Agosto 8

Kasano a Makiramanak iti Panaguummong ti Israel?

Doktrina ken Katulagan 85–87

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Ania dagiti aktibidad nga adda kadatayo itay nabiit? Naballigian kadi dagitoy? Ania ti naaramid a nasayaat, ken kasano a mapasayaattayo pay dagitoy?

• Dagiti pagrebbengan wenno responsibilidadtayo. Asino ti agkasapulan iti serbisiotayo? Kasano a makatulongtayo kadakuada?

• Ti biagtayo. Ania dagiti panggep a tun-oyen a kayattayo nga aramiden a saggaysa? Ania dagiti padas a maibinglaytayo? Ania dagiti bendision a naawattayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Nalabit nga ammo dagiti adda iti korummo wenno klasem ti maysa a banag maipapan kadagiti pagrebbenganda iti panagtrabaho iti aramid ti misionario ken aramid iti templo ken family history. Ngem no kasaritam ida maipapan iti panangummong iti Israel, mabalin a dida ammo no ania ti sarsaritaem. Kasano a matulongam ida a makaawat a ti panangibinglay iti ebanghelio, panagsukisok iti family history, ken panangannong kadagiti ordinansa iti templo ket paset ti dakdakkel nga amang nga aramid ti panangummong iti Israel iti panagsagana para iti Maikadua a Yaay ti Mangisalakan.

Mabalin a naadalen dagiti sursuruam ti pangngarig maipapan iti trigo ken ruruot iti Doktrina ken Katulagan 86, a mangisuro maipapan iti panangummong iti Israel kadagiti maudi nga aldaw. Bayat ti panangbasam iti daytoy a benneg, padasem nga iladawan iti panunotmo dagiti tao iti korummo wenno klasem kas mangmangged iti bangkag ti Apo. Kasano a matulongamto ida a mangpadas iti rag-o a sumangbay manipud ti pannakiramanda iti daytoy naindaklan nga aramid? Tapno masursuro ti ad-adu pay maipapan iti daytoy a topiko, adalem ti mensahe da Presidente Russell M. Nelson ken Sister Wendy W. Nelson “Hope of Israel” ([worldwide youth devotional, Hunio 3, 2018], pangsuplemento iti New Era ken Ensign, ChurchofJesusChrist.org).

Makatulong dagiti agtutubo a lallaki ken agtutubo a babbai iti panangummong iti Israel babaen ti panagtrabaho iti aramid iti templo ken family history.

Aggigiddan a Masursuruan

Mabalinmo a rugian babaen ti panagsaludsod kadagiti miembro ti klase kas kadagitoy: Ania ti napateg kenka bayat ti panangbasam iti Doktrina ken Katulagan 86 iti pagtaengan? Ania ti nasursurom maipapan iti aramid ti panangummong kadagiti annak ti Dios kadagiti maudi nga aldaw? Ania ti ar-aramidentayo a makiraman iti daytoy nga aramid? Iti baba dagiti nainayon a kapanunotan a mangparegta iti korummo wenno klasem a makiraman iti panangummong iti Israel.

• Saludsodem kadagiti miembro ti korummo wenno klasem no ania ti panunotenda no mangngeganda ti termino a “panangummong iti Israel.” No kasapulanda ti tulong, isingasing a basaenda ti sumaganad a panangilawlawag ni Presidente Russell M. Nelson: “Ti panangummong iti Israel kangrunaan a kayatna a sawen ti panangidiaya iti ebanghelio ni Jesucristo kadagiti annak ti Dios iti agsumbangir ti belo nga agpada a di pay nakaaramid kadagiti napapateg a katulagan iti Dios wenno di pay nakaawat kadagiti kasapulan nga ordinansa. Maikari ti tunggal anak ti Nailangitan nga Ama iti gundaway a mangpili a sumurot ken ni Jesucristo, umawat iti ebangheliona karagpin ti amin a bendision daytoy” (“Hope of Israel,” 11–12). Kasano a maapektuan daytoy a panangilawlawag ti wagas a panangpanunottayo maipapan iti daytoy napateg a pagrebbengan?

• Tapno matulongan dagiti miembro ti korum wenno klase a mangkita no kasano a maaramat kadakuada ti pangngarig maipapan iti trigo ken ruruot, mabalinmo nga isurat dagiti ragup ti balikas manipud iti Doktrina ken katulagan 86 iti pisarra. Mailadawan dagitoy a ragup ti balikas dagiti simbolo iti pangngarig—kas “dagiti agmulmula iti bukel,” “rinimbawan dagiti ruot dagiti trigo,” “nabaludbod ti panagrangpayana,” ken “panagani kadagiti trigo” (dagiti bersikulo 2–4, 7). Mailadawan pay dagiti ragup ti balikas dagiti kayulogan dagitoy a simbolo—kas “dagiti Apostol,” “ti Ikakalilis,” “ti Pannakaisubli,” ken ti “aramid ti misionario.” Kalpasanna mabalin nga agtitinnulong dagiti miembro ti korum wenno klase a mangrebyu iti benneg 86 ket iparis dagiti simbolo iti kaipapanan dagitoy. (Mabalinda pay a basaen ti Mateo 13:36–43.) Ania ti masursurotayo manipud iti daytoy a pangngarig maipapan iti aramid a panangummong iti Israel? Ania ti maaramidtayo tapno agbalintayo a “lawag” ken “mangisalakan” kadagiti annak ti Dios? (Doktrina ken Katulagan 86:11).

• Mabalin a malagip dagiti miembro ti korum wenno klase nga iti mensahena iti “Namnama ti Israel,” inawis ida ni Presidente Russell M. Nelson nga agaramid kadagiti naipangruna a banag nga agsagana a tumulong a mangummong iti Israel (kitaen dagiti panid 14–17). Idawat kadakuada no ania dagiti awis a malagipda, ket aggigiddan nga irebyu dagiti awis no kasapulan. Kasano a maaramidnatayo dagitoy a banag a nasamsamay iti panangummong iti Israel? Ania ti maaramidtayo a mangipalagip iti bagbagitayo maipapan kadagitoy nga awis ken agtitinnulong a mangipatungpal kadagitoy? Allukoyem dagiti miembro ti korum wenno klase a sipapartuat nga agpanunot ken mangibinglay kadagiti kapanunotanda.

• Mabalin a basaen dagiti miembro ti korum wenno klase ti pakauna ken umuna a dua a benneg ti mensahe ni Elder Quentin L. Cook a “Great Love for Our Father’s Children” (Liahona, Mayo 2019, 76–79), a mangsapsapul no apay a napateg unay ti ayat kadagiti panagkagumaantayo iti misionario ken templo ken family history. Idawatmo kadakuada a mangibinglay no ania ti nasursuroda maipapan iti no kasano a makaaramid ti ayat iti pagdumaan bayat ti panangikarigatantayo a mangibinglay iti ebanghelio kadagiti adda iti agsumbangir ti belo. Mangted kadagiti miembro ti korum wenno klase iti gundaway a mangisurat iti maysa a banag a kayatda nga aramiden gapu iti panaglilinnawag ita. Tapno matulongan ida nga agpanunot kadagiti kapanunotan, mabalinmo nga isingasing a panunotenda maipapan kadagiti tao nga am-ammoda. Kasano a matulongan ti Dios dagitoy a tao? Kasano a makatulongtayo?

Dagiti Pangsuporta a Resources

• Russell M. Nelson, “The Gathering of Scattered Israel,” Liahona, Nob. 2006, 79–82

• Church History Topics, “The Gathering of Israel,” ChurchofJesusChrist.org/study/history/topics

Panangisuro iti Wagas ti Mangisalakan

Nagtalek ti Mangisalakan kadagiti tao a simmurot Kenkuana. Insaganana ida ken inikkanna ida kadagiti napapateg a pagrebbengan a mangisuro, mangbendision, ken agserbi kadagiti dadduma (kitaen iti Panangisuro iti Wagas ti Mangisalakan [2016], 28). Ania dagiti gundaway a maitedmo kadagiti agtutubo nga agsisinnuro iti tunggal maysa?