Mayo 23

Kasano nga Awatek ti Sagut ti Espiritu Santo?

Doktrina ken Katulagan 51–57

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Ania ti maaramidtayo tapno mabangontayo ti panagkaykaysa kadagiti miembro ti korum wenno klase? Ania dagiti panggep a tun-oyen a kayattayo a pagtitinnulongan nga aramiden?

• Dagiti pagrebbengan wenno responsibilidadtayo. Ania ti ar-aramidentayo a mangibinglay iti ebanghelio? Ania dagiti padas nga adda kadatayo idi iti panangobra iti aramid iti templo ken family history?

• Ti biagtayo. Kasano a naimatangantayon ti ima ti Dios iti biagtayo? Ania ti nangparegta kadatayo iti panagadal iti nasantuan a kasuratan iti daytoy a lawas?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Kalpasan a nabuniagantayo, ipatay dagiti addaan iti priesthood dagiti imada iti rabaw ti ulotayo tapno itallekda (confer) ti sagut ti Espiritu Santo. Mabalin a napalagipan dagiti miembro ti korum wenno klase maipapan iti daytoy idi inadalda ti Doktrina ken Katulagan 51–57 iti daytoy a lawas. Nupay kasta, ti panangawat iti Espiritu Santo ket agkasapulan iti ad-adda pay ngem iti dayta. Tapno maawat ti Espiritu Santo kas kanayon a kadkaduatayo, nasken a tarigagayantayo ti kaaddana, mangawis Kenkuana iti biagtayo, ken sipupudno nga agtungpal kadagiti bilin. Ania dagiti bendision a sumangbayto iti biag dagiti sursuruam bayat ti panagkalikagumda a manggun-od iti impluensiana?

Tapno matulonganka nga agsagana a mangisuro, mabalinmo nga irebyu ti “Ti Sagut ti Espiritu Santo” iti Napudno iti Pammati ([2004], 83–84) wenno ti mensahe ni Presidente Henry B. Eyring “His Spirit to Be with You” (Liahona, Mayo 2018, 86–89).

Tapno maawattayo ti pannarabay ti Espiritu Santo, nasken a kalikagumantayo a gun-oden ti impluensiana iti inaldaw.

Aggigiddan a Masursuruan

Tapno matulongan dagiti miembro ti korum wenno klase a makaawat a nasaysayaat iti sagut ti Espiritu Santo, mabalinmo a rugian babaen ti panangisaritam no kasano a maited ti sagut ti Espiritu Santo. Mabalinda a basaen ti Doktrina ken Katulagan 52:10; 53:3; 55:1–3 ken ilawlawag no ania ti masursuroda. Yunay-unay a saan nga ited dagiti addaan iti priesthood ti Espiritu Santo ngem awisenda ti miembro nga umawat iti Espiritu Santo. Ania ti pagdumaan? Makatulong kadakuada dagiti aktibidad iti baba tapno ad-adda pay a maawatanda no kasano nga awatenda daytoy nakaskasdaaw a sagut.

• No ania ti inaramid ni Lehi ken ti pamiliana a nagpaiwanwan iti Liahoha ket maipada iti no ania ti nasken nga aramidentayo tapno umawat iti pangiwanwan nga impluensia ti Espiritu Santo. Mabalinmo pay nga ipakita ti maysa a ladawan ni Lehi ken ti Liahona (kitaen iti Libro ti Arte ti Ebanghelio [2009], num. 68) ket idawat kadagiti miembro ti korum wenno klase tapno mangibinglay no ania ti ammoda maipapan iti Liahona. Kalpasanna, mabalinmo nga awisen ti kagudua kadakuada a mangbasa iti 1 Nephi 16:14–29 ken ti sabali pay a kagudua a mangbasa iti 1 Nephi 18:8–22, a mangsapsapul kadagiti wagas a pakaipadaan ti Liahona iti Espiritu Santo. Ania ti masursurotayo manipud iti pagwadan ti pamilia ni Lehi a makatulong kadatayo nga umawat nga ad-adda a naan-anay iti Espiritu Santo?

• Naglaon ti tunggal benneg iti Para iti Pigsa dagiti Agtutubo iti balakad maipapan iti panagbiag kadagiti pagrukodan ken bilin ti Apo. Ti panagbiag kadagitoy a bilin ti mangyawis iti bileg ti Espiritu Santo iti biagtayo. Ibilang ti panangawis kadagiti miembro ti korum wenno klase a saggaysa a mangpili iti maysa kadagiti benneg iti Para iti Pigsa dagiti Agtutubo, mangbasa iti daytoy, ken mangmarka kadagiti banag a nasken nga aramidenda wenno saanda nga aramiden a mangtulong kadakuada nga umawat iti Espiritu Santo. Kalpasanna mabalinda nga ibinglay no ania ti nasursuroda iti dadduma pay iti korum wenno klase. Awisem ida a mangituding iti panggepda a tun-oyen a mangtulongto kadakuada nga ad-adda a naan-anay nga umawat iti Espiritu Santo. Apay a kayattayo nga adda ti Espiritu kadatayo? (Kitaen iti Juan 14:26–27; 15:26; 16:13; 2 Nephi 32:3).

• Iti mensahena “His Spirit to Be with You” (Liahona, Mayo 2018, 86–89), kinuna ni Presidente Henry B. Eyring, “Sapay koma ta dumakkel ti tarigagayyo ken ti kabaelanyo nga umawat iti Espiritu Santo” (panid 86). Idawat kadagiti miembro ti korum wenno klase a mangbasa iti siam a parapo iti mensahena mangrugi iti “Dagiti padas ni Propeta a Joseph Smith” (panid 88). Awisem ida a mangsapul no ania ti inaramid ni Joseph Smith tapno umawat iti impluensia ti Espiritu Santo. Mabalinda nga ilista iti pisarra no ania ti masarakanda. No maitutop, mabalinmo nga awisen ida a mangibinglay kadagiti padasda iti yaawat iti pannarabay manipud iti Espiritu Santo. Ania ti ar-aramidenda iti panawen dagitoy a padas a nangiturong iti panangawatda iti pannarabay manipud iti Espiritu Santo? Mabalinyo pay ti mangibinglay iti padas.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Moroni 8:25–26; Doktrina ken Katulagan 20:77, 79; 121:45–46 (Kasano nga awaten ti Espiritu Santo)

• David A. Bednar, “Receive the Holy Ghost,” Liahona, Nob. 2010, 94–97

• Douglas D. Holmes, “The Gift of the Holy Ghost” (First Presidency Christmas Devotional, Dis. 4, 2016), broadcasts.ChurchofJesusChrist.org

Panangisuro iti Wagas ti Mangisalakan

Iti panagsaganana para iti panagserbina iti daga, ti Mangisalakan ket “inturong ti Espiritu iti langalang” tapno agayuno, agkararag, ken “makitipon iti Dios” (Joseph Smith Translation, Mateo 4:1 [iti Mateo 4:1, footnote b]). Ti nabileg a panangisuro iti ebanghelio ket kaipapananna ti saan laeng a panangisagana iti maysa a lesson no di ketdi panangisagana pay iti bagbagitayo. (Kitaen iti Panangisuro iti Wagas ti Mangisalakan [2016], 12.)