Igsoong Joseph, ni David Lindsley

Nobyembre 28

Giunsa ni Joseph Smith Pagtabang sa Pagtuman sa Plano sa Langitnong Amahan?

Doktrina ug mga Pakigsaad 135–136

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang atong mahimo aron sa pag-ugmad og panaghiusa diha sa korum o mga sakop sa klase? Unsa nga mga tumong ang atong gustong buhaton og dungan?

• Ang atong mga katungdanan o mga responsibilidad. Unsa ang atong gibuhat sa pagpaambit sa ebanghelyo? Unsa ang atong mga kasinatian sa paghimo og mga buhat sa templo ug family history?

• Ang atong mga kinabuhi. Giunsa nato pagsinati ang kamot sa Ginoo diha sa atong mga kinabuhi? Unsa ang nakapadasig kanato sa atong pagtuon sa kasulatan niini nga semana?

Sa katapusan sa leksyon, kon angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

“Si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi” (Doktrina ug mga Pakigsaad 135:3). Usa kini ka dayag nga pamahayag mahitungod sa tahas ni Joseph Smith. Nahunahuna ba nimo sukad kon unsay kahulugan niining pamahayag sa imong kinabuhi? Unsa kaha ka lahi ang imong kinabuhi kon ang ebanghelyo ni Jesukristo wala ipahiuli? Unsay imong mabuhat aron matabangan ang mga sakop sa imong korum o klase nga mapalig-on ang ilang mga pagpamatuod bahin sa misyon ni Joseph Smith?

Samtang mangandam ka sa pagtudlo, agig dugang sa pagtuon sa Doktrina ug mga Pakigsaad 135, ikonsiderar ang pagribyu sa mensahe ni Presidente M. Russell Ballard nga “Kita Dili Ba Mopadayon sa Hilabihan ka Mahinungdanon nga Katuyoan?” (Liahona, Mayo 2020, 8–11) ug sa mensahe ni Elder Neil L. Andersen nga “Joseph Smith” (Liahona, Nob. 2014, 28–31).

Ang atong mga kinabuhi napanalanginan sa mga kamatuoran nga gipahiuli pinaagi ni Propeta Joseph Smith.

Pagkat-on og Dungan

Sa pagsugod og panaghisgutan kon sa unsang paagi nga nakatabang si Joseph Smith sa pagtuman sa plano sa Langitnong Amahan, mahimo nimong sugdan pinaagi sa pagribyu kon unsay nakat-unan sa mga sakop sa korum o klase mahitungod sa Propeta gikan sa pagbasa sa Doktrina ug mga Pakigsaad 135 niini nga semana. Sama pananglit, makahimo sila og lista sa mga kamatuoran nga ilang nahibaloan mahitungod sa Manluluwas ug sa Iyang ebanghelyo tungod ni Joseph Smith. Nganong ang matag usa niining mga kamaturoan importante man sa plano sa Langitnong Amahan? Ang mosunod nga mga kalihokan makatabang sa imong korum o klase nga mas masabtan ang tahas ni Joseph Smith diha sa plano sa kaluwasan.

• Aron matabangan ang mga sakop sa korum o klase nga maandam sa pagtabang sa uban nga makasabut sa kaimportante ni Propeta Joseph, mahimo nilang basahon ang “Ang Pagpahiuli sa Ebanghelyo ni Jesukristo pinaagi ni Joseph Smith” diha sa kapitulo 3 sa Isangyaw ang Akong Ebanghelyo ([2019], 42–44). Magtrabaho nga magpares o sa ginagmay nga mga grupo, mahimo nilang matino ang mga punto nga daw importante nga ipaambit sa uban. Dayon mahimo silang magpraktis sa pagpaambit sa kasinatian ni Joseph Smith ngadto sa usag usa sa ilang kaugalingong mga pulong. Hangyoa sila sa pagkonsiderar kon unsa kaha ang ilang buhaton aron mapaambit ang mensahe sa Pagpahiuli. Siguro mahimo silang maghunahuna og usa ka piho nga tawo nga ilang mapaambitan niini nga mensahe. Tingali andam usab silang mopaambit og mga kasinatian sa dihang mitabang sila og usa ka tawo nga mahibalo mahitungod ni Joseph Smith.

• Hangyoa ang mga sakop sa korum o klase sa paghunahuna nga usa sa ilang mga higala diha sa simbahan miingon, “Dili ko sigurado kon ako adunay pagpamatuod bahin ni Joseph Smith. Giunsa nimo pagkahibalo nga siya usa ka propeta?” Unsaon man nato pagtubag? Unsa ang atong makat-unan gikan sa kaugalingong kasinatian ni Joseph Smith diha sa Joseph Smith—Kasaysayan 1:8–19 kon unsaon nato pag-angkon o pagpalig-on sa atong mga pagpamatuod? Hangyoa ang mga sakop sa korum o klase sa paghimo og lista sa mga paagi sa pagpalig-on sa ilang mga pagpamatuod bahin ni Propeta Joseph Smith ug ang matag usa mopili og usa ka butang nga gusto nilang buhaton niini nga semana.

• Aron matabangan ang mga sakop sa korum o klase nga mas makasabut sa buhat nga gihimo sa Dios pinaagi ni Joseph Smith, mahimo nimo silang dapiton sa pagbasa sa mga pahina 68–77 sa Mga Pagtulun-an sa mga Presidente sa Simbahan: Gordon B. Hinckley (2016). Mahimo silang mokuha og usa o duha ka doktrina ug mga binuhatan nga gipresentar diha niining mga kapanguhaan nga labi ka makahuluganon ngadto kanila. Mahimo nilang ipasabut kon nganong mapasalamaton sila nga gipahiuli sa Ginoo kining mga butanga pinaagi ni Joseph Smith. Mahimo usab silang malingaw sa paghimo og mubo nga sulat nga mopahayag sa ilang pasalamat kon sa unsang paagi nga ang buhat ni Joseph Smith nakatabang kanila nga mas mapaduol sa Manluluwas. Mahimo usab silang mamalandong kon unsay ilang mabuhat aron mas hingpit nga makapahimulos sa mga panalangin nga gihatag sa Ginoo pinaagi ni Joseph Smith.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Doktrina ug mga Pakigsaad 35:17–18 (Pinaagi ni Propeta Joseph Smith, ang Ginoo mipahiuli sa kahingpitan sa ebanghelyo)

• Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 60–63

Pagtudlo sumala sa Pamaagi sa Manluluwas

Gitutukan sa Manluluwas ang pagtabang sa Iyang mga sumusunod nga magsunod sa ebanghelyo sa tibuok nilang mga kasingkasing. Sa unsang paagi ka makatabang niadtong imong gitudloan nga makakita kon sa unsang paagi nga ang ilang mga pagpamatuod bahin ni Joseph Smith makaapekto sa ilang inadlaw-adlaw nga pagpakabuhi?