26 ni Tiseba

Cava na Vuna e Bibi kina na Matavuvale?

“Na Matavuvale: Ai Vakaro ki Vuravura Raraba

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ni veika vakaoqo, ka tuvanaka na sala eso me vakayacori kina na ka sa veivosakitaki (rawa ni o navuca ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e vou tu ki na noda tabanalevu, ka da na veivuke vakacava mera vakataukeitaki? Na cava eda sa cakava tiko me vakaibalebale kina na noda gauna ena soqoni ni kuoramu se kalasi?

• Noda itavi se icolacola. Na cava na itavi kei na icolacola eso e tiko vei keda vaka cauravou kei na goneyalewa? E rawa vakacava ni da vakataucokotaki ira vinaka?

• Noda bula. Na cava eda sa cakava tiko meda vakataki Jisu Karisito vakalevu cake ka ciqoma na Nona kaukauwa ena noda bula? Na cava eda sa cakava tiko me vukea na noda matavuvale me lako mai ki Vua?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

E duidui kece na matavuvale, ka sega ni dua na matavuvale e vinaka sara. Ia sa vinaka sara na noda iTubutubu taucoko Vakalomalagi, ka vinakata tu meda ciqoma na veivakalougatataki ni bula marau voli vaka matavuvale tawamudu. Me vukei keda ni rawata oqo, sa vakauqeti ira na parofita kei na iapositolo na Kalou mera vunautaka na dina tawamudu ena “Na Matavuvale: Ai Vakaro ki Vuravura Raraba” (ChurchofJesusChrist.org)

Ni ko vakarau tu mo vakavulica na bibi ni vakamatavuvale, vakasamataka na vuna e bibi kina vei iko na nomu matavuvale. Na itavi cava sa vakayacora o Jisu Karisito ena vukei ni nomu matavuvale me kune marau? Ni ko vakarau tu mo veivakavulici, sa rawa mo vulica “Na Matavuvale: Ai Vakaro ki Vuravura Raraba” (ChurchofJesusChrist.org), “Matavuvale” ena Me iSakisaki ni iTabagone ([2011], 14–15), kei na itukutuku i Elder D. Todd Christofferson “Cava na Vuni Vakamau, Cava na Vuni Matavuvale” (Liaona, Me 2015, 50–53). Na ivakavuvuli cava so mai na veivurevure oqo o nanuma tu ni na vakaibalebale vakalevu sara vei ira o vakavulica?

Na matavuvale sa usutu ni tuvatuva ni Tamada Vakalomalagi kivei keda.

Vulica Vata

Me tekivu e dua na veivosaki me baleta na bibi ni matavuvale, rawa ni o taroga na ka era sa vulica na kuoramu se kalasi me baleta na bula marau vakamatavuvale ni ra wilika e vale “Na Matavuvale: Ai Vakaro ki Vuravura Raraba”. Na cava era vulica e rawa ni vukei ira ni vaqaqacotaka na nodra matavuvale? Qai digitaka e dua se sivia na itaviqaravi oqo e ra me vukea na lewe ni kuoramu se kalasi mera kila vakamatata sara na vuna e bibi kina na matavuvale ena ituvatuva ni Tamada Vakalomalagi.

• Na ivolanikalou ena “iVurevure Veitokoni Eso” e tokona na dina veivakauqeti eso ena ivakaro ni matavuvale. De rawa beka ni o lesia ki na lewe ni kuoramu se kalasi yadua me wilika e dua vei ira na ivolanikalou oqo ka qai vakaraica na ivakaro ni matavuvale me kunea e dua na tikina e semati ki na nona ivolanikalou. Sa rawa ki na lewe ni kuoramu se kalasi yadua me wasea na ka sa kunea.

• Na bulataki ni vakavuvuli i Jisu Karisito sa muataki ki na bula marau dina ka tudei ena loma ni noda matavuvale. Me vukea nodra kila vakamatata oqo na lewe ni kuoramu se kalasi, sa rawa ni o sureta yadua na tamata me digitaka e dua na ivakarau va-Karisito (raica na “Au na Vakatorocaketaka Vakacava na iVakarau va-Karisito?” wase 6 ena Vunautaka na Noqu Kosipeli [2019], 121–29) ka qai raica e dua na ivolanikalou se itukutuku vakaparofita e vakavulica na ivakarau oya. Ni ra wasea tu na lewe ni kuoramu se kalasi na ka era raica, sa rawa ni ra sauma e dua se sivia na taro oqo: Ena ra-wa vakacava na noqu matavuvale na bulataki vakataucoko sara ni vakarau va-Karisito oqo? Na cava au vulica mai na ivakaraitaki ni iVakabula ena sala me tutaki kina na ivakarau oqo ena noqu matavuvale?

• A vakatavulica o Peresitedi Russell M. Nelson: “Na vunica sa vakatubura tiko na nona ravuravu me baleta na vakabauta kei keda kei na noda matavuvale ena dua na ivalavala totolo sara” (“Vosa ni Doladola,” Liaona, Nove. 2018, 7). Me vukea na nodra taqomaki na lewe ni kuoramu se kalasi mai na ravuravu eso oqo, sa rawa ni o sureti ira mera vola ena papa e vica na ivakarau kei na itovo e cibitaka tu o Setani me vakamalumalumutaka kina na matavuvale. Cava na vuna e veivakacacani kina na veika oqo ki na matavuvale? Sa rawa ni ra qai vaqara na lewe ni kuoramu se kalasi na ikavitu ni parakaravu ni ivakaro ni matavuvale ena ivakarau kei na itovo e rawa ni vorata na ravuravu i Setani. E rawa vakacava ni da vaqara na veivuke ni iVakabula ena vakatorocaketaki ni ivakarau kei na itovo eso oqo? Me tiki ni veivosaki oqo, sa rawa ni o vakaraitaka na vidio “Proclamation” (ChurchofJesusChrist.org). Na cava eda vulica ena sala eda rawa ni taqomaka kina na noda matavuvale mai na veivakayarayarataki i Setani?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Roma 8:16–17; Iperiu 12:9 (Eda sa luvena na Tamada Vakalomalagi)

• Vakatekivu 2:18, 24;Vunau kei na Veiyalayalati 131:1–4 (Sa vakatabuya na vakawati na Kalou)

• Mosaia 4:14–15; Vunau kei na Veiyalayalati 68:25–29; 93:40–50(Na itubutubu me vakavulica na kosipeli vei ira na luvedra)

• L. Tom Perry, “Na Vuna e Vakabetena kina na Vakawati kei na Matavuvale—e Vuravura Raraba,” Liaona, Me 2015, 39–42

• Vidio “Families Can Be Together Forever,” “The Home Is a Divine Institution,” ChurchofJesusChrist.org

Veivakavulici ena iVakarau ni iVakabula

A sureti ira na Nona tisaipeli na iVakabula mera vakadinadinataka, ia ni ra vakayacora, sa tara na yalodra na Yalotabu. Ni o veivakavulici, sureta na lewe ni kuoramu se kalasi me wasea na nodra ivakadinadina ena bibi ni matavuvale ena ituvatuva ni Kalou.