Ni Cristo nga agkarkararag

Ni Cristo iti Getsemani, ni Heinrich Hofmann

Marso 28

Apay a Kasapulak ti Pannubbot ni Jesucristo?

Doktrina ken Katulagan 29

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Ania ti maaramidtayo tapno mabangontayo ti panagkaykaysa kadagiti miembro ti korum wenno klase? Ania dagiti panggep a tun-oyen a kayattayo a pagtitinnulongan nga aramiden?

• Dagiti pagrebbengan wenno responsibilidadtayo. Ania ti ar-aramidentayo a mangibinglay iti ebanghelio? Ania dagiti padas nga adda kadatayo idi iti panangobra iti aramid iti templo ken family history?

• Ti biagtayo. Kasano a naimatangantayon ti ima ti Apo iti biagtayo? Ania ti nangparegta kadatayo iti panagadal iti nasantuan a kasuratan iti daytoy a lawas?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Insuro ni Presidente Ezra Taft Benson, “Kas iti maysa a tao a saan a talaga nga agtarigagay iti makan agingga a saan a mabisin isuna, kasta met a saan nga agtarigagay iti pannakaisalakan kenkuana ni Cristo agingga a saanna a maammuan no apay a kasapulanna ni Cristo. Awan ti maysa a tao nga umdas ken umno a makaammo no apay a kasapulanna ni Cristo agingga a maawatan ken maawatna ti doktrina maipapan iti Pannakatnag ken ti epekto daytoy iti amin a sangkataw-an” (“The Book of Mormon and the Doctrine and Covenants,” Ensign, Mayo 1987, 85). Bayat ti panagadalmo iti Doktrina ken Katulagan 29 iti daytoy a lawas, mabalin a nadlawmo ti panangiladawan ti Mangisalakan iti Pannakatnag ken no kasano a masubbottayo manipud iti daytoy. Kasano a nagun-odmo ti pammaneknek maipapan ken ni Jesucristo ken iti akemna a kas Mangisalakan ken Mannubbotmo? Panunoten no kasano a mangbalbaliw kadakuada ti panangpapigsa kadagiti pammaneknek dagiti miembro iti korum wenno klase maipapan Kenkuana. Bayat ti panagsaganam, ibilangmo ti panagadal iti “Agency and the Fall of Adam and Eve,” “The Atonement of Jesus Christ,” ken “The Divine Mission of Jesus Christ” iti kapitulo 3 ti Preach My Gospel ([2019], 49–52, 60–61).

agtutubo a babbai iti klase

Gapu ta sinubbotnatayo ti Mangisalakan manipud iti Pannakatnag, makasaraktayo iti rag-o.

Aggigiddan a Masursuruan

Kas pangyam-ammo iti paglilinnawagan ita nga aldaw, mabalinmo nga awisen dagiti sursuruam a mangilista iti pisarra ti ania man a banag nga ammoda maipapan iti Pannakatnag da Adan ken Eva. Kas pagarigan, ania ti masursuroda manipud iti Doktrina ken Katulagan 29:36–50? Ania ti pakakitaan ti Pannakatnag a makitatayo iti aglawlawtayo? Dagiti akitibidad iti baba ti mangtulongto iti korummo wenno klasem a mangtakuat no kasano a matulongannatayo ti Pannubbot ni Jesucristo a mangparmek kadagiti epekto ti Pannakatnag.

• Tapno nasaysayaat a maawatan ti Pannakatnag da Adan ken Eva, mabalin a basaen dagiti miembro ti korum wenno klase ti “Pannakatnag” iti Napudno iti Pammati (56–59) wenno “Agency and the Fall of Adam and Eve” iti kapitulo 3 ti Preach My Gospel (49–50). Awisem ida a mangipapan a maysa a gayyem ti nagsaludsod kadakuada iti, “Apay a kasapulak ni Jesucristo?” Awisem ida a mangisuro iti tunggal maysa iti kada paris no kasano a sungbatanda dayta a saludsod batay iti no ania ti nasursuroda manipud iti panagbasada.

• Kasano a matulongam dagiti miembro ti korum wenno klase a makasursuro manipud kadagiti nasantuan a kasuratan no apay a kasapulanda ti Pannubbot ni Jesucristo? Maysa a wagas ti panangisurat iti pisarra iti sumagmamano a reperensia iti nasantuan a kasuratan manipud iti “Dagiti Pangsuporta a Resources” ket kalpasanna isurat ti pakagupgopan a palawag para kadagiti reperensia iti akikid a papel. Ikkam ti tunggal miembro ti korum wenno klase iti maysa kadagiti akikid a papel. Awisem ida a mangbasa kadagiti reperensia ti nasantuan a kasuratan a naisurat iti pisarra ket magsapul iti maysa a kaparis ti pakagupgopan a palawagda. (Maibasar ti sumagmamano a palawag iti nasurok ngem maysa a nasantuan a kasuratan.) Awisem ti tunggal miembro ti korum wenno klase a mangbasa iti napigsa iti binatog ti nasantuan a kasuratan a kaparis ti palawagda ket ibinglay no ania ti nasursuroda maipapan iti no apay a kasapulantayo ti Pannubbot ti Mangisalakan.

• Awisem dagiti miembro ti korum wenno klase a sililimed a sungbatan dagiti saludsod kas iti sumaganad: Kasano a mabendisionannak babaen ti Pannubbot ni Jesucristo? Ania koma ti pabalbaliwan kaniak ti Mangisalakan tapno ad-adda a naan-anay a mapadasak dagiti bendision ti Pannubbotna? Kalpasanna idawatmo kadakuada a sangkamaysa a paglilinnawaganda ti umuna a saludsod. Mabalinda nga irebyu ti “The Atonement of Jesus Christ” ken “The Divine Mission of Jesus Christ” iti kapitulo 3 ti Preach My Gospel (51–52, 60–61) ken ti maysa kadagiti video iti “Dagiti Pangsuporta a Resources.” Awisen ida a mangibinglay no ania ti nasursuroda.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Doktrina ken Katulagan 19:16–19 (Inkaro ni Jesucristo dagiti basoltayo tapno ditayonto agsagaba no agbabawitayo)

• 2 Nephi 9:6–16; Alma 42:6–9 (Isalakannatayo ni Jesucristo manipud iti patay ken impierno)

• 2 Nephi 2:5–10; Helaman 14:15–17 (Babaen laeng ken ni Jesucristo a makapagsublitayo iti Dios)

• Mosiah 3:7; Alma 7:11–13 (Gapu ta inawat ti Cristo iti Bagina dagiti rigat ken basoltayo, Ammona no kasano a tulongannatayo)

• Moises 5:10–12 (Gapu ta sinubbotnatayo ti Mangisalakan manipud iti Pannakatnag, makasaraktayo iti rag-o)

• Walter F. González, “The Savior’s Touch,” Liahona, Nob. 2019, 90–92

• “Where Justice, Love, and Mercy Meet,” “Why We Need a Savior,” “The Atonement Enables Us” (videos), ChurchofJesusChrist.org

Panangisuro iti Wagas ti Mangisalakan

Inkararagan ti Mangisalakan dagiti disipulona ken intuloyna ti nagserbi kadakuada. Naaddaan kadagiti gundaway a makaduana ida ket impeksana ti ayatna. Ania dagiti gundaway nga adda kenka a mangaramid iti kasta met laeng kadagiti sursuruam? (Kitaen iti Panangisuro iti Wagas ti Mangisalakan [2016], 6.)