Ni Jesus a Mangbugbuggo iti Saka dagiti Apostol, ni Del Parson

Abril 25

Kasano a Makapagbalinak nga Ad-adda a Kas ken ni Cristo iti Panagserbik kadagiti Dadduma?

Doktrina ken Katulagan 41–44

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Asino dagiti kabarbaro iti wardtayo, ken kasano a matulongantayo ida a makarikna ti nabara a pannakapasangbay? Ania dagiti ar-aramidentayo tapno mapagbalin a napateg ti orastayo kadagiti miting iti korum wenno klase?

• Dagiti pagrebbengan wenno responsibilidadtayo. Ania dagiti sumagmamano a pagrebbengan ken responsibilidadtayo kas agtutubo a lallaki ken agtutubo a babbai? Kasano a maipatungpaltayo a nasaysayaat dagitoy?

• Ti biagtayo. Ania dagiti ar-aramidentayo tapno agbalin nga ad-adda a kas ken ni Jesucristo ken umawat iti bilegna iti biagtayo? Ania dagiti ar-aramidentayo a mangtulong kadagiti pamiliatayo nga umasideg Kenkuana?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Idi binilin ti Apo dagiti Santo nga aguummong iti Kirtland, Ohio, sipupudno a pinanawan ti adu a Santo dagiti pagtaenganda ket nagbaniagada sadiay. Ngem daytoy a yaakar saan laeng a maipapan iti panagbiag iti baro a lugar—maipapan pay daytoy iti panagbiag iti baro a wagas. Mabalin a naadalen dagiti miembro ti korum wenno klase ti Doktrina ken Katulagan 41–44 iti daytoy a lawas ken nasursurodan maipapan iti yaakar dagiti Santo iti Kirtland ken iti linteg nga impalgak ti Apo kadakuada sadiay. Maibilang iti dadduma a banag, ninamnama ti Apo nga agbalin dagiti Santo a nakaykaysa bayat ti panagiinnayat ken panagserbida iti tunggal maysa (kitaen iti Doktrina ken Katulagan 42:30–31, 38–39, 45; 44:6). Ania dagiti padas a mabalinmo nga ibinglay a mangtulong iti korummo wenno klasem a mangrikna iti pateg ti panagserbi a kas ken ni Cristo?

Tapno matulonganka nga agsagana a mangisuro iti panagserbi a kas ken ni Cristo, mabalinmo nga irebyu ti “Panagserbi” iti Para iti Pigsa dagiti Agtutubo ([2011], 32–33) ken ti mensahe ni Presidente Russell M. Nelson “The Second Great Commandment” (Liahona, Nob 2019, 96–100).

Makapagserbitayo a kas iti inaramid iti Mangisalakan.

Aggigiddan a Masursuruan

Tapno mangirugi iti panaglilinnawag maipapan iti panagserbi a kas ken ni Cristo, mabalinmo nga isurat iti pisarra ti “Agbiagkayo a sangsangkamaysa iti ayat” (Doktrina ken Katulagan 42:45). Awisem ti korummo wenno klasem a mangbasa iti Doktrina ken Katulagan 42:30–31, 38–39, 45; 44:6 ken mangilista kadagiti wagas a nagtarigagayan ti Apo kadagiti Santo nga agserbi iti tunggal maysa. Ania dagiti gundaway nga adda kadatayo, agpada iti uneg ken iti ruar dagiti pataengantayo, tapno agserbi kadagiti agkasapulan a mainaig iti pisikal, emosional, wenno naespirituan? Pumili manipud kadagiti kapanunotan iti baba tapno mangparegta iti korummo wenno klasem a mangted iti serbisio a kas ken ni Cristo iti dadduma.

• Tapno matulongan dagiti miembro ti korummo wenno klasem a mangsursuro iti pagwadan ti Mangisalakan iti panagserbi, mabalinmo a dutokan ti tunggal tao a mangbasa iti maysa a binatog iti nasantuan a kasuratan maipapan iti panagserbi ti Mangisalakan iti maysa a tao (kitaen iti “Dagiti Pangsuporta a Resources”). Mabalin a gupgopen ti tunggal tao ti binatog iti nasantuan a kasuratan ken mangilawlawag no ania ti inaramid ti Mangisalakan tapno agserbi iti dadduma. Ania ti isuro dagitoy a pagarigan maipapan ti no ania ti kayat a sawen ti agserbi a kas iti inaramid ti Mangisalakan? Ania ti pagdumaan ti panagserbi iti wagas ti Mangisalakan ken ti dadduma pay a wagas ti panagserbi? Mabalin a mangibinglay dagiti miembro ti korum wenno klase iti padpadasda idi inkarigatanda ti nagserbi kas iti inaramid ti Mangisalakan wenno nagserbi ti dadduma kadakuada iti kastoy a wagas.

• Mabalin a makatulong nga irebyu ti korummo wenno klasem no ania ti insuro ti Mangisalakan ken dagiti propetana maipapan iti panagserbi. Dagitoy ti sumagmamano a binatog iti nasantuan a kasuratan a mabalinda nga aggigiddan a basaen: Mateo 25:31–46; Lucas 10:25–37; Juan 13:34–35; Santiago 1:27; Mosiah 2:17; 18:8–10. Allukoyem ida a mangisurat no ania ti masursuroda maipapan iti panagserbi iti dadduma ken mangibinglay kadagiti kapanunotan ken padas a mainaig iti no ania ti nasursuroda. Kalpasanna mabalinda ti agplano kadagiti wagas a pangtedan iti serbisio a kas ken ni Cristo. (Makaalada kadagiti kapanunotan manipud iti panagbuyada iti maysa wenno ad-adu pay kadagiti video iti “Dagiti Pangsuporta a Resources” wenno panagbisita iti JustServe.org.)

• Tapno matulongan dagiti miembro ti korum wenno klase kadagiti panagkagumaanda nga agminister iti dadduma, ibilang ti aggigiddan a panangrebyu ti mensahe ni Sister Bonnie H. Cordon a “Becoming a Shepherd” (Liahona, Nob. 2018, 74–76). Mabalinmo a rugian babaen ti panangipakitam iti sumagmamano a ladawan ti Mangisalakan nga agserserbi (sumagmamano ti impakita ni Presidente Cordon kabayatan ti mensahena). Ania ti isuro dagitoy a ladawan maipapan iti no kasano a makapagministertayo kadagiti wagas a kas ken ni Cristo? Kalpasanna ibilang ti panangawis kadagiti miembro ti korum wenno klase a mangbasa iti kada paris iti maysa kadagiti benneg ti mensahe ket ibinglay no ania ti nasursuroda maipapan iti no kasano ti agserbi kas iti Mangisalakan. Mabalinda pay nga ibinglay no ania ti masursuroda maipapan iti panagserbi a kas ken ni Cristo bayat ti panagministerda iti dadduma.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Mateo 14:13–21; Juan: 9:1–11; 13:4–5, 12–17; 1 Nephi 11:31; 3 Nephi 17:5–10 (Dagiti pagulidanan ni Jesucristo iti panagserbina iti dadduma)

• Joy D. Jones, “For Him,” Liahona, Nob. 2018, 50–52

• “If We Forget Ourselves,” “Teachings of Thomas S. Monson: Rescuing Those in Need,” “Youth in Action,” “Opportunities to Do Good” (videos), ChurchofJesusChrist.org

Panangisuro iti Wagas ti Mangisalakan

Bayat ti panagministrona iti daga binubos ni Jesucristo ti panawenna nga agserserbi ken tumultulong kadagiti adda iti aglawlawna. Aramiden met dagiti pudno a disipulo ni Cristo ti kasta (kitaen iti Juan 13:35). Mangsapul kadagiti gundaway a mangawis kadagiti miembro ti korum wenno klase tapno mangibinglay no kasano a nakapagserbida iti dadduma ken no ania ti nangparegta kadakuada a mangted iti serbisio. (Kitaen iti Panangisuro iti Wagas ti Mangisalakan [2016], 4–5.)