Oktubre 10

Kasano a Makapagbalinak nga Ad-adda a Naan-anay a Napasurot iti Apo?

Doktrina ken Katulagan 111–114

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna, kas nayon iti panagiinnuman maipapan iti naipangruna a pakaseknan ti korum wenno klase, mabalin a kayatmo nga ilawlawag dagiti impresion ken tema manipud iti sapasap a komperensia. Makatulong dagiti sumaganad a saludsod.

• Ania dagiti tema wenno mensahe a napateg kadatayo?

• Ania ti nariknatayo a makaparegta nga aramiden gapu iti no ania ti nasursuro wenno nariknatayo?

• Ania ti nasken nga aramidentayo kas korum wenno klase nga agtignay iti balakad a nangngegantayo iti sapasap a komperensia?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Tapno agbalin nga ad-adda a naan-anay a napasurot ken ni Jesucristo, nasken nga agtalektayo Kenkuana ken agtungpal kadagiti bilinna—nupay no adda dagiti narigat a karit a mangsubok iti kumbersion wenno pannakapasurottayo. Idi 1837, sumagmamano a miembro ti Simbaan, agraman ti sumagmamano a miembro ti Korum dagiti Sangapulo-ket-dua nga Apostol, ti nakapukaw iti pammaneknekda ket timmalikudda ken ni Propeta Joseph Smith. Ni Presidente Thomas B. Marsh ti Presidente idi ti Korum dagiti Sangapulo-ket-dua nga Apostol. Bayat ti panangbasam ken ti pamiliam iti Doktrina ken Katulagan 112 iti daytoy a lawas, mabalin a madlawyo ti balakad ti Apo nga intedna a nangtulong ken ni Thomas B. Marsh a mapapigsa ti kumbersionna (pannakapasurotna) (kitaen nangnangruna kadagiti bersikulo 10–26). Ania iti isuro kenka daytoy a balakad maipapan iti panagbalin nga ad-adda a napasurot iti Mangisalakan?

Kasano a matulongam dagiti miembro ti korum wenno klase nga umawat iti kari ti Mangisalakan a “mabaliwandanto, ket agasakto ida”? (Doktrina ken Katulagan 112:13). Ania dagiti padas a maibinglayyo? Bayat ti panangutobmo kadagitoy a saludsod, ibilang ti panangrebyu iti mensahe ni Presidente Bonnie H. Cordon a “Trust in the Lord and Lean Not” (Liahona, Mayo 2017, 6–9) ken “Pannakapasurot” iti Napudno iti Pammati ([2004], 40–43).

Dagiti nasantuan a kasuratan ti dakkel a pigsa no agkalikagumtayo nga agbalin nga ad-adda a naan-anay a napasurot.

Aggigiddan a Masursuruan

Ammo kadi dagiti miembro ti korummo wenno klasem no ania ti kaipapanan ti agbalin a napasurot ken ni Jesucristo? Ammoda kadi no kasano ti agbalin nga ad-adda a naan-anay a napasurot? Awisem ida a mangutob kadagitoy a saludsod bayat ti panangrebyuda iti Doktrina ken Katulagan 112:10–26. Kasano a makapagtalinaedtayo a napasurot ken ni Jesucristo uray kadagiti mapannubok a kasasaad? Mabalinmo nga usaren ti maysa wenno ad-adu pay kadagiti sumaganad nga aktibidad a mangtulong iti korummo wenno klasem a mapapigsa ti pannakapasurotda iti Mangisalakan.

• Makatulong tiAlma 32:27–43 kadagiti sursuruam a makaawat no kasano a mapapigsa ti pammatida ken agbalinda nga ad-adda a napasurot iti ebanghelio ni Jesucristo. Nalabit a mabalinmo a bingayen dagiti miembro ti korum wenno klase iti kada grupo ket idawat iti tunggal grupo a mangbasa kadagitoy a bersikulo ken mangilawlawag no ania ti isuroda maipapan iti pammati ken pannakapasurot [conversion]. Idawat iti tunggal grupo a mangibinglay no ania ti nasursuroda. Mabalinmo ti mangyallukoy iti panaglilinnawag babaen ti panangdamag kadagiti saludsod kas kadagitoy: Apay a ti bukel a dumakdakkel nga agbalin a kayo ti maysa a nasayaat a panangiladawan iti pannakapasurot [conversion]? Ania ti kayat a sawen ti “padasenyo dagiti balikas ti [Dios]”? (bersikulo 27). Ania ti kayat a sawen ti “aywananyo ti kayo”? (bersikulo 41). Kasano a maibagatayo a ti bukel ti pannakapasurot [conversion] “bumlad, ken agtubo, ken mangrugi a dumakkel” iti unegtayo? (bersikulo 30). Ikkam dagiti miembro ti korum wenno klase iti gundaway a mangutob no ania ti aramidenda a mangaywan iti bukodda a pannakapasurot [conversion] ken ni Jesucristo.

• Adu dagiti puersa iti lubong a mangsuppiat iti pannakapasurottayo ken ni Jesucristo. Ti panangbasa iti Helaman 5:12 mabalin a mangisuro kadagiti miembro ti korum wenno klase no kasano ti agtalinaed a napigsa iti baet ti sumupsuppiat. Ania ti kayat a sawen ti “bangonenyo ti pamuonyo” iti bato ni Jesucristo? Mabalinmo a dutokan ti tunggal tao iti paset ti mensahe ni Elder Quentin L. Cook “Foundations of Faith” (Liahona, Mayo 2017, 127–31) ket idawat kadakuada a mangsukisok kadagiti pagwadan ken balakad a mangtulong kadakuada a mangbangon iti pamuonda iti Mangisalakan.

• Makapanunotka kadi iti managpartuat a wagas a mangipakita iti pagbatayan nga insuro ni Presidente Bonnie H. Cordon iti mensahena a “Trust in the Lord and Lean Not”? Kas pagarigan, mabalinmo a bingayen ti korummo wenno klasem iti kada grupo ket karitem iti tunggal grupo a mangbangon iti katayagan a pasdek iti nagirig a lugar nga usarenda dagiti bloke wenno dadduma pay a banag. Kalpasanna paglilinnawagan no kasano a mainaig daytoy iti mensahe ni Presidente Cordon. Kalpasanna mabalin ti korum wenno klase ti mangsukisok iti mensahe para kadagiti singasing no kasano a pagtalinaedentayo ti biagtayo a naipamaysa ken ni Jesucristo. Ania dagiti padas a maibinglaytayo no nagpannuraytayo iti bukodtayo a pannakaawat wenno no nagtalektayo iti Mangisalakan?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Alma 5 (Isuro ni Alma maipapan ti panagbalin a napasurot )

• David A. Bednar, “Converted unto the Lord,” Liahona, Nob. 2012, 106–9

• Richard J. Maynes, “The Joy of Living a Christ-Centered Life,” Liahona, Nob. 2015, 27–30

• Becky Craven, “Careful versus Casual,” Liahona, Mayo 2019, 9–11

Panangisuro iti Wagas ti Mangisalakan

Kinuna ti Mangisalakan “Saanko a kukua ti doktrinak, no di ket kukua dayta nangibaon kaniak” (Juan 7:16). Insurona ti doktrina a nasursurona manipud iti Amana. Kasano a maisiguradom a mangisursuroka iti pudno a doktrina? (Kitaen iti Panangisuro iti Wagas ti Mangisalakan [2016], 20–21.)