25 ni Julai

Cava na Vuna Meu Talairawarawa kina ki na iVunau ni Kalou?

Vunau kei na Veiyalayalati 81–83

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na ka sa veivosakitaki (rawa ni o navuca ena dua na soqoni ni mataveiliutaki na veika me veivosakitaki):

• Noda kuoramu se kalasi. Na cava eda rawa ni cakava me taraicake kina na duavata vei ira na lewe ni kuoramu se kalasi? Na takete cava so eda na via cakava vata?

• Noda itavi se icolacola. Na cava eda sa cakava tiko me wasei kina na kosipeli? Na cava so eda sa sotakaya ena vakayacori ni cakacaka ni valetabu kei na tuva kawa?

• Noda bula. Eda sa raica vakacava na liga ni Turaga ena noda bula? Na cava e sa vakauqeti keda ena vuli ivolanikalou ena macawa oqo?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Eda na rairai vakila ena so na gauna ni vakataotaka na noda bula galala ka yalana na noda galala ni digidigi na vakaro ni Kalou. Na ka dina o ya ni vakaro e vakavinakataka cake na noda bula galala. Ena Vunau kei na Veiyalayalati 82:8–10 eda vulica ni sa vukei keda na ivakaro ni kila vakamatata na loma ni Kalou, ka ni da sa talairawarawa kina, na noda ivalavala ena “vagolei vei [keda] me baleta na [noda] vakabulai.” Na ka dina, ni da talairawarawa vua na Kalou, o Koya sa “vauci” me solia vei keda na veivakalougatataki kece e sa yalataka tu (tikina e 9–10). E sa vakalougatataki iko vakacava na Tamada Vakalomalagi ena nomu talairawarawa tu ki na Nona ivakaro? Mo vakarau tu ni veivakavulici, sa rawa ni o wilika na itukutuku i Elder Dale G. Renlund “Vakasinaiti ena Veivakalougatataki” (Liaona, Me 2019, 70–73) se vakasamataka vagumatua eso na ivurevure ena itukutuku ni Gospel Topics, “Obedience” (topics.ChurchofJesusChrist.org).

Na nodra ivakaraitaki na italai yalodina ni Kalou ena gauna e liu sa rawa ni vakauqeti keda ni bula tu ena yalodina nikua.

Vulica Vata

Era na rairai sotavi dredre voli na lewe ni nomu kuoramu se kalasi ni talairawarawa ki na so na ivakaro. Sa rawa ni vakauqeti ira na nodra vukei ni kila vakamatata na vuna e bibi kina na talairawarawa. Vola na ulutaga ni lesoni oqo ena papa, ka sureta na lewe ni kuoramu se kalasi mera wasea na isaunitaro. O rawa ni kerei ira mera vakaraica na ikuri ni veivakararamataki ena Vunau kei na Veiyalayalati 82:8–10, era sa na rairai vulica ena macawa oqo. Qai digitaka e dua se sivia na itaviqaravi e ra me vukei ira ni kila vakamatata cake na vuna esa dau bibi tu ga kina na talairawarawa vua na Kalou, ena gauna mada ga e dredre kina ni vakayacori.

• E rawa ni rawarawa cake na talairawarawa ki na ivakaro ni da kila vakamatata taumada na vuna. Me vulici na vuna e solia kina vei keda na Kalou na ivakaro, sa rawa ni railesuva na lewe ni kuoramu se kalasi na ivukevuke eso ni ivolanikalou ena “iVurevure ni Veitokoni Eso” (se so tale o nanuma). E rawa ni vukei keda vakacava na ivolanikalou oqo ni da kunea dredre tu ni talairawarawa ki na dua na ivakaro? Me tiki ni veivosaki oqo, rawa mo ni wilika vata na wase ka kena ulutaga “iKava, kakua ni guilecava na ‘vuna’ ni kosipeli” ena itukutuku i Peresitedi Dieter F. Uchtdorf “Kakua ni Guilecavi Au” (Liaona, Nove. 2011, 122).

• Me vaka ni kila vakamatata tu o ira o vakavulica na ivakaraitaki daumaka ni talairawarawa ni iVakabula, era na rairai vakauqeti mera talairawarawa vakaoti sara kivua na Kalou. Na gauna cava e talairawarawa kina o Jisu Karisito vei Tamana, ena veituvaki drakidrakita sara mada ga? (raica na Maciu 4:1–11; Luke 22:39–44). Na kedra ivakaraitaki ni turaga kei na marama ka talairawarawa tu sa rawa ni kune ena Iperiu 11. De na via digitaka na nomu kuoramu se kalasi e dua vei ira na ivakaraitaki oqo—se so tale era kila tu, oka kina ena nodra matavuvale—ka wasea na ka e vakauqeti ira me baleti ira na tamata oqo. Cava na vuna era digitaka kina mera talairawarawa vua na Turaga? E vukei keda vakacava na iVakabula ni da digitaka meda talairawarawa?

• Me vukea nodra raica na ivakaro na lewe ni kuoramu se kalasi me ka ni veivakalougatataki ka sega ni colacola, sa rawa mo wasea na ivakavuvuli i Elder D. Todd Christofferson e kune ena “iVurevure Veitokoni Eso.” O na via vakaraitaka se droinitaka na iyaloyalo ni dua na ikabakaba ka kerei ira o vakavulica mera vakayacana na ibutubutu yadua ena dua na ivakaro ka na dredre tu ki na dua na tamata gone me kila deivaki se muria. E rawa ni vukea vakacava e dua na tamata na vosa i Elder Christofferson ka sasaga dredre voli me muria na ivakaro?

• E vica na vidio ka vakavulica na talairawarawa e rawa ni kune ena ChurchofJesusChrist.org kei na Gospel Library app (raica na “iVurevure Veitokoni Eso”). O rawa ni lesia na lewe ni kalasi se kuoramu yadua mera sarava e dua vei ira na vidio oqo ni bera na soqoni ka vakavakarau mai mera wasea na ka era sa vulica me baleta na talairawarawa. De na rawa ni tuvanaka na kuoramu se kalasi na nodra vidio vakai ira me baleta na talairawarawa ki na ivakaro ni Kalou. Sa rawa ni ra qai vakayacora e dua na itaviqaravi me bulia na vidio ka wasea ena vakaitukutuku raraba.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• 1 Nifai 17:3; Mosaia 2:41; Vunau kei na Veiyalayalati 130:20–21 (Eda sa vakalougatataki ena talairawarawa ki na ivakaro)

• Nai Vakarua 10:12–13; Joni 14:15; 1 Joni 5:1–3 (Eda sa talairawarawa ki na ivakaro baleta ni da lomana na Kalou)

• Vunau kei na Veiyalayalati 93:20 (Na talairawarawa sa vakatara meda ciqoma na taucoko ni Kalou)

• “Talairawarawa,” ena wase 3 ni Vunautaka na Noqu Kosipeli (2019), 75

• A vakavulica o Elder D. Todd Christofferson: “Eso e raica walega na solibula kei na iyalayala eso ni talairawarawa ki na ivakaro ni veiyalayalati vou ka tawamudu, ia o ira ka bulataka na ka sa sotavi—ka soli ira tu vagalala ka tawananumi ki na bula ni veiyalayalati—sa kunea na veisaututaki kei na veivakacegui levu sara. Ni da kila tu vakaidina, eda sa qara e levu tale na ivakaro, sega ni lailai. Na lawa se ivakaro vou yadua eda vulica ka bulataka esa vaka e dua tale na ibutubutu se kalawa ena dua na ikabakaba e vakavuna meda kaba cake tikoga. Vakaidina, na bula ni kosipeli esa bula vinaka”(“Na Kaukauwa ni Veiyalayalati,” Liaona, Me 2009, 23).

• Vidio eso “The Sting of the Scorpion,” “Stay within the Lines,” “A Secure Anchor,” “Shower of Heavenly Blessings,” “Blessed and Happy Are Those Who Keep the Commandments of God,” ChurchofJesusChrist.org

Veivakavulici ena iVakarau ni iVakabula

A sureti ira na Nona tisaipeli na iVakabula mera vakadinadina, ia ni ra vakayacora, sa tara na yalodra na Yalotabu. Ni o veivakavulici, sureta na lewe ni kuoramu se kalasi mera wasea na nodra ivakadinadina ena bibi ni kena muri na ivakaro.