Agosto 22

Apay a Kayat ti Apo nga Agbalinak a Nasalun-at?

Doktrina ken Katulagan 89–92

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino dagiti kabarbaro iti wardtayo, ken kasano a matulongantayo ida a makarikna iti nabara a pannakapasangbay? Ania dagiti ar-aramidentayo tapno mapagbalin a napateg ti orastayo kadagiti miting iti korum wenno klasetayo?

• Dagiti pagrebbengan wenno responsibilidadtayo. Ania dagiti sumagmamano a pagrebbengan ken responsibilidadtayo kas agtutubo a lallaki ken agtutubo a babbai? Kasano a maipatungpaltayo a nasaysayaat dagitoy?

• Ti biagtayo. Ania dagiti ar-aramidentayo tapno agbalin nga ad-adda a kas ken ni Jesucristo ken umawat iti bilegna iti biagtayo? Ania dagiti ar-aramidentayo a mangtulong kadagiti pamiliatayo nga umasideg Kenkuana?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Nalaka a panunoten ti sumagmamano a tao maipapan iti Nainsiriban a Balikas [Word of Wisdom], a masarakan iti Doktrina ken Katulagan 89, kas listaan dagiti aramiden ken saan nga aramiden. Addaan ti Word of Wisdom iti sumagmamano kadagitoy, ngem naglaon pay daytoy kadagiti pagbatayan iti panangpatalinaed a nasalun-at dagiti bagitayo. Isurona pay a ti wagas a panangtratotayo kadagiti bagitayo ket mangimpluensia iti salun-at iti panunot, rikna, ken espiritutayo. Ania dagiti bendision a naawatmo bayat ti panangikarigatam ti agbiag iti nasalun-at a panagbiag?

Mabalin a naadalen dagiti miembro ti korummo wenno klasem ti Word of Wisdom bayat ti panagbasada iti Doktrina ken Katulagan 89–92 iti daytoy a lawas. Kasano a matulongam ida a makaawat kadagiti pisikal ken naespirituan a bendision a sumangbay manipud iti panagtungpal iti daytoy a paltiing? Masarakam dagiti makatulong a nalawag a pannakaammo ken pannakaawat babaen ti panangrebyu iti Gospel Topics article “Word of Wisdom” (topics.ChurchofJesusChrist.org) wenno “Salun-at iti Bagi ken Rikna” iti Para iti Pigsa dagiti Agtutubo ([2011], 25–27).

Ti panangaywan kadagiti bagitayo ti mangimpluensia iti salun-at iti panunot, rikna, ken espiritutayo.

Aggigiddan a Masursuruan

Tapno mairugi ti panaglilinnawag maipapan iti Word of Wisdom, isurat dagitoy a balikas iti pisarra: Pisikal, Intelektual, Espiritual, ken Sosial. Awisem ti korummo wenno klasem a mangbasa iti Doktrina ken Katulagan 89:18-21 ket paglilinnawagan no kasano a maaramat dagiti kari kadagitoy a bersikulo kadagitoy a tay-ak. Ania dagiti bendision a mabalin a sumangbay manipud iti panangtungpal iti Word of Wisdom? Kasano a napadasantayon dagitoy a bendision iti biagtayo?

• Adu ti masursuro dagiti miembro ti korummo wenno klasem manipud iti tunggal maysa babaen ti panangaramid iti naurnong a listaan dagiti banag nga ar-aramidenda tapno agbalin a nasalun-at. Bingayem dagiti miembro ti korum wenno klase iti kada grupo, ket dutokam ti tunggal grupo a mangsukisok iti maysa wenno ad-adu pay kadagiti binatog iti nasantuan a kasuratan iti umuna a bullet iti babaen ti “Dagiti Pangsuporta a Resources,” a mangsapsapul kadagiti kinapudno maipapan iti salun-at ti bagi. Paibinglay iti tunggal grupo no ania ti nasursuroda ken ilista dagiti kapanunotanda iti pisarra. Kasano a sungbatantayo dagiti saludsod kas iti sumaganad: Apay a mangted ti Dios kadagiti linteg maipanggep iti salun-at ti bagi? Apay a tungpalentayo dagitoy?

• Mabalin a masaludsod dagiti miembro ti korummo wenno klasem maipapan iti no apay a saanda nga uminum iti makabartek, agsigarilio, wenno agusar iti druga. Kasano ti panangsungbatda kadagitoy saludsod? Kalpasanna mabalinda a sukisoken ti “Salun-at iti Bagi ken Rikna” iti Para iti Pigsa dagiti Agtutubo (dagiti panid 25–27) ket sapulenda ti balakad ken dagiti naikari a bendision a mabalinda nga ibinglay iti dadduma. Kasano a mangapekto ti wagas a panangtratotayo kadagiti bagitayo ti relasiontayo iti Dios? Kasano a nagun-od ti pammaneknek dagiti miembro ti korum wenno klase a mangbendision iti biagda ti panagtungpal iti Word of Wisdom?

• Dagiti padas a mangipakita kadagiti bendision ti panagtungpal iti Word of Wisdom ket makaparegta kadagiti miembro ti korum wenno klase tapno agbalinda nga ad-adda a managkumit iti panagtungpal iti daytoy a linteg. Mabalinmo nga ibinglay ti padasmo manipud iti biagmo wenno ti padas ni Presidente Thomas S. Monson a naibinglay iti mensahena a “Principles and Promises” (Liahona, Nob. 2016, 78–79). Naglaon ti video “Leave the Party” (ChurchofJesusChrist.org) iti sabali pay a pagarigan. Mabalinmo nga allukoyen dagiti miembro ti korum wenno klase a mangibinglay kadagiti padasda.

• Tapno marugian ti panaglilinnawag maipapan iti no kasano ti panangliklik kadagiti pannulisog a manglabsing iti Word of Wisdom, mabalinmo nga ipakita iti korummo wenno klasem ti maysa a appan ti panagbanniit (wenno ladawan ti maysa). Kasano ti panangallilaw dagiti appan ti panagbanniit iti ikan? Masarakan dagiti sungbat iti daytoy a saludsod iti video “You Will Be Freed” (ChurchofJesusChrist.org; kitaen met iti M. Russell Ballard, “O That Cunning Plan of the Evil One,” Liahona, Nob. 2010, 108–10). Kasano a maipada dagiti appan ti panagbanniit iti no ania ti pangallilaw wenno pangkusit ni Satanas kadatayo? Ania ti mensahe ni Presidente Ballard kadagiti matakuatan iti adiksion? Kasano a matulongantayo ti maysa a tao nga agkarkarigatan iti pannulisog nga umasideg iti Mangisalakan? (kitaen kadagiti nasantuan a kasuratan iti maikadua a bullet iti babaen ti “Dagiti Pangsuporta a Resources”).

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Daniel 1:3–20; 1 Taga Corinto 6:19–20; Doktrina ken Katulagan 88:124; 89:5–21 (Napateg iti Apo no kasano ti panangaywantayo kadagiti bagitayo)

• Mosiah 7:33; Alma 13:27–29; Ether 12:27 (Namnama para kadagiti agkarigatan iti pannakairuam)

• Dagiti isyu ti Agosto 2019 ti New Era ken Ensign (espesial nga isyu maipapan iti bagi)

Panangisuro iti Wagas ti Mangisalakan

Iti tunggal pasamak, ti Mangisalakan ti pagwadan ken mannursurotayo. Bayat ti panagsaganam a mangisuro, panunotem no kasano a nakisarita ti Apo kadagiti dadduma ken no kasano a makisaritaka iti wagas a pakaitag-ayan ken pakaparegtaan dagiti sursuruam.