Septiembre 26

Apay a Napateg nga Adda dagiti Tulbek ti Priesthood iti Daga Ita?

Doktrina ken Katulagan 106–108

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Ania ti maaramidtayo tapno mabangontayo ti panagkaykaysa kadagiti miembro ti korum wenno klase? Ania dagiti panggep a tun-oyen a kayattayo a pagtitinnulongan nga aramiden?

• Dagiti pagrebbengan wenno responsibilidadtayo. Ania ti ar-aramidentayo a mangibinglay iti ebanghelio? Ania dagiti padas nga adda kadatayo idi iti panagtrabaho iti aramid iti templo ken family history?

• Ti biagtayo. Kasano a naimatangantayon ti ima ti Dios iti biagtayo? Ania ti nangparegta kadatayo iti panagadal iti nasantuan a kasuratan iti daytoy a lawas?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Insuro ni Elder Gary E. Stevenson a,“Dagiti tulbek ti priesthood ti manglukat kadagiti bendision, sagut, ken bileg ti langit para [kadatayo]” (“Where Are the Keys and Authority of the Priesthood?” Liahona, Mayo 2016, 32). Iggem ni Jesucristo ti amin a tulbek ti priesthood, ket dinutokanna dagiti nailangitan a mensahero a mangitalek (confer) kadagiti tulbek ti priesthood ken ni Joseph Smith. Ita iggem dagiti miembro ti Umuna a Panguluen ken Korum dagiti Sangapulo-ket-dua nga Apostol dagitoy isu met la a tulbek (kitaen iti Doktrina ken Katulagan 90:3–4, 6; 107:35; 132:7). “Dagitoy a tulbek ti turay nga inted ti Dios kadagiti lider ti priesthood tapno mangiturong iti panangusar iti priesthoodna iti daga.

Bayat ti panangbasam iti Doktrina ken Katulagan 107 iti daytoy a lawas, panunotem no kasano a mabendisionannaka ti Dios ken dagiti sursuruam babaen ti Priesthoodna. Ania ti masarakam iti daytoy a benneg a napateg a maammuan dagiti miembro ti korum wenno klase? Bayat ti panagsaganam a mangisuro, mabalinmo nga irebyu ti mensahe ni Elder Gary E. Stevenson ken “Dagiti Tulbek ti Priesthood” iti Napudno iti Pammati ([2004], 126–27).

Adda a magun-odtayo dagiti naindaklan a naespirituan a bendision babaen dagiti tulbek ti priesthood.

Aggigiddan a Masursuruan

TiDoktrina ken Katulagan 107 makatulong a mangsungbat iti saludsod “Ania dagiti bendision a maawattayo babaen ti priesthood ken ti panagserbi dagiti lider iti priesthood?” Nalabit a mabalin a sapulen dagiti miembro ti korum wenno klase ti sumagmamano a sungbat kadagiti bersikulo 18–23, 85–89. Tapno matulongan a nasaysayaat a maawatanda no kasano a bendisionan ti priesthood ken dagiti lider ti priesthood ti biagtayo, usarem ti maysa wenno ad-adu pay kadagiti sumaganad nga aktibidad.

• Mabalinmo a rugian ti panaglilinnawag maipapan kadagiti tulbek ti priesthood babaen ti panangawis iti maysa a miembro ti korum wenno klase nga umay a nakasagana a mangibinglay iti estoria ni Presidente Spencer W. Kimball iti isasarungkarna iti maysa a simbaan iti Denmark, nga insarita ni Presidente Boyd K. Packer iti mensahena a “The Twelve” (Liahona, Mayo 2008, 83–87; kitaen met iti video “The Restoration of Priesthood Keys” [ChurchofJesusChrist.org]). Mabalinmo pay nga idawat iti korummo wenno klasem nga aggigiddan a mangbasa iti benneg a “Dagiti Tulbek ti Priesthood” iti Napudno iti Pammati (dagiti panid 126–27). Ikkam ida iti gundaway a mangisuro iti tunggal maysa iti kada paris no ania dagiti tulbek ti priesthood, maibatay iti no ania ti nasursuroda. Ania dagiti bendision a simmangbay kadatayo babaen ti panagserbi dagiti agig-iggem kadagiti tulbek ti priesthood?

• Mabalin a kayatmo nga ibinglay ti estoria ni Elder Gary E. Stevenson maipapan iti pannakapukawna kadagiti tulbekna manipud iti umuna nga innem a parapo ti mensahena “Where Are the Keys and Authority of the Priesthood?” (wenno ipabuya ti video “Where Are the Keys?” [ChurchofJesusChrist.org]). Mabalinmo nga ipakita ti sumagmamano a tulbek ket awisem ti korummo wenno klasem a mangibinglay no kasano a maipada dagita a tulbek kadagiti tulbek ti priesthood. Mabalin nga irebyu ken paglilinnawagan dagiti sursuruam dagiti nasantuan a kasuratan nga imbasar ni Elder Stevenson (Joseph Smith—Pakasaritaan 1:68–72; Doktrina ken Katulagan 110:11–16), a mangiladawan kadagiti tulbek ti priesthood a maikumkumit iti daga. Mabalinmo nga awisen dagiti miembro ti korum wenno klase a saggaysa a pumili iti maysa kadagiti sumaganad a nasantuan a kasuratan ken mangibinglay iti maysa a binatog a pakagupgopan ti no ania ti masursuroda maipapan kadagiti bileg ken bendision nga awatentayo babaen dagiti tulbek ti priesthood: Mateo 16:18–19; Doktrina ken Katulagan 27:12; 65:2; 84:19–20. Apay a napateg nga adda dagiti tulbek ti priesthood iti daga ita?

• Mabalinmo nga ikkan ti tunggal miembro ti korummo wenno klasem iti papel a sinan-tulbek ket dutokam ti tunggal tao a mangbasa iti benneg II, III, IV, wenno V ti mensahe ni Presidente Dallin H. Oaks “The Keys and Authority of the Priesthood” (Liahona, Mayo 2014, 49–52). Awisem ida a mangisurat iti sinan-tulbek no ania ti nasursuroda maipapan iti priesthood ket kalpasanna ibinglayda no ania ti naisuratda. Kasano nga impluensiaan dagitoy a kinapudno ti wagas a mariknatayo maipapan kadagiti lider ti korum wenno klasetayo ken dagiti naituding nga aramiden nga awatentayo manipud kadakuada?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Russell M. Nelson, “Spiritual Treasures,” Liahona, Nob. 2019, 76–79

• “Priesthood Keys,” iti General Handbook: Serving in The Church of Jesus Christ of Latter-day Saints, 3.4.1

• “Learn Your Duty,” “The Priesthood, an Opportunity to Serve,” videos, ChurchofJesusChrist.org

Panangisuro iti Wagas ti Mangisalakan

Nangawag ken nag-set apart ti Mangisalakan kadagiti lider a mangiturong ken mangituray iti Simbaanna (kitaen iti Mateo 10:1–5). Kasano a matulonganyo dagiti sursuruanyo a makarikna iti panagyaman kadagiti naawagan nga agserbi ken tumulong kadakuada?

Kitaen met iti video “Asking Follow-Up Questions” (ChurchofJesusChrist.org).