14 ni Noveba

Cava na Vuna e Bibi kina na Vakamau Tawamudu?

Vunau kei na Veiyalayalati 129–132

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e gadreva na noda veivuke kei na masu? Na cava rawa ni cakava meda vukei ira kina? O cei me da sureta ki na itaviqaravi mai oqo?

• Noda itavi se icolacola. Na ilesilesi cava soti eda sa vakayacora rawa? Na ilesilesi cava so e gadrevi meda vakayacora? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

• Noda bula. Na cava so e sotavi wale tikoga oqo e sa vakaqaqacotaka na noda ivakadinadina? Na cava e sa yaco tiko ki na noda bula, ka rawa vakacava ni da veitokoni vakai keda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ni ra rawata tu na lewe ni nomu kuoramu se kalasi na ivakadinadina ni vakamau ena valetabu ni ra se gone, era sa na gadreva ka vakavakarau vakalevu ki na veivakalougatataki cecere oqo. Ena ituvatuva ni bula marau ni Tamada Vakalomalagi, na tawamudu ni veiyalayalati ni vakamau esa ka bibi ki na bula vakacerecerei (raica na Vunau kei na Veiyalayalati 131:1–4). Ia na vakamau ena valetabu e sega walega ni baleta na ka eda na rawata ena bula ka tarava—esa rawa talega ni kauta mai na veivakalougatataki levu ena bula oqo. Me ivakaraitaki, na veiyalayalati tabu kei na Kalou e rawa ni vakayarayarataka na sala e raica kina e dua na turaga kei na marama vakawati na nodrau veimaliwai vakai rau. Ka sa vakadeitaka na turaga kei na marama ka vauci tu vakai rau ena gauna oqo kei na veigauna tawamudu ni mai na vuku i Jisu Karisito, sa na tomani vakadua kina na nodrau veimaliwai kevaka e rau dinata na nodrau veiyalayalati.

O na vukei ira vakacava na lewe ni nomu kuoramu se kalasi ni vakila e dua na gagadre levu ni vauci tu ena valetabu? Mo vakarautaki iko ena vakavulici ni vakamau ena valetabu, o na via vakadikeva na ivola “About a Temple Sealing” ena temples.ChurchofJesusChrist.org se wilika na “Vakamau” ena Tudei ena Vakabauta ([2004], 97–101).

Sa rawa ni ra vauci tawamudu na matavuvale mai na cakacaka vakalotu ni valetabu.

Vulica Vata

Me soli e dua na gauna vei ira na lewe ni kuoramu se kalasi ni wasea na ka era sa vulica tiko ena ivolanikalou ena macawa oqo, sa rawa mo vola ena papa e dua na taro me vaka Cava na vuna e bibi kina na vakamau tawamudu ena valetabu ni Kalou? Sa rawa ni ra qai vakaraica na lewe ni kuoramu se kalasi na isema ki na dua na tikina era sa wilika ena Vunau kei na Veiyalayalati 129–32 e rawa ni vukea na isau ni taro ka vola na isema tikiva na taro. (Ke na veivuke, sa rawa ni o dusi ira ki na Vunau kei na Veiyalayalati 131:1–4; 132:13–19.) Wilika vata eso na isema, ka veivosakitaka na ka era vakavulica. Sa rawa ni o vakayagataka e dua vei ira na itaviqaravi oqo me vukei ira na itabagone ni kila vakamatata na bibi ni vakamau ena valetabu.

• Baleta ni sa vakasakiti na vakamau tawamudu ki na kosipeli vakalesui mai, ena rairai tiko na madigi vei ira o vakavulica mera vakamacalataka kivei ira na tamata ka sega ni matata tu kina. Me vukei ira na lewe ni kuoramu se kalasi ni kitaka oqo, sa rawa ni o sureti ira me ra raitayaloyalotaka ni tiko e dua na nodra itokani ka vakananuma tu na vuna era vakabauta kina na Yalododonu Edaidai ni sa ka bibi sara na vakamau ena valetabu. Kerei ira me ra wilika na ivolanikalou ena “Supporting Resources,” “The Family: A Proclamation to the World” (ChurchofJesusChrist.org), se na tabana e 97–98 ena Tudei ena Vakabauta. Sa rawa ni ra vakaraica na vosa, malanivosa, kei na vakasama eso era rawa ni okata ena dua na ivola ki na nodra itokani ena vakamacalataki ni bibi ni vakamau ena valetabu. Sa rawa talega ni ra sarava na “Why Is Marriage Sacred to Heavenly Father?” mai na “Face to Face with Elder and Sister Renlund” ([worldwide youth broadcast], Oko. 5, 2017, FacetoFace.ChurchofJesusChrist.org). Sa rawa ni o solia vei ira na gauna mera vola e dua na ivola ka sureti ira ni wasea na ka era sa vola.

• Na saravi ni dua na ivakaraitaki ni vakawati yalodina sa rawa ni vakauqeti ira o vakavulica me ra vakasaqara na veivakalougatataki oqo vakai ira. E dua na sala me vakayacori kina oqo oya me railesuvi na wase ni tukutuku i Elder L. Whitney Clayton “Vakawati: Sarava ka Vuli” (Liaona, Me 2013, 83--85). Na cava era vulica na lewe ni kuoramu se kalasi mai na itukutuku oqo me baleta na iwalewale ni kena tara e dua na vakamau bula marau tawamudu? Era na via railesuva talega na lewe ni kuoramu se kalasi na vakasama eso ena “Kena Rawati e dua na Vakamau Bula Marau” ena Tudei ena Vakabauta (tabana e 99–101). Era rawa talega ni sarava na “How Did Elder and Sister Bednar Meet?” mai na “Face to Face with Elder and Sister Bednar“ ([worldwide youth broadcast], Me 12, 2015, FacetoFace.ChurchofJesusChrist.org).

• Kerea na lewe ni kuoramu se kalasi me ra vakasamataka eso na ka e rawa ni tarovi ira mai na vauci tu ena valetabu. Na cava eda rawa ni cakava oqo me ulabaleti kina na veika oqo? Sa rawa ni ra qai railesuva na “Vakamau Tawamudu” ena wase 3 ni Vunautaka na Noqu Kosipeli ([2019], 89) me raici kina na ivakavuvuli kei na itovo eso e muataki ki na marau ni bula vakawati kei na matavuvale. Sa rawa mera vola eso na ka e rawa ni ra cakava oqo mera vakavakarau kina ki na vakamau tawamudu. Na cava na itavi ni iVakabula ena noda vukei ni vakarautaka ka rawata na vakamau tawamudu?

Cakacaka ena Vakabauta

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na nodra dui veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Vunau kei na Veiyalayalati 49:16–17; 131:1–4; 132:13–19 (Sa ka bibi ena ituvatuva ni Kalou na vakamau tawamudu)

• Gospel Topics, “Marriage,” topics.ChurchofJesusChrist.org

• Na vidio “What Is a Temple Wedding Like?”, temples.ChurchofJesusChrist.org

• A kaya o Elder D. Todd Christofferson: “ Me cauraki na yavu dina eso e semati ki na vakawati kei na matavuvale ena sega ni raibaleta se vakalailaitaka na nodra solibula kei na rawaka o ira ka sega ni vakadinata rawa na kena yaga. … E levu e sa vinaka, e levu e sa veiganiti—ka so na gauna na ka taucoko e sa gadrevi ena gauna oqo—sa rawa ni rawati ena ituvaki lailai yaga sara. Ena nuidei eda vakadinadinataka ni Veisorovaki i Jisu Karisito e sa vatavatairalagotaka ka, kena itinitini, na sauma lesu na veika taucoko e tawarawati ka yali me baleti ira na lesu ki Vua” (“A Cava na Vuni Vakawati, A Cava na Vuni Matavuvale,” Liaona, Me 2015, 52).

Veivakavulici ena iVakarau ni iVakabula

Taroga na taro eso ena vakauqeti ira o vakavulica ni vakasamataka vakatitobu na vakamau tawamudu ka vakila na gagadre ni kena cakacakataki na nakinaki oya. Vakarogoca vagumatua na nodra isaunitaro ka sauma ena yalovinaka ena veivakauqeti ni Yalotabu.