mga babaye nga nagkuyog og lakaw

Oktubre 24

Unsaon Nako Paggamit “ang mga Gahum sa Langit” sa Akong Kinabuhi?

Doktrina ug mga Pakigsaad 121–123

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang bag-o sa atong ward, ug unsaon nato pagtabang kanila nga mobati og pag-abiabi? Unsa ang atong buhaton aron sa paghimo sa oras sa atong mga miting sa korum o klase nga makahuluganon?

• Ang atong mga katungdanan o mga responsibilidad. Unsa ang pipila sa atong mga katungdanan ug mga responsibilidad isip mga batan-ong lalaki ug mga batan-ong babaye? Sa unsa nga paagi kita mas makatuman niini?

• Ang atong mga kinabuhi. Unsa ang atong buhaton aron mahimong mas mahisama ni Jesukristo ug madawat ang Iyang gahum diha sa atong mga kinabuhi? Unsa ang atong buhaton aron sa pagtabang sa atong mga pamilya nga moduol ngadto Kaniya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang awtoridad ug gahum sa pagkapari dili susama nga butang. Ang usa ka tawo mahimong makadawat og awtoridad sa pagkapari pinaagi sa pagpandong sa mga kamot—ang mga lalaki mahimong ma-orden sa usa ka katungdanan sa pagkapari, ug ang mga lalaki ug mga babaye mahimong ma-set apart alang sa usa ka calling. Apan ang gahum sa pagkapari—ang gahum sa Dios, o “ang mga gahum sa langit”—magamit lamang “diha sa mga baruganan sa pagkamatarung” (Doktrina ug mga Pakigsaad 121:36), ug ang mga lalaki ug mga babaye mahimong makagamit niini nga gahum. Kon gusto kita nga ang atong pagserbisyo sa uban mahimong gamhanan ug makapausab sa kinabuhi, kinahanglan kita nga mahimong takus nga motawag sa mga gahum sa langit.

Ang mga sakop ba sa imong korum o klase nahibalo kon unsaon paggamit ang gahum sa pagkapari? Unsa kaha kalahi ang ilang mga kinabuhi ug ang ilang pagserbisyo kon aduna sila niana nga panabut? Pamalandunga kining mga pangutana samtang magtuon ka sa Doktrina ug mga Pakigsaad 121. Maayo usab nga magtuon sa duha ka mensahe gikan ni Presidente Russell M. Nelson. Ang usa gipamulong ngadto sa mga naghupot sa pagkapari—“Ang Bugti sa Gahum sa Priesthood” (Liahona, Mayo 2016, 66–69). Ang lain gipamulong ngadto sa mga sister—“Espirituhanon nga mga Bahandi” (Liahona, Nob. 2019, 76–79).

batan-ong lalaki nga nag-ampo

Ang gahum sa pagkapari moabut pinaagi sa matarung nga pagpuyo.

Pagkat-on og Dungan

Sa pagsugod og panaghisgutan mahitungod sa gahum sa pagkapari, mahimo nimong pangutan-on ang mga sakop sa korum o klase nga ipaambit ang butang nga ilang nakat-unan mahitungod niining gahum gikan sa ilang pagbasa sa Doktrina ug mga Pakigsaad 121 niini nga semana. Kon makatabang kini, mahimo nimong isugyot nga ilang basahon og daklit ang mga bersikulo 34–46 aron makita ang matag dapit nga ang pulong nga gahum gigamit ug dayon ipaambit kon unsay ilang makat-unan. Mahimo nimong gamiton ang mosunod nga mga kalihokan aron matabangan ang mga sakop sa imong korum o klase nga mas masabtan kon unsaon nila paggamit ang gahum sa pagkapari sa Dios diha sa ilang mga kinabuhi.

• Mahimong mapuslanon ang pagtandi kon sa unsang paagi nga ang “gahum” ug “impluwensya” mamintenar sa kalibutan sa unsay gitudlo sa Ginoo diha sa seksyon 121 kon sa unsang paagi nga ang gahum sa pagkapari mamintenar. Makahimo ka og duha ka kolum nga tsart diha sa pisara nga adunay mga ulohan nga Kalibutanong Gahum ug Mga Gahum sa Langit. Ang mga sakop sa korum o klase mahimong mobutang og mga pulong ug mga hugpong sa mga pulong diha sa tsart gikan sa Doktrina ug mga Pakigsaad 121:34-46. Sa unsang paagi nga ang pagsabut niining mga bersikulo makaapekto sa paagi sa atong pagtinguha nga makaimpluwensya sa uban alang sa maayo, lakip na sa atong mga higala, mga sakop sa pamilya, ug kadtong atong giserbisyuhan ug gipangalagaran? Sumala niini nga mga bersikulo, sa unsang paagi nga ang Espiritu Santo makatabang kanato nga maimpluwensyahan ang uban sa matarung nga paagi?

• Aron matabangan ang mga naghupot sa Aaronic nga Pagkapari nga makakat-on kon unsaon pagdala og gahum ngadto sa ilang pagserbisyo sa pagkapari, mahimo nimong ipakita ang nagkadaiyang mga butang ug hangyuon ang mga sakop sa korum sa pagtag-an kon pila ang bili sa matag butang. Nganong ang ubang mga butang mas dako man og bili kay sa uban? Unsa nga mga butang ang labing bililhon sa atong mga kinabuhi, ug unsa nga bugti ang kinahanglan natong “ibayad” alang niini? Ang mga sakop sa korum o klase mahimo dayong mangita sa mensahe ni Presidente Russell M. Nelson nga “Ang Bugti sa Gahum sa Priesthood,” nga mangita sa bugti nga iyang giingon nga kinahanglan gayud natong bayaran aron makadawat sa gahum sa pagkapari. Sa unsang paagi nga ang atong mga kinabuhi ug ang mga kinabuhi sa uban maapektuhan samtang magserbisyo kita nga adunay dugang pa nga gahum sa Manluluwas?

• Aron matabangan ang mga batan-ong babaye nga makasabut kon sa unsang paagi sila makagamit sa gahum sa pagkapari, mahimo nimo silang hangyuon sa paghunahuna mahitungod sa mga panahon sa dihang ilang gibati ang gahum sa Dios sa ilang mga kinabuhi. Ipasabut nga ang gahum sa pagkapari mao ang gahum sa Dios. Mahimo silang mangita sa mensahe ni Presidente Russell M. Nelson nga “Espirituhanon nga mga Bahandi” alang sa mga kamatuoran mahitungod sa kababayen-an ug sa gahum sa pagkapari. Unsay gihangyo ni Presidente Nelson nga buhaton sa kababayen-an sa Simbahan aron sa “paggamit sa gahum sa Manluluwas”? (pahina 77; tan-awa ilabi na sa upat ka parapo [paragraph] nga magsugod sa “Ang matag babaye ug matag lalaki”). Kanus-a kita migamit niini nga gahum aron mapanalanginan ang atong mga kinabuhi ug ang mga kinabuhi sa uban? Unsa ang gitudlo kanato sa Doktrina ug mga Pakigsaad 121:39–43 kon unsaon paglihok uban sa gahum sa Ginoo diha sa atong mga kinabuhi?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 39–42

• David A. Bednar, “Ang mga Gahum sa Langit,” Liahona, Mayo 2012, 48–51

Pagtudlo sumala sa Pamaagi sa Manluluwas

Samtang magtinguha ka nga mosunod sa ehemplo ni Jesukristo ug magpuyo nga takus sa paggamit sa Iyang gahum, makahimo ka sa pagtudlo uban sa gahum ug awtoridad.