Mayo 9

Kasano a Mabendisionan ti Espiritu Santo ti Biagko iti Inaldaw?

Doktrina ken Katulagan 46–48

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino ti agkasapulan iti tulong ken karkararagtayo? Ania ti maaramidtayo a mangtulong kadakuada? Asino ti nasken nga awisentayo iti daytoy umay nga aktibidadtayo?

• Dagiti pagrebbengan wenno responsibilidadtayo. Ania dagiti naituding nga aramiden a naipatungpaltayon? Ania dagiti naituding nga aramiden a nasken nga aramidentayo? Kasano nga inawistayo dagiti dadduma nga umasideg ken ni Cristo, ken kasano a maawistayo dagiti dadduma itan?

• Ti biagtayo. Ania dagiti nabiit pay a padas a nangpapigsa kadagiti pammaneknektayo? Ania ti mapaspasamak iti biagtayo, ken kasano a makapagsisinnuportatayo iti tunggal maysa?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Adu a nagkauna a miembro ti naisubli a Simbaan ti nakabasan maipapan kadagiti naespirituan a parangarang ti Espiritu Santo kadagiti nasantuan a kasuratan (kitaen iti Dagiti Aramid 2:1–4; 13:52; 1 Taga Corinto 12:4–11; 3 Nephi 19). Mabalin a naadalen dagiti miembro ti korum wenno klase ti Doktrina ken Katulagan 46–48 iti daytoy a lawas, mabalin a nasursurodan a naggagar ti Apo a mangisuro kadagitoy a Santo maipapan kadagiti bendision a mabalin nga isangbay ti Espiritu Santo iti biagda. Ania dagiti padas a nakaisuro kenka no kasano a bendisionannaka ti Espiritu Santo? Kasano a matulongan ti Espiritu Santo dagiti sursuruam iti amin nga aspeto ti biagda?

Tapno matulongannaka nga agsagana a mangparegta iti korummo wenno klasem nga agkalikagum a manggun-od iti impluensia ti Espiritu Santo, mabalinmo nga irebyu ti “Dagiti Akem ti Espiritu Santo” iti Napudno iti Pammati ([2004], 82) ken ti mensahe ni Elder Gary E. Stevenson “How Does the Holy Ghost Help You?” (Liahona, Mayo 2017, 117–20).

Matulongannatayo ti Espiritu Santo a makaawat ken mangisuro kadagiti kinapudno ti ebanghelio.

Aggigiddan a Masursuruan

Mangted dagiti nasantuan a kasuratan iti adu a pagarigan dagiti naespirituan a sagut. Kasano a matulongam a mapapigsa ti pammati dagiti miembro ti korummo wenno klasem a mabalin a maiparangarang dagitoy a sagut iti biagtayo iti agdama? Mabalinmo a rugian babaen ti panangawis kadakuada a mangisurat iti pisarra iti naespirituan a sagut a nailadawan iti Doktrina ken Katulagan 46:7–33 ken mangilawlawag no kasano a nakitadan daytoy a naiparangarang iti biagda wenno iti biag ti maysa a tao nga am-ammoda.

Kas nayon kadagiti sagut ti Espiritu, bendisionannatayo ti Espiritu Santo iti adu a dadduma pay a wagas. Mabalinmo nga usaren ti maysa wenno ad-adu pay kadagiti aktibidad iti baba a mangtulong iti miembro ti korum wenno klase a nasaysayaat a makaawat iti daytoy.

• No dadduma ipagaruptayo a kasapulantayo ti Espiritu Santo laeng para kadagiti napapateg a pangngeddeng wenno pasamak iti biagtayo. Kasano a matulonganyo dagiti sursuruanyo a mangilasin no kasano ti kadakkel ti maaramid ti Espiritu Santo para kadakuada? Mabalinmo a bingayen ti korum wenno klase iti babassit a grupo ket dutokam ti tunggal grupo a mangbasa iti maysa wenno ad-adu pay kadagiti nasantuan a kasuratan manipud iti “Dagiti Pangsuporta a Resources.” Mabalin ti maysa a tao iti tunggal grupo a mangibinglay no ania ti nasursuroda. Kalpasanna, awisem ti tunggal miembro ti korum wenno klase a mangilista kadagiti wagas a pakabendisionan ti Espiritu Santo iti inaldaw a biagda. Bayat ti panangibinglayda kadagiti listaanda, mabalinda a pagsasaritaan no ania ti maaramidda tapno adda ti Espiritu Santo kadakuada iti unos ti tunggal aldaw.

• Sabali pay a wagas a pakatulongan kadagiti sursuruam a maawatan no kasano a makatulong ti Espiritu Santo kadakuada ket panangisurat kadagiti sumaganad a saludsod iti pisarra: Ania ti ammotayo maipapan iti Espiritu Santo? Kasano a matulongannatayo ti Espiritu Santo? Kalpasanna mabalin a sukisoken dagiti miembro ti korum wenno klase dagiti sungbat iti mensahe ni Elder Gary E. Stevenson “How Does the Holy Ghost Help You?” (Liahona, Nob. 2017, 117–20). Mabalinda pay a sapulen dagiti sungbat babaen ti panangrebyu iti “Dagiti Akem ti Espiritu Santo” iti Napudno iti Pammati (panid 82). No maitutop, mangibinglay kadagiti padasmo iti Espiritu Santo, ket awisem dagiti agtutubo a mangibinglay kadagiti padasda.

• Mabalin a basaen dagiti miembro ti korum wenno klase ti “Personal Revelation” wenno “Learn to Recognize the Promptings of the Spirit” iti kapitulo 4 ti Preach My Gospel ([2019], 95–96, 102–3). Kalpasanna mabalinda ti agpammarang nga isuda dagiti misionario a mangisursuro iti maysa a tao a saanna pay pulos nangngegan no kasano a mabendisionan ti Espiritu Santo ti biagtayo. Ania koma ti isaoda kadakuada?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Juan 14:16–27 (Masuruannatayo ti Mangliwliwa ken maipalagipna ti amin a banag kadatayo)

• Juan 15:26; Doktrina ken Katulagan 42:17; Moises 1:24 (Paneknekan ti Espiritu Santo ti Ama ken ti Anak)

• Taga-Roma 8:16 (Paneknekan ti Espiritu a datayo dagiti annak ti Dios)

• 2 Nephi 32:5; Doktrina ken Katulagan 18:18 (Ipakitanto ti Espiritu Santo kadatayo no ania ti nasken nga aramidentayo)

• 3 Nephi 27:20 (Pasantuennatayo ti Espiritu Santo)

• Moroni 8:26 (Punnuennatayo ti Espiritu Santo iti namnama ken ayat)

• Moroni 10:5 (Isuro ti Espiritu Santo ti kinapudno kadatayo)

Panangisuro iti Wagas ti Mangisalakan

Imbinglay ti Mangisalakan dagiti simple nga estoria, pangngarig, ken pagarigan ti pudno a biag tapno mangisuro iti wagas a napateg kadagiti disipulona. Ania dagiti bukod a padas a mabalinmo nga ibinglay kadagiti agtutubo a makatulong a maawatanda dagiti akem ti Espiritu Santo ken mariknada ti tarigagay nga agkalikagum a manggun-od kadagiti kasta a padas? (Kitaen iti Panangisuro iti Wagas ti Mangisalakan [2016], 22.)