi ona e fai atu ia i latou e mafaufau faapea, e i ai sa latou uo o loo tauivi ma ponokalafi ma e manao e salamo. O a mea latou te maua o le a fesoasoani i le latou uo mai mau o loo i lalo o “Punaoa Lagolago” ma i le itulau 1–4 o le tamai tusi Let Virtue Garnish Thy Thoughts? O le a se mea e mafai ona fesoasoani i le latou uo ia malamalama e mafai e le epikopo ona fesoasoani ia te ia? (tagai i le Mo le Malosi o le Autalavou, 12, 37).

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e sui o le korama po o tagata o le vasega ona faasoa atu o latou manatu.

Punaoa Lagolago

• Isaia 1:18; Mosaea 4:2; Mataupu Faavae ma Feagaiga 58:42–43 (E mafai ona faamagaloina i tatou pe afai tatou te salamo)

• 1 Nifae 17:3; Mosaea 24:14–15; Alema 26:12 (O le a faamalosia i tatou e le Atua i lo tatou taumafai ai e tausi poloaiga)

• O le vaega “Individuals” o le AddressingPornography.ChurchofJesusChrist.org

• “Watch Your Step,” “To Look Upon,” “Chastity: What Are the Limits?” “Pornography Addiction: Is There Hope?” “Redeeming the Dead Redeemed Me” (vitio), ChurchofJesusChrist.org

Aoao Atu i le Ala a le Faaola

Ao e aoao atu e faapei ona aoao atu le Faaola, o le a faamatuu mai e tagata o le korama po o le vasega se nofoaga i o latou loto mo le fatu o le talalelei ia totoina ai, ia mafalā, ma ia ola ai. O le a se mea e mafai ona e faia ia fesoasoani ai ia latou malamalama i le mana ma le matagofie o le ola ai i se olaga mamā?