babbai nga aggigiddan a magmagna

Oktubre 24

Kasano a Magun-odko “dagiti Bileg ti Langit” iti Biagko?

Doktrina ken Katulagan 121–123

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino dagiti kabarbaro iti wardtayo, ken kasano a matulongantayo ida a makarikna iti nabara a pannakapasangbay? Ania dagiti ar-aramidentayo tapno mapagbalin a napateg ti orastayo kadagiti miting iti korum wenno klasetayo?

• Dagiti pagrebbengan wenno responsibilidadtayo. Ania dagiti sumagmamano a pagrebbengan ken responsibilidadtayo kas agtutubo a lallaki ken agtutubo a babbai? Kasano a maipatungpaltayo a nasaysayaat dagitoy?

• Ti biagtayo. Ania dagiti ar-aramidentayo tapno agbalin nga ad-adda a kas ken ni Jesucristo ken umawat iti bilegna iti biagtayo? Ania dagiti ar-aramidentayo a mangtulong kadagiti pamiliatayo nga umasideg Kenkuana?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Saan nga agpada a banag ti turay ken bileg ti priesthood. Mabalin nga umawat ti tao iti turay ti priesthood babaen ti panangipatay kadagiti ima—mabalin a maordenan dagiti lallaki iti saad [office] ti priesthood, ken agpada a mabalin a ma-set apart dagiti lallaki ken babbai para iti maysa a takem [calling]. Ngem ti bileg ti priesthood—ti bileg ti Dios, wenno “dagiti bileg ti langit”—mabalin nga usaren laeng “kadagiti pagbatayan ti kinalinteg” (Doktrina ken Katulagan 121:36), mabalin nga usaren nga agpada dagiti lallaki ken babbai daytoy a bileg. No kayattayo nga agbalin a nabileg ken makapagbalbaliw iti biag ti panagserbitayo iti dadduma, nasken nga agbalintayo a maikari nga umawag kadagiti bileg ti langit.

Ammo kadi dagiti miembro ti korummo wenno klasem no kasano a gun-oden ti bileg ti priesthood? Kasano a maisupadi ti biagda ken ti panagserbida no awananda iti dayta a pannakaawat? Utobem dagitoy a saludsod bayat ti panagadalmo iti Doktrina ken Katulagan 121. Nasayaat pay nga adalen ti dua a mensahe manipud ken ni Presidente Russell M. Nelson. Maiturong ti maysa kadagiti addaan iti priesthood—“The Price of Priesthood Power” (Liahona, Mayo 2016, 66–69). Maiturong ti sabali pay kadagiti kakabsat a babbai—“Spiritual Treasures,” (Liahona, Nob. 2019, 76–79).

barito nga agkarkararag

Sumangbay ti bileg ti priesthood babaen ti nalinteg a panagbiag.

Aggigiddan a Masursuruan

Tapno marugian ti panaglilinnawag maipapan iti bileg ti priesthood, mabalinmo nga idawat kadagiti miembro ti korum wenno klase a mangibinglay iti maysa a banag a nasursuroda maipapan iti daytoy a bileg manipud iti panangbasada iti Doktrina ken Katulagan 121 iti daytoy a lawas. No makatulong daytoy, mabalinmo nga isingasing a basaenda biit dagiti bersikulo 34–46 tapno sapulenda ti tunggal lugar a nakausaran ti balikas a bileg ket kalpasanna ibinglay no ania ti masursurona. Mabalinyo nga usaren dagiti sumaganad nga aktibidad a mangtulong kadagiti miembro ti korummo wenno klasem a nasaysayaat a maawatanda no kasano a magun-odda ti bileg ti priesthood ti Dios iti biagda.

• Mabalin a napateg a pagdasigen no kasano a mapagtalinaed iti lubong ti “bileg” wenno “impluensia” iti no ania ti insuro ti Apo iti benneg 121 maipapan iti no kasano a mapagtalinaed ti bileg ti priesthood. Mabalinmo ti mangaramid iti dua ti kolumna a tsart iti pisarra nga addaan kadagiti paulo a Nailubongan a Bileg ken Dagiti Bileg ti Langit. Mabalin dagiti miembro ti korum wenno klase ti mangpunno iti tsart kadagiti balikas ken ragup ti balikas manipud iti Doktrina ken Katulagan 121:34–46. Kasano a makaapekto ti pannakaawattayo kadagitoy a bersikulo iti wagas a panagkalikagumtayo a mangimpluensia iti dadduma para iti pagsayaatan, agraman dagiti gagayyemtayo, miembro ti pamilia, ken dagiti pagserbian ken pagministeringantayo? Segun kadagitoy a bersikulo, kasano a matulongannatayo ti Espiritu Santo a mangimpluensia iti dadduma a sililinteg?

• Tapno matulongan dagiti addaan iti Aaronic Priesthood a mangsursuro no kasano ti mangisangbay iti bileg iti panagserbi iti priesthood, mabalinmo nga i-display ti nadumaduma a banag ket papugtuam kadagiti miembro ti korum no mano ti pateg ti tunggal banag. Ania dagiti sumagmamano a banag a dakdakkel ti pategna ngem iti dadduma? Ania dagiti banag a kadaklan ti pategna iti biagtayo, ken ania ti gatad a nasken a “bayadantayo” para kadagitoy? Kalpasanna mabalin a sukisoken dagiti miembro ti korum ti mensahe ni Presidente Russell M. Nelson iti “The Price of Priesthood Power,” a mangsapsapul iti gatad a kinunana a nasken a bayadantayo tapno umawat iti bileg ti priesthood. Kasano a naapektuan ti biagtayo ken ti biag dagiti dadduma bayat ti panagserbitayo nga addaan iti dakdakkel a bileg ti Mangisalakan?

• Tapno matulongam dagiti agtutubo a babbai a makaawat no kasano a magun-odda ti bileg ti priesthood, mabalin nga idawatmo kadakuada a mangpanunot maipapan kadagiti panawen idi nariknada ti bileg ti Dios iti biagtayo. Ilawlawag a bileg ti Dios ti bileg ti priesthood. Mabalinda a sukisoken iti mensahe ni Presidente Russell M. Nelson “Spiritual Treasures” dagiti kinapudno maipapan kadagiti babbai ken bileg ti priesthood. Ania ti indawat ni Presidente Nelson kadagiti babbai ti Simbaan nga aramidenda tapno “siwayawaya a magun-odda ti bileg ti Mangisalakan”? (panid 77; kitaen nangnangruna iti uppat a parapo mangrugi iti “Tunggal babai ken tunggal lalaki”). Kasano a nakagun-odtayo iti daytoy a bileg a mangbendision iti biagtayo ken ti biag dagiti dadduma? Ania ti isuro kadatayo ti Doktrina ken Katulagan 121:39–43 maipapan iti no kasano ti agtignay nga addaan iti bileg ti Apo iti biagtayo?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Russell M. Nelson, “Drawing the Power of Jesus Christ into Our Lives,” Liahona, Mayo 2017, 39–42

• David A. Bednar, “The Powers of Heaven,” Liahona, Mayo 2012, 48–51

Panangisuro iti Wagas ti Mangisalakan

Bayat ti panagkalikagummo a sumurot iti pagwadan ni Jesucristo ken agbiag a maikari a manggun-od iti bilegna, kabaelamto ti mangisuro nga addaan iti bileg ken turay.