Oktubre 10

Unsaon Nako aron Mahimong Mas Hingpit nga Makabig ngadto sa Ginoo?

Doktrina ug mga Pakigsaad 111–114

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon, agi og dugang ngadto sa pagtinambagay mahitungod sa piho nga mga panginahanglan sa korum o klase, tingali gusto nimong hisgutan ang mga pag-aghat ug mga tema gikan sa kinatibuk-ang komperensya. Ang mosunod nga mga pangutana mahimong makatabang.

• Unsa nga mga tema o mga mensahe ang mahinungdanon ngari kanato?

• Unsa nga pag-aghat ang atong gibati nga buhaton tungod sa unsay atong nakat-unan o gibati?

• Unsay kinahanglan natong buhaton isip usa ka korum o klase sa paglihok sa tambag nga atong nadungog sa kinatibuk-ang komperensya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Aron mas hingpit nga makabig ngadto ni Jesukristo, kinahanglan gayud kita nga mosalig Kaniya ug mosunod sa Iyang mga sugo—bisan kon ang lisud nga mga hagit mosulay sa atong pagkakabig. Niadtong 1837, pipila ka miyembro sa Simbahan, lakip sa pipila ka sakop sa Korum sa Napulog Duha ka mga Apostoles, nawad-an sa ilang mga pagpamatuod ug mibatok ni Propeta Joseph Smith. Si Thomas B. Marsh mao ang Presidente sa Korum sa Napulog Duha ka mga Apostoles nianang panahona. Samtang ikaw ug ang imong pamilya magbasa sa Doktrina ug mga Pakigsaad 112 niini nga semana, mahimong mabantayan ninyo ang tambag nga gihatag sa Ginoo aron matabangan si Thomas B. Marsh nga mapalig-on ang iyang pagkakabig (tan-awa ilabi na sa mga bersikulo 10–26). Unsa ang gitudlo niini nga tambag nganha kanimo mahitungod sa pagkahimong mas nakabig ngadto sa Manluluwas?

Unsaon nimo pagtabang ang mga sakop sa korum o klase nga makadawat sa saad sa Manluluwas nga “sila makabig, ug Ako moalim kanila”? (Doktrina ug mga Pakigsaad 112:13). Unsa nga mga kasinatian ang imong mapaambit? Samtang mamalandong ka niining mga pangutana, ikonsiderar ang pagribyu sa mensahe ni Presidente Bonnie H. Cordon nga “Salig sa Ginoo ug Ayaw Pagsalig sa Kaugalingong Salabutan” (Liahona, Mayo 2017, 6–9) ug “Pagkakabig” diha sa Matinud-anon sa Tinuhoan ([2004], 138–142).

Ang mga kasulatan usa ka dakong kalig-on samtang magtinguha kita aron mahimong mas hingpit nga makabig.

Pagkat-on og Dungan

Ang mga sakop ba sa imong korum o klase nahibalo kon unsay kahulugan sa pagkakabig ngadto ni Jesukristo? Nasayud ba sila kon unsaon aron mahimong mas hingpit nga makabig? Dapita sila sa pagpamalandong niining mga pangutana samtang magribyu sila sa Doktrina ug mga Pakigsaad 112:10–26. Sa unsang paagi kita magpabiling makabig ngadto ni Jesukristo bisan sa mahagitong mga kahimtang? Mahimo nimong gamiton ang usa o dugang pa sa mosunod nga mga kalihokan aron matabangan ang imong korum o klase nga mapalig-on ang ilang pagkakabig ngadto sa Manluluwas.

• Ang Alma 32:27–43 makatabang niadtong imong gitudloan nga makasabut kon unsaon pagpalig-on sa ilang pagtuo ug mahimong mas hingpit nga makabig ngadto sa ebanghelyo ni Jesukristo. Siguro mahimo nimong bahinon ang mga sakop sa korum o klase ngadto sa mga grupo ug hangyoa ang matag grupo sa pagbasa niining mga bersikulo ug hisguti kon unsay gitudlo niini mahitungod sa hugot nga pagtuo ug pagkakabig. Hangyoa ang matag grupo sa pagpaambit sa unsay ilang nakat-unan. Mahimo kang makaawhag og panaghisgutan pinaagi sa pagpangutana sama niini: Nganong ang usa ka binhi nga motubo og mahimong usa ka kahoy usa man ka maayo nga paghulagway sa pagkakabig? Unsay buot ipasabut sa “pagsulay sa mga pulong [sa Dios]”? (bersikulo 27). Unsa ang gipasabut sa “moalima sa kahoy”? (bersikulo 41). Sa unsang paagi kita makasulti nga ang binhi sa pagkakabig “mibukad, ug migitib, ug misugod sa pagtubo” sa sulod nato? (bersikulo 30). Hatagi ang mga sakop sa korum o klase og panahon sa pagpamalandong kon unsay angayan nilang buhaton aron maamumahan ang ilang kaugalingong pagkakabig ngadto ni Jesukristo.

• Adunay daghang pwersa sa kalibutan nga mobatok sa atong pagkakabig ngadto ni Jesukristo. Ang pagbasa sa Helaman 5:12 mahimong makatudlo sa mga sakop sa korum o klase kon unsaon pagpabiling lig-on bisan pa man sa oposisyon. Unsay gipasabut sa “motukod sa inyong tukuranan” diha sa pundasyon ni Jesukristo? Mahimo nimong sangunan ang matag tawo og usa ka porsyon sa mensahe ni Elder QuentinL. Cook nga “Mga Pundasyon sa Hugot nga Pagtuo” (Liahona, Mayo 2017, 127–31) ug hangyoa sila sa pagpangita og mga ehemplo ug tambag nga makatabang kanila sa pag-ugmad sa ilang pundasyon diha sa Manluluwas.

• Makahunahuna ka ba og usa ka mamugnaong paagi sa pagpakita sa baruganan nga gitudlo ni Presidente Bonnie H. Cordon diha sa iyang mensahe nga “Salig sa Ginoo ug Ayaw Pagsalig sa Kaugalingong Salabutan”? Sama pananglit, mahimo nimong bahinon ang imong korum o klase ngadto sa mga grupo ug hagita ang matag grupo sa pagtukod og kinatas-ang estruktura diha sa usa ka nagbahirig nga dapit gamit ang mga bloke o uban pang mga butang. Dayon hisguti kon sa unsang paagi kini may kalabutan sa mensahe ni Presidente Cordon. Ang korum o klase mahimo dayong mangita sa mensahe alang sa mga sugyot kon unsaon pagpabilin sa atong mga kinabuhi nga nakasentro diha ni Jesukristo. Unsa nga mga kasinatian ang atong mapaambit kon magsalig kita sa atong kaugalingong panabut o kon mosalig kita sa Manluluwas?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Alma 5 (Si Alma nagtudlo mahitungod sa pagkakabig)

• David A. Bednar, “Nakabig ngadto sa Ginoo,” Liahona, Nob. 2012, 106–9

• Richard J. Maynes, “Ang Kalipay sa Pagpakabuhi nga Nakasentro kang Kristo,” Liahona, Nob. 2015, 27–30

• Becky Craven, “Mabinantayon batok Dili Kaayo Magtagad,” Liahona, Mayo 2019, 9–11

Pagtudlo sumala sa Pamaagi sa Manluluwas

Ang Manluluwas miingon, “Ang gitudlo ko dili akong kaugalingon, kondili iya sa nagpadala kanako” (Juan 7:16). Iyang gitudlo ang doktrina nga Iyang nakat-unan gikan sa Iyang Amahan. Unsaon nimo pagsiguro nga nagtudlo ka sa tinuod nga doktrina? (Tan-awa sa Pagtudlo sumala sa Pamaagi sa Manluluwas [2016], 20–21.)