Pebrero 28

Ania ti Kaipapanan ti Agbabawi?

Doktrina ken Katulagan 18–19

Agiinnuman

Idauluan ti miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag nga ilawlawag):

• Ti korum wenno klasetayo. Asino dagiti kabarbaro iti wardtayo, ken kasano a matulongantayo ida a makarikna ti nabara a pannakapasangbay? Ania dagiti ar-aramidentayo tapno mapagbalin a napateg ti orastayo kadagiti miting iti korum wenno klasetayo?

• Dagiti pagrebbengan wenno responsibilidadtayo. Ania dagiti sumagmamano a pagrebbengan ken responsibilidadtayo kas agtutubo a lallaki ken agtutubo a babbai? Kasano a maipatungpaltayo a nasaysayaat dagitoy?

• Ti biagtayo. Ania dagiti ar-aramidentayo tapno agbalin nga ad-adda a kas ken ni Jesucristo ken umawat iti bilegna iti biagtayo? Ania dagiti ar-aramidentayo a mangtulong kadagiti pamiliatayo nga umasideg Kenkuana?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Narigat a basaen ti Doktrina ken Katulagan 19:16–19 ken saan a marikna ti ayat ti Mangisalakan para kadatayo. Kadagitoy a bersikulo, inladawanna ti panagsagaba a napasaranna bayat ti panangsubbotna iti basbasoltayo ken panangipalgakna no apay nga Isu ket situtulok a nagsagaba iti nakaro—“tapno saan[tayo] nga agsagaba no agbabawi[tayo].” Ti panagbabawi ket maysa a bendision nga inaramid a posible ti Mangisalakan. Daytoy ti agtultuloy, inaldaw a panagkagumaan a mangliklik nga agbasol ken umasideg iti Dios. Daytoy ti paset ti plano ti Nailangitan nga Ama a mangtulong kadatayo nga agsubli Kenkuana. Ti pannakaawat no kasano ti agbabawi ket makatulong kadatayo a mangdalus iti basbasoltayo, mangbalbaliw iti puspuso ken pampanunottayo, ken ad-adda pay nga umas-asideg iti Dios.

Kasano a nakatulong kenka ti panagbabawi nga ad-adda nga umas-asideg iti Nailangitan nga Ama? Kasano a matulongam dagiti sursuruam nga agbabawi? Kasano a matulongam ida a mangkita a ti panagbabawi ket inaldaw a panagkagumaan ken saan laeng a nailatang para kadagiti nadagsen a basol? Bayat ti panagsaganam a mangisuro, ibilangmo ti panangadal iti mensahe ni Presidente Russell M. Nelson “We Can Do Better and Be Better” (Liahona, Mayo 2019, 67–69).

Ni Cristo iti Getsemani, ni Harry Anderson

Aggigiddan a Masursuruan

Inyawag ti amin a propeta nga agbabawi ti amin a tao manipud pay idi punganay. Nupay kasta, nalabit nga awan ti awis nga agbabawi a kapalaus iti awis ti Mangisalakan a masarakan iti Doktrina ken Katulagan 19:15–19, a mabalin a nabasa dagiti agtutubo iti daytoy a lawas. Mabalinmo a saludsoden kadakuada no ania ti masursuroda maipapan iti Mangisalakan manipud kadagitoy a bersikulo. Ania ti ibaga dagitoy a bersikulo maipapan iti kinapateg ti panagbabawi iti imatang ti Apo? Dagiti sumaganad a kapanunotan ti makatulong kadagiti sursuruam a mangkita iti panagbabawi kas inaldaw a bendision iti biagda.

• Tapno matulongan a maawatan dagiti miembro ti korum wenno klase no kasano a bendisionan ti panagbabawi ti biagda, mabalinmo a rugian babaen ti panagdamag kadagitoy a saludsod: Kasano a mammuak no maar-aramid dagiti panagkagumaak nga agbabawi? Kasano a matulongannakto ti Mangisalakan nga agbalbaliw? Kas nayon iti panagbabawi iti basol, ania dagiti dadduma pay a bendision a sumangbay gapu iti panagbabawi? Awisem dagiti miembro ti klase a mangbasa iti maysa wenno ad-adu pay kadagiti nasantuan a kasuratan iti “Dagiti Pangsuporta a Resources,” a mangsapsapul kadagiti sungbat kadagiti saludsod. Ania iti nasarakanda? Kas paset daytoy a panaglilinnawag, mabalinmo nga ipabuya ti video a “Repentance: A Joyful Choice” (ChurchofJesusChrist.org).

• Saan a maawatan ti adu nga agtutubo no ania ti kaipapanan ti agbabawi. Mabalin nga agamakda iti panagbabawi wenno panunotenda a maaramat laeng daytoy kadagiti nadagsen a basol. Tapno makatulong a maatur daytoy a palso a pannakaawat, mabalinmo nga awisen dagiti miembro ti korum wenno klase a mangadal iti paset ti mensahe ni Presidente Russell M. Nelson “We Can Do Better and Be Better” (Liahona, Mayo 2019, 67–69), a mangsapsapul kadagiti ragup ti balikas no ania ti kaipapanan ti agbabawi. Ania ti nasarakanda a nangtulong kadakuada a mangpanunot maipapan iti panagbabawi iti baro a wagas? Ania dagiti bendision nga inkari ni Presidente Nelson kadagiti agbabawi?

• Kasano a matulongam a maipaawat kadagiti sursuruam no apay ken kasano nga agbabawitayo? Makatulong ti mensahe ni Presidente Dallin H. Oaks “Cleansed by Repentance” (Liahona, Mayo 2019, 91–94). Mabalinmo a bingayen ti korum wenno klase iti uppat a grupo ket dutokam ti tunggal grupo a mangbasa iti maysa kadagiti uppat a benneg ti mensahe ni Presidente Oaks. Kalpasanna mabalin ti tunggal grupo ti mangidatag iti pakagupgopan ti nabasada iti dadduma pay a grupo, kasta met iti ania man a nasantuan a kasuratan manipud iti mensahe a mangsuporta iti no ania ti nasursuroda. Mabalinmo a gibusan babaen ti panangidawat kadagiti miembro ti korum wenno klase a mangibinglay kadagiti pammaneknekda maipapan iti kinapateg ti panagbabawi iti plano ti Dios.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• 2 Nephi 31:13; Enos 1:5–9; Mosiah 4:9–12; 27:23–26, 35; Alma 19:33; 36:18–21, 24; 37:9; Helaman 15:7–8; Moroni 6:8; Doktrina ken Katulagan 58:42–43; 64:9–10 (Dagiti nasantuan a kasuratan maipapan iti panagbabawi)

• Doktrina ken Katulagan 18:10–16 (Mangisangbay ti panagbabawi iti rag-o)

• “Panagbabawi,”,” iti Para iti Pigsa dagiti Agtutubo (2011), 28–29

• “Repentance through the Atonement of Jesus Christ,” iti kapitulo 3 ti Preach My Gospel (2019), 62–63

• “Repentance Is a Blessing to All of Us,” “Atonement—Not a One-Time Thing” (videos), ChurchofJesusChrist.org

Panangisuro iti Wagas ti Mangisalakan

Inawis ti Mangisalakan dagiti dadduma nga agtignay iti pammati ken agbiag kadagiti kinapudno nga Insurona. Ania ti maaramidmo a mangtulong kadagiti sursuruam a mangkita iti bileg ti inaldaw a panagbabawi? (Kitaen iti Panangisuro iti Wagas ti Mangisalakan [2016], 31, 35.)