Abril 11

Kasano a Maawisko ti Amin nga Umasideg ken ni Cristo?

Doktrina ken Katulagan 30–36

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna, kas nayon iti panagiinnuman maipapan iti naipangruna a pakaseknan ti korum wenno klase, mabalin a kayatmo nga ilawlawag dagiti impresion ken tema manipud iti sapasap a komperensia. Makatulong dagiti sumaganad a saludsod.

• Ania dagiti tema wenno mensahe a napateg kenka?

• Ania ti mariknam a makaparegta nga aramiden gapu iti nasursuro wenno nariknatayo?

• Ania ti kasapulantayo nga aramiden kas korum wenno klase tapno agtignay a mayannurot iti balakad a nangngegantayo iti sapasap a komperensia?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Sumagmamano laeng a bulan kalpasan ti pannakabukel ti Simbaan idi Abril 6, 1830, iti Fayette, New York, inrugi ti Apo ti panangawag kadagiti misionario a mangummong iti “pili[na] manipud iti uppat a suli ti daga” (Doktrina ken Katulagan 33:6). No ania ti nangrugian a panagkagumaan ti bassit a ragup dagiti baro a napasurot iti maysa a limitado a lugar ti geograpia isu ti dimmur-asan iti dakkel a ragup dagiti misionario a mangipakpakdaar iti ebanghelio iti intero a lubong. Ngem saan a limitado ti aramid ti misionario kadagiti agserserbi ti full-time a mision. Kanayon a tarigagayan ti Apo nga agawis ti tunggal maysa kadatayo kadagiti adda iti aglawlawtayo nga umasideg Kenkuana.

Ania dagiti nagbalin a padasmo iti panangawis iti dadduma nga agsursuro maipapan iti ebanghelio ti Mangisalakan? Ania ti maaramidmo a mangparegta kadagiti miembro ti korum wenno klase a mangipatungpal iti pagrebbenganda a mangisangbay kadagiti kararua ken ni Jesucristo? Bayat ti panagsaganam a mangisuro, ibilangmo ti panangrebyu iti “What Is My Purpose as a Missionary?” iti Preach My Gospel ([2019] 1–16) ken ti mensahe ni Elder Dieter F. Uchtdorf “Missionary Work: Sharing What Is in Your Heart,” Liahona, Mayo 2019, 15–18).

Babaen ti panangawis kadagiti gagayyemtayo a dumar-ay kadagiti miting iti Simbaan wenno aktibidad, matulongantayo ida a mangsursuro ti maipapan ken ni Cristo.

Aggigiddan a Masursuruan

Dakamaten tiDoktrina ken Katulagan 30–36 dagiti nagnagan ti sumagmamano a tao a naawagan kadagiti mision kadagiti nagkauna nga aldaw ti Simbaan. Sumagmamano nga aldaw sakbay ti mitingyo, mabalinmo nga ikkan ti tunggal korum wenno klase iti maysa kadagitoy a nagan (kitaen dagiti paulo kadagiti benneg 30–36) ken awisen ida a mangammo no ania ti balakad nga inted ti Apo a mangtulong iti dayta a tao a mangibinglay iti ebanghelio. Kasano a maaramattayo dayta a balakad iti bagbagitayo? Dagiti kapanunotan iti baba ti ad-adda pay a makaparegta kadagiti sursuruam a mangawis kadagiti adda iti aglawlawda nga umasideg ken ni Cristo.

• Maawatan kadi dagiti sursuruam no ania ti kayat a sawen ti umasideg ken ni Cristo? Mabalinmo nga idawat kadakuada a mangibinglay kadagiti kapanunotanda. Makatulong, no maibinglaymo daytoy a pannakailawlawag: “Tapno umasideg iti Mangisalakan, nasken nga adda pammati dagiti tao Kenkuana iti panagbabawi—nga agar-aramid kadagiti kasapulan a panagbalbaliw a mangisangbay iti biagda iti pannakitunos iti pannursurona” (Preach My Gospel, 2). Mabalin pay a basaen dagiti miembro ti korum wenno klase dagiti nasantuan a kasuratan a mairaman dagiti ragup ti balikas kas iti “umasidegka kaniak” wenno “umasidegka ken ni Cristo” a mangtulong a masungbatan daytoy a saludsod—kas pagarigan, Mateo 11:28–30; Omni 1:26; Moroni 10:32; Doktrina ken Katulagan 20:59. Apay a kayattayo dagiti tao nga umasideg ken ni Cristo? Ania dagiti sumagmamano a simple a banag a mabalintayo nga aramiden a mangtulong kadakuada? Mabalin nga agplano dagiti miembro ti korum wenno klase tapno mangawis iti maysa a tao nga am-ammoda nga umay nga as-asideg ken ni Cristo.

• Ti panangammo maipapan iti no kasano a nakaibinglayen dagiti dadduma iti ebanghelio ket maysa a naindaklan a wagas a pangparegta kadagiti sursuruam. Mabalinmo nga ipabuya ti maysa wenno ad-adu pay a video a masarakan iti baba ti “Dagiti Pangsuporta a Resources” wenno mangawis kadagiti miembro ti korum wenno klase a mangbasa iti balakad wenno pagarigan a masarakan iti mensahe ni Sister Cristina B. Franco “Finding Joy in Sharing the Gospel” (Liahona, Nob. 2019, 83–86). Ania ti masursurotayo manipud kadagitoy a pagarigan? Paglilinnawagan no ania ti mabalin nga aramiden ti korummo wenno klasem a mangawis iti dadduma nga umasideg ken ni Cristo.

• No maipanggep iti panangibinglay iti ebanghelio, kinuna ni Elder Dieter F. Uchtdorf a sumagmamano kadatayo ti mabalin a “makarikna iti panagduadua no kasano nga aramiden daytoy. Mabalin nga agsaduttayo a rummuar iti nagin-awa a lugartayo” (“Missionary Work: Sharing What Is in Your Heart,” Liahona, Mayo 2019, 16). No marikna dagiti miembro ti korum wenno klase ti kastoy, makatulong ti lima a singasing nga inted ni Elder Uchtdorf iti mensahena. Mabalinmo nga awisen ti tunggal miembro ti klase a mangbasa maipapan iti maysa kadagiti singasingna ket ibinglay no ania ti nasursuroda.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• 1 Timoteo 4:12 (Agbalin nga ulidan kadagiti mamati)

• Alma 17:2–4 (Insagana dagiti annak a lallaki ni Mosiah ti bagbagida tapno mangibinglay iti ebanghelio)

• Doktrina ken Katulagan 42:6–7 (Ikasaba ti ebanghelio babaen ti bileg ti Espiritu)

• Russell M. Nelson ken Wendy Nelson, “Hope of Israel” (worldwide youth devotional, Hunio 3, 2018), suplemento iti New Era ken Ensign, HopeofIsrael.ChurchofJesusChrist.org

• “Inviting All to Come unto Christ: Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (videos), ChurchofJesusChrist.org

Panangisuro iti Wagas ti Mangisalakan

Inawis ti Mangisalakan dagiti dadduma a mangipaneknek kadagiti kinapudno tapno masagid ti Espiritu dagiti pusoda. “Siasinoak iti panagkunayo?” Sinaludsodna. Bayat ti isusungbat ni Pedro, napapigsa ti pammaneknekna: “Sika ti Cristo, ti Anak ti Dios a sibibiag.” (Mateo16:15–16). Kasano a makapapigsa iti pammaneknek dagiti miembro ti korum wenno klase ti panangibinglay iti ebanghelio?