Disyembre 26

Nganong Importante ang mga Pamilya?

“Ang Pamilya: Usa ka Pamahayag ngadto sa Kalibutan”

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang bag-o sa atong ward, ug unsaon nato pagtabang kanila nga mobati og pag-abiabi? Unsa ang atong buhaton aron sa paghimo sa oras sa atong mga miting sa korum o klase nga makahuluganon?

• Ang atong mga katungdanan o mga responsibilidad. Unsa ang pipila sa atong mga katungdanan ug mga responsibilidad isip mga batan-ong lalaki ug mga batan-ong babaye? Sa unsa nga paagi kita mas makatuman niini?

• Ang atong mga kinabuhi. Unsa ang atong buhaton aron mahimong mas mahisama ni Jesukristo ug madawat ang Iyang gahum diha sa atong mga kinabuhi? Unsa ang atong buhaton aron sa pagtabang sa atong mga pamilya nga moduol ngadto Kaniya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang matag pamilya lahi, ug walay pamilya nga perpekto. Apan kitang tanan adunay perpekto nga Langitnong mga Ginikanan, kinsa gusto nga atong madawat ang panalangin sa pagpuyo nga malipayon isip mahangturong mga pamilya. Aron matabangan kita nga matuman kini, gidasig sa Dios ang mga propeta ug mga apostoles sa pagpahayag og mahangturong mga kamatuoran diha sa “Ang Pamilya: Usa ka Pamahayag ngadto sa Kalibutan” (ChurchofJesusChrist.org).

Samtang mangandam ka sa pagtudlo mahitungod sa kaimportante sa mga pamilya, hunahunaa kon ngano nga ang imong pamilya importante man kanimo. Unsa ang tahas ni Jesukristo diha sa pagtabang sa imong pamilya nga makakita og kalipay? Samtang mangandam ka sa pagtudlo, mahimo nimong tun-an ang “Ang Pamilya: Usa ka Pamahayag ngadto sa Kalibutan”” (ChurchofJesusChrist.org), “Pamilya” diha sa Alang sa Kalig-on sa mga Kabatan-onan ([2011], 14–15), ug ang mensahe ni Elder D. Todd Christofferson nga “Nganong Kaminyoon, Nganong Pamilya” (Liahona, Mayo 2015, 50–53). Unsa nga mga baruganan gikan niining mga kapanguhaan ang imong gibati nga labing makahuluganon ngadto sa imong gitudloan?

Ang pamilya mahinungdanon sa plano sa Langitnong Amahan alang kanato.

Pagkat-on og Dungan

Sa pagsugod og panaghisgutan mahitungod sa kaimportante sa mga pamilya, mahimo nimong pangutan-on ang mga sakop sa korum o klase kon unsay ilang nakat-unan mahitungod sa kalipay diha sa kinabuhi sa pamilya samtang magbasa sila sa “Ang Pamilya: Usa ka Pamahayag ngadto sa Kalibutan”” diha sa panimalay. Unsay ilang nakat-unan nga tingali makatabang kanila sa paglig-on sa ilang mga pamilya? Dayon pagpili og usa o dugang pa sa mga kalihokan nga anaa sa ubos aron pagtabang sa mga sakop sa korum o klase nga mas makasabut pa kon nganong ang mga pamilya importante sa plano sa Langitnong Amahan.

• Ang mga kasulatan diha sa “Suporta nga mga Kapanguhaan” nagsuporta sa dinasig nga mga kamatuoran diha sa pamahayag bahin sa pamilya. Siguro mahimo nimong sangunan ang matag sakop sa korum o klase sa pagbasa sa usa niining mga kasulatan ug dayon sa pagpangita sa pamahayag bahin sa pamilya aron makakita og tudling nga may kalabutan sa iyang kasulatan. Ang matag sakop sa korum o klase mahimong mopaambit sa unsay iyang nakit-an.

• Ang pagsunod sa mga pagtulun-an ni Jesukristo moresulta sa tinuod ug malungtarong kalipay sulod sa atong mga pamilya. Aron matabangan ang mga sakop sa korum o klase nga masabtan kini, mahimo nimong dapiton ang matag tawo sa pagpili og usa ka Kristohanong hiyas (tan-awa sa “Unsaon Nako Pagpalambo og mga Hiyas nga Sama kang Kristo?” kapitulo 6 diha sa Isangyaw ang Akong Ebanghelyo [2019], 139–152) ug dayon mangita og kasulatan o propetikanhong pamahayag nga nagtudlo mahitungod niana nga hiyas. Samtang magpaambit ang mga sakop sa korum o klase sa unsay ilang nakit-an, mahimo silang motubag sa usa o dugang pa sa mosunod nga mga pangutana: Sa unsang paagi nga ang mas hingpit nga pagsunod niining Kristohanong hiyas makaapekto sa akong pamilya? Unsay akong makat-unan gikan sa ehemplo sa Manluluwas kon unsaon paggamit niining hiyas diha sa akong pamilya?

• Si Presidente Russell M. Nelson nagtudlo: “Ang kaaway paspas kaayong mipalapad sa iyang pag-atake sa hugot nga pagtuo ug ngari kanato ug sa atong mga pamilya” (“Pasiuna nga Pakigpulong,” Liahona, Nob. 2018, 7). Aron matabangan ang mga sakop sa korum o klase sa pagbantay batok niining mga pag-atake, mahimo nimo silang dapiton sa paglista diha sa pisara sa pipila ka mga kinaiya ug mga pamatasan nga gipasiugdahan ni Satanas aron sa pagpahuyang sa mga pamilya. Ngano nga kining mga butang makadaut man sa mga pamilya? Ang mga sakop sa korum o klase mahimo dayon nga mangita sa ikapito nga parapo [paragraph] sa pamahayag bahin sa pamilya alang sa mga kinaiya ug mga pamatasan nga makabatok sa mga pag-atake ni Satanas. Unsaon nato pagtinguha sa tabang sa Manluluwas sa pagpalambo niining mga kinaiya ug mga pamatasan? Unsay atong makat-unan kon unsaon nato sa pagpanalipod sa atong mga pamilya gikan sa impluwensya ni Satanas?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Mga Taga-Roma 8:16–17; Mga Hebreohanon 12:9 (Kita mga anak sa Langitnong Amahan)

• Genesis 2:18, 24; Doktrina ug mga Pakigsaad 131:1–4 (Gi-orden sa Dios ang kaminyoon)

• Mosiah 4:14–15; Doktrina ug mga Pakigsaad 68:25–29; 93:40–50 (Ang mga ginikanan kinahanglang motudlo sa ilang mga anak sa ebanghelyo)

• L. Tom Perry, “Nganong ang Kaminyoon ug Pamilya Importante—Bisan Asa sa Kalibutan,” Liahona, Mayo 2015, 39–42

Pagtudlo sumala sa Pamaagi sa Manluluwas

Ang Manluluwas midapit sa Iyang mga disipulo sa pagpamatuod, ug samtang sila mihimo, ang Espiritu mitandog sa ilang mga kasingkasing. Samtang magtudlo ka, dapita ang mga sakop sa korum o klase sa pagpaambit sa ilang mga pagpamatuod sa kaimportante sa pamilya diha sa plano sa Dios.