batan-ong lalaki nga nagsulat diha sa whiteboard

Disyembre 12

Unsaon Nako Pagpangita og mga Tubag sa Akong mga Pangutana?

Mga Artikulo sa Hugot nga Pagtuo ug mga Opisyal nga Pahayag 1 ug 2

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang bag-ohay lang nato nga mga kalihokan? Malampuson ba kini? Unsa ang maayong nabuhat, ug sa unsa nga paagi kita makapanindot niini?

• Ang atong mga katungdanan o mga responsibilidad. Kinsa ang nagkinahanglan sa atong tabang? Unsaon nato pagtabang kanila?

• Ang atong mga kinabuhi. Unsa nga mga tumong ang atong gibuhat sa indibidwal nga paagi? Unsa nga mga kasinatian ang atong mapaambit? Unsa nga mga panalangin ang atong nadawat?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Normal ra nga adunay mga pangutana. Maghunahuna kita sa atong umaabut ug sa kalibutan nga naglibut kanato. Kita adunay mga pangutana usab mahitungod sa Dios ug sa Iyang plano alang kanato. Samtang magbasa ka sa Mga Opisyal nga Pahayag 1 ug 2 niini nga semana, bantayi kon unsay gibuhat sa mga propeta ug mga apostoles aron makakita og mga tubag sa ilang mga pangutana (ang outline niini nga semana diha sa Dali, Sunod Kanako—Alang sa mga Indibidwal ug mga Pamilya mahimong makatabang). Unsa ang tahas sa pagpangita og mga tubag sa mga pangutana diha sa imong pagkat-on sa ebanghelyo? Unsa ang imong mabuhat sa pag-awhag sa mga sakop sa imong korum o klase sa pagpangita og mga tubag sa ilang mga pangutana kalabut sa ebanghleyo sa matinud-anong paagi? Samtang mangandam ka sa pagtudlo, ikonsiderar ang pagribyu sa Doktrina ug mga Pakigsaad 6:14–15; 9:7–9 ug “Pagbaton og Espirituhanong Kahibalo [Acquiring Spiritual Knowledge]” diha sa Mahinungdanon nga Dokumento sa Doktrinal nga Kahanas [Doctrinal Mastery Core Document] ([2018], 3–5).

mga batan-ong babaye nga nagtan-aw sa tablet

Ang atong mga pagpamatuod mahimong mapalig-on samtang mangita kita og mga tubag sa atong mga pangutana sa matinud-anong mga paagi.

Pagkat-on og Dungan

Samtang ang mga sakop sa imong korum o klase nagtuon sa Mga Opisyal nga Pahayag 1 ug 2 niini nga semana, mahimong nakadiskubre sila og mga baruganan nga may kalabutan sa pagdawat og mga tubag sa mga pangutana mahitungod sa ebanghelyo. Hatagi sila og pipila ka minutos sa pagribyu sa mga pamahayag ug ipaambit kon unsay ilang nakat-unan mahitungod sa pagdawat og pagpadayag. Ang mosunod nga mga kalihokan makatabang niadtong imong gitudloan nga mas makasabut kon unsaon pagpangita og mga tubag sa ilang mga pangutana kalabut sa ebanghelyo.

• Ang mosunod nga mga kasulatan nagtudlo og mga baruganan mahitungod sa pagpangutana ug pagdawat og mga tubag: Mateo 7:7; Doktrina ug mga Pakigsaad 6:14–15; 9:7–9. Ang imong korum o klase mahimong magbasa og dungan niining mga tudling ug maghimo og lista diha sa pisara sa mga baruganan nga ilang makit-an. Nganong ang Langitnong Amahan dili man kanunay nga motubag sa hingpit o diha-diha dayon sa atong mga pangutana? Unsaon nato pagpadayon sa pagpakita sa atong hugot nga pagtuo samtang maghulat kita sa mga tubag? (tan-awa sa Doktrina ug mga Pakigsaad 19:23; 78:18). Ikonsiderar ang pagpaambit og usa ka kasinatian sa dihang ikaw adunay pangutana mahitungod sa ebanghelyo ug nakadawat og tubag. Hangyoa ang mga sakop sa korum o klase sa pagpaambit og susama nga mga kasinatian.

• Ang mga sakop ba sa imong korum o klase makahunahuna og mga tawo diha sa mga kasulatan kinsa nangutana nga miresulta sa pagpadayag? (Kon gikinahanglan, mahimo nimo silang itudlo ngadto sa mga kasulatan ubos sa “Suporta nga mga Kapanguhaan.”) Ang mga sakop sa korum o klase mahimong mobasa mahitungod niini nga mga tawo diha sa mga kasulatan ug matino kon unsa ang mga pangutana nga ilang gipangutana, giunsa nila pagpangita og mga tubag, ug ang mga tubag nga ilang nadawat. Unsa ang atong makat-unan gikan niini nga mga ehemplo? Unsaon man nato paggamit ang atong nakat-unan samtang mangita kita og mga tubag sa atong kaugalingong mga pangutana?

• Ang mensahe ni Elder W. Mark Bassett nga “Alang sa Atong Espirituhanong Kalamboan ug Pagkat-on” (Liahona, Nob. 2016, 52–54) naghatag og mga sugyot kon unsaon pagpangita og mga tubag sa espiritwal nga mga pangutana. Ang imong korum o klase mahimong magbasa og dungan sa upat ka parapo [paragraph] niini nga mensahe nga magsugod sa “Aron masabtan ang mga misteryo sa Dios.” Dapita dayon ang mga sakop sa korum o klase sa pagbasa sa 1 Nephi 2:16, 19–20; 10:17–19; 11:1 ug sa pagtino kon unsay gibuhat ni Nephi aron sa pagpangita og mga tubag sa iyang mga pangutana. Dapita ang mga sakop sa korum o klase sa paghunahuna kon unsay ilang buhaton aron sa pagsunod sa ehemplo ni Nephi kon sila adunay mga pangutana mahitungod sa ebanghelyo.

• Ang istorya diha sa Marcos 9:14–27 makatabang sa mga sakop sa korum o klase kon manglimbasug sila og mga pangutana o pagduha-duha. Sa dili pa ang klase, dapita ang usa ka sakop sa imong korum o klase nga motungha nga andam sa pagpaambit sa istorya. Dayon, bahina ang imong korum o klase ngadto sa tulo ka grupo, ug sangunan ang matag grupo sa pagtuon sa usa sa tulo ka obserbasyon nga gihimo ni Elder Jeffrey R. Holland mahitungod sa istorya diha sa iyang mensahe nga “Nagatuo Ako” (Liahona, Mayo 2013, 93–95). Sa unsang paagi nato magamit ang mga obserbasyon ni Elder Holland kon kita o ang tawo nga atong nailhan adunay mga pangutana o mga pagduha-duha mahitungod sa ebanghelyo?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Enos 1:1–8; Alma 5:43–47; 40:3–5; Ether 2:18–23; Doktrina ug mga Pakigsaad 138:1–4, 11; Joseph Smith—Kasaysayan 1:10–18 (Mga ehemplo sa mga tawo nga nangita og mga tubag sa ilang mga pangutana)

• James B. Martino, “Dangup ngadto Kaniya ug ang mga Tubag Moabut,” Liahona, Nob. 2015, 58–60

Pagtudlo sumala sa Pamaagi sa Manluluwas

Ang Manluluwas miawhag niadtong Iyang gitudloan sa paggamit sa mga kasulatan sa pagpangita og mga tubag sa ilang kaugalingong mga pangutana. Sa unsang paagi nga kadtong imong gitudloan mapanalanginan samtang magkat-on sila kon unsaon sa pagpangita og mga tubag sa ilang mga pangutana?