agtutubo a lalaki nga agsursurat iti whiteboard

Disiembre 12

Kasano a Masarakak dagiti Sungbat Kadagiti Saludsodko?

Pagannurotan ti Pammati ken Opisial a Palawag 1 ken 2

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Ania dagiti aktibidad nga adda kadatayo itay nabiit? Naballigian kadi dagitoy? Ania ti naaramid a nasayaat, ken kasano a mapasayaattayo pay dagitoy?

• Dagiti pagrebbengan wenno responsibilidadtayo. Asino ti agkasapulan iti serbisiotayo? Kasano a makatulongtayo kadakuada?

• Ti biagtayo. Ania dagiti panggep a tun-oyen a kayattayo nga aramiden a saggaysa? Ania dagiti padas a maibinglaytayo? Ania dagiti bendision a naawattayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Gagangay nga adda dagiti saludsod. Masdaawtayo maipapan iti masakbayan ken ti lubong iti aglawlawtayo. Addaantayo pay kadagiti saludsod maipapan iti Dios ken ti planona para kadatayo. Bayat ti panangbasam iti Opisial a Palawag 1 ken 2 iti daytoy a lawas, makita no ania ti inaramid dagiti propeta ken apostol tapno mangsapul kadagiti sungbat dagiti saludsodda (ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia mabalin a makatulong). Ania a papel ti agsapsapul iti sungbat kadagiti saludsod a naakem iti panagsursuro iti ebanghelio? Ania ti maaramidmo a mangallukoy kadagiti miembro ti korummo wenno klasem nga agsapsapul kadagiti sungbat dagiti saludsodda iti ebanghelio iti napudno a wagas? Bayat ti panagsaganam a mangisuro, ibilang ti panangrebyu iti Doktrina ken Katulagan 6:14–15; 9:7–9 ken “Acquiring Spiritual Knowledge” iti Doctrinal Mastery Core Document ([2018], 3–5).

agtutubo a babbai a kumitkita iti tablet

Mapapigsa dagiti pammaneknektayo bayat ti panagsapultayo kadagiti sungbat dagiti saludsod iti napudno a wagas.

Aggigiddan a Masursuruan

Bayat ti panagadal ti korummo wenno klasem iti Opisial a Palawag 1 ken 2 iti daytoy a lawas, mabalin a natakuatandan dagiti pagbatayan a mainaig iti panangawat iti sungbat kadagiti saludsod maipapan iti ebanghelio. Ikkam ida iti sumagmamano a minuto a mangrebyu kadagiti palawag ket ibinglay no ania ti nasursuroda maipapan iti panangawat iti paltiing. Makatulong kadakuada dagiti sumaganad nga aktibidad iti baba tapno nasaysayaat a maawatanda no kasano ti mangsapul iti sungbat kadagiti saludsodda iti ebanghelio.

• Mangisuro dagiti sumaganad a nasantuan a kasuratan kadagiti pagbatayan maipapan iti panagdamag kadagiti saludsod ken panangawat kadagiti sungbat: Mateo 7:7; Doktrina ken Katulagan 6:14–15; 9:7–9. Mabalin nga aggigiddan a basaen ti korummo wenno klasem dagitoy a binatog ket ilistam iti pisarra dagiti pagbatayan a masarakanda. Apay a saan a kanayon a sungbatan ti Nailangitan nga Ama dagiti saludsodtayo a naan-anay wenno madagdagus? Kasano a maituloytayo ti panangipakita iti pammatitayo bayat ti panagur-uraytayo kadagiti sungbat? (kitaen iti Doktrina ken Katulagan 19:23; 78:18). Ibilangmo ti panangibinglay iti maysa a padas idi adda saludsodmo maipapan iti ebanghelio ken immawatka iti sungbat. Idawat kadagiti miembro ti korum wenno klase a mangibinglay kadagiti kasta met la a padas.

• Makapagpanunot kadi dagiti miembro ti korummo wenno klasem maipapan kadagiti tao iti nasantuan a kasuratan a nagdamag kadagiti saludsod a nangiturong iti paltiing? (No kasapulan, mabalinmo nga ibasar dagitoy kadagiti nasantuan a kasuratan iti babaen ti “Dagiti Pangsuporta a Resources.” Mabalin a basaen dagiti miembro ti korum wenno klase maipapan kadagitoy a tao iti nasantuan a kasuratan ken lasinen no ania dagiti saludsod a dinamagda, no kasano a nagsapulda kadagiti sungbat, ken dagiti sungbat a naawatda. Ania ti masursurotayo manipud kadagitoy a pagarigan? Kasano a maaramattayo no ania ti masursurotayo bayat ti panagsapultayo iti sungbat kadagiti bukodtayo a saludsod? Kas paset daytoy nga aktibidad mabalinmo pay nga ipakita ti “How Can I Live the Gospel Standards Better?” manipud iti “Face to Face with Elder and Sister Bednar” ([worldwide youth broadcast], Mayo 12, 2015, FacetoFace.ChurchofJesusChrist.org).

• Mangted ti mensahe ni Elder W. Mark Bassett a “For Our Spiritual Development and Learning” (Liahona, Nob. 2016, 52–54) kadagiti singasing maipapan iti no kasano nga agsapul iti sungbat kadagiti naespirituan a saludsod. Mabalin nga aggigiddan a basaen ti korummo wenno klasem ti uppat a parapo ti mensahena a mangrugi iti “Tapno maawatan dagiti kinadatdatlag ti Dios.” Kalpasanna awisem dagiti miembro ti klase a mangbasa iti 1 Nephi 2:16, 19–20; 10:17–19; 11:1 ken ilasinmo no ania ti inaramid ni Nephi a mangsapul iti sungbat kadagiti saludsodna. Awisem dagiti miembro ti korum wenno klase a mangpanunot maipapan iti no anianto ti aramidenda a mangsurot iti pagwadan ni Nephi no adda saludsodda maipapan iti ebanghelio.

• Makatulong ti estoria iti Marcos 9:14–27 kadagiti miembro ti korum wenno klase no agkarigatanda kadagiti saludsod wenno panagduadua. Iti nasapsapa, awisem ti maysa a miembro ti korummo wenno klasem nga umay a nakasagana a mangibinglay iti estoria. Kalpasanna, bingayem ti korummo wenno klasem iti tallo a grupo, ket dutokam ti tunggal grupo a mangadal iti maysa kadagiti tallo a pammaliiw ni Elder Jeffrey R. Holland maipapan iti estoria iti mensahena “Lord, I Believe” (Liahona, Mayo 2013, 93–95). Kasano a maaramattayo dagiti pammaliiw ni Elder Holland no adda dagiti saludsod wenno agduadua maipapan iti ebanghelio ti maysa a tao nga am-ammotayo?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Enos 1:1–8; Alma 5:43–47; 40:3–5; Ether 2:18–23; Doktrina ken Katulagan 138:1–4, 11; Joseph Smith—Pakasaritaan 1:10–18 (Pagarigan dagiti tao nga agsapsapul iti sungbat dagiti saludsodda)

• James B. Martino, “Turn to Him and Answers Will Come,” Liahona, Nob. 2015, 58–60

• Gospel Topics, “Answering Gospel Questions,” topics.ChurchofJesusChrist.org

Panangisuro iti Wagas ti Mangisalakan

Inallukoy ti Mangisalakan dagiti insurona a mangusar kadagiti nasantuan a kasuratan a mangsapul iti sungbat kadagiti bukodda a saludsod. Kasano a mabendisionanto dagiti sursuruam bayat ti panagsursuroda no kasano ti mangsapul iti sungbat kadagiti saludsodda?