Jesucristo

Ni Apo Jesucristo, ni Del Parson

Hunio 27

Kasano a Makapagsaganaak Itan a Mangipasdek iti Pagtaengan a Naisentro ken ni Cristo?

Doktrina ken Katulagan 67–70

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino dagiti kabarbaro iti wardtayo, ken kasano a matulongantayo ida a makarikna iti nabara a pannakapasangbay? Ania dagiti ar-aramidentayo tapno mapagbalin a napateg ti orastayo kadagiti miting iti korum wenno klasetayo?

• Dagiti pagrebbengan wenno responsibilidadtayo. Ania dagiti sumagmamano a pagrebbengan ken responsibilidadtayo kas agtutubo a lallaki wenno agtutubo a babbai? Kasano a maipatungpaltayo a nasaysayaat dagitoy?

• Ti biagtayo. Ania dagiti ar-aramidentayo tapno agbalin nga ad-adda a kas ken ni Jesucristo ken umawat iti bilegna iti biagtayo? Ania dagiti ar-aramidentayo a mangtulong kadagiti pamiliatayo nga umasideg Kenkuana?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Iraman tiDoktrina ken Katulagan 68 ti balakad kadagiti nagannak a mabalin a kasla saan a mainaig a dagus kadagiti miembro ti korum wenno klase (kitaen kadagiti bersikulo 25–28). Nupay kasta, gapu ta maaddaanda iti nabileg nga impluensia kadagiti agdama ken masakbayan a pamiliada, makatulong daytoy a balakad kadakuada itan. Ti kasayaatan a wagas a makapagsaganada a maaddaan iti pagtaengan iti masakbayan ket ti “magna a sililinteg iti imatang ti Apo” iti agdama (bersikulo 28).

Ania dagiti bendision a simmangbay iti pamiliam gapu ta sinurotmo dagiti pannursuro ti Mangisalakan? Kasano a matulongan dagiti miembro ti korum wenno klase dagiti pamiliada a mangipasdek iti pagtaengan a naisentro ken ni Cristo? Tapno agsagana a mangisuro, mabalinmo nga irebyu ti mensahe ni Presidente Henry B. Eyring nga “A Home Where the Spirit of the Lord Dwells” (Liahona, Mayo 2019, 22–25) ken “Ti Kaamaan: Maysa a Waragawag iti Lubong” (ChurchofJesusChrist.org).

agtutubo a babai nga agtoktokar iti piano

Mariknatayo ti nain-indaklan nga ayat kadagiti pamiliatayo no isentrotayo dagiti pagtaengantayo ken ni Cristo.

Aggigiddan a Masursuruan

Tapno matulongan dagiti miembro ti korummo wenno klasem a mangkita no kasano a maaramat ti Doktrina ken Katulagan 68:25–28 kadakuada, maidawatmo kadakuada a mangisurat iti ababa a panangiladawan ti no ania ti kayarigan ti masakbayan a pamiliada. Mabalinmo nga idawat kadakuada a mangibinglay no ania ti insuratda no tarigagayanda. Kalpasanna mabalinda a basaen ti Doktrina ken Katulagan 68:25–28 ket sapulenda dagiti pannursuro ken pagbatayan ti ebanghelio a makatulong kadakuada a mangbukel kadagiti nalinteg a pamilia itan ken iti masakbayan. Makatulong kadakuada dagiti aktibidad iti baba a makaawat no kasano a pagbalinenda ni Cristo a sentro dagiti pamiliada.

• Naglaon ti maikapito a parapo ti “Ti Kaamaan: Maysa a Waragawag iti Lubong” kadagiti kinapudno a makatulong kadagiti miembro ti korum wenno klase a mangisentro kadagiti pagtaenganda iti Mangisalakan. Awisem ida a mangbasa iti daytoy a parapo ket mangilasin kadagiti pannursuro ken pagbatayan a mangtulongto iti maysa a pamilia nga agbalin a naragsak. Mabalin a kayatmo nga isurat dagitoy iti pisarra ket pailawlawag kadagiti sursuruam no apay a makatulong ti tunggal maysa iti pamilia nga agbalin a naragsak. Mabalin a kayat dagiti miembro ti korum wenno klase a mangibinglay no kasano a nakitadan dagitoy a pannursuro ken pagbatayan a maaramat kadagiti bukodda a pamilia wenno ti dadduma. Allukoyem ida a mangutob no kasano a maaramatda ti uray maysa laeng kadagitoy a pagbatayan iti biagda ita. Ipanamnamam manen kadakuada a mapagbalinda ni Jesucristo a sentro ti biagda, ania man ti kasasaad ti pamilia a naggapuanda.

• Mabalin a paglilinnawagan dagiti miembro ti korum wenno klase dagiti banag a mamagtalinaed iti Mangisalakan iti sentro dagiti pagtaengantayo ken dagiti banag a manglapped Kenkuana iti panagbalinna a sentro ti pagtaengantayo. Mabalinmo nga idawat iti tunggal tao wenno babassit a grupo a mangrebyu iti maysa kadagiti benneg ti mensahe ni Presidente Henry B. Eyring nga “A Home Where the Spirit of the Lord Dwells” (Liahona, Mayo 2019, 22–25) tapno mangsapul kadagiti pagbatayan a makatulong a mamagbalin kadagiti pagtaengantayo nga ad-adda pay a nakasentro ken ni Cristo. Awisem dagiti miembro ti korum wenno klase a mangibinglay no ania ti masursuroda ken mangpili iti maysa a banag nga aramidendanto kabayatan ti umay a lawas a mamagbalin kadagiti pagtaenganda nga ad-adda a naipamaysa ken ni Jesucristo ken dagiti pannursurona.

• Nalabit a mabalinmo nga idawat iti maysa wenno ad-adu pay a miembro ti korum wenno klase a mangkanta wenno mangbasa iti maysa a kanta maipapan iti pagtaengan wenno pamilia, kas iti “Home Can Be a Heaven on Earth” (Hymns, no. 298) or “Love Is Spoken Here” (Children’s Songbook, 190). Mabalin a dumngeg dagiti dadduma no ania ti isuro ti kanta maipapan iti panamagbalin iti pagtaengan a maysa a naragsak a lugar. Awisem ida a mangibinglay iti padas idi nariknada ti ragsak gapu ta naipakita kadakuada ti ayat wenno idi timmulongda a nangpadakkel iti ayat iti pagtaenganda.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Mosiah 4:14–16; Doktrina ken Katulagan 88:119; 121:41–46 (Kasano ti mangipasdek iti nalinteg a pagtaengan)

• “What Can I Do to Help Ease Family Tension?” manipud iti Face to Face ken ni Elder Rasband, Sister Oscarson, ken ni Brother Owen (worldwide youth broadcast, Ene. 20, 2016), “Two Brothers Apart,” “Through Small Things,” “More Diligent and Concerned at Home” (videos), ChurchofJesusChrist.org

Panangisuro iti Wagas ti Mangisalakan

Impakita ti Mangisalakan ti ayatna para iti dadduma babaen iti panagserbi. Napasurot dagiti tao ken nabaliwan dagiti biag babaen kadagiti nasayaat nga aramidna. Kasano a matuladmo daytoy a kababalin kas maysa a lider? Kasano a matulongam dagiti agtutubo nga agtarigagay a mangsurot iti pagwadan ti panagserbi ti Mangisalakan iti bukodda a pamilia?