Brother Joseph, ni David Lindsley

Nobiembre 28

Kasano a Timmulong ni Joseph Smith a Mangipatungpal iti Plano ti Nailangitan nga Ama?

Doktrina ken Katulagan 135–136

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Ania ti maaramidtayo tapno mabangontayo ti panagkaykaysa kadagiti miembro ti korum wenno klase? Ania dagiti panggep a tun-oyen a kayattayo a pagtitinnulongan nga aramiden?

• Dagiti pagrebbengan wenno responsibilidadtayo. Ania ti ar-aramidentayo a mangibinglay iti ebanghelio? Ania dagiti padas nga adda kadatayo idi iti panangtrabaho iti aramid iti templo ken family history?

• Ti biagtayo. Kasano a naimatangantayon ti ima ti Apo iti biagtayo? Ania ti nangparegta kadatayo iti panagadaltayo iti nasantuan a kasuratan iti daytoy a lawas?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

“Ni Joseph Smith, ti Propeta ken Mammadto ti Apo, ti ad-adu ti naaramidna, malaksid ken ni Jesus, para iti pannakaisalakan dagiti tao iti daytoy a lubong, ngem iti asino man a tao a nagbiag ditoy” (Doktrina ken Katulagan 135:3). Daytoy ti natingra a palawag maipapan iti akem ni Joseph Smith. Napanunotmo kadi no ania ti kaipapanan daytoy a palawag iti biagmo? Kasano a maiduma koma ti biagmo no saan a naisubli ti ebanghelio ni Jesucristo? Ania ti maaramidmo a mangtulong kadagiti miembro ti korummo wenno klasem a mangpapigsa kadagiti pammaneknekda maipapan iti mision ni Joseph Smith?

Bayat ti panagsaganam a mangisuro, kas nayon iti panagadal iti Doktrina ken Katulagan 135, ibilang ti panangrebyu iti mensahe ni Presidente M. Russell Ballard “Shall We Not Go On in So Great a Cause?” (Liahona, Mayo 2020, 8–11) ken ti mensahe ni Elder Neil L. Andersen “Joseph Smith” (Liahona, Nob. 2014, 28–31).

Nabendisionan ti biagtayo babaen kadagiti kinapudno a naisubli babaen ken ni Propeta Joseph Smith.

Aggigiddan a Masursuruan

Tapno rugian ti panaglilinnawag maipapan iti no kasano a timmulong ni Joseph Smith a mangipatungpal iti plano ti Nailangitan nga Ama, mabalinmo a rugian babaen ti panangrebyu no ania ti nasursuro dagiti miembro ti korum wenno klase maipapan iti Propeta manipud iti panangbasa iti Doktrina ken Katulagan 135 iti daytoy a lawas. Kas pagarigan, mabalinda nga ilista dagiti kinapudno nga ammoda maipapan iti Mangisalakan ken iti ebangheliona gapu ken ni Joseph Smith. Apay a napateg ti tunggal maysa kadagitoy a kinapudno iti plano ti Nailangitan nga Ama? Makatulong dagiti sumaganad nga akitibidad iti korummo wenno klasem a makaawat a nasaysayaat iti akem ni Joseph Smith iti plano ti pannakaisalakan.

• Tapno matulongan dagiti miembro ti korum wenno klase nga agsagana a mangtulong iti dadduma a makaawat iti pateg ni Propeta Joseph, mabalinda a basaen ti “The Restoration of the Gospel of Jesus Christ through Joseph Smith” iti kapitulo 3 ti Preach My Gospel ([2019], 36–38). Iti panagtrabaho iti kada paris wenno babassit a grupo, mabalinda nga ilasin dagiti punto a kasla napateg nga ibinglay iti dadduma. Kalpasanna mabalinda ti agsanay iti panangibinglay iti padas ni Joseph Smith iti tunggal maysa iti bukodda a balikas. Idawatmo kadakuada a mangibilang no ania ti mabalinda nga aramiden a mangibinglay iti mensahe ti Pannakaisubli. Nalabit a mabalinda a panunoten ti naipangruna a tao a pangibinglayanda iti daytoy a mensahe. Mabalin nga agtallugodda pay a mangibinglay kadagiti padasda idi tinulonganda ti maysa a tao a nagsursuro maipapan ken ni Joseph Smith.

• Idawat kadagiti miembro ti korum wenno klase a mangipapan a kuna ti maysa kadagiti gagayyemda iti simbaan, “Diak sigurado nga addaanak iti pammaneknek maipapan ken ni Joseph Smith. Kasano ti pannakaammom a propeta isuna?” Kasano koma ti sungbattayo? Ania ti masursurotayo manipud iti bukod a padas ni Joseph Smith iti Joseph Smith—Pakasaritaan 1:8–19 maipapan iti no kasano a magun-od wenno mapapigsatayo dagiti bukodtayo a pammaneknek? Idawat kadagiti miembro ti korum wenno klase a mangilista kadagiti wagas a pakapapigsaan dagiti pammaneknekda maipapan ken ni Propeta Joseph Smith ket saggaysa a pumili iti maysa a banag a kayatda nga aramiden iti daytoy a lawas.

• Tapno matulongan dagiti miembro ti korum wenno klase a makaawat a nasaysayaat iti aramid nga impatungpal ti Dios babaen ken ni Joseph Smith, mabalinmo nga awisen ida a mangbasa kadagiti panid 48–53 ti Teachings of Presidents of the Church: Gordon B. Hinckley (2016) wenno mangbuya iti maysa wenno ad-adu pay kadagiti video iti “Dagiti Pangsuporta a Resources.” Mabalinda ti pumili iti maysa wenno dua kadagiti doktrina ken kannawidan a naidatag kadagitoy a resources a nangnangruna a napnuan kaipapanan kadakuada. Mabalinda nga ilawlawag no apay nga agyamyamanda nga insubli ti Apo dagitoy a banag babaen ken ni Joseph Smith. Mabalin a magustuanda pay ti agaramid iti surat a mangipekpeksa iti panagyamanda iti no kasano a nakatulong ti aramid ni Joseph Smith nga ad-adda a nangyasideg kadakuada iti Mangisalakan. Mabalinda pay nga utoben no ania ti maaramidda tapno ad-adda a naan-anay a mairanudda kadagiti bendision nga inaramid ti Apo a nakasagana a magun-od babaen ken ni Joseph Smith.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Doktrina ken Katulagan 35:17–18 (Babaen ken ni Propeta Joseph Smith, insubli ti Apo ti pakabuklan ti ebanghelio)

• Russell M. Nelson, “The Book of Mormon: What Would Your Life Be Like without It? Liahona, Nob. 2017, 60–63

• “Teachings of Joseph Smith: The Nature of God,” “Ministry of Joseph Smith: The Book of Mormon,” “Ministry of Joseph Smith: The Organization of the Church,” “Ministry of Joseph Smith: The Restoration of Priesthood Authority,” “Ministry of Joseph Smith: Temples,” (videos), ChurchofJesusChrist.org

Panangisuro iti Wagas ti Mangisalakan

Impamaysa ti Mangisalakan iti panangtulong kadagiti pasurotna nga agbiag iti ebanghelio iti amin a pusoda. Kasano a matulongam dagiti sursuruam a mangkita no kasano nga apektuan koma dagiti pammaneknekda ken ni Joseph Smith ti inaldaw a biagda?