pamilia nga agad-adal kadagiti nasantuan a kasuratan

Marso 14

Kasano nga Agtunos iti Pakabuklan dagiti Nadiosan nga Akem dagiti Lallaki ken Babbai?

Doktrina ken Katulagan 23–26

icon ti panagiinnuman

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Asino ti agkasapulan iti tulong ken karkararagtayo? Ania ti maaramidtayo a mangtulong kadakuada? Asino ti nasken nga awisentayo iti daytoy umay nga aktibidad?

• Dagiti pagrebbengan wenno responsibilidadtayo. Ania dagiti naituding nga aramiden a naipatungpaltayon? Ania dagiti naituding nga aramiden a nasken nga aramidentayo? Kasano nga inawistayo dagiti dadduma nga umasideg ken ni Cristo, ken kasano a maawistayo dagiti dadduma itan?

• Ti biagtayo. Ania dagiti nabiit pay a padas a nangpapigsa kadagiti pammaneknektayo? Ania ti mapaspasamak iti biagtayo, ken kasano a makapagsisinnuportatayo iti tunggal maysa?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Nangted ti Nailangitan nga Ama kadagiti lallaki ken babbai kadagiti agpada a napateg nga akem tapno maipatungpal iti planona. Natunos dagitoy nga akem iti tunggal maysa. Tapno matulongan dagiti lallaki ken babbai a mangipatungpal kadagitoy nga akem, inikkanna ida kadagiti naidumduma a sagut ken kabaelan. Mabalin nga inadalen dagiti miembro ti korum wenno klase ti Doktrina ken Katulagan 25 iti daytoy a lawas. Iti daytoy a paltiing, nangted ti Apo iti balakad ken ni Emma Smith maipapan iti napateg nga aramid iti Pannakaisubli ti ebanghelio ken inlawlawagna no kasano a makapagtinnulong da Joseph ken Emma ti tunggal maysa. Ania dagiti pagarigan a nakitamon a panagtitinnulong dagiti lallaki ken babbai iti natunos a wagas a mangaramid iti trabaho ti Apo? Kasano a maparegtam dagiti agtutubo a lallaki ken agtutubo a babbai no mangisuroka a mangipaawat kadagiti nadiosan nga akemda ken agtitinnulongda a mangbangon iti pagarian ti Dios?

Bayat ti panagsaganam a mangisuro, ibilangmo ti panagrebyu iti “Ti Kaamaan: Maysa a Waragawag iti Lubong” (ChurchofJesusChrist.org) ken ti mensahe ni President Linda K. Burton “We’ll Ascend Together” (Liahona, Mayo 2015, 29–32).

agtutubo a babbai ken agtutubo a lalaki a mangar-arkos iti cake

Masursuro dagiti agtutubo a lallaki ken agtutubo a babbai ti agtitinnulong iti panangbangon iti pagarian ti Dios.

Aggigiddan a Masursuruan

Tapno marugian ti panaglilinnawag maipapan iti no kasano nga agtitinnulong dagiti lallaki ken babbai nga agtrabaho iti pagarian ti Dios, ibilang ti panangawis kadagiti miembro ti korum wenno klase a mangrebyu iti Doktrina ken Katulagan 25. Ania ti kinuna ti Apo maipapan kadagiti pagrebbengan nga adda kada Emma ken Joseph iti tunggal maysa? Ania ti masursurotayo manipud iti benneg 25 maipapan iti no kasano a nasken nga agtinnulong nga agtrabaho dagiti agassawa? Mabalinmo nga ikkan dagiti sursuruam iti sumagmamano a papel a pagsuratan ti no ania ti masarakanda ken paibinglay kadakuada dagiti kapanunotanda. Kalpasanna pumilika manipud kadagiti sumaganad nga aktibidad a mangtulong a mangipaawat a nasaysayaat kadakuada no kasano a namnamaen ti Dios nga agtitinnulong nga agtrabaho dagiti annakna a lallaki ken annakna a babbai.

• Makapanunotka kadi iti maysa a pagarigan a mangtulong a mangipaawat kadagiti miembro ti korum wenno klase no ania ti kaipapanan ti “panagtunos”? Kas pagarigan, mabalinda a pagsasaritaan maipapan kadagiti agtutunos a maris wenno paglilinnawagan no kasano a pagbalinen a napimpintas ti musika dagiti nadumaduma a boses iti maysa a koro. Kasano nga agtunos iti pakabuklan dagiti nadiosan nga akem dagiti lallaki ken babbai? Kas korum wenno klase, aggigiddan a basaen ti umuna a dua a parapo ti benneg a napauluan iti “Lifting and Helping in Our Complementary Roles” manipud iti mensahe ni Presidente Linda K. Burton “We’ll Ascend Together” (Liahona, Mayo 2015, 30). Wenno mabalinmo nga awisen ti nagkallaysa nga agassawa a mangsarungkar iti korummo wenno klasem ket pagsasaritaan no kasano a nagtinnulongda a mangipatungpal kadagiti akemda ken no kasano a tinulongan ida ti Apo. Ania ti masursurom, manipud iti mensahe ni Presidente Burton wenno iti agassawa, maipapan iti no kasano nga agsisinnuporta dagiti lallaki ken babbai kadagiti pamiliada?

• Dagiti nasantuan a kasuratan a nailista iti “Dagiti Pangsuporta a Resources” ti makatulong kadagiti miembro ti korum wenno klase nga agsursuro iti ad-adu pay maipapan kadagiti pagrebbengan dagiti lallaki ken babbai kadagiti pamilia. Mabalinmo a dutokan ti tunggal miembro ti korum wenno klase a mangbasa iti maysa kadagitoy a binatog iti nasantuan a kasuratan. Awisem ida a mangibinglay kadagiti bersikuloda ket pagsasaritaan maipapan kadagiti pagrebbengan a nailawlawag. Ania ti isuro dagitoy a nasantuan a kasuratan maipapan kadagiti pagrebbengan dagiti nagannak? Kasano nga agtitinnulong dagiti agassawa iti panangipatungpal kadagitoy nadiosan a pagrebbengan? Kasano a matulongan ida ti Mangisalakan nga agbalin a naballigian? Kasano a makatulong dagiti ubbing kadakuada?

• Tapno matulongan a mangipaawat iti korum wenno klase no kasano nga agtunos dagiti lallaki ken babbai iti tunggal maysa kas agpada nga agkadua, isurat dagiti sumaganad a paulo iti pisarra: Dagiti Pagrebbengen ti Ama ken Dagiti Pagrebbengan ti Ina. Idawat kadagiti miembro ti korum wenno klase a mangsukisok iti maikapito a parapo ti “Ti Kaamaan: Maysa a Waragawag iti Lubong” ket isurat no ania ti masarakanda iti baba ti maitutop a paulo. Ania ti masursurotayo maipapan kadagiti nadiosan nga akem dagiti amma ken inna? Ania ti kaipapanan ti nasken nga agtinnulong dagiti amma ken inna kas “agpada nga agkadua” iti panangipatungpal kadagitoy a pagrebbengan? Ania dagiti pagarigan a maibinglaytayo manipud iti biagtayo a mangipakita kadagiti amma ken inna iti panangipatungpal kadagiti akemda ken panangtitinnulongda kas agpada nga agkadua? Mabalinmo pay nga ilawlawag dagiti wagas a pakapagsaganaan dagiti agtutubo ita para kadagitoy nga akem iti masakbayan.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Proverbio 22:6; Doktrina ken Katulagan 68:25–28; 121:41–43 (Dagiti pagrebbengan dagiti nagannak)

• Taga Efeso 5:25; Moises 3:21–24; 5:1–12 (Agtinnulong dagiti agassawa kas agpada nga agkadua)

• Jean B. Bingham, “United in Accomplishing God’s Work,” Liahona, Mayo 2020, 60–63

• “The Women in Our Lives,” “Let Us Be Men” (videos), ChurchofJesusChrist.org

Panangisuro iti Wagas ti Mangisalakan

Insagana ti Mangisalakan dagiti sinuruanna ken inikkanna ida iti napapateg a pagrebbengan. Kasano a maisaganam dagiti sursuruam nga agtitinnulong nga agtrabaho kas annak a lallaki ken annak a babbai ti Dios? (Kitaen iti Panangisuro iti Wagas ti Mangisalakan [2016], 27–28.)