11 ni Julai

E Ra-wa Vakacava na Noqu Bula na kena Kilai na Yavu ni Veivakabulai?

Vunau kei na Veiyalayalati 76

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e gadreva na noda veivuke kei na masu? Na cava eda rawa ni cakava meda vukei ira kina? O cei e dodonu me da sureta ki na itaviqaravi mai oqo?

• Noda itavi se icolacola. Na ilesilesi cava soti eda sa vakayacora rawa? Na ilesilesi cava so e gadrevi meda cakava? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

• Noda bula. Na cava so e sotavi wale tikoga oqo e sa vaqaqacotaka na noda ivakadinadina? Na cava e sa yaco tiko ki na noda bula, ka rawa vakacava ni da veitokoni vakai keda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Sa vakarautaka tu na Tamada Vakalomalagi e dua na ituvatuva e rawa kina vei keda ni ciqoma na veivakalougatataki tawamudu eso ka yaco me vakataki koya. E vinakati ira kece na luvena o Koya me ra kila na ituvatuva o ya, ka sa vakaraitaka vei ira na parofita ena veitabayabaki. Ni ra vulica tu na lewe ni kuoramu se kalasi na Vunau kei na Veiyalayalati 76 ena macawa oqo, era sa vulica na ka a vakatakila na Kalou me baleta na Nona ituvatuva vei Josefa Simici kei Sidini Rikitoni, oka kina na itavi bibi ni iVakabula ena ituvatuva kei na lagilagi eda rawa ni ciqoma ena bula sa bera mai. Kevaka eda sa yalodina tiko, sa rawa ni da vakataucokotaki ena Veisorovaki i Jisu Karisito, ciqoma na taucoko ni reki, ka bula vata kei na Kalou ka sega ni mudu.

Sa vakayarayarataka vakacava na nomu raica tu na bula na kilai ni tuvatuva ni Tamada Vakalomalagi. O rawa vakacava ni vukea na nomu kuoramu se kalasi ni kila deivaki ni sa ka ni veivakalougatataki na kena kilai na yavu ni veivakabulai? Mo vakarau tu ni veivakavulici, sa rawa ni o wilika naYavu ni Veivakabulai” ena Tudei ena Vakabauta ([2004], 115–17) se na itukutuku i Elder Dieter F. Uchtdorf “Nomu iLakolako Cecere” (Liaona, Nove. 2019, 86–90).

Na vulici ni yavu ni veivakabulai esa mai veidusimaki ka vakaibalebale ki na noda bula.

Vulica Vata

Dua na sala me tekivutaki kina na veivosaki kei na nomu kuoramu se kalasi me baleta na yavu ni veivakabulai oya mo sureta e dua me vola ena papa na veiulutaga oqo, vata kei na tikina eso mai na Vunau kei na Veiyalayalati 76: Bula Taumada (tikina e 22–27), Bula Oqo (tikina e 40–43), kei na Bula ni oti na Mate (tikina e 50–53, 59–62). Solia vei ira na lewe ni kuoramu se kalasi e vica na miniti mera railesuva na veitikina oqo me laurai kina na itavi ni iVakabula ena vakataucokotaki ni tuvatuva ni Tamada Vakalomalagi. Kerei ira ni vola ena ruku ni ulutaga yadua na ka era raica. Na veitaviqaravi e ra sa rawa ni vukei ira ni kila vakavinaka cake na sala e vakalougatataka kina na nodra bula na ituvatuva ni Tamada Vakalomalagi.

• Na railesuvi ni so na yaca ni tuvatuva ni Tamada Vakalomalagi sa rawa ni vukea na lewe ni kuoramu se kalasi mera kila vakavinaka cake na ituvatuva. Sa rawa ni ra railesuva na ivolanikalou ena matai ni digo ena ruku ni “iVurevure Veitokoni Eso” ka cakava e dua na lisi ni so na yaca me baleta na ituvatuva ni Kalou. Na cava era vakavulica na veiyaca oqo me baleta na ituvatuva? Me ivakaraitaki, e vakavure marau vakacava vei keda na ituvatuva oqo, ena gauna oqo ka tawamudu? Na cava era vakavulica vei keda na ivolanikalou oqo ena itavi ni iVakabula ena ituvatuva? Sa rawa ni o vakaraitaka na vidio “Our Eternal Life” se “Men’s Hearts Shall Fail Them” (ChurchofJesusChrist.org) ka sureti ira o vakatavulica mera tukuna na gauna eso era a yalo vakavinavinaka kina ki na ituvatuva ni Tamada Vakalomalagi.

• Navuca ni sureti ira o vakavulica mera veivosakitaka na sala era na rairai sauma kina na taro eso vakaoqo a taroga e dua na itokani me baleta na yavu ni veivakabulai: Eda lako mai e vei? Cava na vuna eda tiko kina eke? Eda na lako kivei ni sa cava na bula eke? Sureti ira ni vakayagataka na itukutuku ena ruku ni “Yavu ni Veivakabulai” ena Tudei ena Vakabauta (tabana e 115–17) kei na ivurevure ena ruku ni “iVurevure Veitokoni Eso” me vakarautaka e dua na isau ki na dua vei ira na taro. Eda sa vaqaqacotaki vakacava mai na kilai ni isau ki na veitaro oqo?

• Era sa vulica vakatitobu cake na dina eso ni kosipeli na lewe ni kuoramu se kalasi ni sa soli vei ira na madigi me ra veivakavulici. Kerea taumada e vica na lewe ni kuoramu se kalasi mera vakavakarau mai ni wasea e dua na ivakaleka ni ka era kila me baleta e dua na tiki ni yavu ni veivakabulai. Sa rawa ni ra vakayagataka na ivakaleka eso e kune ena ruku ni “Na Yavu ni Veivakabulai” ena wase 3 ni Vunautaka na Noqu Kosipeli ([2019], 48–53). Na duidui cava e vakavurea me kilai kina na yavu ni veivakabulai?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• 2 Nifai 11:5; Alama 12:30; 34:9; 41:2; 42:8, 13–15; Mosese 6:59–62 (Na yaca eso ena ituvatuva ni Tamada Vakalomalagi)

• Vunau kei na Veiyalayalati 38:1–3; 138:53–56; Mosese 4:1–4; Eparaama 3:21–24 (Na bula taumada)

• 2 Nifai 2:19–21, 25; Alama 5:15–16; 34:32; Eparaama 3:25–26 (Na bula oqo)

• Joni 14:1–2; Alama 11:42–45; Vunau kei na Veiyalayalati 76:39–43, 89–93(Na bula ni oti na mate)

Veivakavulici ena iVakarau ni iVakabula

A taroga na taro eso na iVakabula e vakavuna mera vakasama vakatitobu kina o ira a vakavulica. A kauwaitaka ena yalomalua o Koya na nodra isaunitaro. O rawa ni vakayagataka vakacava na taro me vukei ira na itabagone ni vakasamataka vakatitobu na ituvatuva ni Kalou? (Raica na Veivakavulici ena iVakarau ni iVakabula [2016], 33–34.)