Baraca Josefa, mai vei David Lindsley

28 ni Noveba

A Veivuke Vakacava o Josefa Simici ena Vakataucokotaki ni Tuvatuva ni Tamada Vakalomalagi?

Vunau kei na Veiyalayalati 135–136

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. Na cava e rawa ni da cakava me taraicake kina na duavata vei ira na lewe ni kuoramu se kalasi? Na lalawa cava so eda na via cakava vata?

• Noda itavi se icolacola. Na cava beka eda sa vakayacora tiko me wasei kina na kosipeli? Na cava so eda sa sotakaya ena kena vakayacori tiko na cakacaka ni valetabu kei na tuva kawa?

• Noda bula. Eda sa raica vakacava na liga ni Turaga ni cakacaka tiko ena noda bula? Na cava e sa vakauqeti keda ena noda vuli ivolanikalou ena macawa oqo?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

“Ko Josefa Simici na Parofita ka Daurairai ni Turaga, sa cakava e levu cake na ka mai vei ira kecega na tamata era sa bula oti e vuravura, ka vakavo ga kina ko Jisu, me baleta na nodra vakabulai na tamata e vuravura” (Vunau kei na Veiyalayalati 135:3). Sa itukutuku qaqa oqo me baleta na itavi i Josefa Simici. O ni bau vakasamataka mada na ibalebale ni itukutuku oqo ki na nomu bula? Ena duidui tu vakacava na nomu bula kevaka a sega ni vakalesui mai na kosipeli i Jisu Karisito? Na cava o rawa ni cakava mo vukei ira kina na lewe ni nomu kuoramu se kalasi ni vaqaqacotaka na nodra ivakadinadina me baleta na ilesilesi i Josefa Simici?

Ni o vakavakarau mo veivakavulici, me ikuri ni nomu vulica na Vunau kei na Veiyalayalati 135, vakasamataka mo railesuva na itukutuku nei Peresitedi M. Russell Ballard “Meda Kakua Beka ni Tomana Tiko nai Naki Cecere Vakaoqo?” (Liaona, Me 2020, 8–11) kei na vosa nei Elder Neil L. Andersen “Josefa Simici” (Liaona, Nove. 2014, 28–31).

E sa vakalougatataki na noda bula ena dina eso a vakalesui mai vua na Parofita o Josefa Simici.

Vulica Vata

Me tekivutaki na veivosaki ena sala a veivuke kina o Josefa Simici ena vakataucokotaki ni tuvatuva ni Tamada Vakalomalagi, sa rawa ni o tekivu ena railesuvi ni ka era sa vulica na lewe ni kuoramu se kalasi me baleta na Parofita ena wiliki ni Vunau kei na Veiyalayalati 135 ena macawa oqo. Me ivakaraitaki, rawa ni ra vola na dina eso era kila tu me baleta na iVakabula kei na Nona kosipeli ena vuku i Josefa Simici. Cava na vuna esa ka bibi kina na veidina yadua oqo ena ituvatuva ni Tamada Vakalomalagi? Na itaviqaravi eso oqo sa rawa ni vukea na nomu kuoramu se kalasi ni kila vakamatata cake na itavi i Josefa Simici ena yavu ni veivakabulai.

• Me vukea na vakarautaki ni lewe ni kuoramu se kalasi ena nodra vukei na tani ni kila deivaki na bibi ni Parofita o Josefa Simici, sa rawa ni ra wilika “Na Veivakalesuimai ni Kosipeli i Jisu Karisito mai vei Josefa Simici” ena wase 3 ni Vunautaka na Noqu Kosipeli ([2019], 36–38). Cakacaka tu vakaveisa se ilawalawa lalai, sa rawa ni ra raica na tikina eso e rairai bibi tu me wasei vei ira na tani. Rawa ni ra qai vakatovotovotaka vakai ira na wasei ni veika a sotakaya o Josefa Simici ena nodra dui vosa. Kerei ira mera navuca na ka era rawa ni cakava me wasea kina na itukutuku ni Veivakalesuimai. De rawa beka mera vakasamataka vakatabakidua e dua na tamata era rawa ni wasea vua na itukutuku oqo. Sa rawa ni ra lomasoli talega ni wasea na veika era sa sotava ena gauna era a vukea kina e dua me vulica baleti Josefa Simici.

• Kerea na lewe ni kuoramu se kalasi mera raitayaloyalotaka ni dua na nodra itokani ena Lotu e kaya, “Au sega ni vakadeitaka ni tiko na noqu ivakadinadina me baleti Josefa Simici. O kila vakacava ni sa parofita o koya? Eda na sauma vakacava? Na cava eda vulica mai na ka a sotava vakaikoya o Josefa Simici ena Josefa Simici—Ai Tukutuku 1:8–19 ena sala eda rawa ni rawata se vaqaqacotaka kina na noda ivakadinadina? Kerea na lewe ni kuoramu se kalasi mera vola na sala eso me vaqaqacotaki kina na nodra ivakadinadina me baleta na Parofita o Josefa Simici ka digitaka yadua e dua na ka era na via cakava ena macawa oqo.

• Me vukei ira na lewe ni kuoramu se kalasi ni kila vakamatata cake na cakacaka a vakataucokotaka na Kalou mai vei Josefa Simici, sa rawa ni o sureti ira ni wilika na tabana e 48–53 ni Nodra iVakavuvuli na Peresitedi ni Lotu: Gordon B. Hinckley (2016) se sarava e dua se sivia na vidio ena “iVurevure Veitokoni.” Era rawa ni digitaka e dua se rua vei ira na ivunau kei na ivakarau e tukuni ena veivurevure oqo e vakaibalebale vakalevu sara vei ira. Era rawa ni vakamacalataka na vuna era vakavinavinakataka kina ni sa vakalesuya mai na Turaga na veika oqo mai vei Josefa Simici. Era na rairai marautaka talega na volai ni vola e vakaraitaki kina na nodra vakavinavinaka ena sala sa vukei ira kina na cakacaka i Josefa Simici mera toro volekata na iVakabula. Era rawa talega ni vakasamataka vagumatua na ka era rawa ni cakava me vakayagataki vakataucoko sara kina na veivakalougatataki sa vakarautaka tu na Turaga mai vei Josefa Simici.

Cakacaka ena Vakabauta

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na nodra dui veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Vunau kei na Veiyalayalati 35:17–18 (Maivei Parofita o Josefa Simici, sa vakalesuya mai na Turaga na taucoko ni kosipeli)

• Russell M. Nelson, “Na iVola i Momani: Ena Vakaivei Beka Nomu Bula Kevaka e Sega? Liaona, Nove. 2017, 60–63

• Vidio eso “Teachings of Joseph Smith: The Nature of God,” “Ministry of Joseph Smith: The Book of Mormon,” “Ministry of Joseph Smith: The Organization of the Church,” “Ministry of Joseph Smith: The Restoration of Priesthood Authority,” “Ministry of Joseph Smith: Temples,” ena ChurchofJesusChrist.org

Veivakavulici ena iVakarau ni iVakabula

A raica matua na iVakabula na nodra vukei na Nona imuri ni bulataka na kosipeli ena yalodra taucoko. O na vukei ira vakacava o vakavulica mera raica na sala sa dodonu me ra-wa kina na nodra bula ni veisiga na nodra ivakadinadina i Josefa Simici?