Dagiti Santo nga agtartaray nga umadayo iti grupo a mangriribuk

C. C. A. Christensen (1831–1912), Dagiti Santo a Napapanaw manipud iti Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, sagut dagiti appoko ni C. C. A. Christensen, 1970

Septiembre 12

Kasano a Masangotayo ti Rigat nga Addaan Pammati?

Doktrina ken Katulagan 98–101

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino ti agkasapulan iti tulong ken karkararagtayo? Ania ti maaramidtayo a mangtulong kadakuada? Asino ti nasken nga awisentayo iti daytoy umay nga aktibidadtayo?

• Dagiti pagrebbengan wenno responsibilidadtayo. Ania dagiti naituding nga aramiden a naipatungpaltayon? Ania dagiti naituding nga aramiden a nasken nga aramidentayo? Kasano nga inawistayo dagiti dadduma nga umasideg ken ni Cristo, ken kasano nga awisentayo dagiti dadduma itan?

• Ti biagtayo. Ania dagiti nabiit pay a padas a nangpapigsa kadagiti pammaneknektayo? Ania ti mapaspasamak iti biagtayo, ken kasano a makapagsisinnuportatayo iti tunggal maysa?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Nangidiaya iti liwliwa dagiti balikas ti Dios iti Doktrina ken Katulagan 98 ken 101 kadagiti Santo a maipaspasango kadagiti nakaro a pannubok iti Missouri kadagiti panawen ti 1830. Idinto a mabalin a maiduma dagiti pannuboktayo kadagiti pannubok dagiti nagkauna a miembro ti Simbaan, maipasangotayo amin iti rigat kabayatan ti mortalidad, ken ti sipupudno a panangresponde iti rigat ket matulongannatayo a dumur-as iti kinaespirituan ken agbalin nga ad-adda a kas ken ni Jesucristo.

Kasano a pinapigsanaka ken pinasayaatna ti relasionmo ken ni Jesucristo ti yaasideg iti Apo bayat ti panawen ti rigat? Ania dagiti karit ken pannubok a mapaspasaran dagiti miembro ti korummo wenno klasem, ken no kasano a makatulongka kadakuada a mangsapul iti pigsa iti Mangisalakan? Tapno matulonganka nga agsagana a mangisuro maipapan iti rigat, mabalinmo nga irebyu ti mensahe ni Elder Neil L. Andersen “Wounded” (Liahona, Nob. 2018, 83–86) ken “Rigat” iti Napudno iti Pammati ([2004], 8–11).

agtutubo a lalaki iti ruar

Masarakantayo ti talna iti panawen ti rigat babaen ti yaasidegtayo iti Mangisalakan.

Aggigiddan a Masursuruan

Agkarkarigatan ti tunggal miembro ti korummo wenno klasem kadagiti bukodna a karit. Ania a pangliwliwa ti mariknam a masarakanda iti Doktrina ken Katulagan 98:1–3? Mabalinmo nga usaren ti maysa wenno ad-adu pay kadagiti aktibidad iti baba a mangtulong kadakuada a makaawat no kasano ti panagibtur iti rigat nga addaan iti pammati iti Apo.

• Naglaon dagiti nasantuan a kasuratan iti adu a pagwadan dagiti tao a sipupudno a nagibtur kadagiti pannubok. Masursuro dagiti miembro ti korum wenno klase no kasano ti panagibtur a sipupudno iti rigat babaen ti panagadal iti sumagmamano kadagitoy a pagwadan (kitaen ti sumagmamano iti “Dagiti Pangsuporta a Resources”). Mabalinda a saggaysa a pilien ti maysa kadagiti binatog iti nasantuan a kasuratan ken gupgopen dayta a padas ti tao para iti korum wenno klase. Ania dagiti nalawag a pannakaammo ken pannakaawat a magun-odtayo maipapan iti no apay nga addaantayo iti rigat? Ania ti masursurotayo maipapan iti sipupudno a panangibtur iti rigat? Awisem dagiti miembro ti korum wenno klase a saggaysa a mangisurat iti pannubok a sangsanguenda wenno dagiti ipatpategda ket utobenda no kasano a makagun-odda iti bileg ti Mangisalakan a mangtulong kadakuada iti panawen dagitoy a pannubok.

• Tapno masursuro maipapan iti sumagmamano kadagiti gapu ti rigat ken no ania ti masursurotayo manipud kadagiti pannuboktayo, mabalin nga aggigiddan a basaenyo ti umuna a dua a parapo iti babaen ti “Rigat” iti Napudno iti Pammati (panid 8). Idawat kadagiti miembro ti korum wenno klase a mangibinglay iti no ania ti nasursuroda. Kalpasanna mabalin nga irebyu ti tunggal tao ti maysa kadagiti nabati pay a tallo a benneg iti babaen ti “Rigat” ket agsagana a mangisuro iti nabati pay a sursuruenda, agraman iti no kasano a matulongannatayo ti Mangisalakan kadagiti panawen ti pannubok. Allukoyem ida a mangibinglay iti bukod a padas a mainaig iti no ania ti nabasada no mariknada a komportableda nga aramiden daytoy.

• Maysa a wagas a panangparegta iti panaglilinnawag maipapan iti rigat ket ti panangidrowing iti maysa a linia nga agpababa iti tengnga ti pisarra ket isurat ti Apay nga addaantayo iti rigat? Iti maysa a bangir ken Kasano a masangotayo ti rigat a sipupudno? iti sabali pay a bangir. Mabalin a basaen ti tunggal miembro ti korummo wenno klasem dagiti benneg manipud ken ni Elder Neil L. Andersen “Wounded,” a mangsapsapul kadagiti sungbat dagiti saludsod iti pisarra. Ania ti masursurotayo maipapan iti Mangisalakan manipud iti mensahe ni Elder Anderson?

• Inusar ni Elder Stanley G. Ellis dagiti pagarigan dagiti piek ken kulibangbang a pangisuro maipapan iti rigat iti mensahena a “Do We Trust Him? Hard Is Good” (Liahona, Nob. 2017, 112–14). Mabalinmo nga ipakita ti ladawan ti maysa a piek nga agpespessa wenno maysa a kulibangbang manipud iti kukun wenno balay ti igges [cocoon] ket paglilinnawagan no ania ti insuro ni Elder Ellis. Kalpasanna mabalin nga agtitinnulong dagiti sursuruam iti kada paris a mangrebyu iti mensahe ni Elder Ellis. Mabalin nga ilista ti tunggal paris ti amin a banag a masarakanda nga insurona maipapan iti no apay nga addaantayo iti rigat ken no kasano ti nasken a panangrespondetayo iti daytoy. Kasano a natulongannatayo nga umas-asideg iti Mangisalakan ti panagibtur a sipupudno kadagiti panawen ti rigat?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• 1 Samuel 1; 1 Ar-ari 17; Lucas 23:33–34; 1 Nephi 5:1–9; Mosiah 24:8–17; 3 Nephi 1:4–21; Moroni 1; Pangiwanwan iti Nasantuan a Kasuratan, “Ruth” ken “Esther,” scriptures.ChurchofJesusChrist.org (Dagiti pagarigan ti tattao a naipasango iti rigat)

• Juan 14:18; Taga Roma 8:28, 35–39; Alma 36:3 (Matulongannatayo ti Mangisalakan iti panawen ti rigat)

• “God Will Lift Us Up,” “The Will of God,” videos, ChurchofJesusChrist.org

Panangisuro iti Wagas ti Mangisalakan

Am-ammo ti Mangisalakan mismo dagiti sinuruanna—ken ammona no asino ti kabaelanda a pagbalinan. Idi nagkarigatanda, saan a simmuko kadakuada ngem intuloyna nga inayat ida. Ania dagiti panagkarigatan nga adda kadagiti agtutubo? Kasano a maipakitam ti ayatmo ken suportam?