agtutubo a babai nga agig-iggem iti telepono

Hunio 13

Kasano a Maliklikak ti Pornograpia?

Doktrina ken Katulagan 63

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Ania dagiti aktibidad nga adda kadatayo itay nabiit? Naballigian kadi dagitoy? Ania ti naaramid a nasayaat, ken kasano a mapasayaattayo pay dagitoy?

• Dagiti pagrebbengan wenno responsibilidadtayo. Asino ti agkasapulan iti serbisiotayo? Kasano a makatulongtayo kadakuada?

• Ti biagtayo. Ania dagiti panggep a tun-oyen a kayattayo nga aramiden a saggaysa? Ania dagiti padas a maibinglaytayo? Ania dagiti bendision a naawattayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Mabalin a naadalen dagiti miembro ti korum wenno klase ti Doktrina ken Katulagan 63 iti daytoy a lawas ken nabasadan ti maipapan iti ballaag ti Apo kadagiti nagkauna a Santo maipapan kadagiti peggad ti kinagartem—maysa a ballaag nga inulit-ulitna nga inted (kitaen iti Doktrina ken Katulagan 63:13–16; Mateo 5:27–28; 3 Nephi 12:27–30). Idinto a naaramat dagitoy a ballaag kadagiti tao iti amin a panawen, maaramat dagitoy nga ad-adda pay a kasapulan iti aldawtayo, no nagwarasen a kasla angol ti pornograpia. Ania dagiti pagpeggadan ken presion a mainaig iti pornograpia a mabalin a pakaipasanguan dagiti miembro ti korummo wenno klasem? Ania dagiti pagbatayan ti ebanghelio ken pagrukodan iti panangliklik a makatulong kadakuada a mangpatalinaed a natarnaw iti panunot ken tignayda?

Bayat ti panagsaganam a mangisuro, ibilang ti panangrebyu iti “Pagaliwaksayan ken Media” ken “Kinadalus iti Dayaw” iti Para iti Pigsa dagiti Agtutubo ([2011], 11–13, 35–37) ken Let Virtue Garnish Thy Thoughts (booklet, 2006).

agtutubo a lallaki iti klase

Mapapigsa dagiti miembro ti korum wenno klase ti tunggal maysa iti panangliklik iti pornograpia.

Aggigiddan a Masursuruan

Tapno marugian ti panaglilinnawag maipapan iti pornograpia, mabalinmo nga awisen dagiti miembro ti korum wenno klase a mangbasa iti Doktrina ken Katulagan 63:13–16 ken paglilinnawagan dagiti nalawag a pannakaammo ken pannakaawat [insights] manipud kadagitoy a bersikulo a mangtulong kadakuada a makaawat no apay a napeggad unay ti pornograpia. Tapno matulongan a maawatan dagiti miembro ti korummo wenno klasem no kasano a maliklikan ti pornograpia, usarem ti maysa wenno ad-adu pay kadagiti sumaganad nga aktibidad. Iti panangigibus iti panaglilinnawagyo, mabalin a mariknam a maparegtaka a mangilawlawag no kasano a makatulong ti bishop kadagiti nakiraman iti pornograpia (kitaen iti Para iti Pigsa dagiti Agtutubo, 12, 37).

• Mabalin nga adda saludsod dagiti miembro ti korummo wenno klasem maipapan iti panangliklik iti pornograpia. Tapno matulongan ida a mangsapul kadagiti sungbat, mabalinmo nga isurat dagiti sumaganad a saludsod iti pisarra: Ania ti pornograpia? Apay a napeggad daytoy? Kasano a maadaywantayo ti pannulisog ti pornograpia? Tapno matulongan dagiti miembro ti korum wenno klase a mangsapul kadagiti sungbat iti umuna a dua a saludsod, idawat kadakuada a mangrebyu iti “Pornograpia” iti Napudno iti Pammati (dagiti panid 117–18) ken “Pagaliwaksayan ken Media” ken “Kinadalus iti Dayaw” iti Para iti Pigsa dagiti Agtutubo (dagiti panid 11–13, 35–37). Tapno matulongan ida a mangsapul kadagiti sungbat iti maikatlo a saludsod, idawat kadakuada a mangrebyu iti Genesis 39:1–12; Taga-Roma 12:21; 2 Timoteo 2:22; Alma 39:3–9; Moroni 10:30; Doktrina ken Katulagan 27:15–18; 121:45–46. Awisem ida a mangibinglay kadagiti sungbat a masarakanda.

• Tapno matulongan ti korum wenno klase a mangtakuat kadagiti wagas a pakaliklikan iti pornograpia, mabalin nga iparebyum kadakuada ti mensahe ni Elder Jeffrey R. Holland “Place No More for the Enemy of My Soul” (Liahona, Mayo 2010, 44–46) ken ti mensahe ni Linda S. Reeves “Protection from Pornography—a Christ-Focused Home” (Liahona, Mayo 2014, 15–17). Mabalinda ti mangipapan a kasarsaritada ti masakbayan nga anakda a lalaki wenno anakda a babai maipapan no apay a makadadael unay ti pornograpia ken no kasano a maliklikan daytoy. Ania nga impormasion ti ibinglayda manipud iti mensahe iti komperensia a narebyuda? Awisem ida a mangbukel iti sagpaparis ken mangibinglay kadagiti sungbat a nasarakanda. Paisurat pay kadakuada no ania ti aramidenda tapno maliklikan ti pornograpia.

• Awisem dagiti sursuruam a mangbasa iti 1 Taga-Corinto 10:13 ken Alma 13:28. Saludsodem kadakuada no kasano iti panagkunada a mainaig dagitoy a nasantuan a kasuratan kadagiti karittayo iti panangliklik iti pornagrapia iti agdama. Mabalinmo pay nga idawat kadakuada a mangipapan nga addaanda iti maysa a gayyem a nagkarigatan iti pornograpia ken kayatnan ti agbabawi. Ania ti masarakanda a mangtulong iti gayyemda kadagiti nasantuan a kasuratan iti babaen ti “Dagiti Pangsuporta a Resources” ken kadagiti panid 1–4 ti booklet Let Virtue Garnish Thy Thoughts? Ania ti mabalin a mangtulong a mangipaawat iti gayyemda a makatulong ti bishop kenkuana? (Kitaen iti Para iti Pigsa dagiti Agtutubo, 12, 37).

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Isaias 1:18; Mosiah 4:2; Doktrina ken Katulagan 58:42–43 (Mapakawantayo no agbabawitayo)

• 1 Nephi 17:3; Mosiah 24:14–15; Alma 26:12 (Papigsaennatayonto ti Dios kadagiti panagkagumaantayo nga agtungpal kadagiti bilin)

• The “Individuals” section of AddressingPornography.ChurchofJesusChrist.org

• “Watch Your Step,” “To Look Upon,” “Chastity: What Are the Limits?” “Pornography Addiction: Is There Hope?” “Redeeming the Dead Redeemed Me” (videos), ChurchofJesusChrist.org

Panangisuro iti Wagas ti Mangisalakan

Bayat ti panangisurom kas iti panangisuro ti Mangisalakan, mangtedto dagiti miembro ti korum wenno klase iti lugar iti pusoda para iti bukel ti ebanghelio a maimula, tapno agtubo, ken dumakkel. Ania ti maaramidmo a makatulong kadakuada a mangusar kadagiti nasantuan a kasuratan tapno maawatanda ti bileg ken ngayed ti panagbiag iti nasagudayan a biag?