Nobyembre 14

Nganong Importante ang Mahangturon nga Kaminyoon?

Doktrina ug mga Pakigsaad 129–132

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang nagkinahanglan sa atong tabang ug mga pag-ampo? Unsay atong mahimo sa pagtabang kanila? Kinsa ang atong dapiton ngadto sa umaabut nga kalihokan?

• Ang atong mga katungdanan o mga responsibilidad. Unsa nga mga buluhaton ang ato nang natuman? Unsa nga mga buluhaton ang kinahanglan natong buhaton? Giunsa nato pagdapit ang uban sa pagduol ngadto kang Kristo, ug unsaon nato pagdapit ang uban karon?

• Ang atong mga kinabuhi. Unsa nga bag-ong mga kasinatian ang nakapalig-on sa atong mga pagpamatuod? Unsa ang nanghitabo sa atong mga kinabuhi, ug unsaon nato sa pagsuporta ang usag usa?

Sa katapusan sa leksyon, kon angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Samtang ang mga sakop sa imong korum o klase makaangkon og mga pagpamatuod bahin sa kaminyoon sa templo samtang bata pa sila, mas lagmit silang magtinguha ug mangandam alang niining dakong panalangin. Sa plano sa kalipay sa atong Langitnong Amahan, ang walay katapusan nga pakigsaad sa kaminyoon mahinungdanon sa kahimayaan (tan-awa sa Doktrina ug mga Pakigsaad 131:1–4). Apan ang kaminyoon sa templo dili lamang mahitungod sa unsay atong madawat sa sunod nga kinabuhi—makahatag usab kini og dagkong mga panalangin niini nga kinabuhi. Sama pananglit, ang sagradong mga pakigsaad ngadto sa Dios makaimpluwensya sa pagtan-aw sa bana ug asawa sa ilang relasyon sa usag usa. Ug ang usa ka lalaki ug usa ka babaye nga masilyo sa usag usa sa karon ug sa tibuok kahangturan adunay kasiguroan nga tungod ni Jesukristo, ang ilang relasyon magpadayon sa kahangturan kon magmatinuoron sila sa ilang mga pakigsaad.

Unsaon nimo pagtabang sa mga sakop sa imong korum o klase nga mobati og dugang nga tinguha nga masilyo sa templo? Aron maandam ang imong kaugalingon sa pagtudlo mahitungod sa kaminyoon sa templo, mahimo nimong basahon ang “Kaminyoon” diha sa Matinud-anon sa Tinuohan ([2004], 86–91).

Ang mga pamilya mahimong masilyo sa kahangturan pinaagi sa mga ordinansa sa templo.

Pagkat-on og Dungan

Aron mahatagan ang mga sakop sa korum o klase og kahigayunan sa pagpaambit sa unsay ilang gitun-an diha sa mga kasulatan niini nga semana, mahimo nimong isulat diha sa pisara ang usa ka pangutana sama sa Nganong ang mahangturong kaminyoon sa templo sa Dios importante? Ang mga sakop sa korum o klase mahimo dayon nga mangita sa pakisayran sa usa ka bersikulo nga ilang mabasahan diha sa Doktrina ug mga Pakigsaad 129–32 nga makatabang sa pagtubag sa pangutana ug pagsulat sa pakisayran tupad sa pangutana. (Kon makatabang kini, mahimo nimo silang itudlo sa Doktrina ug mga Pakigsaad 131:1–4; 132:13–19.) Basaha og dungan ang pipila ka pakisayran, ug hisguti kon unsay gitudlo niini. Mahimo nimong gamiton ang usa sa mosunod nga mga kalihokan aron matabangan ang mga batan-on nga mas makasabut sa kaimportante sa kaminyoon sa templo.

• Tungod kay ang mahangturong kaminyoon talagsaon sa gipahiuli nga ebanghelyo, kadtong imong gitudloan mahimong adunay mga oportunidad sa pagpasabut niini ngadto sa mga tawo nga dili pamilyar niini. Aron matabangan ang mga sakop sa korum o klase sa pagbuhat niini, mahimo nimo silang dapiton sa paghunahuna nga sila adunay usa ka higala nga natingala nganong ang mga Santos sa Ulahing mga Adlaw nagtuo nga ang pagkaminyo diha sa templo importante kaayo. Hangyoa sila sa pagbasa sa mga kasulatan diha sa “Suporta nga mga Kapanguhaan,” “Ang Pamilya: usa ka Pamahayag ngadto sa Kalibutan” (ChurchofJesusChrist.org), o mga pahina 86–87 diha sa Matinud-anon sa Tinuhoan. Mahimo nga mangita sila og mga pulong, mga hugpong sa mga pulong, ug mga ideya nga tingali ilang malakip sa usa ka sulat ngadto sa ilang higala nga magpasabut sa kaimportante sa kaminyoon sa templo. Mahimo nimo silang hatagan og panahon sa paghimo og sulat ug dayon sa pagdapit kanila sa pagpaambit sa unsay ilang gisulat.

• Ang pagkakita og ehemplo sa matinud-anong kaminyoon makapadasig niadtong imong gitudloan sa pagtinguha mismo alang niining panalangin. Usa ka paagi sa pagbuhat niini mao ang pagribyu sa mga seksyon sa mensahe ni Elder L. Whitney Clayton nga “Kaminyoon: Tan-awa ug Pagkat-on” (Liahona, Mayo 2013, 83–85). Unsa ang makat-unan sa mga sakop sa korum o klase gikan niini nga mensahe kon unsaon pag-ugmad og malipayon nga mahangturong kaminyoon? Ang mga sakop sa korum o klase mahimo usab nga moribyu sa mga ideya sa “Pagkab-ot og usa ka Malipayon nga Kaminyoon” diha sa Matinud-anon sa Tinuhoan (mga pahina 89–91).

• Hangyoa ang mga sakop sa korum o klase sa paghunahuna og pipila ka butang nga makapugong kanila nga masilyo sa templo. Unsa ang atong mabuhat karon aron mabuntog kining mga butanga? Dayon mahimo silang moribyu sa “Mahangturon nga Kaminyoon” diha sa kapitulo 3 sa Isangyaw ang Akong Ebanghelyo ([2019], 99) aron makakita og mga baruganan ug mga binuhatan nga moresulta sa malipayong mga kaminyoon ug mga pamilya. Mahimo silang molista og pipila sa mga butang nga ilang mabuhat karon sa pag-andam alang sa usa ka mahangturong kaminyoon. Unsa ang tahas sa Manluluwas sa pagtabang kanato nga maandam ug makaangkon og mahangturong kaminyoon?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Doktrina ug mga Pakigsaad 49:16–17; 131:1–4; 132:13–19 (Ang mahangturong kaminyoon mahinungdanon sa plano sa Dios)

• Mga Hilisgutan sa Ebanghelyo, “Kaminyoon,” topics.ChurchofJesusChrist.org

• Si Elder D. Todd Christofferson namahayag: “Sa pagpahayag sa sukaranang mga kamatuoran kalabut sa kaminyoon ug pamilya mao ang dili pagbaliwala o pagpaubos sa sakripisyo ug kalampusan niadtong kansang ideyal dili maoy kasamtangang kamatuoran. … Ang daghan nga maayo, gikinahanglan—bisan usahay ang tanan nga gikinahanglan karon—makab-ot sa kahimtang nga dili ideyal. … Uban sa pagsalig kami mopamatuod nga ang Pag-ula ni Jesukristo nagpaabut ug, sa katapusan, mobayad sa tanang paghikaw ug nawala alang niadtong modangup ngadto Kaniya” (“Nganong Kaminyoon, Nganong Pamilya,” Liahona, Mayo 2015, 52).

Pagtudlo sumala sa Pamaagi sa Manluluwas

Pangutana og makapadasig nga mga pangutana niadtong imong gitudloan aron makahunahuna og maayo mahitungod sa mahangturong kaminyoon ug mobati og tinguha nga magtrabaho paingon niana nga tumong. Paminaw og maayo sa ilang mga tubag ug tubaga uban sa kamabination kon giaghat sa Espiritu.