dagiti kabarbaro a nagkallaysa iti sango ti templo

Nobiembre 14

Apay a Napateg ti Agnanayon a Kallaysa?

Doktrina ken Katulagan 129–132

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Asino ti agkasapulan iti tulong ken karkararagtayo? Ania ti maaramidtayo a mangtulong kadakuada? Asino ti nasken nga awisentayo iti daytoy umay nga aktibidad?

• Dagiti pagrebbengan wenno responsibilidadtayo. Ania dagiti naituding nga aramiden a naipatungpaltayon? Ania dagiti naituding nga aramiden a nasken nga aramidentayo? Kasano nga inawistayo dagiti dadduma nga umasideg ken ni Cristo, ken kasano a maawistayo dagiti dadduma itan?

• Ti biagtayo. Ania dagiti nabiit pay a padas a nangpapigsa kadagiti pammaneknektayo? Ania ti mapaspasamak iti biagtayo, ken kasano a makapagsisinnuportatayo iti tunggal maysa?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Bayat ti pannakagun-od iti pammaneknek dagiti miembro ti korummo wenno klasem maipapan iti kallaysa iti templo no agtututuboda pay laeng, nalabit nga ad-adda nga agtarigagay ken agsaganada para iti daytoy naindaklan a bendision. Iti plano ti ragsak iti Nailangitan nga Amatayo, napateg unay iti pannakaitan-ok ti agnanayon a katulagan ti kallaysa (kitaen iti Doktrina ken Katulagan 131:1–4). Ngem ti kallaysa iti templo saan laeng a maipanggep iti no ania ti awatentayonto iti sumaruno a biag—mangisangbayto pay daytoy iti dadakkel a bendision ditoy a biag. Kas pagarigan, makaimpluensia dagiti sagrado a katulagan iti Dios iti wagas a panangkita dagiti agassawa iti relasionda iti tunggal maysa. Ken ti maysa a lalaki ken maysa a babai a nailantip iti tunggal maysa para ita a panawen ken iti amin a kinaagnanayon ket addaan iti pammatalged a gapu ken ni Jesucristo, agtultuloyto ti relasionda iti agnanayon no napudnoda kadagiti katulaganda.

Kasano a matulongam dagiti miembro ti korummo wenno klasem a makarikna iti dakdakkel a tarigagay a mailantip iti templo? Tapno maisaganam ti bagim a mangisuro maipapan iti kallaysa iti templo, mabalinmo a sukisoken ti artikulo nga “About a Temple Sealing” iti temples.ChurchofJesusChrist.org wenno basaem ti “Kallaysa” iti Napudno iti Pammati ([2004], 97–101).

dagiti nagannak a mangkibkibin kadagiti annakda

Mabalin a mailantip dagiti pamilia iti agnanayon babaen kadagiti ordinansa ti templo.

Aggigiddan a Masursuruan

Tapno mangted kadagiti miembro ti korum wenno klase iti gundaway a mangibinglay iti no ania ti ad-adalenda kadagiti nasantuan a kasuratan iti daytoy a lawas, mabalinmo nga isurat iti pisarra ti maysa a saludsod kas iti Apay a napateg ti agnanayon a kallaysa iti templo ti Dios? Kalpasanna mabalin a sapulen dagiti miembro ti korum wenno klase ti reperensia iti maysa a bersikulo a basaenda iti Doktrina ken Katulagan 129–32 a makatulong a mangsungbat iti saludsod ken isurat ti reperensia iti abay ti saludsod. (No makatulong daytoy, mabalinmo nga itudo kadakuada iti Doktrina ken Katulagan 131:1–4; 132:13–19.) Aggigiddan a mangbasa iti sumagmamano a reperensia, ken paglilinnawagan no ania ti isuroda. Mabalinmo nga usaren ti ania man kadagiti sumaganad nga aktibidad a mangtulong kadagiti agtutubo a makaawat a nasaysayaat iti kinapateg ti kallaysa iti templo.

• Gapu ta naidumduma ti agnanayon a kallaysa iti naisubli nga ebanghelio, mabalin nga addaan dagiti sursuruam iti gundaway a mangilawlawag daytoy kadagiti tao a saan pay a pamiliar iti daytoy. Tapno matulongan dagiti miembro ti korum wenno klase a mangaramid iti daytoy, mabalinmo nga awisen ida a mangipapan nga adda maysa a gayyemda nga agsiddaaw no apay a mamati dagiti Santo iti Ud-udina nga Aldaw a napateg unay ti panagkallaysa iti templo. Idawatmo kadakuada a mangbasa kadagiti nasantuan a kasuratan iti “Dagiti Pangsuporta a Resources,” “Ti Kaamaan: Maysa a Waragawag ti Lubong” (ChurchofJesusChrist.org), wenno dagiti panid 97–98 iti Napudno iti Pammati. Mabalinda a sapulen dagiti balikas, ragup ti balikas, ken kapanunotan a mabalin nga iramanda iti surat iti gayyemda a mangilawlawag iti kinapateg ti kallaysa iti templo. Mabalinda pay a buyaen ti “Why Is Marriage Sacred to Heavenly Father?” manipud iti “Face to Face with Elder and Sister Renlund” ([worldwide youth broadcast], Ago. 5, 2017], FacetoFace.ChurchofJesusChrist.org). Mabalinmo nga ikkan ida iti gundaway nga agsurat ken kalpasanna awisem ida a mangibinglay no ania ti insuratda.

• Ti panangkita iti pagwadan ti napudno a kallaysa ket makaparegta kadagiti sursuruam nga agkalikagum a manggun-od iti daytoy a bendision iti bagbagida. Maysa a wagas a panangaramid iti daytoy ket panagrebyu kadagiti benneg ti mensahe ni Elder L. Whitney Clayton “Marriage: Watch and Learn” (Liahona, Mayo 2013, 83–85). Ania ti masursuro dagiti miembro ti korum wenno klase manipud iti daytoy a mensahe maipapan iti no kasano ti mangbangon iti agnanayon a naragsak a panagasawa? Mabalin pay nga irebyu dagiti miembro ti korum wenno klase dagiti kapanunotan iti “Pananggun-od iti Naragsak a Panagasawa” iti Napudno iti Pammati (dagiti panid 99–101). Mabalinda pay a buyaen ti “How Did Elder and Sister Bednar Meet?” manipud iti “Face to Face with Elder and Sister Bednar” ([worldwide youth broadcast], Mayo 12, 2015], FacetoFace.ChurchofJesusChrist.org).

• Idawat kadagiti miembro ti korum wenno klase a mangpanunot iti sumagmamano a banag a manglapped kadakuada iti pannakailantip iti templo. Ania ti mabalin nga aramidentayo itan tapno maliklikan dagitoy a banag? Kalpasanna mabalinda nga irebyu ti “Eternal Marriage” iti kapitulo 3 ti Preach My Gospel ([2019], 89) a mangsapul kadagiti pagbatayan ken kannawidan a mangiturong kadagiti naragsak a panagdenna dagiti agassawa ken pamilia. Mabalinda nga ilista ti sumagmamano kadagiti banag a maaramidda itan tapno agsagana para iti agnanayon a kallaysa. Ania ti akem ti Mangisalakan iti panangtulong kadatayo nga agsagana ken manggun-od iti agnanayon a kallaysa?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Doktrina ken Katulagan 49:16–17; 131:1–4; 132:13–19 (Kasapulan iti agnanayon a kallaysa iti plano ti Dios)

• Gospel Topics, “Marriage,” topics.ChurchofJesusChrist.org

• “What Is a Temple Wedding Like?” (video), temples.ChurchofJesusChrist.org

• Kinuna ni Elder D. Todd Christofferson: “Tapno ipakdaar dagiti kangrunaan a kinapudno a mainaig iti panagasawa ken pamilia ket saan a mangliway wenno mangpabassit kadagiti sakripisio ken balligi dagitay awan iti agdama a realidad ti pagulidananda. … Kaaduan a nasayaat, kaaduan a kasapulan—uray no dadduma amin a kasapulan itan—mabalin a maragpat iti babassit ngem iti nasayaat a kasasaad. … Addaan iti panagtalek paneknekanmi a ninamnama ti Pannubbot ni Jesucristo ken, iti kamaudiananna, agbayadto iti amin a naikkat ken napukaw dagiti umasideg Kenkuana” (“Why Marriage, Why Family,” Liahona, Mayo 2015, 52).

Panangisuro iti Wagas ti Mangisalakan

Agdamag kadagiti saludsod a mangparegtanto kadagiti sursuruam nga agpanunot iti nauneg maipapan iti agnanayon a kallaysa ken makarikna iti tarigagay a mangitrabaho iti dayta panggep a tun-oyen. Dumngegka a naimbag kadagiti saludsodda ket sungbatam a nasayaat no paregtaennaka ti Espiritu.