Hulio 25

Apay a Nasken nga Agbalinak a Natulnog kadagiti Bilin ti Dios?

Doktrina ken Katulagan 81–83

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Ania ti maaramidtayo tapno mabangontayo ti panagkaykaysa kadagiti miembro ti korum wenno klase? Ania dagiti panggep a tun-oyen a kayattayo a pagtitinnulongan nga aramiden?

• Dagiti pagrebbengan wenno responsibilidadtayo. Ania ti ar-aramidentayo a mangibinglay iti ebanghelio? Ania dagiti padas nga adda kadatayo idi iti panangaramid iti aramid iti templo ken family history?

• Ti biagtayo. Kasano a naimatangantayon ti ima ti Dios iti biagtayo? Ania ti nangparegta kadatayo iti panagadal iti nasantuan a kasuratan iti daytoy a lawas?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

No dadduma mariknatayo a dagiti bilin ti Dios ti mangpaiget iti wayawayatayo ken mangpabeddeng iti karbengantayo nga agpili. Kinapudnona ti bilin ti mangpadakkel iti wayawayatayo. Iti Doktrina ken Katulagan 82:8–10 masursurotayo dagiti bilin a mangtulong kadatayo a makaawat iti pagayatan ti Dios, ken no agtungpaltayo kadagitoy, dagiti panagtignaytayo “agbalin [kadatayo] a pakaisalakanan[tayo].” Kinapudnona, no agtungpaltayo iti Dios, “nagkari” nga itedna kadatayo ti amin a bendision nga inkarina (dagiti bersikulo 9–10). Kasano a binendisionannaka ti Nailangitan nga Ama bayat ti panagtungpalmo kadagiti bilinna? Tapno agsagana a mangisuro, mabalinmo a basaen ti mensahe ni Elder Dale G. Renlund “Abound with Blessings” (Liahona, Mayo 2019, 70–73) wenno utobem ti sumagmamano a resources iti Gospel Topics article “Obedience” (topics.ChurchofJesusChrist.org).

Dagiti pagwadan dagiti napudno a katulongan ti Dios iti napalabas ti makaparegta kadatayo nga agbiag a maikari iti agdama.

Aggigiddan a Masursuruan

Mabalin nga ikarkarigatan nga agtungpal iti sumagmamano a bilin dagiti miembro ti korummo wenno klasem. Makaparegta kadakuada ti panangtulong kadakuada a makaawat no apay a napateg ti panagtungpal. Isurat ti paulo daytoy a balabala iti pisarra, ket awisem dagiti miembro ti korum wenno klase a mangibinglay kadagiti sungbat. Mabalinmo nga idawat kadakuada a mangsapul kadagiti nayon a nalawag a pannakaammo ken pannakaawat iti Doktrina ken Katulagan 82:8–10, a mabalin a naadalda iti daytoy a lawas. Kalpasanna mangpili ti maysa wenno ad-adu pay kadagiti aktibidad iti baba tapno mangtulong kadakuada a makaawat a nasaysayaat no apay a kanayon a napateg ti agtungpal iti Dios, uray no narigat ti panagaramid iti daytoy.

• Mabalin a nalaklaka ti agtungpal kadagiti bilin no maawatantayo dagiti gapu iti likudan dagitoy. Tapno maammuan no apay a mangted ti Dios kadagiti bilin, mabalin nga irebyu dagiti miembro ti korum wenno klase dagiti reperensia iti “Supporting Resources” (wenno dagiti dadduma a mapanunotmo). Kasano a matulongandatayo dagitoy a nasantuan a kasuratan no marigatantayo nga agtungpal iti maysa a bilin? Kas paset daytoy a panaglilinnawag, mabalin nga aggigiddan a basaenyo ti benneg a napauluan iti “Fourth, forget not the ‘why’ of the gospel” iti mensahe ni Presidente Dieter F. Uchtdorf “Forget Me Not” (Liahona, Nob. 2011, 122).

• No maawatan dagiti sursuruam ti naan-anay a pagwadan ti Mangisalakan iti panagtungpal, mabalin a maparegtada a naan-anay nga agtungpal iti Dios. Kaano a nagtungpal ni Jesucristo iti Amana, uray pay kadagiti narigat a kasasaad? (kitaen iti Mateo 4:1–11; Lucas 22:39–44). Masarakan dagiti pagarigan dagiti lallaki ken babbai a managtungpal iti Hebreo 11. Mabalin a pilien ti korummo wenno klasem ti maysa kadagitoy a pagarigan—wenno dagiti dadduma nga am-ammoda, agraman kadagiti pamiliada—ket ibinglayda no ania ti mangparegta kadakuada maipapan kadagitoy a tao. Apay a pinilida ti agtungpal iti Apo? Kasano a tulongannatayo ti Mangisalakan no pilientayo ti agbalin a natulnog?

• Tapno matulongan dagiti miembro ti korum wenno klase a mangibilang a kas bendision dagiti bilin a saan a kas dagensen, mabalinmo nga ibinglay dagiti pannursuro ni Elder D. Todd Christofferson a masarakan iti “Dagiti Pangsuporta Resources.” Mabalinmo nga i-display wenno idrowing ti maysa nga agdan ken idawatmo kadagiti sursuruam nga ikkanda iti label ti tunggal pangal iti maysa a bilin a mabalin a narigat a maawatan wenno matungpal ti maysa nga agtutubo. Kasano a makatulong dagiti balikas ni Elder Christofferson iti maysa a mangikarkarigatan nga agtungpal kadagiti bilin?

• Masarakan ti sumagmamano a video maipapan iti panagtulnog iti LDS.org ken iti Gospel Library app (kitaen iti “Dagiti Pangsuporta a Resources”). Mabalinmo a dutokan ti tunggal miembro ti korum wenno klase a mangbuya iti maysa kadagitoy a video sakbay ti miting ket umay a nakasagana a mangibinglay no ania ti nasursuroda maipapan iti panagtulnog. Nalabit a mabalin nga agplano ti korum wenno klase ti bukodda a video maipapan iti panagtungpal kadagiti bilin ti Dios. Kalpasanna mabalin ti mangbukel iti maysa nga aktibidad a mangparnuay iti video ken ibinglayda daytoy iti social media.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• 1 Nephi 17:3; Mosiah 2:41; Doktrina ken Katulagan 130:20–21 (Mabendisionantayo babaen ti panagtulnog kadagiti bilin)

• Deuteronomio 10:12–13; Juan 14:15; 1 Juan 5:1–3 (Agtulnogtayo kadagiti bilin gapu ta ay-ayatentayo ti Dios)

• Doktrina ken Katulagan 93:20 (Ti panagtungpal ti mangpalugod kadatayo nga umawat iti pakabuklan ti Dios)

• “Obedience,” iti kapitulo 3 ti Preach My Gospel (2019), 75

• Insuro ni Elder D. Todd Christofferson: “Adda dagiti mangibilang laeng iti sakripisio ken limitasion iti panagtungpal kadagiti bilin ti baro ken agnanayon a katulagan, ngem dagiti agbiag iti padas—mangted iti biagda a siwawaya ken saan a silalatang iti natulagan a biag—makasarak iti dakdakkel a wayawaya ken pannakapnek. No pudno a maawatantayo, kalikagumantayo ti manggun-od iti ad-adu pay a bilin, saan a basbassit. Tunggal baro a linteg wenno bilin a masursuro ken matungpal ket maipada iti maysa pay nga addang iti agdan a mangpabael kadatayo nga umuli iti nangato ken nangatngato pay. Pudno, a nasayaat a biag ti panagbiag iti ebanghelio” (“The Power of Covenants,” Liahona, Mayo 2009, 23).

• “The Sting of the Scorpion,” “Stay within the Lines,” “A Secure Anchor,” “Shower of Heavenly Blessings,” “Blessed and Happy Are Those Who Keep the Commandments of God,” videos, ChurchofJesusChrist.org

Panangisuro iti Wagas ti Mangisalakan

Inawis ti Mangisalakan dagiti disipulona nga agpaneknek, ken kas inaramidda idi, sinagid ti Espiritu dagiti pusoda. Kabayatan ti panagisurom, awisem dagiti miembro ti korum wenno klase a mangibinglay kadagiti pammaneknekda iti kinapateg ti panagtungpal kadagiti bilin.