Disiembre 26

Apay a Napateg dagiti Pamilia?

“Ti Kaamaan: Maysa a Waragawag iti Lubong”

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag:

• Ti korum wenno klasetayo. Asino dagiti kabarbaro iti wardtayo, ken kasano a matulongantayo ida a makarikna iti nabara a pannakapasangbay? Ania dagiti ar-aramidentayo tapno mapagbalin a napateg ti orastayo kadagiti miting iti korum wenno klase?

• Dagiti pagrebbengan wenno responsibilidadtayo. Ania dagiti sumagmamano a pagrebbengan ken responsibilidadtayo kas agtutubo a lallaki ken agtutubo a babbai? Kasano a maipatungpaltayo a nasaysayaat dagitoy?

• Ti biagtayo. Ania dagiti ar-aramidentayo tapno agbalin nga ad-adda a kas ken ni Jesucristo ken umawat iti bilegna iti biagtayo? Ania dagiti ar-aramidentayo a mangtulong kadagiti pamiliatayo nga umasideg Kenkuana?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Agduduma ti tunggal pamilia, ken awan ti perpekto a pamilia. Ngem addaantayo amin kadagiti perpekto a Nailangitan a Nagannak, a kayatdatayo nga umawat iti bendision ti panagbiag a siraragsak kas agnanayon a pamilia. Tapno matulongannatayo a manggun-od iti daytoy, pinaregta ti Apo dagiti propeta ken apostol a mangipakdaar kadagiti agnanayon a kinapudno iti “Ti Kaamaan: Maysa a Waragawag iti Lubong” (ChurchofJesusChrist.org).

Bayat ti panagsaganam a mangisuro maipapan iti kinapateg dagiti pamilia, panunotem maipapan iti no apay a napateg kenka ti pamiliam. Ania ti papel nga inakem ni Jesucristo iti panangtulong iti pamiliam a mangsarak iti ragsak? Bayat ti panagsaganam a mangisuro, mabalinmo nga adalen ti “Ti Kaamaan: Maysa a Waragawag iti Lubong” (ChurchofJesusChrist.org), “Pamilia” iti Para iti Pigsa dagiti Agtutubo ([2011], 14–15), ken ti mensahe ni Elder D. Todd Christofferson “Why Marriage, Why Family” (Liahona, Mayo 2015, 50–53). Ania dagiti pagbatayan manipud kadagitoy a resources a mariknam nga agbalinto a kapatgan kadagiti sursuruam?

Ti pamilia ti kangrunaan iti plano ti Nailangitan nga Ama para kadatayo.

Aggigiddan a Masursuruan

Tapno mairugi ti panaglilinnawag maipapan iti kinapateg dagiti pamilia, mabalinmo a saludsoden kadagiti korum wenno klase no ania ti nasursuroda maipapan iti kinaragsak iti biag ti pamilia bayat ti panangbasada iti “Ti Kaamaan: Maysa a Waragawag iti Lubong” iti pagtaengan. Ania ti nasursuroda a mabalin a makatulong kadakuada a mangpatibker kadagiti pamiliada? Kalpasanna mangpili ti maysa wenno ad-adu pay kadagiti aktibidad iti baba a mangtulong kadagiti miembro ti korum wenno klase nga ad-adda pay a mangpasayaat iti pannakaawatda no apay a napateg dagiti pamilia iti plano ti Nailangitan nga Ama.

• Dagiti nasantuan a kasuratan iti “Dagiti Pangsuporta a Resources” ti mangsuporta kadagiti naparegta a kinapudno iti waragawag ti kaamaan. Nalabit a mabalinmo a dutokan ti tunggal miembro ti korum wenno klase a mangbasa iti maysa kadagitoy a nasantuan a kasuratan ket kalpasanna mangsukisok iti waragawag ti kaamaan a mangsapul iti maysa a binatog a mainaig iti nasantuan a kasuratanna. Mabalin nga ibinglay ti tunggal miembro ti korum wenno klase no ania ti nasarakanna.

• Ti panagbiag kadagiti pannursuro ni Jesucristo ti mangiturong iti pudno ken napaut a kinaragsak iti uneg dagiti pamiliatayo. Tapno matulongan a maawatan dagiti miembro ti korum wenno klase daytoy, mabalinmo nga awisen ti tunggal tao a mangpili iti maysa a kababalin a kas ken ni Cristo (kitaen iti “How Do I Develop Christlike Attributes?” kapitulo 6 iti Preach My Gospel [2019], 121–29) ket kalpasanna mangsapul iti maysa a nasantuan a kasuratan wenno napadtuan a palawag a mangisuro maipapan iti dayta a kababalin. Bayat ti panangibinglay dagiti miembro ti korum wenno klase no ania ti nasarakanda, mabalinda a sungbatan ti maysa wenno ad-adu pay kadagiti sumaganad a saludsod: Kasano nga apektuanna ti pamiliak ti ad-adda a naan-anay a panagbiag iti daytoy a kababalin a kas ken ni Cristo? Ania ti masursurok manipud iti pagwadan ti Mangisalakan maipapan iti no kasano a yaplikar daytoy a kababalin iti pamiliak?

• Insurat ni Presidente Russell M. Nelson: “Pumigpigsa ti idadarup ti kabusor iti pammati ken kadatayo ken iti pamiliatayo iti naparpardas pay” (“Opening Remarks,” Liahona, Nob. 2018, 7). Tapno matulongan dagiti miembro ti korum wenno klase a mangsaluad a maibusor kadagitoy nga idadarup, mabalinmo nga awisen ida a mangilista iti pisarra iti sumagmamano a galad ken ugali nga itandudo ni Satanas tapno mangpakapsut kadagiti pamilia. Apay a napeggad dagitoy a banag kadagiti pamilia? Kalpasanna mabalinda a sukisoken dagiti miembro ti korum wenno klase ti maikapito a parapo ti waragawag ti kaamaan para kadagiti galad ken ugali a mangsuppiat kadagiti idadarup ni Satanas. Kasano a makapagpatulongtayo iti Mangisalakan iti panangpadur-as kadagitoy a galad ken ugali? Kas paset daytoy a panaglilinnawag, mabalinmo nga ipabuya ti video a “Proclamation” (ChurchofJesusChrist.org). Ania ti masursurotayo maipapan iti no kasano a masalaknibantayo dagiti pamiliatayo manipud iti impluensia ni Satanas?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Taga Roma 8:16–17; Hebreo 12:9 (Annaknatayo ti Nailangitan nga Ama)

• Genesis 2:18, 24; Doktrina ken Katulagan 131:1–4 (Inordenan ti Dios ti kallaysa)

• Mosiah 4:14–15; Doktrina ken Katulagan 68:25–29; 93:40–50 (Nasken a suruan dagiti nagannak dagiti annakda iti ebanghelio)

• L. Tom Perry, “Why Marriage and Family Matter—Everywhere in the World,” Liahona, Mayo 2015, 39–42

• “Families Can Be Together Forever,” “The Home Is a Divine Institution,” videos, ChurchofJesusChrist.org

Panangisuro iti Wagas ti Mangisalakan

Inawis ti Mangisalakan dagiti disipulona nga agpaneknek, ken kas inaramidda idi, sinagid ti Espiritu dagiti pusoda. Kabayatan ti panagisurom, awisem dagiti miembro ti korum wenno klase a mangibinglay kadagiti pammaneknekda iti kinapateg ti pamilia iti plano ti Dios.