Hulio 11

Kasano nga Apektuanna ti Biagko ti Pannakaammo maipapan iti Plano ti Pannakaisalakan?

Doktrina ken Katulagan 76

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino ti agkasapulan iti tulong ken karkararagtayo? Ania ti maaramidtayo a mangtulong kadakuada? Asino ti nasken nga awisentayo iti daytoy umay nga aktibidadtayo?

• Dagiti pagrebbengan wenno responsibilidadtayo. Ania dagiti naituding nga aramiden a naipatungpaltayon? Ania dagiti naituding nga aramiden a nasken nga aramidentayo? Kasano nga inawistayo dagiti dadduma nga umasideg ken ni Cristo, ken kasano nga awisentayo dagiti dadduma itan?

• Ti biagtayo. Ania dagiti nabiit pay a padas a nangpapigsa kadagiti pammaneknektayo? Ania ti mapaspasamak iti biagtayo, ken kasano a makapagsisinnuportatayo iti tunggal maysa?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Nangted ti Nailangitan nga Amatayo iti plano a mangpabael kadatayo nga umawat kadagiti agnanayon a bendision ken agbalin a kas Kenkuana. Kayatna nga ammo ti amin nga annakna maipapan iti dayta a plano, isu nga impalgakna daytoy kadagiti propeta iti unos dagiti panawen. Bayat ti panagadal dagiti miembro ti korum wenno klase iti Doktrina ken Katulagan 76 iti daytoy a lawas, naammuanda no ania ti impalgak ti Dios maipapan iti planona kada Joseph Smith ken Sidney Rigdon, agraman ti kangrunaan nga akem ti Mangisalakan iti plano ken ti dayag a maawattayo iti biag nga umay. No napudnotayo, makapagbalintayo a naan-anay babaen ti Pannubbot ni Jesucristo, umawat iti pakabuklan ti rag-o, ken agbiag nga agnanayon iti sidong ti Dios.

Kasano nga inimpluensianna ti pannirigam iti biag ti pannakaammom maipapan iti plano ti Nailangitan nga Ama? Kasano a matulongam ti korummo wenno klasem a makaawat nga anian a bendision ti pannakaammo maipapan iti plano ti pannakaisalakan? Tapno agsagana a mangisuro, mabalinmo a basaen ti “Plano ti Pannakaisalakan” iti Napudno iti Pammati ([2004], 115–17) wenno ti mensahe ni Elder Dieter F. Uchtdorf “Your Great Adventure” (Liahona, Nob. 2019, 86–90).

Ti panagsursuro maipapan iti plano ti pannakaisalakan ket mangted iti panangiturong ken panggep iti biagtayo.

Aggigiddan a Masursuruan

Maysa a wagas a pangirugi iti panaglilinnawag iti korummo wenno klasem maipapan iti plano ti pannakaisalakan ket panagawis iti maysa a tao a mangisurat iti pisarra dagiti sumaganad a paulo, kasta met dagiti bersikulo manipud iti Doktrina ken Katulagan 76: Biag sakbay ti yaay iti Daga (dagiti bersikulo 22–27), Biag iti Daga (dagiti bersikulo 40–43), ken Biag kalpasan ti Ipapatay (dagiti bersikulo 50–53, 59–62). Mangted kadagiti miembro ti korum wenno klase iti sumagmamano a minuto a mangrebyu kadagitoy a bersikulo a mangsapul iti akem ti Mangisalakan iti panangipatungpal iti plano ti Nailangitan nga Ama. Idawat kadakuada a mangisurat iti baba ti tunggal paulo no ania ti masarakanda. Makatulong kadakuada dagiti aktibidad iti baba tapno nasaysayaat a maawatanda no kasano a bendisionan ti plano ti Nailangitan nga Ama ti biagda.

• Ti panangrebyu iti sumagmamano kadagiti nagan ti plano ti nailangitan nga Ama ket makatulong kadagiti miembro ti korum wenno klase a nasaysayaat a maawatanda ti plano. Mabalinda nga irebyu dagiti nasantuan a kasuratan iti umuna a bullet iti baba ti “Dagiti Pangsuporta a Resources” ket ilistada ti sumagmamano kadagiti nagan para iti plano ti Dios. Ania ti isuro kadatayo dagitoy a nagan maipapan iti plano? Kas pagarigan, kasano a mangisangbay kadatayo daytoy a plano iti ragsak, ita ken iti agnanayon? Ania ti isuro dagitoy a nasantuan a kasuratan maipapan iti akem ti Mangisalakan iti plano? Mabalinmo nga ipabuya ti video “Our Eternal Life” wenno “Men’s Hearts Shall Fail Them” (ChurchofJesusChrist.org) ket awisem dagiti sursuruam a mangisarita maipapan kadagiti panawen idi nariknada ti panagyaman iti plano ti Nailangitan nga Ama.

• Ibilang ti panangawis kadagiti sursuruam a mangilawlawag no kasano a masungbatanda ti maysa a gayyem a nagdamag kadagiti sumaganad a saludsod maipapan iti plano ti pannakaisalakan: Sadino ti naggapuantayo? Apay nga addatayo ditoy? Sadino ti papanantayo kalpasan daytoy a biag? Awisem ida a mangusar iti impormasion iti babaen ti “Plano ti Pannakaisalakan” iti Napudno iti Pammati (dagiti panid 115–17) ken dagiti resources iti babaen ti “Dagiti Pangsuporta a Resources” tapno agsagana a mangsungbat iti maysa kadagiti saludsod. Kasano a napapigsatayo babaen ti panangammo kadagiti sungbat kadagitoy a saludsod?

• Masursuro dagiti miembro ti korum wenno klase dagiti kinapudno ti ebanghelio a naun-uneg pay no maikkanda kadagiti gundaway a mangisuro. Iti nasapsapa, idawat iti sumagmamano a miembro ti korum wenno klase nga umay a nakasagana a mangibinglay iti ababa a pakagupgopan ti ammoda maipapan iti maysa nga aspeto ti plano ti pannakaisalakan. Mabalinda nga usaren dagiti pakagupgopan a masarakan iti babaen ti “The Plan of Salvation” iti kapitulo 3 iti Preach My Gospel ([2019], 48–53). Ania a pagdumaan ti maaramid a mangammo maipapan iti plano ti pannakaisalakan?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• 2 Nephi 11:5; Alma 12:30; 34:9; 41:2; 42:8, 13–15; Moises 6:59–62 (Dagiti nagan para iti plano ti Nailangitan nga Ama)

• Doktrina ken Katulagan 38:1–3; 138:53–56; Moises 4:1–4; Abraham 3:21–24 (Biag sakbay ti yaay iti daga)

• 2 Nephi 2:19–21, 25; Alma 5:15–16; 34:32; Abraham 3:25–26 (Biag iti daga)

• Juan 14:1–2; Alma 11:42–45; Doktrina ken Katulagan 76:39–43, 89–93 (Biag kalpasan ti ipapatay)

Panangisuro iti Wagas ti Mangisalakan

Nagsaludsod ti Mangisalakan a nakaigapuan iti nagpanunotan iti nauneg dagiti sinuruanna. Sipupudno nga interesado kadagiti sungbatda. Kasano a mausarmo dagiti saludsod a makatulong kadagiti agtutubo nga agpanunot a siuuneg maipapan iti plano ti Dios? (Kitaen iti Panangisuro iti Wagas ti Mangisalakan [2016], 33–34.)